1 Hena Timoteo 4 - Sumu Yedi ya Isa Masiya 1906 Kitamo 1897 Malumbo 1905

¹ Kake Ngoma eteta hena some, ti magheri ma kuidiwika, wandu wenelushigha luitikijo, wekisikija ngoma jakenga na machundo ma maluhungu.

² Hena ukeleki wa wandu wenye kuchwa‐maongo, wekigerwa malmishiri ghati ya lusaro lwawo wenye sa na menya isha;

³ wekisuija kuaika, na wekiaghanya kutesia na vijo, evilungie Izuwa viuhiwe na kuanjela na wala weitikija na weitisiwa kididi.

⁴ Amu kyose kilungiwe ni Izuwa ni kyedi, na tehenaho kindu kya kusuika, kikiuhiwa na kuanjela:

⁵ amu kyashenetijwa na kiteto kya Izuwa na kuomba.

⁶ Ukiwakumbusha wandu‐wa‐hetu vindu ivi, uneoka mhiri wedi wa Kristo Yesu, ukirishwa na viteto vya luitikijo, na vya ichundo ledi uliratere mtano ingeriaha:

⁷ kake usue malughano mahaya na ma kicheku. Na ukuhirije hena wukundi‐izuwa:

⁸ Amu kukuhirija kwa muri kuna mbucha hena vidongo; kake wukundi‐izuwa wuna mbucha hena vindu vyose, wuna lutemiano lwa moo uoho ingeriaha, na lwa ula uneza.

⁹ Kiteto kiitikijika, na kiwe luhio lose.

¹⁰ Amu hena iyo twahira na twaketa lunyarki, amu twambikia Izuwa mwenye moo luing’idaki lwetu, eye ni mukija wa wandu wose, muno wawo weitikije.

¹¹ Vindu ivi uviaghanye na uviloshe.

¹² Mundu asidae wubwange wako: kake uoke fwana hena wala weitikija, ghati ya kiteto, ghati ya mitongie, ghati ya lukundo, ghati ya luitikijo, ghati ya kuzerra.

¹³ Mtano nineikanize ugure kusoma, kutinda, kulosha.

¹⁴ Usikitihie kiingijo kioho hako, uingiwe hena wuroti, hamwe na kugerwa mikono ya waghosi.

¹⁵ Uoke mhiri ghati ya vindu ivi; ukung’ole deng’e henavyo; nesa kutonga kwako kuoke kwa some hena wose.

¹⁶ Ukuyoe mwenye, na kulosha kwako. Uikae ghati ya vindu ivi: amu ukiketa huwo unekukija mwenye na wala wekusikia pia.