1 Hena Timoteo 3 - Sumu Yedi ya Isa Masiya 1906 Kitamo 1897 Malumbo 1905

¹ Kiteto iki kiitikijika, Mundu ekienda uaskofu, ekunda ndima yedi.

² Hena lwa iyo Askofu tena huwo kuoka esina‐linganyo, mume mwe, wa mng’ana, etishije, esina bulibuli, mtighi, echee ghati ya kulosha;

³ si mwenye kitaghara, si mbighi; nde mhoo, si mundu wa mawoo, si miangwafetha;

⁴ mwenye kuitoria nezo nyumba yakwe mwenye, ekioka na waana wakwe si yakwe na mitongie yedi yose;

⁵ (kake mundu esitisiwe kuitoria nyumba yakwe mwenye, nize enelirinda kanisa la Izuwa?)

⁶ si mwitikiji msha, asikubaebae, na agwe ghati ya wuchili wa Shetani.

⁷ Nawa tena huwo kuoka na mburi yedi kufuma na wala wa some; asigwe ghati ya nguruna na izero la Shetani,

⁸ na huwowa washemasi waoke wahuji, si wenye viteto viri, si wandu wa mawa meingi, si wenye kukunda mbucha mbiwi:

⁹ wekiigura mbiso ya luitikijo na lusaro luzerre.

¹⁰ Na awa wagheshwe kuwoka; ikwade watumike sa washemasi, wekioka wesitetwa kindu.

¹¹ Huwowa na wache waoke wahuji, si wachunganji, wa mng’ana, waitikiji ghati ya vindu vyose.

¹² Washemasi waoke wome wa mche mwe, wekiitoria nezo waana na nyumba jawo wenye,

¹³ amu wala wetumika nezo sa washemasi wekuetie kidombo kyedi, na kukaria kubaha ghati ya luitikijo luoho ghati ya Kristo Yesu.

¹⁴ Nakutamia vindu ivi, nikiing’idaki kukuzia afuhi;

¹⁵ kake nikishesha muno, nesa utisiwe nize yawawe wandu kuketa ghati ya nyumba ya Izuwa, niyo kanisa la Izuwa mwenye moo, ngujo na mshighi wa kididi.

¹⁶ Na esina ngani mbiso ya wukundi‐izuwa ni mbaha; Ula ewonjwe ghati ya muri, earehiwe ngalo ghati ya ngoma, ewoniwe na malaika, etindiwe ghati ya mbare, eitikijwe masangeni, euhiwe wanga ghati ya kirumi.