1 Hena Timoteo 1 - Sumu Yedi ya Isa Masiya 1906 Kitamo 1897 Malumbo 1905

¹ Paulo, mwondo wa Kristo Yesu hena aghanyo la Izuwa Mukija wetu, na Kristo Yesu luing’idaki lwetu:

² hena Timoteo, mwana wangu wa kididi ghati ya luitikijo; Mvono, lusario, luworo, kufuma Izuwa Apa na Kristo Yesu Mzuri wetu.

³ Sandu nikutindie uikae Efeso, magheri niokie nikitonga Umakedoni, nesa uwaaghanye wandu wasiku wasiloshe ichundo lingi,

⁴ nete wasiyoe malughano ya mburi jisiiting’o ja ndaliwa, nijo jiareha mawujanyo, kukela marongorio ma Izuwa meoho ghati ya luitikijo; ni huwo ingeriaha waketa.

⁵ Kake kuidiwika kwa itanawo ni lukundo kufuma ngoro izerre na lusaro lwedi na luitikijo lusina ukeleki:

⁶ na kufuma vindu ivi weoho wekibalia wegharuka mbai hena kuteta kuhaya.

⁷ Wekikunda kuoka walosha wa sheria, wekioka tewetwarijawo nete kila wekiteta nete vila wevighamba hena zinya.

⁸ Kake twatisiwa ti sheria ni yedi, mundu ekiihiria sandu iwe sheria,

⁹ sa wenye kutisiwa iki, ti sheria teiarehiwe hena mundu mwenye ngalo, nde hena wasui‐sheria na wegolong’i, wasui‐Izuwa na wenye ng’oki, hena wesiirowili na wawiwi, hena wabighiwawee na wabighi‐mee, hena wakomi,

¹⁰ hena waketi‐mbuya, hena wekuketie viwiwi na wome, hena wahiwi‐wandu, hena wechwa‐maongo, hena werara‐maongo, na kwakicha hena kindu kingiwa kisigurana na ichundo liduwie;

¹¹ hena anjili ya kirumi kya Izuwa etasiwa, iwikwe hangu.

¹² Namwanjela ula eniidimija, Kristo Yesu Mzuri wetu, amu enigheshijia kuoka mwitikiji,

¹³ ekiniwika ghati ya ndima yakwe; nikioka kuwoka mwenye kurigha, na kukinya, na kuketa viwiwi: kake niwonie lusario, amu nikiketie nisitisiwe, ghati ya kusaitikija:

¹⁴ na mvono wa Mzuri wetu uokie mwingi muno hamwe na luitikijo na lukundo luoho ghati ya Kristo Yesu.

¹⁵ Kiteto kiitikijika, na kiwe luuhio lose, ti Kristo Yesu ezie masangeni awakije wenye ng’oki; wa awa nimi mbaha:

¹⁶ kake hena kindu iki niwonie lusario, nesa ghati yangu mi wa kuwoka Yesu Kristo awonje lugumirio lwakwe lose, hena fwana ya wala wenemwitikija ikwade hena moo wa ndarasi.

¹⁷ Hena Mfumwa wa ndarasi, esinyamarika, esiwonwa, Izuwa mjenye, nganyi na kirumi ndarasi na ndarasi. Amen.

¹⁸ Itanawo ili nakuwikia we, mwana wangu Timoteo, hena mawuroti mekurongorie, nesa hena ama uidime kubighana bighano ledi;

¹⁹ Ukigura luitikijo na lusaro lwedi: na wandu weoho wemashukuma hae na webaika owiwi ghati ya vindu vya luitikijo:

²⁰ ghati ya awa Humenayo na Alexandro; ewo nikawagera mkononi ha Shetani, waloshwe kusarigha.