ತೀತಗ್ ಅಪೊಸ್ತಲೆ ಪೌಲು ಬರೆತಿ ಪತ್ರಿಕೆ 3 - ಪೊಸ ಒಡಂಬಡಿಕೆ

¹ ಸರಕಾರೊಗ್ಲಾ ಐತ ಅಧಿಕಾರಿಲೆಗ್ಲಾ ಅಧೀನೆರಾದ್ ಉಪ್ಪೊಡಂದ್‌ದ್ ನಂಬುನಾಕುಲೆಗ್ ನೆನೆಪು ಪುಟ್ಟಾಲ. ಅಕುಲು ತಗ್ಗ್‌ದಿನಾಕುಲಾದಿತ್ತ್‌ದ್ ಎಡ್ಡೆಂತಿನೆನ್ ಮಲ್ಪೆರೆ ತಯಾರಾದುಪ್ಪೊಡು.

² ಏರೆನ್ಲಾ ದೂಷಣೆ ಮಲ್ಪಂದೆ, ಲಡಯಿ ಮಲ್ಪಂದೆ, ತಗ್ಗ್‌ತನೊಟು ಮಾತೆರೊಟ್ಟುಗು ಸಮಾಧಾನಿಲಾದ್ ನಡಪಡ್.

³ ಒಂಜಿ ಕಾಲೊಡು ನಮಲಾ ಬುದ್ಧಿದಾಂತಿನಾಕುಲುಲಾ ಅವಿಧೇಯೆರ್‌ಲಾ ಆದಿತ್ತ. ನಮ ಸಾದಿ ತತ್ತ್‌ದಿನಕುಲಾದ್ ದಿಂಜ ಆಸೆ ದುರಾಶೆಲೆಗ್ ಗುಲಾಮೆರಾದಿತ್ತ. ನಮ ಜೀವನ ಪಡಿಕೆಂತಿನೆಡ್ಲಾ ಮತ್ಸರೊಡ್ಲಾ ದಿಂಜಿದಿತ್ತ್‌ದ್ ನಮ ಒರಿಯನ್ ಒರಿ ಪಗೆ ಮಲ್ತೊಂದಿತ್ತ.

⁴ ಆಂಡ ನಮ ರಕ್ಷಕೆ ಆದುಪ್ಪು ದೇವೆರೆ ದಯಲಾ ಪ್ರೀತಿಲಾ ನರಮಾನಿಲೆಗ್ ಪ್ರಕಟ ಆದುಪ್ಪುನಗ,

⁵ ನಮ ಮಲ್ತ್‌ದಿನ ಎಡ್ಡೆ ಕ್ರಿಯೊಲೆಗಾದ್ ಅತ್ತ್, ಆಂಡ ಆಯನ ಕರುಣೆಡ್ದೇ ನಮ ಪಾಪೊಲೆನ್ ದೆಕ್ಕ್‌ದ್ ಒಂಜಿ ಪೊಸ ಪುಟ್ಟುನ್ಲಾ ಪರಿಶುದ್ಧಾತ್ಮೊಡ್ದು ಪೊಸ ಜೀವನೊನ್ಲಾ ಕೊರ್ದು ನಮನ್ ರಕ್ಷಣೆ ಮಲ್ತೆ.

^6-7 ಆಯೆ ನಮ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತನ ದಯೊಡ್ದಾದ್ ನಮನ್ ನೀತಿವಂತೆರ್ ಅಂದ್‌ದ್ ತೀರ್ಪು ಹೊಂದುದು ನಂಕ್ ನಿತ್ಯಜೀವದ ನಿರೀಕ್ಷೆನ್ ಕೊರಿಯೆ. ಐಕ್ ಭಾದ್ಯಸ್ತೆರಾವೊಡು ಅಂದ್‌ದ್ ದೇವೆರ್ ಯೇಸು ಕ್ರಿಸ್ತಡ್ದ್ ನಮ ಮಿತ್ತ್ ತನ ಪರಿಶುದ್ಧಾತ್ಮೊನು ಉದಾರಾದ್ ದಂಡ್ಯಾದೆ. ಉಂದು ನಂಬಿಕೆಗ್ ಯೋಗ್ಯದ ಪಾತೆರ ಆದುಂಡು.

⁸ ದೇವೆರೆಡ್ ನಂಬಿಕೆ ದೀತಿನ ಮಾತೆರ್ಲಾ ಎಡ್ಡೆಂತಿನೆನ್ ಮಲ್ಪೆರೆಗಾದ್ರ ತನ್ಕುಲೆನ್ ಒಚ್ಚಿದ್ ಕೊರ್ಪಿಲೆಕ್ಕ ಈ ಪಾತೆರೊಲೆನ್ ಕಂಡಿತಾದ್ ಪನ್ಲ ಅಂದ್‌ದ್ ನಿಕ್ಕ್ ಪನ್ಪೆ. ಉಂದು ನರಮಾನಿಲೆಗ್ ಎಡ್ಡೆಲಾ ಪ್ರಯೋಜನಲಾ ಆದುಂಡು.

⁹ ಬುದ್ಧಿದಾಂತಿನ ತರ್ಕೊಲೆಗಾವಡ್ ಸಂತಾನ ಪಟ್ಟಿಲೆಗಾವಡ್ ನ್ಯಾಯಕಟ್ಟ್‌ಗ್ ಸಮ್ಮಂಧ ಪಡೆಯಿನ ಮಾತ ತರ್ಕ ಲಡಾಯಿಲೆಗಾವಡ್ ದೂರ ಆದುಪ್ಪುಲ. ಉಂದು ಮಾತ ಪ್ರಯೋಜನದಾಂತಿನವುಲಾ ಕೆಲಸೊಗು ಬರಂದಿನವುಲಾ ಆದುಂಡು.

¹⁰ ಸಭೆಟ್ ಭೇದ ಪುಟ್ಟಾವುನ ನರಮಾನಿಲೆಗ್ ಒಂಜಿ ರಡ್ಡ್ ಸರ್ತಿ ಬುದ್ಧಿ ಪಂಡಿ ಬೊಕ್ಕ ಆಯನ್ ಬೊಡ್ಚಿ ಅಂದ್‌ದ್ ಬುಡ್ದು ಬುಡ್ಲ.

¹¹ ಇಂಚಿತ್ತಿನಾಯೆ ಮಾರ್ಗ ತತ್ತ್‌ದಿನಾಯೆಲಾ ಪಾಪ ಮಲ್ಪುನಾಯೆಲಾ ಆದುಲ್ಲೆ. ಆಯೆ ತಾನ್ ಶಿಕ್ಷೆಗ್ ತಕ್ಕದಾಯೆ ಅಂದ್‌ದ್ ಆಯನ ಉಡಲೇ ತೀರ್ಪು ಮಲ್ಪುಂಡು.

ಪೌಲುನ ಕಡೆ ಪಾತೆರೊಲು

¹² ನಿಕೋಪೊಲಿಡ್ ಚಳಿಕಾಲ ಮುಗಿಯಮುಟ್ಟ ಅಲ್ಪನೇ ಉಂತೊಡು ಅಂದ್‌ದ್ ಎನ್ನುವೆ. ಅರ್ತೆಮಾನನಾವಡ್, ತುಖಿಕನಾವಡ್ ನಿನ ಕೈತಲ್‌ ಕಡಪುಡಿ ಕೂಡ್ಲೆ ಎನ ಕೈತಲ್‌ ಬರಿಯೆರೆ ಪ್ರಯತ್ನ ಮಲ್ಪುಲ.

¹³ ನ್ಯಾಯಶಾಸ್ತ್ರಿ ಆಯಿ ಜೇನಗ್ಲಾ ಬೊಕ್ಕ ಅಪೊಲ್ಲೋಸಗ್ಲಾ ಅಕ್ಲೆನ ಪ್ರಯಾಣೊಗು ಸಹಾಯ ಮಲ್ಪುಲ. ಅಕ್ಲೆಗ್ ದಾಲಾ ಕೊರತೆ ಆವಂದಿಲೆಕ್ಕ ತೂಲ.

¹⁴ ನಮ್ಮ ಜನೊಕುಲು ಫಲದಾಂತಿನಾಕುಲು ಆದುಪ್ಪಂದಿಲೆಕ್ಕ ಬೋಡಿತ್ತಿ ಸಂಗತಿಲೆಗಾದ್ ಎಡ್ಡೆ ಬೇಲೆಲೆನ್ ಮಲ್ಪೆರೆ ಕಲ್ತೊನಡ್.

¹⁵ ಎನಡೊಪ್ಪ ಉಪ್ಪುನ ಮಾತೆರ್ಲಾ ವಂದನೆ ತೆರಿಪಾವೆರ್. ಕ್ರಿಸ್ತನ್ ನಂಬುನಾಕುಲಾದ್ ನಮನ್ ಪ್ರೀತಿ ಮಲ್ಪುನಾಕುಲೆಗ್ ವಂದನೆ ತೆರಿಪಾಲ. ದೇವೆರೆ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.