ತೀತಗ್ ಅಪೊಸ್ತಲೆ ಪೌಲು ಬರೆತಿ ಪತ್ರಿಕೆ 2 - ಪೊಸ ಒಡಂಬಡಿಕೆಸ್ವಸ್ಥ ಬೋಧನೆ 1 ಈಯಾಂಡಲಾ ತೀತ, ಸ್ವಸ್ಥ ಬೋಧನೆಗ್ ತಕ್ಕಾದ್ ಬೋಧನೆ ಕೊರ್ಲ. 2 ಪರಬೆರೆಗ್ ಇಂಚ ಬೋಧನೆ ಮಲ್ಪುಲ, ಅಕುಲು ಪರ್ಪಿ ಅಭ್ಯಾಸೊಡ್ದು ದೂರ ಉಪ್ಪುನಾಕುಲು, ಘನತಾಕುಲು, ಬುದ್ದಿವಂತಿಕೆದಾಕುಲು, ನಂಬಿಕೆಡ್, ಪ್ರೀತಿಡ್, ತಾಳ್ಮೆಡ್ ಗೆಲವುದಾಕುಲು ಆದುಪ್ಪೊಡು. 3 ಅಂಚೆನೇ ಪ್ರಾಯದ ಪೊಂಜೊವುಲೆಗ್ ಇಂಚ ಬೋಧನೆ ಮಲ್ಪುಲ, ಅಕುಲು ಚಾಡಿಗಾರೆರ್, ಪರ್ಪಿ ಅಭ್ಯಾಸೊಗು ಗುಲಾಮೆರ್ ಆದುಪ್ಪಂದೆ, ದೇವಭಕ್ತಿಗ್ ಯೋಗ್ಯಾದ್ ನಡಪುನ ಎಡ್ಡೆ ಬೋಧನೆ ಪನ್ಪಿನಾಕುಲು ಆದುಪ್ಪೊಡು. 4-6 ಉಂದತ್ತಂದೆ ಅಕುಲು ಜವ್ವಂದಿ ಪೊಂಜೊವುಲೆಗ್ ನಿಕ್ಲೆಡ್ದ್ ದೇವೆರೆ ಪಾತೆರೊಗು ದೂಷಣೆ ಆವಂದಿಲೆಕ್ಕ ನಿಕ್ಲೆನ ಕಂಡನಿಯಾಡ್ಲೆನ್ ಜೋಕುಲೆನ್ ಪ್ರೀತಿ ಮಲ್ಪುನಾಕುಲುಲಾ ಬುದ್ದಿವಂತಿಕೆದಾಕುಲುಲಾ ಪತಿವ್ರತೆರ್ಲಾ ಸ್ವಂತ ಇಲ್ಲಡ್ ಬೇಲೆ ಮಲ್ತೊಂದುಪ್ಪುನಾಕುಲುಲಾ, ಎಡ್ಡೆಂತಿನಾಕುಲುಲಾ ತನ್ಕುಲೆ ಕಂಡನಿಯಾಡ್ಲೆಗ್ ಒಳಗಾದುಪ್ಪೊಡು ಅಂದ್‌ದ್ ಬುದ್ಧಿ ಕಲ್ಪಾವುಲೆಕ್ಕ ಬೋಧನೆ ಕೊರ್ಲ. ಅಂಚೆನೇ ಮಾತ ಬಗೆಟ್ಲಾ ಬುದ್ದಿವಂತಿಕೆಡುಪ್ಪೊಡು ಅಂದ್‌ದ್ ಈ ಜವನ್ಯೆರೆನ್ ಎಚ್ಚರಿಸಾಲ. 7 ಮಾತ ಎಡ್ಡೆ ಕಾರ್ಯೊಲೆನ್ ಮಲ್ಪುನೆಟ್ಟ್ ಈಯೆ ಮಾದ್ರಿ ಆದುಪ್ಪುಲ. ನಿನ ಬೋಧನೆಡ್ ಯಥಾರ್ಥತೆಲಾ, ಗಂಭೀರತೆಲಾ ತೋಜಿದ್ ಬರಡ್. 8 ಅಪಗ ನಂಕ್ ವಿರೋಧ ಉಂತುನಾಕುಲು ನಮ ಸಂಗತಿಡ್ ಪಡಿಕೆಂತಿನೆನ್ ಪನಿಯೆರೆ ಅವಕಾಶದಾಂತಿನೆಡ್ದ್ ನಾಚಿಗೆಗ್ ಗುರಿ ಆಪೆರ್. 9 ಚಾಕ್ರಿದಾಕುಲು ಮಾತೆಟ್ಲಾ ತನ್ಕುಲೆ ಯಜಮಾನೆರೆಗ್ ವಿಧೇಯೆರಾದುಪ್ಪೊಡು, ಅಕ್ಲೆನ್ ಮಾತೆಟ್ಲಾ ಮೆಚ್ಚಾವೆರೆಗ್ ಪ್ರಯಾಸ ಮಲ್ಪೊಡು. 10 ಅಕುಲು ಎದುರು ಪಾತೆರಂದೆ ಒವ್ವೆನ್ಲಾ ಕಂಡೊನಂದೆ ಪೂರ ನಂಬಿಗಸ್ತೆರ್‌ಲಾ, ಎಡ್ಡೆಂತಿನಾಕುಲುಲಾ ಆದ್ ತೋಜಿದ್ ಬರೊಡು. ಅಪಗ ಅಕ್ಲೆಡ್ದಾದ್ ನಮ ರಕ್ಷಕೆ ಆದುಪ್ಪು ದೇವೆರೆ ಬೋಧನೆಗ್ ಮಾತ ಬಗೆಟ್ಲಾ ಮಾನ ಕನಪಿಲೆಕ್ಕ ಆವು. 11 ದಾಯೆಗಂದ್ಂಡ ಮಾತ ನರಮಾನಿಲೆಗ್ ರಕ್ಷಣೆನ್ ಉಂಡು ಮಲ್ಪುನ ದೇವೆರೆನ ದಯ ತೋಜಿದ್ ಬೈದ್‌ಂಡ್. 12-13 ನಮ ಭಕ್ತಿದಾಂತಿ ಮನಸ್‌ನ್ಲಾ, ಲೋಕದ ಇಚ್ಚೆಲೆನ್ಲಾ ಬುಡ್ದು, ಭಾಗ್ಯ ಇತ್ತಿ ನಿರೀಕ್ಷೆನ್ ಪತ್ತೊಂದು, ನಮ ಮಲ್ಲ ದೇವೆರ್‌ಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತ ಮೈಮೆಡ್ ತೋಜಿದ್ ಬರ್ಪಿನೆನ್ ಕಾತೊಂದು ಇತ್ತ್‌ದ್ ಈ ಲೋಕೊಡು ಹದೊಟು, ನೀತಿಡ್, ಭಕ್ತಿಡ್ ಬದ್‌ಕೊಡು ಪಂಡ್ದ್‌ಲಾ ದೇವೆರೆ ದಯ ನಂಕ್ ಬೋಧನೆ ಕೊರ್ಪುಂಡು. 14 ನಮನ್ ಮಾತ ಅನ್ಯಾಯೊಡ್ದು ಬುಡುಗಡೆ ಮಲ್ಪೆರೆಗಾದ್‌ಲಾ, ಎಡ್ಡೆ ಕೆಲಸೊಲೆಡ್ ಆಸಕ್ತಿ ಇತ್ತಿ ಜನೊಕುಲು ಆದುಪ್ಪೊಡಂದ್‌ದ್‌ಲಾ, ತನ ಸ್ವಂತ ಜನ ಆದ್ ಶುದ್ಧ ಮಲ್ಪುನೆಕ್ಕಾದ್‌ಲಾ ಯೇಸು ತನನ್ ತಾನೆ ನಂಕ್ ಬೋಡಾದ್ ಒಚ್ಚಿದ್ ಕೊರಿಯೆ. 15 ಈ ಕಾರ್ಯದ ಸಂಗತಿಡ್ ಬೋಧನೆ ಮಲ್ತೊಂದು, ಎಚ್ಚರಿಕೆ ಕೊರೊಂದು ಪೂರ್ತಿ ಅಧಿಕಾರೊಡು ಖಂಡಿಸಾಲ. ಏರ್ಲಾ ನಿನನ್ ಪಿಲ್ಯಾವಂದಿಲೆಕ್ಕ ತೂವೊನ್ಲ. |
New Life Literature