ತೀತಗ್ ಅಪೊಸ್ತಲೆ ಪೌಲು ಬರೆತಿ ಪತ್ರಿಕೆ 1 - ಪೊಸ ಒಡಂಬಡಿಕೆ

^1-2 ದೇವೆರೆ ದಾಸೆಲಾ ಯೇಸು ಕ್ರಿಸ್ತನ ಅಪೊಸ್ತಲೆಲಾ ಆಯಿ ಪೌಲು ನಂಕ್ ಒಟ್ಟುಗುಪ್ಪು ನಂಬಿಕೆದ ಬಗೆಟ್ ತನ ನಿಜ ಮಗೆ ಆದುಪ್ಪು ತೀತಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಕ್ ದಯಲಾ, ಸಮಾಧಾನಲಾ ಆವಡ್.

³ ದೇವೆರ್ ಅಜತಿನಾಕುಲೆ ನಂಬಿಕೆನ್ಲಾ, ಭಕ್ತಿನ್ಲಾ ಉಂಡು ಮಲ್ಪುನ ಸತ್ಯದ ಗೇನೊಗ್ಲಾ ಅಭಿವೃದ್ಧಿ ಮಲ್ಪೆರೆಗಾದ್ರಲಾ ಯಾನ್ ಅಪೊಸ್ತಲೆ ಆತೆ. ಆ ನಂಬಿಕೆಗ್ಲಾ ಸತ್ಯದ ಗೇನೊಗ್ಲಾ ನಿತ್ಯಜೀವದ ನಿರೀಕ್ಷೆನೇ ಆಧಾರ ಆದುಂಡು.

⁴ ಸುಳ್ಳು ಪನಂದಿನ ದೇವೆರ್ ಆ ನಿತ್ಯಜೀವೊನು ಕೊರ್ಪೆ ಅಂದ್‌ದ್ ಆದಿಡ್ದೇ ವಾಗ್ದತ್ತ ಮಲ್ತ್‌ದ್ ಸರಿಯಾಯಿನ ಸಮಯೊಡು ವಾಗ್ದಾನೊನು ಮುಗಿತ್‌ದ್ ಪ್ರಸಂಗೊಡು ಪ್ರಕಟ ಮಲ್ತೆ. ಆ ಬೋಧನೆದ ಉದ್ಯೋಗೊನು ನಮ ರಕ್ಷಕೆ ಆದುಪ್ಪು ದೇವೆರೆನ ಅಪ್ಪಣೆದ ಮಿತ್ತ್ ಎಂಕ್ ಒಪ್ಪಿಸಾದ್ ಕೊರ್ತೆ.

ಕ್ರೇತೊಡು ತೀತನ ಬೇಲೆ

⁵ ಯಾನ್ ನಿಕ್ಕ್ ಅಪ್ಪಣೆ ಕೊರ್ತಿಲೆಕ್ಕ ಕ್ರೇತ್ ದ್ವೀಪೊಡು ಒರಿದಿ ಕೆಲಸೊನು ಈ ತೀರಿಸಾದ್ ಸಮ ಮಲ್ಪೊಡಂದ್‌ದ್‌ಲಾ, ಊರು ಊರುಡು ಹಿರಿಯಾಕುಲೆನ್ ನೇಮಕ ಮಲ್ಪೊಡಂದ್‌ದ್‌ಲಾ ನಿನನ್ ಅವುಲು ಬುಡ್ದು ಬತ್ತೆ.

⁶ ಸಭೆತ ಹಿರಿಯಾಯೆ ದೂರುದಾಂತಿನಾಯೆಲಾ, ಒರ್ತಿ ಬೊಡೆದಿ ಇತ್ತಿನಾಯೆಲಾ ಆದುಪ್ಪೊಡು. ಆಯನ ಜೋಕುಲು ಪಟಿಂಗೆರ್ ಇಜ್ಜಿಂಡ ಎದುರುಂತುನಾಕುಲು ಆದುಪ್ಪಂದೆ ನಂಬಿಕೆದಾಕುಲು ಆದುಪ್ಪೊಡು.

⁷ ಒರಿ ಸಭಾದ್ಯಕ್ಷೆ ದೇವೆರೆ ಇಲ್ಲದ ಪಾರುಪತ್ತೆಗಾರೆ ಆದುಲ್ಲೆ. ಅಂಚಾದ್ ಆಯೆ ದೂರುದಾಂತಿನಾಯೆ ಆದುಪ್ಪೊಡು. ಆಯೆ ಛಲತಾಯೆಲಾ ಎದುರು ಕೋಪ ಮಲ್ಪುನಾಯೆಲಾ ಪರ್ದ್ ಲಡಯಿ ಮಲ್ಪುನಾಯೆಲಾ ಪೆಟ್ಟು ಪಾಡುನಾಯೆಲಾ ದುಡ್ಡುದಾಶೆದಾಯೆಲಾ ಆದುಪ್ಪೆರೆ ಬಲ್ಲಿ.

⁸ ಐತ ಪಗತೆಗ್ ತನ ಇಲ್ಲಡ್ ಬಿನ್ನೆರೆನ್ ಸೇರಾವೊನುನಾಯೆ ಆದಿತ್ತ್‌ದ್, ಎಡ್ಡೆಂತಿನೆನ್ ಪ್ರೀತಿ ಮಲ್ಪುನಾಯೆ ಆದುಪ್ಪೊಡು. ಬುದ್ದಿವಂತಿಕೆಡುಪ್ಪುನಾಯೆಲಾ ನೀತಿದಾಯೆಲಾ ಪರಿಶುದ್ಧದಾಯೆಲಾ ಮಿತಿಟುಪ್ಪುನಾಯೆಲಾ ಆದಿತ್ತ್‌ದ್,

⁹ ಆಯೆ ಎಡ್ಡೆ ಬೋಧನೆದ ವಿಚಾರೊಡು ಬೇತೆಕ್ಲೆಗ್ ಉಮೇದ್ ಕೊರಿಯೆರೆಗ್ಲಾ ವಿರೋಧ ಮಲ್ಪುನಾಕುಲೆನ ಬಾಯಿ ಕಟ್ಟಿಯೆರೆಗ್ಲಾ ಬೋಧನೆಗ್ ಸಮಾದುಪ್ಪು ನಂಬಿಕೆದ ಪಾತೆರೊನು ದೃಢಾದ್ ಕೈಕೊನುನಾಯೆಲಾ ಆದುಪ್ಪೊಡು.

¹⁰ ದಾಯೆಗಂದ್ಂಡ ಐಟ್ಟ್ ಹೆಚ್ಚಿನಾಕುಲು ಸುನ್ನತಿದಾಕುಲು, ಬಜೀ ವ್ಯರ್ಥ ಹರಟೆಲೆಡ್ ಮುರ್ಕುದು ಬೇತೆಕ್ಲೆನ್ ಮೋಸೊಗು ಪಾಡ್ದ್ ಅಧಿಕಾರೊಗು ಎದುರುಂತುನಾಕುಲು ಮಸ್ತ್ ಜನ ಉಲ್ಲೆರ್,

¹¹ ಮೊಕುಲು ವಾ ತರೊಟುಲಾ ಲಾಭ ಮಲ್ತೊನೊಡಂದ್‌ದ್ ತಪ್ಪು ಬೋಧನೆನ್ ಮಲ್ತ್‌ದ್ ಇಡೀ ಇಲ್ಲ್‌ನೆ ಕಂಕಣೆ ಪಾಡ್ವೆರ್. ಅಕ್ಲೆನ ಬಾಯಿ ಮುಚ್ಚೊಡು.

¹² ಕ್ರೇತ್ ದ್ವೀಪದಾಕುಲು ಏಪಲಾ ಸುಳ್ಳುಗಾರೆರ್, ದುಷ್ಟ ಮೃಗೊಲು, ದಡ್ಡೆರ್, ಬಂಜೆಲೆರ್ ಅಂದ್‌ದ್ ಅಕ್ಲೆನ ಉಲಯಿಡೇ ಇತ್ತಿನ ಒರಿ ಪ್ರವಾದಿ ಪನ್ತೆ,

^13-14 ಈ ಸಾಕ್ಷಿ ನಿಜನೇ. ಅಂಚಾದ್ ಅಕ್ಲೆನ್ ನಂಬಿಕೆಡ್ ದೃಢ ಮಲ್ಪೆರೆಗಾದ್, ಅಕುಲು ಯೆಹೂದ್ಯೆರೆ ಆಚಾರೊಲೆನ್ಲಾ ಸತ್ಯೊಡ್ದು ದೂರ ಪೋತಿನ ಜನೊಕುಲೆನ ಅಪ್ಪಣೆನ್ಲಾ ಕೇನುನೆನ್ ಬುಡ್ಪಿಲೆಕ್ಕ ಅಕ್ಲೆನ್ ಬಲವಾದ್ ಖಂಡಿಸಾಲ.

¹⁵ ನಿರ್ಮಲದಾಕುಲೆಗ್ ಮಾತಲಾ ಶುದ್ಧನೇ, ಆಂಡ ಮೈಲೆದಾಕುಲೆಗ್ಲಾ ನಂಬಿಕೆದಾಂತಿನಾಕುಲೆಗ್ಲಾ ಒವುಲಾ ಶುದ್ಧ ಆದುಪ್ಪುಜಿ. ಅಕ್ಲೆ ಮನಸ್‌ಲಾ ಮನಸಾಕ್ಷಿಲಾ ರಡ್ಡ್‌ಲಾ ಮೈಲೆ ಆದುಪ್ಪುಂಡು.

¹⁶ ಅಂಚಿತ್ತಿನಾಕುಲು ದೇವೆರೆನ್ ತೆರಿದ ಅಂದ್‌ದ್ ಪಂಡೆರ್ಡಲಾ ತನ್ಕುಲೆ ನಡತೆಡ್ ಆಯನ್ ಅರೆಂಜುನಕುಲಾದುಲ್ಲೆರ್. ಅಕುಲು ಅಸಹ್ಯದಾಕುಲುಲಾ ತಗ್ಗಂದಿನಾಕುಲುಲಾ ಒವುಲಾ ಎಡ್ಡೆ ಕೆಲಸೊನು ಮಲ್ಪೆರೆ ಆವಂದಿನಾಕುಲುಲಾ ಆದುಲ್ಲೆರ್.