ರೋಮಾಯೆರೆಗ್ 9 - ಪೊಸ ಒಡಂಬಡಿಕೆ

ದೇವೆರ್ ಬೊಕ್ಕ ಆಯನ ಜನೊಕುಲು

^1-2 ಎಂಕ್ ಮಲ್ಲ ದುಃಖಲಾ ಎನ ಉಡಲ್‌ಡ್ ಬುಡಂದಿ ಬೇನೆಲಾ ಉಂಡು. ಸುಳ್ಳು ಪನಂದೆ ಕ್ರಿಸ್ತ ಎದುರುಡು ಸತ್ಯ ಪನ್ಪೆ. ನೆಕ್ಕ್ ಪರಿಶುದ್ಧಾತ್ಮೊಗು ಅಧೀನವಾಯಿನ ಎನ ಮನಸೇ ಸಾಕ್ಷಿ.

³ ಶರೀರ ಸಮ್ಮಂಧೊಡು ಎನ ಸಂತಾನದಾಕುಲು ಆದುಪ್ಪು ಎನ ಸಹೋದ್ರೆರೆಗಾದ್ ಯಾನೇ ಕ್ರಿಸ್ತಡ್ದ್ ದೂರ ಆದ್ ದೇವೆರೆ ಶಾಪೊಗು ಒಳಗಾವೆರೆಗ್ ಒಪ್ಪಿಯೊನೆರೆ ಯಾವು.

⁴ ಅಕುಲು ಇಸ್ರಾಯೇಲ್ಯೆರೆ ವಂಶದಾಕುಲುಲಾ ದೇವೆರೆ ಬಾಲೆಲೆ ಹಕ್ಕ್‌ದಾಕುಲುಲಾ ಆದುಲ್ಲೆರ್. ಅಕ್ಲೆಡ್ ದೇವೆರೆ ಮೈಮೆ ಉಂಡು. ಅಕ್ಲೆಡೊಪ್ಪ ದೇವೆರ್ ಒಡಂಬಡಿಕೆಲೆನ್ ಮಲ್ತೊಂಡೆ. ಅಕ್ಲೆಗ್ ನ್ಯಾಯಕಟ್ಟ್‌ಲಾ ದೇವಾಲಯೊಡು ನಡಪು ಆರಾಧನೆಲಾ ವಾಗ್ದಾನೊಲುಲಾ ಕೊರ್ಪಾಂಡ್.

⁵ ಅಬ್ರಹಾಮು, ಇಸಾಕ್, ಯಾಕೋಬೆರ್ ಅಕ್ಲೆನ ಪಿತೃಲೇ. ಕ್ರಿಸ್ತೆ ಶರೀರ ಸಂಬಂಧೊಡು ಅಕ್ಲೆನ ವಂಶೊಡೇ ಪುಟ್ಟಿಯೆ. ಆಯೆ ಮಾತೆತ್ತ ಮಿತ್ತ್ ಅಧಿಕಾರದಾಯೆಲಾ ಏಪೊಗ್ಲಾ ಸ್ತುತಿ ಹೊಂದಿಯೆರೆ ತಕ್ಕ ಇತ್ತಿನಾಯೆಲಾ ದೇವೆರ್‌ಲಾ ಆದುಲ್ಲೆ. ಆಮೆನ್.

⁶ ದೇವೆರ್ ಪಂಡಿನ ಪಾತೆರ ತತ್ತ್‌ಂಡ್ ಅಂದ್‌ದ್ ನಮ ಎನ್ನಿಯೆರೆ ಬಲ್ಲಿ. ದಾಯೆ ಪಂಡ ಇಸ್ರಾಯೇಲ್ ವಂಶೊಡು ಪುಟ್ಟಿನಾಕುಲು ಮಾತೆರ್ ಇಸ್ರಾಯೇಲ್ಯೆರ್ ಅತ್ತ್.

⁷ ಅಂಚೆನೇ ಅಬ್ರಹಾಮುನ ವಂಶೊಡು ಪುಟ್ಟಿ ಮಾತೆರ್ ಅಕುಲು ದೇವೆರೆ ಜೋಕುಲು ಪಂಡ್ದ್ ಪನ್ಪಾವೊನ್ಜೆರ್. ಆಂಡ ಇಸಾಕುಡ್ದು ಪುಟ್ಟುನಾಕುಲೇ ನಿನ ಸಂತಾನ ಅಂದ್‌ದ್ ಪನ್ಪಾವೊನ್ವೆರ್ ಪಂಡ್ದ್ ದೇವೆರ್ ಪಂಡೆ.

⁸ ಉಂದೆತ್ತ ಅರ್ಥ ಶರೀರ ಸಂಬಂಧೊಡು ಪುಟ್ಟಿನ ಮಾತೆರ್ಲಾ ದೇವೆರೆ ಜೋಕುಲತ್ತ್. ಆಂಡ ದೇವೆರೆ ವಾಗ್ದಾನೊಡ್ದು ಪುಟ್ಟಿನಾಕುಲೇ ಅಬ್ರಹಾಮುನ ಸಂತಾನದಾಕುಲು ಪಂಡ್ದ್ ಆಪೆರ್.

⁹ ಬರ್ಪಿ ವರ್ಸ ಉಂದೇ ಸಮಯೊಡು ಯಾನ್ ಬರ್ಪೆ. ಅಪಗ ಸಾರಗ್ ಒರಿ ಮಗೆ ಉಪ್ಪುವೆ ಪನ್ಪಿ ವಾಗ್ದತ್ತದ ಪಾತೆರ ನಿಗಂಟ್ ಆತ್ಂಡತ್ತಾ.

¹⁰ ಉಂದು ಮಾತ್ರ ಅತ್ತಂದೆ ರೆಬೆಕ್ಕಲಾ ಪಿತೃ ಆಯಿ ಇಸಾಕ್‌ಡ್ದ್ ಅಮರ್ ಜೋಕುಲೆಗ್ ಬಂಜಿನಾಲಾಯಿನವು ಐತ ಲೆಕ್ಕನೇ ಆಂಡ್.

^11-12 ಆ ಜೋಕುಲು ಒರಿಯೇ ಅಮ್ಮೆರೆಗ್ ಜೋಕುಲಾದಿತ್ತ್‌ಂಡಲಾ ಪುಟ್ಟೊಡ್ದುಂಬೇ ವಾ ಎಡ್ಡೆ ಪಡಿಕೆಲೆನ್ ಮಲ್ಪಂದೆ ಉಪ್ಪುನಗ ಮಲ್ಲಾಯೆ ಎಲ್ಯಾಯನ ಚಾಕ್ರಿ ಮಲ್ಪುವೆ ಅಂದ್‌ದ್ ಆಲೆಗ್ ಪಂಡ್ದಿತ್ತ್‌ಂಡ್. ನೆಡ್ದ್ ದೇವೆರ್ ತನ್ಕ್ ಮನಸಿತ್ತಿನಾಕುಲೆನ್ ಅಜತೊನುವೆ ಪನ್ಪಿ ಸಂಕಲ್ಪ ಶಾಶ್ವತಾದ್ ಉಪ್ಪೊಡುಂದುದು ತೋಜಾಯೆ. ಆ ಸಂಕಲ್ಪೊಲು ಭಾಗ್ಯೊಗು ಆಧಾರ ಆದುಪ್ಪಂದೆ ಲೆಪ್ಪುನಾಯನ ಚಿತ್ತದ ಮಿತ್ತೇ ಆಧಾರ ಆದುಂಡು.

¹³ ನೆಕ್ಕಾದ್ ಯಾಕೋಬುನು ಪ್ರೀತಿ ಮಲ್ತೆ, ಏಸಾವನ್ ಪಗೆ ಮಲ್ತೆ ಪಂಡ್ದ್ ಬರೆತ್ಂಡ್.

¹⁴ ಅಂಚಾಂಡ ದಾನೆ ಪನ್ಕ? ದೇವೆರೆಡ ಅನ್ಯಾಯ ಉಂಡಾ? ಇಜ್ಜೇ ಇಜ್ಜಿ.

¹⁵ “ಏರೆನ ಮಿತ್ತ್ ಎನ ದಯ ಉಂಡಾ ಆಯಗ್ ದಯ ತೋಜಾವೆ, ಏರೆನ ಮಿತ್ತ್ ಕರುಣೆ ಉಂಡಾ ಆಯಗ್ ಕರುಣೆ ತೋಜಾವೆ,” ಪಂಡ್ದ್ ದೇವೆರ್ ಮೋಶೆಗ್ ಪನ್ಪೆ ಅತ್ತಾ.

¹⁶ ಅಂಚಾಯಿನೆಡ್ದ್ ದೇವೆರೆ ದಯ ನರಮಾನಿಗ್ ಆಯನ ಆಸೆದ ಮಿತ್ತಾವಡ್ ಆಯನ ಪ್ರಯಾಸೊಡ್ದಾವಡ್ ಒದಗಂದೆ ದೇವೆರ್ ಕರುಣೆ ಮಲ್ಪುನೆಡ್ದೇ ಒದಗುಂಡು.

¹⁷ ದೇವೆರ್ ಫರೋಹನ ವಿಚಾರೊಡು, “ಯಾನ್ ನಿನಡ ಎನ ಶಕ್ತಿನ್ ತೋಜಾದ್ ಲೋಕ ಇಡೀ ಎನ ಪುದರ್‌ನ್ ಪ್ರಸಿದ್ಧಿ ಮಲ್ಪೊಡಂದ್‌ದೇ ನಿನನ್ ಮಿತ್ತ್‌ದ ಸ್ಥಾನೊಗು ಕನಬೈದೆ ಪಂಡ್ದ್ ಪನ್ತೆ ಪನ್ಪಿನವು ಶಾಸ್ತ್ರೊಡು ಉಂಡು.”

¹⁸ ದೇವೆರ್ ಏರೆನ್ ಕರುಣೆ ಮಲ್ತ್ಂಡಲಾ ಏರೆನ್ ಕಠಿಣ ಮಲ್ತ್ಂಡಲಾ ಅವು ಮಾತಲಾ ಆಯನ ಚಿತ್ತದಲೆಕ್ಕನೇ ಉಂಡು ಪನ್ಪಿನ ಉಂದೆಡ್ದ್ ತೋಜಿದ್ ಬರ್ಪುಂಡು.

ದೇವೆರೆ ಕರುಣೆ ಬೊಕ್ಕ ಕೋಪ

¹⁹ “ದೇವೆರೆ ಚಿತ್ತೊಗು ಎದುರುಂತುನಾಯೆ ಇಜ್ಜಾಂಡ ಆಯೆ ಎಂಕ್ಲೆನ ತಪ್ಪು ನಾಡುನವು ಎಂಚ ಪಂಡ್ದ್ ಎನನ್ ಕೇನೊಲಿ?”

²⁰ ಓ ನರಮಾನಿಯೇ ಅಂಚ ಪನಡ, ದೇವೆರೆಗ್ ಎದುರು ಪಾತೆರುನ ಈ ಎಂಚಿತ್ತಿನಾಯೆ? ರೂಪದವು ರೂಪೊನು ಉಂಡು ಮಲ್ತಿನಾಯಗ್, ಎನನ್ ಇಂಚ ದಾಯೆ ಮಲ್ತ ಪಂಡ್ದ್ ಕೇನಿಯೆರೆ ಉಂಡಾ?

²¹ ಎಡ್ಡೆಂತಿನೆಕ್ಕಾದ್ ಒಂಜಿ ಬೊಡ್ಚಾಂದಿನೆಕ್ಕ್ ಬೊಕ್ಕೊಂಜಿ ಬಾಜನೊಲೆನ್ ಒಂಜೇ ಮಣ್ಣ್‌ಡ್ದ್ ಮಲ್ಪೆರೆ ಓಡಾರಿಗ್ ಮಣ್ಣ್‌ದ ಮಿತ್ತ್ ಅಧಿಕಾರ ಇಜ್ಜಾ?

²² ಆಂಡ ದೇವೆರ್ ತನ ಕೋಪೊನು ತೋಜಾದ್ ತನ ಶಕ್ತಿನ್ ಪ್ರಸಿದ್ದ ಮಲ್ಪೊಡು ಪಂಡ್ದ್ ಇತ್ತ್ಂಡಲಾ ಅಂಚ ಮಲ್ಪಂದೆ ತನ ಕೋಪೊಗು ಒಳಗಾಯಿನ ನಾಶನೊಗು ಬಾಧ್ಯೆರಾಯಿನಾಕುಲೆನ್ ಬಾರಿ ಸಮಾಧಾನೊಡು ಸಹಿಸೊಂದೆ.

²³ ಬೊಕ್ಕ ಬಲ ಹೊಂದಿಯೆರೆ ತಾನ್ ಸುರುಟ್ಟೇ ತಯಾರ್ ಮಲ್ತ್‌ದಿನ ಕರುಣೆದ ರೂಪೊಡು ತನ ಮೈಮೆನ್ ತೋಜಾದೆ.

^24-25 ಆಯ ಕನಿಕರೊಡು ಎಂಕ್ಲೆನ್ ಯೆಹೂದ್ಯೆರೆ ಉಲಯಿಡ್ದ್ ಮಾತ್ರ ಲೆಪ್ಪಂದೆ ಹೊಸೇಯನ ಗ್ರಂಥದ ವಚನೊಡು ತಾನ್ ಪಂಡಿಲೆಕ್ಕ ಪಿದಯಿದ ಜನೊಕುಲೆಡ್ದ್‌ಲಾ ಲೆತ್ತೆ. ಆ ವಚನ ದಾನೆಂದ್ಂಡ, “ಎನ ಜನ ಅತ್ತಂದಿನಾಕುಲೆನ್ಲಾ ಎನ ಜನ ಪಂಡ್ದ್, ಯಾನ್ ಪ್ರೀತಿ ಮಲ್ಪಂದಿನಲೆನ್ ಎನ ಪ್ರೀತಿದಾಲ್ ಪಂಡ್ದ್ ಲೆಪ್ಪೆ.”

²⁶ ಬೊಕ್ಕ ವಾ ಜಾಗ್‌ಡ್, “ನಿಕುಲು ಎನ ಜನೊಕುಲತ್ತ್ ಪಂಡ್ದ್ ಅಕ್ಲೆಗ್ ಪಂಡಿನ ಜಾಗ್‌ಡೇ ಜೀವ ಇತ್ತಿ ದೇವೆರೆ ಜೋಕುಲು ಪಂಡ್ದ್ ಪನ್ಪಾವೊನ್ವೆರ್ ಪನ್ಪಿನವೇ.”

²⁷ ಬೊಕ್ಕ ಯೆಶಾಯೆಲಾ ಇಸ್ರಾಯೇಲ್ಯೆರೆ ಬಗೆಟ್ ಪನ್ಪೆ, “ಇಸ್ರಾಯೇಲ್ ಜನ ಕಡಲ್ದ ಬರಿತ ಪೊಯ್ಯೆದ ಲೆಕ್ಕ ಇತ್ತೆರ್ಡಲಾ, ಅಕ್ಲೆಡ್ ಒಂತೆ ಮಂದಿಗ್ ಮಾತ್ರ ರಕ್ಷಣೆ ತಿಕ್ಕು;

²⁸ ದಾಯಗಂದ್‌ಂಡ ದೇವೆರ್ ಲೋಕೊನು ನ್ಯಾಯತೀರ್ಪು ಮಲ್ಪುನ ದಿನ ಕೈತಲಾಂಡ್, ಅವೆನ್ ಬೇಗನೇ ತೀರಿಸಾವೆ.”

²⁹ ಅವ್ವೇ ಅಬಿಪ್ರಾಯೊಡ್ದು ಯೆಶಾಯೆ ಬೊಕ್ಕೊಂಜಿ ವಚನೊಡು, “ಸೇನಾದೀಶ್ವರೆ ಆಯಿ ಕರ್ತವೆ ನಂಕ್ ಸಂತಾನೊನು ಒರಿಪಂದೆ ಪೋದಿತ್ತ್‌ಂಡ ಸೋದೋಮುದ ಗತಿಯೇ ಎಂಕ್ಲೆಗಾತು. ಗೊಮೋರದ ಗತಿಯೇ ನಡತುದು,” ಪಂಡ್ದ್ ಪನ್ಪೆ.

ಇಸ್ರಾಯೇಲ್ಯೆರ್ ದಂಟು ಕಲ್ಲ್‌ಗ್ ದಂಟಿನವು

³⁰ ಅಂಚಾಂಡ ದಾನೆ ಪನ್ಕ, ನೀತಿನ್ ಪಡೆಯೆರೆ ಪ್ರಯತ್ನ ಮಲ್ಪಂದಿ ಪಿದಯಿದ ಜನೊಕುಲು ನೀತಿನ್ ಹೊಂದಿಯೆರ್, ಅವು ನಂಬಿಕೆಡ್ದ್ ಉಂಡಾಪಿ ನೀತಿಯೇ.

³¹ ಆಂಡ ಇಸ್ರಾಯೇಲ್ಯೆರ್ ನೀತಿನ್ ಕೊರ್ಪಿನ ನ್ಯಾಯಕಟ್ಟ್‌ನ್ ಪತ್ತೊನೊಡು ಪಂಡ್ದ್ ಪ್ರಯತ್ನ ಮಲ್ತೆರ್ಡಲಾ ಆ ನ್ಯಾಯಕಟ್ಟ್‌ನ್ ಪತ್ತಿಯೆರೆ ಆವಂದೆ ಪೋಯೆರ್ ಪಂಡ್ದ್ ಪನೊಲಿ.

³² ಐಕ್ ಕಾರಣ ದಾನೆ? ಅಕುಲು ನಂಬಿಕೆನ್ ಆಧಾರ ಮಲ್ತೊನಂದೆ ನೇಮನಿಷ್ಟೆಲೆನೇ ಆಧಾರ ಮಲ್ತೆರ್. ಅಕುಲು ದಂಟು ಕಲ್ಲ್‌ಗ್ ದಂಟಿಯೆರ್.

³³ ಅಂಚಾಯಿನೆಡ್ದ್ ಶಾಸ್ತ್ರೊಡು ಇಂಚ ಬರೆತ್ಂಡ್, “ಇಂದಾ ಚೀಯೋನುಡು ದಂಟುನ ಕಲ್ಲ್‌ನ್ಲಾ ದಂಟ್‌ದ್ ಬೂರುನ ಪಾದೆನ್ಲಾ ದೀತೆ. ಐತ ಮಿತ್ತ್ ನಂಬಿಕೆ ದೀಪಿನಾಯೆ ಏರ್ಲಾ ನಾಚಿಗೆಡ್ ಬೂರುಜೆರ್.”