ರೋಮಾಯೆರೆಗ್ 7 - ಪೊಸ ಒಡಂಬಡಿಕೆ

¹ ಸಹೋದ್ರೆರೇ, ನ್ಯಾಯಕಟ್ಟ್‌ನ್ ತೆರಿದಿನಾಯಗ್ ಯಾನ್ ಪನ್ಪಿನವು ದಾನೆಂದ್ಂಡ, ಒರಿ ನರಮಾನಿ ಜೀವೊಡುಪ್ಪ ಮುಟ್ಟ ಮಾತ್ರ ಆಯ ಮಿತ್ತ್ ನ್ಯಾಯಕಟ್ಟ್‌ದ ಅಧಿಕಾರ ನಡಪುಂಡು ಪನ್ಪಿನವು ನಿಕ್ಲೆಗ್ ಗೊತ್ತಿಜ್ಜಾ?

² ಐಕ್ ಒಂಜಿ ಉದಾರಣೆ, ಕಂಡನಿ ಜೀವೊಡುಪ್ಪುನೆಟ್ಟ ಬೊಡೆದಿ ನ್ಯಾಯಪ್ರಕಾರ ಆಯನಾದುಪ್ಪುವಲ್; ಕಂಡನಿ ಸೈತೆಡ ಕಂಡನಿ ಹಂಗ್ ಆಲೆಗ್ ತಪ್ಪುಂಡು.

³ ಇಂಚ ಉಪ್ಪುನಗ ಕಂಡನಿ ಬದ್‌ಕ್‌ದುಪ್ಪುನಗ ಆಲ್ ಬೇತೆ ಒರಿಯನೊಟ್ಟುಗು ಸೇರಿಯೊಲ್‌ಡ ಆಲ್ ವ್ಯಭಿಚಾರಿ ಪಂಡ್ದ್ ಲೆಪ್ಪಾವೊನುವೊಲು. ಆಂಡ ಕಂಡನಿ ಸೈತಿ ಬೊಕ್ಕ ಆಯನ ಹಂಗ್ ತತ್ತಿನೆಡ್ದ್ ಆಲ್ ಬೊಕ್ಕೊರಿ ಕಂಡನಿನ್ ಮಲ್ತೊಂಡಲಾ ಆಲ್ ವ್ಯಭಿಚಾರಿ ಅತ್ತ್.

⁴ ಅಂಚೆನೇ ಎನ ಸಹೋದರೆರೆ, ನಿಕುಲುಲಾ ಕ್ರಿಸ್ತನ ಶರೀರೊಡ್ದಾವರ ನ್ಯಾಯಕಟ್ಟ್‌ದ ಪಾಲ್‌ಗ್ ಸೈತ್‌ದರ್. ದೇವೆರೆಗ್ ಫಲ ಆಪಿನೆಕ್ಕಾದ್ ಬೊಕ್ಕೊರಿಯನ್ ಅಂದ್ಂಡ ಸೈತ್‌ದ್ ಜೀವ ಆದ್ ಲಕ್ಕಿನಾಯಡೊಪ್ಪ ಸೇರೊಂಡರ್.

⁵ ನಮ ಶರೀರಭಾವೊಡು ಉಪ್ಪುನಗ ಪಾಪದ ಆಸೆಲು ನ್ಯಾಯಕಟ್ಟ್‌ಡ್ದೇ ಬುಲೆದ್ ನಮ ಅಂಗೊಲೆಡ್ ಬೇಲೆ ಮಲ್ತೊಂದು ಮರಣೊಗು ಫಲೊನು ಪುಟ್ಟಾವೊಂದಿತ್ತ್‌ಂಡ್.

⁶ ಇತ್ತೆ ಆಂಡಲಾ ನಮನ್ ವಶ ಮಲ್ತೊಂಡಿ ನ್ಯಾಯಕಟ್ಟ್‌ದ ಪಾಲ್‌ಗ್ ನಮ ಸೈತಿನೆಡ್ದ್ ಆ ಕಟ್ಟ್‌ಡ್ದ್ ಬುಡುಗಡೆ ತಿಕ್ಕ್ಂಡ್. ಇಂಚ ಉಪ್ಪುನಗ ನಮ ನನ ಶಾಸ್ತ್ರದ ಬರವುದ ಪ್ರಕಾರ ಪರ ರೀತಿಡ್ ನಮ ದೇವೆರೆನ ಸೇವೆ ಮಲ್ಪುನಾಕುಲು ಅತ್ತ್. ಪರಿಶುದ್ಧಾತ್ಮಡ್ದ್ ಪೊಸ ರೀತಿಡ್ ಆಯನ ಸೇವೆ ಮಲ್ಪುನಾಕುಲು ಆದುಲ್ಲ.

ನ್ಯಾಯಕಟ್ಟ್ ಬೊಕ್ಕ ಪಾಪ

⁷ ಅಂಚಾಂಡ ದಾದ ಪನ್ಕಾ? ನ್ಯಾಯಕಟ್ಟ್ ಪಾಪದ ಸ್ವರೂಪನಾ? ಏಪೊಗ್ಲಾ ಅತ್ತ್. ನ್ಯಾಯಕಟ್ಟ್‌ಡೇ ಅತ್ತಂದೆ ಪಾಪ ಪನ್ಪಿನವು ಎಂಚಿನವು ಪಂಡ್ದ್ ಎಂಕ್ ಗೊತ್ತಾತ್ವ್ಂದ್. ಉದಾರಣೆಗಾದ್ ನನೊರಿಯನ ಸೊತ್ತುನು ಆಸೆ ಮಲ್ಪೆರೆ ಬಲ್ಲಿ ಪಂಡ್ದ್ ನ್ಯಾಯಕಟ್ಟ್ ಪನ್ತ್‌ಜಿಡ ದುರಾಶೆ ಪಂಡ್ಂಡ ಎಂಚಿನವು ಅಂದ್‌ದ್ ಎಂಕ್ ತೆರಿದಿತ್ತ್‌ವಂದ್.

⁸ ಆಂಡ ಈ ಅಪ್ಪಣೆಡ್ದ್ ಪಾಪ ಬೋಡಾಯಿನಾತ್ ದುರಾಶೆಲೆನ್ ಎನಡ ಪುಟ್ಟಾಂಡ್. ನ್ಯಾಯಕಟ್ಟ್ ಇಜ್ಜಂದೆ ಉಪ್ಪುನಗ ಪಾಪ ಸೈತಿಲೆಕ್ಕನೆ.

⁹ ಸುರುಟ್ಟು ಯಾನ್ ನ್ಯಾಯಕಟ್ಟ್ ಇಜ್ಜಾಂದಿನಾಯೆ ಆದಿತ್ತ್‌ದ್ ಜೀವೊಡಿತ್ತೆ. ಅಪ್ಪಣೆ ಬತ್ತಿನಪಗ ಪಾಪ ಕುಡ ಬದ್‌ಕ್ಂಡ್. ಯಾನ್ ಸೈತೆ.

¹⁰ ಜೀವೊಡುಪ್ಪೆರೆಗಾದ್ ಕೊರ್ದಿತ್ತಿನ ಅಪ್ಪಣೆ ಮರಣೊಗು ಕಾರಣ ಆಂಡ್ ಪಂಡ್ದ್ ಎಂಕ್ ತೆರಿದ್ ಬತ್ತ್ಂಡ್.

¹¹ ಎಂಚಂದ್ಂಡ ಪಾಪ ಅಪ್ಪಣೆಲೆಡ್ದ್ ಅನುಕೂಲ ಪಡೆದ್ ಎನನ್ ಮೋಸ ಮಲ್ತ್‌ದ್ ಆ ನಿಯಮನೇ ಎನನ್ ಕೆರ್‌ಂಡ್.

¹² ಇಂಚ ಉಪ್ಪುನಗ ನ್ಯಾಯಕಟ್ಟ್ ಪರಿಶುದ್ಧವಾಯಿನವು. ಬೊಕ್ಕ ಅಪ್ಪಣೆಲು ಪರಿಶುದ್ಧದವುಲಾ ನ್ಯಾಯದವುಲಾ, ಎಡ್ಡೆಂತಿನವುಲಾ ಆದುಂಡು.

¹³ ಅಂಚಾಂಡ ಎಡ್ಡೆಂತಿನವು ಎಂಕ್ ಮರಣೊಗು ಕಾರಣ ಆಂಡಾ? ಅಂಚ ಏಪೊಗ್ಲಾ ಪನಿಯೆರೆ ಬಲ್ಲಿ. ಪಾಪನೇ ಮರಣೊಗು ಕಾರಣವಾಯಿನವು. ಎಡ್ಡೆಂತಿನೆಡ್ದ್ ಪಾಪ ಎಂಕ್ ಮರಣೊನು ಉಂಡು ಮಲ್ತ್ಂಡ್. ಅಂಚ ಪಾಪದ ನಿಜ ಸ್ವರೂಪ ಗೊತ್ತಾಂಡ್. ಬೊಕ್ಕ ಅಪ್ಪಣೆಡ್ದಾವರ ಪಾಪ ಪನ್ಪಿನವು ನನಲಾ ಭಯಂಕರದವು ಪಂಡ್ದ್ ತೆರಿದ್ ಬತ್ತ್ಂಡ್.

¹⁴ ನ್ಯಾಯಕಟ್ಟ್ ಆತ್ಮೀಕವಾಯಿನವು ಅಂದ್‌ದ್ ನಮ ತೆರಿದ. ಆಂಡ ಯಾನ್ ಶರೀರಭಾವದಾಯೆ ಪಾಪೊಗು ಸ್ವಾದೀನೊಡುಪ್ಪೆರೆ ಮಾರ್ದ್ ಪೋತಿನಾಯೆ ಆದುಲ್ಲೆ.

¹⁵ ಎಂಚಂದ್ಂಡ ಯಾನ್ ಮಲ್ಪುನವು ಎಂಕೇ ಗೊತ್ತಿಜ್ಜಿ. ಒವೆನ್ ಮಲ್ಪೊಡಂದ್ ಯಾನ್ ಎನ್ನ್‌ದುಪ್ಪುವೆನಾ ಅವೆನ್ ನಡಪಾವಂದೆ ಬೊಡ್ಚಾಂದಿನೆನ್ ಮಲ್ತೊಂದುಲ್ಲೆ.

¹⁶ ಆಂಡ ಯಾನ್ ಮಲ್ಪೆರೆ ಎನ ಮನಸ್ ಒಪ್ಪಿಜಿಡ ನ್ಯಾಯಕಟ್ಟ್ ಎಡ್ಡೆಂತಿನವು ಅಂದ್‌ದ್ ಒಪ್ಪಿಯೊಂಡಿಲೆಕ್ಕ ಆಂಡ್.

¹⁷ ಇಂಚ ಉಪ್ಪುನಗ ಬೊಡ್ಚಾಂದಿನೆನ್ ಮಲ್ಪುನಾಯೆ ನನ ಯಾನತ್ತ್. ಎನಡ ನಿಲೆ ಆತಿ ಪಾಪನೇ ಅವೆನ್ ಮಲ್ಪುಂಡು.

¹⁸ ಎನಡ ಅಂದ್ಂಡ, ಎನ ಶರೀರಭಾವೊಡು ಎಡ್ಡೆಂತಿನವು ದಾಲಾ ಇಜ್ಜಿ ಅಂದ್‌ದ್ ಎಂಕ್ ತೆರಿದ್‌ಂಡ್. ಎಡ್ಡೆಂತಿನೆನ್ ಮಲ್ಪೆರೆ ಎಂಕ್ ಮನಸುಂಡು. ಆಂಡ ಅವೆನ್ ಮಲ್ಪುನವು ಎನಡ್ದ್ ಆವಂದ್.

¹⁹ ಯಾನ್ ಮೆಚ್ಚುನ ಎಡ್ಡೆ ಕಾರ್ಯೊಲೆನ್ ಮಲ್ಪಂದೆ ಮೆಚ್ಚಂದಿ ಪಡಿಕೆಂತಿನೆನೇ ಮಲ್ಪುನಾಯೆ ಆದುಲ್ಲೆ.

²⁰ ಮಲ್ಪೆರೆ ಬಲ್ಲಿ ಪನ್ಪಿ ಬೇಲೆನ್ ಯಾನ್ ಮಲ್ತ್ಂಡ ಅವೆನ್ ಮಲ್ತಿನಾಯೆ ಯಾನತ್ತ್. ಎನಡ ನಿಲೆ ಆದುಪ್ಪು ಪಾಪನೇ ಅವೆನ್ ಮಲ್ತ್ಂಡ್.

²¹ ಇಂಚ ಈ ನಿಯಮೊಲು ಕಾರ್ಯ ಮಲ್ತೊಂದುಂಡು ಪಂಡ್ದ್ ಎಂಕ್ ತೋಜಿದ್ ಬರ್ಪುಂಡು. ಯಾನ್ ಎಡ್ಡೆಂತಿನೆನ್ ಮಲ್ಪೆರೆ ಆಸೆ ಮಲ್ಪುನಗ ಎನ ಎದುರು ಪಡ್ಕೆಂತಿನವು ಮಾತ್ರ ಬರ್ಪುಂಡು.

²² ಅಂತರ್ಯದ ಉಲಯಿ ದೇವೆರೆ ನಿಯಮೊಲೆಡ್ ಸಂತೋಷ ಪಡೆಪಿನಾಯೆ ಆದುಲ್ಲೆ. ಆಂಡ ಅಂಗೊಲೆಡ್ ಬೇತೆ ಒಂಜಿ ನಿಯಮ ಉಂಡು ಪಂಡ್ದ್ ತೂಪೆ.

²³ ಅವು ಎನ ಅಂರ್ತಯೊಡುಪ್ಪುನ ನಿಯಮೊಗು ವಿರೊದ್ಧಾದ್ ಹೋರಾಟ ಮಲ್ತ್‌ದ್ ಎನನ್ ಕೈದ್ ಮಲ್ತ್‌ದ್ ಎನ ಅಂಗೊಲೆಡ್ ಉಪ್ಪುನ ಪಾಪದ ನಿಯಮೊಗು ವಶಮಲ್ಪುನವು ಆದುಂಡು.

²⁴ ಅಯ್ಯೋ ಯಾನ್ ಏತೊಂಜಿ ದುರಾವಸ್ಥೆಡ್ ಬೂರ್ದಿನ ನರಮಾನಿ! ಈ ಮರಣದ ಶರೀರೊಡ್ದು ಎನನ್ ಬುಡ್ಪಾವುನಾಯೆ ಏರ್?

²⁵ ಬುಡ್ಪಾವುನಾಯೆ ಉಲ್ಲೆ ಪಂಡ್ದ್ ಪನ್ಪಿನೆಕ್ಕ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ದೇವೆರೆಗ್ ಉಪಕಾರ. ಇಂಚ ಉಪ್ಪುನಗ ಎನ್ನಾತೆಗ್ ಯಾನೇ ಅಂರ್ತಯೊಡು ದೇವೆರೆ ನಿಯಮೊಲೆಗ್ ಸೇವಕೆ ಆದ್‌ಲಾ ಶರೀರ ಸಮ್ಮಂಧೊಡು ಪಾಪ ಪನ್ಪಿ ನಿಯಮೊಲೆಗ್ ಸೇವಕೆ ಆದ್‌ಲಾ ನಡತೊನುನಾಯೆ ಆದುಲ್ಲೆ.