ರೋಮಾಯೆರೆಗ್ 14 - ಪೊಸ ಒಡಂಬಡಿಕೆ

ಬೇತೆಕ್ಲೆನ್ ತೀರ್ಪು ಮಲ್ಪೊಡ್ಚಿ

¹ ನಂಬಿಕೆಡ್ ಬಲಹೀನ ಇತ್ತಿನಾಕುಲೆನ್ಲಾ ಸೇರಾವೊನ್ಲೆ; ಆಂಡ ಅಕ್ಲೆನ ಎದರುಡು ಸಂಶಯದ ಸಂಗತಿಲೆನ್ ಚರ್ಚೆ ಮಲ್ಪಡೆ.

² ಒರಿ ಒವೆನಾಂಡಲಾ ತಿನೊಲಿ ಪಂಡ್ದ್ ನಂಬುವೆ. ನಂಬಿಕೆಡ್ ಬಲ ಇಜ್ಜಂದಿನಾಯೆ ಕಾಯಿಕಜಿಪುನು ಮಾತ್ರ ತಿನ್ಪೆ.

³ ತಿನ್ಪಿನಾಯೆ ತಿನಂದಿನಾಯನ್ ಹೀನ ಮಲ್ಪೆರೆ ಬಲ್ಲಿ. ತಿನಂದಿನಾಯೆ ತಿನ್ಪಿನಾಯನ್‌ ದೋಷಿ ಪಂಡ್ದ್ ಎನ್ನೆರೆ ಬಲ್ಲಿ. ದೇವೆರ್ ಇರ್ವೆರೆನ್ಲಾ ಸೇರಾವೊಂದೆ ಅತ್ತಾ?

⁴ ನನೊರಿಯನ ಬೇಲೆದಾಯನ್ ತೀರ್ಪು ಮಲ್ಪೆರೆ ಈ ಏರ್? ಆಯೆ ತಪ್ಪುದಾಂತಿನಾಯೆ ಆದ್ ಉಂತುದೆಡಲಾ ತಪ್ಪುದಾಯೆ ಆದಿತ್ತ್‌ದ್ ಬೂರ್ದಿತ್ತೆಡಲಾ ಅವು ಆಯ ಯಜಮಾನಗ್ ಸೇರ್ದಿನವು. ಆಯೆ ತಪ್ಪುದಾಂತಿನಾಯೆ ಆದ್ ಉಂತುವೆ. ಆಯನ್ ಉಂತಾವೆರೆ ಕರ್ತವೆ ಶಕ್ತೆ ಆದುಲ್ಲೆ.

⁵ ಒರಿ ಒಂಜಿ ದಿನೊಡ್ದು ಬೊಕ್ಕೊಂಜಿ ದಿನೊನು ವಿಶೇಷದವು ಪಂಡ್ದ್ ಎನ್ನುವೆ. ಬೊಕ್ಕೊರಿ ಮಾತ ದಿನೊಲೆನ್ ವಿಶೇಷದವು ಪಂಡ್ದ್ ಎನ್ನುವೆ, ಪ್ರತಿಯೊರಿಲಾ ತನ ತನ ಮನಸ್‌ಡ್ ತೀರ್ಮಾನ ಮಲ್ತಿಲೆಕ್ಕ ನಡಪಡ್.

⁶ ದಿನೊಲೆನ್ ವಿಶೇಷ ಪಂಡ್ದ್ ಎನ್ನುನಾಯೆ ಕರ್ತವಗಾದ್ ಅಂಚ ಎನ್ನುವೆ. ತಿನ್ಪಿನಾಯೆ ಕರ್ತವಗಾದ್ ತಿನ್ಪೆ. ಆಯೆ ದೇವೆರೆಗ್ ಉಪಕಾರ ಮಲ್ಪುವೆ ಅತ್ತಾ. ತಿನಂದಿನಾಯೆಲಾ ಕರ್ತವಗಾದ್ ತಿನಂದೆ ದೇವೆರೆಗ್ ಉಪಕಾರ ಮಲ್ಪುವೆ.

⁷ ನಮಡ ಒರಿಯಾಂಡಲಾ ತನ್ಕಾದ್ ಬದುಕುನುಲಾ ಇಜ್ಜಿ. ತನ್ಕಾದ್ ಸೈಪಿನಲಾ ಇಜ್ಜಿ.

⁸ ನಮ ಬದುಕುವಡ ಕರ್ತವಗಾದ್ ಬದುಕುವ, ಸೈತ್ಂಡ ಕರ್ತವಗಾದ್ ಸೈಪ.

⁹ ಬದ್‌ಕ್ಂಡಲಾ ಸೈತ್ಂಡಲಾ ನಮ ಕರ್ತವನಾಕುಲೇ. ದಾಯೆ ಪಂಡ ಸೈತಿನಾಕಲೆಗ್ಲಾ ಬದುಕುನಾಕುಲೆಗ್ಲಾ ಕರ್ತವೆ ಆದುಪ್ಪೊಡು ಪಂಡ್ದೇ ಕ್ರಿಸ್ತೆ ಸೈತ್‌ದ್ ಕುಡ ಜೀವೊಡು ಲಕ್ಕ್‌ದ್ ಬತ್ತೆ.

¹⁰ ತಿನಂದಿನಾಯಾ ನಿನ ಸಹೋದ್ರನ ಬಗೆಟ್ ಈ ತೀರ್ಪು ಮಲ್ಪುನು ದಾಯೆ? ತಿನ್ಪಿನಾಯಾ ನಿನ ಸಹೋದ್ರನ್ ಈ ಕೀಳ್ ಮಲ್ಪುನು ದಾಯೆ? ನಮ ಮಾತೆರ್ ದೇವೆರೆ ನ್ಯಾಯಾಸನದ ಎದುರುಡು ಉಂತೊಡತ್ತಾ?

¹¹ “ಎನ ಜೀವದಾಣೆ, ಮಾತೆರ್ ಎಂಕ್ ಅಡ್ಡಬೂರ್ವೆರ್. ಮಾತೆರ್ ಎನನ್ ದೇವೆರ್ ಪಂಡ್ದ್ ಅರಿಕೆ ಮಲ್ಪುವೆರ್,” ಪಂಡ್ದ್ ಕರ್ತವೆ ಪನ್ತೆ ಪಂಡ್ದ್ ಬರೆತ್ಂಡ್.

¹² ಅಂಚಾದ್ ನಮಡ ಪ್ರತಿ ಒರಿಲಾ ದೇವೆರೆ ಎದುರುಡು ಉತ್ತರ ಕೊರೊಡು.

ಬೂರಿಯೆರೆ ಅವಕಾಸ ಕೊರೊಡ್ಚಿ

¹³ ಐಕಾದ್ ನಮ ಒರಿಯನ್ ಒರಿ ತೀರ್ಪು ಮಲ್ಪುನೆನ್ ಉಂತಾಗ. ಐತ ಬದಲಿಗ್ ಸಹೋದ್ರಗ್ ದಂಟೆರೆಗಾವಡ್ ಪಾಪೊಡು ಬೂರ್ಯೆರೆಗಾವಡ್ ಆಪಿಲೆಕ್ಕ ಮಲ್ಪುನೆನ್ ಏಪಲಾ ಮಲ್ಪುಜ ಪಂಡ್ದ್ ತೀರ್ಮಾನ ಮಲ್ತೊನ್ಲೆ.

¹⁴ ವಾ ತಿನ್ಪಿ ವಸ್ತುಲಾ ಅಶುದ್ಧದವು ಅತ್ತ್ ಪಂಡ್ದ್ ತೆರಿದೆ ಬೊಕ್ಕ ಕರ್ತವೆ ಆದುಪ್ಪು ಯೇಸುಡೊಪ್ಪ ಇತ್ತ್‌ದ್ ದೃಢವಾದ್ ನಂಬುದೆ. ಆಂಡ ನಿಕುಲು ವಾ ತಿನ್ಪಿನ ವಸ್ತುಲೆನ್ ಅಶುದ್ಧ ಪಂಡ್ದ್ ನಂಬುವರ್ಡ ಅವು ನಿಕ್ಲೆಗ್ ಅಶುದ್ಧದವು ಆದುಂಡು.

¹⁵ ಆಂಡ ಈ ತಿನ್ಪಿನ ವಸ್ತುಲೆಡ್ದ್ ನಿನ ಸಹೋದ್ರನ ಮನಸ್‌ಗ್ ಬೇನೆ ಮಲ್ಪುವಡ ಈ ಪ್ರೀತಿಗ್ ತಕ್ಕ ನಡತೊನುಜ. ಕ್ರಿಸ್ತೆ ಏರೆಗಾದ್ ಸೈತ್ ಪೋಯೆನಾ, ಆಯಗ್ ಈ ತಿನ್ಪಿನ ವಸ್ತುಲೆಡ್ದ್ ನಾಶ ಮಲ್ಪಡ.

¹⁶ ನಿಕುಲು ಎಡ್ಡೆ ಪಂಡ್ದ್ ಎನ್ನುನೆಕ್ಕ್ ದೂಷಣೆ ಆವಂದಿಲೆಕ್ಕ ತೂವೊನ್ಲೆ.

¹⁷ ದಾಯೆಗಂದ್ಂಡ ತಿನ್ಪಿನವುಲಾ ಪರ್ಪಿನವುಲಾ ದೇವೆರೆ ರಾಜ್ಯ ಅತ್ತ್. ನೀತಿಲಾ, ಸಮಾಧಾನಲಾ ಪರಿಶುದ್ಧಾತ್ಮಡ್ದ್ ಉಂಡಾಪಿ ಸಂತೋಷ ಆದುಂಡು.

¹⁸ ಬೊಕ್ಕ ನಿಕುಲು ಈ ರೀತಿಡ್ ಕ್ರಿಸ್ತನ ಸೇವೆ ಮಲ್ಪುನಾಂಡ ನಿಕುಲು ದೇವೆರೆಗ್ ಮೆಚ್ಚೆಗೆದಾಕುಲು ಆದ್‌ಲಾ ನರಮಾನಿಲೆಗ್ ಯೋಗ್ಯದಾಕುಲುಲಾ ಆದುಪ್ಪುವರ್ ಆತೇ.

¹⁹ ಅಂಚಾದ್ ನಮ ಸಮಾಧಾನೊನ್ಲಾ ಒರಿಯಗ್ ಒರಿ ಭಕ್ತಿವೃದ್ಧಿಗ್ಲಾ ಅನುಕೂಲ ಆಪಿನೆನ್ ತೂವೊನುಗ.

²⁰ ದೇವೆರ್ ಕಟ್ಟಿನೆನ್ ತಿನ್ಪಿ ವಸ್ತುಲೆ ಕಾರಣೊಡ್ದಾದ್ ನಾಶ ಮಲ್ಪಡ. ಮಾತ ವಸ್ತುಲುಲಾ ಶುದ್ಧದವೇ. ಆಂಡ ತಿಂದ್‌ದ್ ಬೊಕ್ಕೊರಿಯಗ್ ಅಡ್ಡಿ ಮಲ್ಪುನವು ತಪ್ಪು.

²¹ ಮಾಸ ತಿನ್ಪಿನಾವಡ್ ದ್ರಾಕ್ಷಾರಸ ಪರ್ಪಿನಾವಡ್ ನಿನ ಸಹೋದ್ರಗ್ ಅಡ್ಡಿ ಮಲ್ಪುನ ಬೇತೆ ಒವೆನ್ಲಾ ಬುಡ್ದು ಬುಡ್ಪಿನವೇ ಎಡ್ಡೆ.

²² ನಿಕ್ಕುಪ್ಪು ನಂಬಿಕೆ ದೇವೆರೆಗ್ ಮಾತ್ರ ತೋಜುಲೆಕ್ಕ ಉಪ್ಪಡ್. ತನ್ಕುಲೆ ಮನಸ್‌ಡ್ ಸರಿ ಪಂಡ್ದ್ ಕಂಡಿತ ಮಲ್ತೊನೊಂದು ಅವೆನ್ ಮಲ್ಪುನಗ ಮನಸ್‌ಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ.

²³ ಆಂಡ ತಿನ್ಪಿನೆತ್ತ ಬಗೆಟ್ ಏರೆಗಾಂಡಲಾ ಸಂಶಯ ಉಂಡುಡ, ಅಂಚಿತ್ತಿನೆನ್ ತಿನ್ಪಿನಾಕುಲೆನ್ ದೇವೆರ್ ಕಂಡಿಸಾವೆ. ದಾಯೆಗಂದ್ಂಡ ಅಕ್ಲೆನ ಕ್ರಿಯೆಗ್ ನಂಬಿಕೆದ ಆಧಾರ ಇಜ್ಜಿ. ಬೊಕ್ಕ ನಂಬಿಕೆಡ್ದ್ ಆವಂದಿನವು ಮಾತಲಾ ಪಾಪನೇ.