ಪ್ರಕಟಣೆ 8 - ಪೊಸ ಒಡಂಬಡಿಕೆಏಳನೆ ಮುದ್ರೆ 1 ಆ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯೆ ಏಳನೆ ಮುದ್ರೆನ್ ದರ್ಪುನಗ ಸುಮಾರ್ ಅರ್ಧ ಗಂಟೆ ಪೊರ್ತು ಮುಟ್ಟ ಪರಲೋಕೊಡು ಶಾಂತ ಆಂಡ್. 2 ಅಪಗ ದೇವೆರೆ ಎದುರುಡು ಉಂತುದಿತ್ತಿ ಏಳ್‌ ದೂತೆರೆನ್ ತೂಯೆ. ಅಕ್ಲೆಗ್ ದೇವೆರ್ ಏಳ್‌ ತುತೂರಿಲೆನ್ ಕೊರಿಯೆ. 3 ಐಡ್ದ್ ಬೊಕ್ಕ ಬೊಕ್ಕೊರಿ ದೂತೆ ಬತ್ತ್‌ದ್ ಬಂಗಾರ್‌ದ ದೂಪಾರತಿನ್ ಪತ್ತೊಂದು ಬಲಿಪೀಠದ ಕೈತಲ್‌ ಉಂತಿಯೆ. ಗದ್ದಿಗೆದ ಎದುರುಡು ಬಂಗಾರ್‌ದ ಬಲಿಪೀಠದ ಮಿತ್ತ್ ಮಾತ ದೇವಜನೊಕುಲೆ ಪ್ರಾರ್ಥನೆಡೊಪ್ಪ ಸಮರ್ಪಣೆ ಮಲ್ಪೆರೆಗಾದ್ ಆಯಗ್ ಮಸ್ತ್ ಲೋಭಾನ ಕೊರ್ದಿತ್ತ್‌ಂಡ್. 4 ಅಪಗ ಧೂಪದ ಪುಗೆ ದೂತನ ಕೈಡ್ದ್ ದೇವಜನೊಕುಲೆ ಪ್ರಾರ್ಥನೆಡೊಪ್ಪ ದೇವೆರೆ ದುಂಬು ಏರ್ದ್ ಪೋಂಡು. 5 ಐಡ್ದ್ ಬೊಕ್ಕ ಆ ದೂತೆ ಧೂಪಾರತಿನ್‌ ದೆತ್ತೊಂದು ಬಲಿಪೀಠದ ಗೆಂಡೊಡು ದಿಂಜಾದ್ ಭೂಮಿಗ್ ದಕ್ಕಿಯೆ. ಅಪಗ ತೆಡಿಲ್‌ದ ಅಬ್ಬರಲಾ, ಮಿಂಚಿಲಾ, ಭೂಕಂಪಲಾ ಆಂಡ್. ತುತೂರಿಲು 6 ಏಳ್‌ ತುತೂರಿಲೆನ್ ಪತ್ತೊಂದಿತ್ತಿ ಏಳ್‌ ದೂತೆರ್ ತುತೂರಿ ಉರ್ಪೆರೆ ತಯಾರ್ ಆಯೆರ್. 7 ಸುರುತ್ತ ದೂತೆ ತುತೂರಿ ಉರ್ಪುನಗ ನೆತ್ತೆರ್‌ಡ್ ಕಲತ್ತ್‌ದಿನ ಆನೆಕಲ್ಲ್‌ದ ಬರ್ಸಲಾ ತೂಲಾ ಭೂಮಿದ ಮಿತ್ತ್ ದೊರಿಂಡ್. ನೆಡ್ದ್ ಭೂಮಿದ ಮೂಜೆಟ್ ಒಂಜಿ ಪಾಲ್ ಪೊತ್ತುದು ಪೋಂಡು. ಮರಕ್ಲೆಡ್ ಮೂಜೆಟ್ ಒಂಜಿ ಪಾಲ್ ಬಸ್ಮ ಆಂಡ್. ಪಜ್ಜಿ ಪಜಿರ್‌ಲಾ ಪೊತ್ತುದು ಪೋಂಡು. 8 ಬೊಕ್ಕ ರಡ್ಡನೆ ದೂತೆ ತುತೂರಿ ಉರ್ಪುನಗ ತೂ ಪತ್ತ್‌ದ್ ಮಲ್ಲ ಗುಡ್ಡೆದಲೆಕ್ಕ ಇತ್ತಿನೆನ್ ಕಡಲ್‌ಗ್ ಪಾಡ್ಂಡ್. 9 ಅಪಗ ಕಡಲ್ದ ಉಲಯಿ ಮೂಜೆಟ್ ಒಂಜಿ ಪಾಲ್ ನೆತ್ತೆರ್ ಆಂಡ್. ಕಡಲ್‌ಡಿತ್ತಿ ಜೀವಿಲೆಡ್ ಮೂಜೆಟ್ ಒಂಜಿ ಪಾಲ್ ಸೈತ್‌ಪೋಂಡು, ಕಪ್ಪಲುಲೆಡ್ ಮೂಜೆಟ್ ಒಂಜಿ ಪಾಲ್ ಹಾಳಾದ್ ಪೋಂಡು. 10 ಮೂಜನೇ ದೂತೆ ತುತೂರಿ ಉರ್ಪುನಗ ತೂಟೆದಲೆಕ್ಕ ಅರ್ಲುನ ಒಂಜಿ ಮಲ್ಲ ಬೊಳ್ಳಿ ಬಾನೊಡ್ದು ತಿರ್ತ್ ಬೂರ್‌ಂಡ್. ಅವು ತುದೆಲೆಡ್‌ ಮೂಜೆಟ್ ಒಂಜಿ ಪಾಲ್‌ದ ಮಿತ್ತ್‌ಲಾ ನೀರ್‌ದ ವಸರ್‌ದ ಮಿತ್ತ್‌ಲಾ ಬೂರ್‌ಂಡ್. 11 ಆ ಬೊಳ್ಳಿಗ್ ಮಾಚಿ ಪತ್ರೆ ಅಂದ್‌ದ್ ಪುದರ್, ನೀರ್ ಮೂಜೆಟ್ ಒಂಜಿ ಪಾಲ್ ಮಾಚಿ ಪತ್ರೆದ ಲೆಕ್ಕ ಕೈಪೆ ಆಂಡ್. ಆ ಕೈಪೆ ನೀರ್‌ನ್ ಪರಿನ ಮಸ್ತ್ ಜನ ಸೈತೆರ್. 12 ನಾಲನೇ ದೂತೆ ತುತೂರಿ ಉರ್ಪುನಗ ಸೂರ್ಯೆ, ಚಂದ್ರೆ ಬೊಳ್ಳಿಲೆಡ್‌ ಮೂಜೆಟ್ ಒಂಜಿ ಭಾಗೊಗು ಹಾಕ್‌ದ್ ಕತ್ತಲೆ ಆಂಡ್. ಅವೆಡ್ದಾವರ ಪಗೆಲ್‌ಡ್ಲಾ ಮೂಜೆಟ್ ಒಂಜಿ ಪಾಲ್ ಬೊಲ್ಪುದಾಂತೆ ಪೋಂಡು, ರಾತ್ರೆಡ್ಲಾ ಅಂಚೆನೇ ಆಂಡ್. 13 ಬೊಕ್ಕ ಯಾನ್ ತೂನಗ, ಇಂದಾ ಒಂಜಿ ಗಿಡಿ ನಡು ಬಾನೊಡು ರಾವೊಂದಿತ್ತ್‌ಂಡ್. ಅವು, “ಅಯ್ಯೋ, ಅಯ್ಯೋ, ಅಯ್ಯೋ ಒರಿದಿನ ಮೂಜಿ ದೂತೆರ್ ತನ್ಕುಲೆ ತುತೂರಿ ಉರ್ಪುನಗ ಆಪಿನ ವಿಷಯೊಲೆಡ್ದ್ ಈ ಲೋಕೊಡುಪ್ಪುನಾಕುಲೆಗ್ ಎಂಚಿತ್ತಿ ಆಪತ್ತುಲು ಆಪುಂಡು.” ಅಂದ್‌ದ್ ಮಲ್ಲ ಶಬ್ಧೊಡು ಪನ್ಪಿನೆನ್ ಕೇಂಡೆ. |
New Life Literature