ಪ್ರಕಟಣೆ 7 - ಪೊಸ ಒಡಂಬಡಿಕೆ

ಒಂಜಿ ಲಕ್ಷ ನಲ್ಪತ್ತನಾಲ್ ಸಾರ ಇಸ್ರಾಯೇಲ್ ಜನೊಕುಲು

¹ ಉಂದು ಆಯಿ ಬೊಕ್ಕ ನಾಲ್ ದೂತೆರ್, ಭೂಮಿದ ನಾಲ್ ದಿಕ್ಕ್‌ಲೆಡ್ ಉಂತೊಂದು ಭೂಮಿದ ಮಿತ್ತಾವಡ್, ಕಡಲ್ದ ಮಿತ್ತಾವಡ್, ವಾ ಮರತ ಮಿತ್ತಾವಡ್ ಗಾಳಿ ಬೀಜಂದಿಲೆಕ್ಕ ಭೂಮಿದ ನಾಲ್ ದಿಕ್ಕ್‌ಲೆ ಗಾಳಿಲೆನ್ ತಡೆಪುನೆನ್ ತೂಯೆ.

² ಅಪಗ ಮುಡಯಿಡ್ದ್ ಬೊಕ್ಕೊರಿ ದೂತೆ ಜೀವ ಇತ್ತಿ ದೇವೆರೆ ಮುದ್ರೆನ್ ಪತ್ತೊಂದು ಬರ್ಪಿನೆನ್ ತೂಯೆ. ಆಯೆ ಭೂಮಿಗ್ಲಾ ಕಡಲ್‌ಗ್ಲಾ ಕೇಡ್ ಮಲ್ಪುನ ಅಧಿಕಾರ ಪಡೆತಿನ ಆ ನಾಲ್ ದೂತೆರೆಗ್,

³ “ಉಂತುಲ, ನಮ ದೇವೆರೆ ಸೇವಕೆರೆ ಮುಂಡದ ಮಿತ್ತ್ ಮುದ್ರೆ ಪಾಡುನ ಮುಟ್ಟ ಭೂಮಿಗಾವಡ್, ಕಡಲ್‌ಗಾವಡ್ ಮರಕ್ಲೆಗಾವಡ್ ಕೇಡ್ ಮಲ್ಪಡೆ.”

⁴ ಮುದ್ರೆಲೆಡ್ ಒತ್ತಾವೊಂಡಿನಾಕುಲೆನ ಸಂಖ್ಯೆ ಎಂಕ್ ಕೇಂಡ್. ಇಸ್ರಾಯೇಲ್ಯೆರೆ ಪ್ರತಿಯೊಂಜಿ ಗೋತ್ರದಾಕುಲುಲಾ ಒತ್ತಾವೊಂಡೆರ್. ಅಕ್ಲೆನ ಸಂಖ್ಯೆ ಒಂಜಿ ಲಕ್ಷದ ನಲ್ಪತ್ತನಾಲ್ ಸಾರ ಮಂದಿ.

⁵ ಮುದ್ರೆ ಪಾಡಿನಾಕುಲು ಏರೇರ್ ಪಂಡ್ಂಡ, ಯೂದನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ರೂಬೇನ್‌ನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಗಾದನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ,

⁶ ಅಸೇರನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ನೆಫ್ತಲೀಮನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಮನಸ್ಸೆನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ,

⁷ ಸಿಮೆಯೋನನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಲೇವಿನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಇಸ್ಸಾಕಾರನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ,

⁸ ಜಬುಲೋನುನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಯೋಸೇಫನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಬೆನ್ಯಾಮೀನನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ ಮಂದಿ ಮುದ್ರೆ ಪಾಡಿನಾಕುಲು ಇತ್ತೆರ್.

ಮಲ್ಲ ಗುಂಪುಡ್ದು ಉಪಕಾರ ಸ್ತುತಿ

⁹ ಉಂದೆಡ್ದ್ ಬೊಕ್ಕ ಯಾನ್ ಏರೆಡಲಾ ಗೆನ್ಪೆರೆ ತೀರಂದಿನಾತ್ ಮಲ್ಲ ಜನೊಕುಲೆ ಗುಂಪು ಗದ್ದಿಗೆದ ಎದುರುಡ್ಲಾ ಯಜ್ಞದ ಕುರಿತ ಕಿನ್ನಿದ ಎದುರುಡ್ಲಾ ಉಂತುದಿತ್ತಿನೆನ್ ತೂಯೆ. ಅಕುಲು ಮಾತ ಜನಾಂಗ, ಗೋತ್ರ, ಪ್ರಜೆ, ಭಾಷೆ, ಪಾತೆರುನಾಕುಲು ಆದಿತ್ತೆರ್. ಅಕುಲು ಬೊಲ್ದು ಅಂಗಿನ್ ಪಾಡೊಂದು ತನ್ಕುಲೆ ಕೈಟ್ ಖರ್ಜೂರದ ಗೆಲ್ಲ್‌ಲೆನ್ ಪತ್ತೊಂದಿತ್ತೆರ್.

¹⁰ ಅಕುಲು, “ಗದ್ದಿಗೆಡ್ ಕುಲ್ಲೊಂದಿತ್ತಿ ನಮ ದೇವೆರೆಗ್ಲಾ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯಗ್ಲಾ ಎಂಕ್ಲೆಗ್ ರಕ್ಷಣೆ ಉಂಡಾಯಿನೆಕ್ಕ್‌ಲಾ ಉಪಕಾರ ಸ್ತುತಿ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬೊಬ್ಬೆ ದೀಯೆರ್.

¹¹ ಅಪಗ ಮಾತ ದೂತೆರ್‌ಲಾ, ಹಿರಿಯೆರ್‌ಲಾ ಬೊಕ್ಕ ಆ ನಾಲ್ ಜೀವಿಲು ಗದ್ದಿಗೆದ ಸುತ್ತಲಾ ಉಂತೊಂದಿತ್ತೆರ್. ಅಕುಲು ಗದ್ದಿಗೆದ ಎದುರುಡು ಅಡ್ಡಬೂರ್ದು ದೇವೆರೆನ್ ಆರಾಧನೆ ಮಲ್ತೆರ್.

¹² “ಆಮೆನ್, ಆಶೀರ್ವಾದ, ಮೈಮೆ, ಗೇನ, ಉಪಕಾರ ಸ್ತುತಿ, ಮಾನ, ಬಲ, ಅಧಿಕಾರ ಮಾತಲಾ ನಮ ದೇವೆರೆಗ್ ಏನಿತ್ಯೇನಿಗ್ಲಾ ಉಪ್ಪಡ್ ಆಮೆನ್,” ಅಂದ್‌ದ್ ರಾಗ ಮಲ್ತೆರ್.

¹³ ಉಂದೆನ್ ತೂದು ಹಿರಿಯೆರೆಡ್ ಒರಿ, ಬೊಲ್ದು ಕುಂಟು ತುತ್ತೊಂಡಿನಾಕುಲು ಮೊಕುಲು ಏರ್? ಒಲ್ತುಡ್ದು ಬತ್ತೆರ್ ಅಂದ್‌ದ್ ಎನಡ ಕೇನ್ನಗ,

¹⁴ “ಸ್ವಾಮಿ, ಈಯೇ ತೆರಿದ,” ಅಂದ್‌ದ್ ಪಂಡೆ. ಐಕ್ ಆಯೆ ಎನಡ ಪಂಡಿನಿ ಮೊಕುಲು ಆ ಮಲ್ಲ ಭಂಗೊನು ಅನುಭವ ಮಲ್ತ್‌ದ್ ಬತ್ತಿನಾಕುಲು; ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ನೆತ್ತೆರ್‌ಡ್ ತನ್ಕುಲೆ ಕುಂಟುಲೆನ್ ಮಡಿ ಮಲ್ತೊಂದೆರ್.

¹⁵ ಈ ಕಾರಣೊಡ್ದು “ಅಕುಲು ದೇವೆರೆ ಗದ್ದಿಗೆದ ಎದುರು ಇತ್ತ್‌ದ್, ಆಯನ ಆಲಯೊಡು ರಾತ್ರೆ ಪಗೆಲ್ ಸೇವೆ ಮಲ್ಪುವೆರ್. ಬೊಕ್ಕ ಗದ್ದಿಗೆಡ್ ಕುಲ್ಲೊಂದಿನಾಯೆನೇ ಅಕ್ಲೆ ನಡುಟು ಇತ್ತ್‌ದ್ ಆಶ್ರಯ ಕೊರ್ಪೆ.

¹⁶ ‘ನನ ಮಿತ್ತ್ ಏಪೊಗ್ಲಾ ಅಕ್ಲೆಗ್ ಬಡವು ಇಜ್ಜಿ. ಬಾಜೆಲ್ ಇಜ್ಜಿ. ಅಕ್ಲೆಗ್ ದೊಂಬುಲಾ ವಾ ಸಿಕೆಲಾ ತಾಗಂದ್,’

¹⁷ ದಾಯೆಗಂದ್ಂಡ ಗದ್ದಿಗೆದ ಮದ್ಯೊಡುಪ್ಪು ಯಜ್ಞದ ಕುರಿತ ಕಿನ್ನಿ ಆಯಿನಾಯೆ ಅಕ್ಲೆಗ್ ಕುರುಬಲೆಕ್ಕ ಇತ್ತ್‌ದ್ ‘ಅಕ್ಲೆನ್ ಜೀವ ಇತ್ತಿ ನೀರ್‌ದ ವಸರ್‌ದ ಕೈತಲ್‌ ನಡಪುಡುವೆ.’ ‘ಬೊಕ್ಕ ದೇವೆರ್ ಅಕ್ಲೆ ಕಣ್ಣ್‌ಡ್ದ್ ಕಣ್ಣೀರ್‌ನ್ ಮಾತ ಒಚ್ಚಿದ್ ಬುಡ್ಪೆ,’” ಅಂದ್‌ದ್ ಪಂಡೆ.