ಪ್ರಕಟಣೆ 6 - ಪೊಸ ಒಡಂಬಡಿಕೆ

ಮುದ್ರೆಲು

¹ ಬೊಕ್ಕ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯೆ ಆ ಏಳ್‌ ಮುದ್ರೆಲೆಡ್ ಒಂಜಿ ಮುದ್ರೆನ್ ದರ್ಪುನಗ ಯಾನ್ ತೂಯೆ. ಬೊಕ್ಕ ಆ ನಾಲ್ ಜೀವಿಲೆಡ್ ಒಂಜಿ ಜೀವಿ “ಬಲ!” ಅಂದ್‌ದ್ ತೆಡಿಲ್‌ದಂಚಿನ ಸ್ವರೊಟ್ಟು ಪನ್ಪಿನೆನ್ ಕೇಂಡೆ.

² ಅಪಗ ಅಲ್ಪ ಒಂಜಿ ಬೊಲ್ದು ಕುದುರೆ ತೋಜ್ಂಡ್. ಐತ ಮಿತ್ತ್ ಕುಲ್ಲುದಿತ್ತಿನಾಯನ ಕೈಟ್ ಬಿಲ್ಲ್ ಇತ್ತ್ಂಡ್. ಆಯಗ್ ಜಯಮಾಲೆ ಪಾಡ್ದಿತ್ತ್‌ಂಡ್. ಆಯೆ ಗೆಂದುನಾಯೆ ಆದ್ ಗೆಂದೆರೆಗಾದ್ ಪಿದಾಡಿಯೆ.

³ ಆಯೆ ರಡ್ಡನೆ ಮುದ್ರೆನ್ ದರ್ಪುನಗ ರಡ್ಡನೆ ಜೀವಿ “ಬಲ!” ಅಂದ್‌ದ್ ಪನ್ಪಿನೆನ್ ಕೇಂಡೆ.

⁴ ಅಪಗ ಬೊಕ್ಕೊಂಜಿ ಕುದುರೆ ಪಿದಾಡ್ದ್ ಬತ್ತ್ಂಡ್. ಅವು ಕೆಂಪು ಕುದುರೆ. ಐತ ಮಿತ್ತ್ ಕುಲ್ಲುದಿನಾಯಗ್ ಭೂಮಿಡ್ದ್ ಸಮಾಧಾನೊನು ದೆತ್ತ್‌ದ್ ಬುಡಿಯೆರೆಲಾ ನರಮಾನಿಲು ಒರಿಯನ್ ಒರಿ ಕೆರ್ಪಿನಾಕುಲು ಆಪಿಲೆಕ್ಕ ಮಲ್ಪೆರೆಗ್ಲಾ ಅಧಿಕಾರ ಕೊರ್ದಿತ್ತ್‌ಂಡ್, ಆಯಗ್ ಮಲ್ಲ ಕತ್ತಿಲಾ ಕೊರ್ದಿತ್ತ್‌ಂಡ್.

⁵ ಆಯೆ ಮೂಜನೇ ಮುದ್ರೆನ್ ದರ್ಪುನಗ ಮೂಜನೇ ಜೀವಿ “ಬಲ!” ಅಂದ್‌ದ್ ಪನ್ಪಿನೆನ್ ಕೇಂಡೆ. ಅಪಗ ಒಂಜಿ ಕಪ್ಪು ಕುದುರೆ ತೋಜ್ಂಡ್. ಐತ ಮಿತ್ತ್ ಕುಲ್ಲುದಿತ್ತಿನಾಯನ ಕೈಟ್ ತ್ರಾಸ್ ಇತ್ತ್ಂಡ್.

⁶ ಬೊಕ್ಕ ನಾಲ್ ಜೀವಿಲೆ ಮದ್ಯೊಡು ಒರಿಯನ ಸ್ವರ ಕೇಂಡ್. “ಅವು ದಿನತ ಕೂಲಿಗ್ ಒಂಜಿ ಸೇರ್ ಗೋದಿ; ಅತ್ತ್‌ಡ ಮೂಜಿ ಸೇರ್ ಜವೆಗೋದಿ. ಆಂಡ ಎಣ್ಣೆನ್ಲಾ ದ್ರಾಕ್ಷಾರಸೊನ್ಲಾ ಕೇಡ್ ಮಲ್ಪಡ.” ಅಂದ್‌ದ್ ಪಂಡ್ಂಡ್.

⁷ ಆಯೆ ನಾಲನೇ ಮುದ್ರೆನ್ ದರ್ಪುನಗ ನಾಲನೇ ಜೀವಿ “ಬಲ!” ಅಂದ್‌ದ್ ಪನ್ಪಿನೆನ್ ಕೇಂಡೆ.

⁸ ಅಪಗ ಒಂಜಿ ಬೊನ್ಯ ಬಣ್ಣದ ಕುದುರೆನ್ ತೂಯೆ. ಐತ ಮಿತ್ತ್ ಕುಲ್ಲುದಿನಾಯನ ಪುದರ್ ಮರಣ. ಆಯನ ಪಿರವುಡು ಪಾತಾಳ ಪನ್ಪಿನಾಯೆ ಬತ್ತೆ. ಅಕ್ಲೆಗ್ ಭೂಮಿದ ನಾಲೆಟ್ಟ್ ಒಂಜಿ ಭಾಗೊನು ಕತ್ತಿಡ್ದ್‌ಲಾ, ಬರಗಾಲೊಡ್ದುಲಾ, ಉಪದ್ರೊಲೆಡ್ದ್‌ಲಾ, ಕಾಡ್ ಮೃಗೊಲೆಡ್ದ್‌ಲಾ ಕೆರಿಯೆರೆ ಅಧಿಕಾರ ಕೊರ್ದಿತ್ತ್‌ಂಡ್.

⁹ ಆಯೆ ಐನನೇ ಮುದ್ರೆನ್ ದರ್ಪುನಗ ದೇವೆರೆ ವಾಕ್ಯೊಡ್ದುಲಾ ಅಕುಲು ಪಂಡಿನ ಸಾಕ್ಷಿಡ್ದ್‌ಲಾ ಸೈತಿನಾಕುಲೆನ ಆತ್ಮೊಲು ಬಲಿಪೀಠದ ತಿರ್ತ್ ಉಪ್ಪುನೆನ್ ತೂಯೆ.

¹⁰ ಅಕುಲು, “ಓ ಸರ್ವಶಕ್ತೆ ಆದುಪ್ಪು ಕರ್ತವಾ, ಪರಿಶುದ್ಧೆಲಾ, ಸತ್ಯವಂತೆಲಾ ಆದುಪ್ಪುನಾಯ, ಭೂಮಿಡ್ ಉಪ್ಪುನಾಕುಲು ಎಂಕ್ಲೆನ್ ಕೆರಿನೆಕ್ಕಾದ್ ಈ ಏತ್ ಕಾಲ ಮುಟ್ಟ ನ್ಯಾಯತೀರ್ಪಂದೆಲಾ ದಂಡನೆ ಮಲ್ಪಂದೆಲಾ ಉಪ್ಪುವ?” ಅಂದ್‌ದ್ ಮಲ್ಲ ಶಬ್ಧೊಡು ಅರಬಾಯಿ ದೀಯೆರ್.

¹¹ ಅಪಗ ಅಕ್ಲೆಡ್ ಒರಿ ಒರಿಯಗ್ ಒಂಜೊಂಜಿ ಬೊಲ್ದು ಅಂಗಿನ್ ಕೊರ್ದಿತ್ತೆರ್. ಉಂದತ್ತಂದೆ ನಿಕ್ಲೆ ಲೆಕ್ಕ ಸೈಯೊಡಾಪಿ ನಿಕ್ಲೆನ ಸಹೋದ್ರೆರ್ ಬೊಕ್ಕ ನಿಕ್ಲೆನ ಜತೆಸೇವಕೆರೆನ ಪಟ್ಟಿ ಪೂರ್ತಿ ಆಪಿನೆಟ್ಟ ನನಲಾ ಒಂತೆ ಕಾಪುಲೆ ಅಂದ್‌ದ್ ಅಕ್ಲೆಗ್ ಅಪ್ಪಣೆ ಆಂಡ್.

¹² ಆಯೆ ಆಜನೆ ಮುದ್ರೆನ್ ದರ್ಪುನೆನ್ ತೂಯೆ. ದರ್ಪುನಗ ಮಲ್ಲ ಭೂಕಂಪ ಉಂಡಾಂಡ್. ಸೂರ್ಯೆ ಕಂಬೊಲಿದ ಲೆಕ್ಕ ಕಪ್ಪು ಆಂಡ್‌. ಚಂದ್ರೆ ನೆತ್ತೆರ್‌ದ ಲೆಕ್ಕ ಕೆಂಪು ಆಂಡ್‌.

¹³ ಬಿರುಗಾಳಿಡ್ದ್ ಪಂದುನ ಅರ್ತಿಮರತ ಕಾಯಿ ಬೂರುಲೆಕ್ಕನೇ ಬಾನದ ಬೊಳ್ಳಿಲು ಭೂಮಿಗ್ ಬೂರ್‌ಂಡ್.

¹⁴ ಬಾನ ಸುರುಳಿದಲೆಕ್ಕ ಸುತ್ತೊಂದು ಪೋಂಡು. ಮಾತ ಗುಡ್ಡೆಲುಲಾ ದ್ವೀಪೊಲುಲಾ ತನ್ಕುಲೆ ಜಾಗ್‌ಡ್ದ್ ಅಂಚಿಂಚಿ ಪೋವೆರೆ ಸುರು ಮಲ್ತ.

¹⁵ ಅಪಗ ಈ ಭೂಮಿದ ಅರಸುಲು, ಅಧಿಪತಿಲು, ಸೈನ್ಯದ ಅಧಿಕಾರಿಲು, ಐಶ್ವರ್ಯವಂತೆರ್, ಬಲತ್ತಾಕುಲು, ಗುಲಾಮೆರ್, ಸ್ವತಂತ್ರೆರ್ ಆದಿತ್ತಿನಾಕುಲು ಗುಡ್ಡೆದ ಮಾಟೆಲೆಗ್, ಪಾದೆದ ಸಂದ್‌ಲೆಗ್ ಪಾರ್ದ್ ಪೋದು ತನ್ಕುಲೆನ್ ಮದೆ ಮಲ್ತೊಂಡೆರ್;

¹⁶ ಅಕುಲು ಬುಲ್ತುದು ಗುಡ್ಡೆಲೆಗ್ ಪಾದೆಲೆಗ್, “ಎಂಕ್ಲೆನ ಮಿತ್ತ್ ಬೂರ್ದು ಎಂಕ್ಲೆನ್ ಮದೆ ಮಲ್ಪುಲೆ. ಗದ್ದಿಗೆದ ಮಿತ್ತ್ ಕುಲ್ಲುದಿತ್ತಿನಾಯನ ಮೋನೆಡ್ದ್‌ಲಾ ಕುರಿತ ಕಿನ್ನಿ ಆದಿತ್ತಿನಾಯನ ಕೋಪೊಡ್ದುಲಾ ಎಂಕ್ಲೆನ್ ಮದೆ ಮಲ್ಪುಲೆ.

¹⁷ ದಾಯೆಗಂದ್ಂಡ ಅಕ್ಲೆನ ಕೋಪ ತೋಜಿದ್ ಬರ್ಪಿ ಆ ಮಲ್ಲ ದಿನ ಬೈದ್‌ಂಡ್. ಐತ ಎದುರುಡು ಉಂತಿಯೆರೆ ಏರೆಡ್ದ್ ಆವು ಅಂದ್‌ದ್ ಪಂಡೆರ್.”