ಪ್ರಕಟಣೆ 5 - ಪೊಸ ಒಡಂಬಡಿಕೆಸುರುಳಿ ಬೊಕ್ಕ ಯಜ್ಞದ ಕುರಿ 1 ಬೊಕ್ಕ ಗದ್ದಿಗೆಡ್ ಕುಲ್ಲುದಿತ್ತಿನಾಯನ ಬಲತ್ತ ಕೈಟ್ ಒಂಜಿ ಸುರುಳಿನ್ ತೂಯೆ. ಆ ಸುರುಳಿದ ರಡ್ಡ್ ಮರ್ಗಿಲ್‌ಡ್ಲಾ ಬರೆದಿತ್ತ್‌ಂಡ್. ಅವೆನ್ ಏಳ್‌ ಮುದ್ರೆಲೆಡ್ ಬಂದ್ ಮಲ್ತ್‌ದಿತ್ತೆರ್ 2 ಉಂದತ್ತಂದೆ ಒರಿ ಬಲಿಷ್ಟೆ ದೂತೆ, “ಈ ಸುರುಳಿನ್ ಗಿರ್ಪೆರೆಗ್ಲಾ ಮುದ್ರೆಲೆನ್ ದರ್ಪೆರೆಗ್ಲಾ ತಕ್ಕದಾಯೆ ಏರ್ ಉಲ್ಲೆರ್?” ಅಂದ್‌ದ್ ಗಟ್ಟಿ ಸ್ವರೊಟ್ಟು ಸಾರಿಯುನೆನ್ ತೂಯೆ. 3 ಆಂಡ ಆ ಸುರುಳಿನ್ ಗಿರ್ಪೆರೆಗಾವಡ್ ಐತ ಉಲಯಿ ತೂವೆರೆಗಾವಡ್, ಪರಲೋಕೊಡಾವಡ್ ಈ ಭೂಮಿಡಾವಡ್ ಭೂಮಿದ ತಿರ್ತಾವಡ್ ಏರೆಗ್ಲಾ ಶಕ್ತಿ ಇತ್ತ್‌ಜಿ. 4 ಅಪಗ ಆ ಸುರುಳಿನ್ ಗಿರ್ಪೆರೆಗಾವಡ್ ಐಟ್ಟ್ ತೂವೆರೆಗಾವಡ್ ತಕ್ಕದಾಯೆ ತಿಕ್ಕಂದಿನೆಡ್ದಾವರ ಯಾನ್ ದಿಂಜ ಬುಲ್ತೆ. 5 ಐಡ್ದ್ ಬೊಕ್ಕ ಹಿರಿಯೆರೆಡ್ ಒರಿ ಎಂಕ್, “ಬುಲ್ಪೊಡ್ಚಿ ಇಂದಾ, ಯೂದ ಗೋತ್ರೊಡ್ದು ಪುಟ್ಟಿನ ಸಿಮ್ಮಲಾ, *ದಾವೀದನ ವಂಶದಾಯೆ ಆದುಪ್ಪು ಒರಿ ಗೆಂದ್‌ದೆ. ಆಯೆ ಆ ಸುರುಳಿನ್ಲಾ ಐತ ಏಳ್‌ ಮುದ್ರೆಲೆನ್ಲಾ ಗಿರ್ಪುವೆ,” ಅಂದ್‌ದ್ ಪಂಡೆ. 6 ಬೊಕ್ಕ ಯಾನ್ ಗದ್ದಿಗೆಲಾ ನಾಲ್ ಜೀವಿಲು ಇತ್ತಿ ಜಾಗ್‌ಗ್ಲಾ ಹಿರಿಯೆರ್ ಇತ್ತಿ ಜಾಗ್‌ಗ್ಲಾ ನಡುಟು ಯಜ್ಞದ ಒಂಜಿ ಕುರಿತ ಕಿನ್ನಿ ಉಂತುದಿನೆನ್ ತೂಯೆ. ಐಕ್ ಏಳ್‌ ಕೊಂಬುಲಾ ಏಳ್‌ ಕಣ್ಣ್‌ಲಾ ಇತ್ತ್ಂಡ್. ಅವು ಭೂಮಿದ ಮಾತ ಕಡೆಕ್ಕ್, ಕಡಪುಡ್ದಿನ ದೇವೆರೆ ಏಳ್‌ ಆತ್ಮೊಲು ಆದಿತ್ತ್ಂಡ್. 7 ಆಯೆ ದುಂಬು ಬತ್ತ್‌ದ್ ಗದ್ದಿಗೆಡ್ ಕುಲ್ಲೊಂದಿತ್ತಿನಾಯನ ಬಲತ್ತ ಕೈಡ್ದ್ ಆ ಸುರುಳಿನ್ ದೆತ್ತೊಂಡೆ. 8 ಆಯೆ ಸುರುಳಿನ್ ದೆತ್ತೊಂಡಿನಪಗ ಆ ನಾಲ್ ಜೀವಿಲುಲಾ ಇರ್ವತ್ತನಾಲ್ ಮಂದಿ ಹಿರಿಯೆರ್‌ಲಾ ಯಜ್ಞದ ಕುರಿತ ಕಿನ್ನಿದ ಎದುರು ಅಡ್ಡಬೂರ್ಯೆರ್. ಹಿರಿಯೆರೆನ ಕೈಟ್ ವೀಣೆಲಾ ದೇವಜನೊಕುಲೆ ಪ್ರಾರ್ಥನೆ ಪನ್ಪಿನ ದೂಪೊಡ್ದು ದಿಂಜಿದಿ ಬಂಗಾರ್‌ದ ಧೂಪದ ಬಾಜನಲಾ ಇತ್ತ್ಂಡ್. 9 ಅಕುಲು ಪೊಸ ರಾಗ ಮಲ್ತೊಂದು, “ಈ ಸುರುಳಿನ್ ದೆತ್ತೊಂದು ಜಪ್ಪೆರೆ ಐತ ಮುದ್ರೆಲೆನ್ ದರ್ಪೆರೆ ಈ ತಕ್ಕದಾಯೆ, ಈ ಬಲಿ ಆದ್ ನಿನ ನೆತ್ತೆರೆಡ್ದ್ ಬುಡುಗಡೆ ಮಲ್ತ್‌ದಿ ಮಾತ ಗೋತ್ರ, ಪ್ರಜೆ, ಭಾಷೆ, ಜನೊಕುಲು, ಬೊಕ್ಕ ಜನಾಂಗೊಲೆಡ್ದ್ ದೇವೆರೆಗಾದ್ ನರಮಾನಿಲೆನ್ ಬಿಲೆಕ್ ದೆತ್ತೊಂಡ. 10 ಅಕ್ಲೆನ್ ನಮ್ಮ ದೇವೆರೆಗಾದ್ ರಾಜೆರಾದ್‌ಲಾ ಯಾಜಕೆರಾದ್‌ಲಾ ಮಲ್ತ. ಅಕುಲು ಭೂಮಿದ ಮಿತ್ತ್ ಆಳುವೆರ್,” ಅಂದ್‌ದ್ ಪಂಡೆರ್. 11 ಉಂದತ್ತಂದೆ, ಯಾನ್ ತೂವನಗ ಗದ್ದಿಗೆ, ನಾಲ್ ಜೀವಿಲು ಬೊಕ್ಕ ಹಿರಿಯಾಕುಲೆ ಸುತ್ತಲಾ ಉಂತುದಿತ್ತಿ ಮಸ್ತ್ ದೂತೆರೆ ಸ್ವರೊನು ಕೇಂಡೆ. ಅಕ್ಲೆನ ಸಂಖ್ಯೆ ಕೋಟಿಗಟ್ಲೆಲಾ ಲಕ್ಷಗಟ್ಲೆಲಾ ಇತ್ತ್ಂಡ್. 12 ಬೊಕ್ಕ ಅಕುಲು ಗಟ್ಟಿ ಸ್ವರೊಟ್ಟು ರಾಗ ಮಲ್ತೊಂದಿತ್ತೆರ್, “ಬಲಿ ಆದುಪ್ಪು ಕುರಿತ ಕಿನ್ನಿ ಆದುಪ್ಪುನಾಯೆ ಬಲ, ಐಶ್ವರ್ಯ, ಗೇನ, ಸಾಮರ್ಥ್ಯ, ಮಾನ, ಮೈಮೆ ಬೊಕ್ಕ ಆಶೀರ್ವಾದ ಪಡೆವೊನ್ರೆ ತಕ್ಕದಾಯೆ ಆದುಲ್ಲೆ,” ಅಂದ್‌ದ್ ಪಂಡೆರ್. 13 ಉಂದತ್ತಂದೆ ಪರಲೋಕೊಡ್ಲಾ, ಭೂಮಿದ ಮಿತ್ತ್‌ಲಾ, ಭೂಮಿದ ತಿರ್ತ್‌ಲಾ ಕಡಲ್ದ ಮಿತ್ತ್‌ಲಾ ಉಪ್ಪು ಮಾತ ಸೃಷ್ಟಿಲು ಅಂದ್ಂಡ ಭೂಮಿಡ್, ಬಾನೊಡು, ಕಡಲ್ಡ್ ಉಪ್ಪು ಮಾತಲಾ, “ಗದ್ದಿಗೆಡ್ ಕುಲ್ಲ್‌ದಿನಾಯಗ್ಲಾ ಯಜ್ಞದ ಕುರಿತ ಕಿನ್ನಿಗ್ಲಾ ಆಶೀರ್ವಾದ, ಮಾನ, ಮೈಮೆ, ತ್ರಾಣ ಏನಿತ್ಯೇನಿಗ್ಲಾ ಉಪ್ಪಡ್,” ಅಂದ್‌ದ್ ಪನ್ಪಿನೆನ್ ಕೇಂಡೆ. 14 ಅಪಗ ಆ ನಾಲ್ ಜೀವಿಲು “ಆಮೆನ್!” ಅಂದ್‌ದ್ ಪಂಡ. ಬೊಕ್ಕ ಹಿರಿಯಾಕುಲು ಅಡ್ಡಬೂರ್ದು ಆರಾಧನೆ ಮಲ್ತೆರ್. |
New Life Literature