ಪ್ರಕಟಣೆ 4 - ಪೊಸ ಒಡಂಬಡಿಕೆ

ಪರಲೋಕೊಡು ಆಪಿನ ಆರಾಧನೆ

¹ ಐಡ್ದ್ ಬೊಕ್ಕ ಯಾನ್ ಪರಲೋಕೊಡು ಒಂಜಿ ಬಾಕಿಲ್ ಜತ್ತ್‌ದಿನೆನ್ ತೂಯೆ. ಯಾನ್ ಸುರುಟ್ಟು ಕೇಂಡ್ದಿ ಪಾತೆರ, ಅವು ಎನಡ ತುತೂರಿದ ಲೆಕ್ಕನೆ ಪಾತೆರೊಂದುಪ್ಪುನೆನ್ ಕೇಂಡೆ. ಆ ಸ್ವರ ಪಂಡ್ಂಡ್, “ಇಡೆಗ್ ಮಿತ್ತ್ ಬಲ; ಉಂದೆಡ್ದ್ ಬೊಕ್ಕ ನಡಪೆರೆ ಉಪ್ಪುನೆನ್ ನಿಕ್ಕ್ ತೋಜಾವೆ.”

² ಕೂಡ್ಲೇ ಯಾನ್ ದೇವೆರಾತ್ಮನ ವಶ ಆಯೆ. ಅಪಗ ಇಂದಾ, ಪರಲೋಕೊಡು ಒಂಜಿ ಗದ್ದಿಗೆ ಇತ್ತ್ಂಡ್, ಗದ್ದಿಗೆದ ಮಿತ್ತ್ ಒರಿ ಕುಲ್ಲೊಂದಿತ್ತೆ.

³ ಕುಲ್ಲುದಿತ್ತಿನಾಯನ ಕಣ್ಣ್ ಸೂರ್ಯಕಾಂತ ಬೊಕ್ಕ ಪದ್ಮರಾಗ ಮಣಿತ್ತಲೆಕ್ಕ ತೋಜೊಂದಿತ್ತ. ಗದ್ದಿಗೆದ ಸುತ್ತಲಾ ಪಚ್ಚೆ ಮಿಂಚುನ ಕಲ್ಲ್‌ದಲೆಕ್ಕ ಕಾಮನಬಿಲ್ಲ್ ಇತ್ತ್ಂಡ್.

⁴ ಉಂದತ್ತಂದೆ ಐತ ಸುತ್ತಲಾ ಇರ್ವತ್ತನಾಲ್ ಗದ್ದಿಗೆಲು ಇತ್ತ್ಂಡ್. ಆ ಗದ್ದಿಗೆಲೆಡ್ ಬೊಲ್ದು ಕುಂಟು ಪಾಡೊಂದಿತ್ತಿ ಇರ್ವತ್ತನಾಲ್ ಮಂದಿ ಹಿರಿಯೆರ್ ಕುಲ್ಲುದಿತ್ತೆರ್. ಅಕ್ಲೆ ತರೆತ ಮಿತ್ತ್ ಬಂಗಾರ್‌ದ ಕಿರೀಟ ಇತ್ತ್ಂಡ್.

⁵ ಗದ್ದಿಗೆಡ್ದ್ ಮಿಂಚಿದ ಬೊಲ್ಪುಲಾ ತೆಡಿಲ್‌ದ ಶಬ್ಧಲಾ ಬರೊಂದಿತ್ತ್‌ಂಡ್. ಗದ್ದಿಗೆದ ಎದುರುಡು ಏಳ್‌ ತೂಟೆ ಅರ್ಲೊಂದಿತ್ತ್‌ಂಡ್, ಅವು ದೇವೆರೆ ಏಳ್‌ ಆತ್ಮೊಲು.

⁶ ಉಂದತ್ತಂದೆ ಗದ್ದಿಗೆದ ಎದುರುಡು ಸ್ಫಟಿಕದಂಚಿನ ಕನ್ನಡಿದ ಕಡಲ್ ಇತ್ತಿಲೆಕ್ಕ ತೋಜಿದ್ ಬತ್ತ್ಂಡ್. ಗದ್ದಿಗೆದ ನಡುಟ್ಲಾ ಗದ್ದಿಗೆದ ಸುತ್ತಲಾ ನಾಲ್ ಕಡೆಟ್ಲಾ ನಾಲ್ ಜೀವಿಲು ಇತ್ತ. ಐಕ್ಲೆಗ್ ದುಂಬು ಪಿರವು ಕಣ್ಣುಲು ಇತ್ತ್ಂಡ್.

⁷ ಈ ಜೀವಿಲೆಡ್ ಸುರುತ್ತವು ಸಿಮ್ಮದಲೆಕ್ಕ ಇತ್ತ್ಂಡ್; ರಡ್ಡನೆದವು ಬೋರಿದಲೆಕ್ಕ; ಮೂಜನೆದೆಕ್ ನರಮಾನಿ ಮೋನೆ ಇತ್ತ್ಂಡ್, ಬೊಕ್ಕ ನಾಲನೆದವು ರಾಪಿನ ಗಿಡಿತಲೆಕ್ಕ ಇತ್ತ್ಂಡ್.

⁸ ಆ ನಾಲ್ ಜೀವಿಲೆಗ್ ಒಂಜೊಂಜೆಕ್ ಆಜಾಜಿ ರೆಂಕೆಲು ಇತ್ತ್ಂಡ್. ಸುತ್ತಲಾ ಉಲಯಿಲಾ ಪಿದಯಿಲಾ ಕಣ್ಣ್‌ಲು ಇತ್ತ್ಂಡ್. ಬೊಕ್ಕ ಆ ಜೀವಿಲು ರಾತ್ರೆ ಪಗೆಲ್ ಬುಡಂದೆ, “ದೇವೆರಾದುಪ್ಪು ಕರ್ತವೆ ಪರಿಶುದ್ಧೆ, ಪರಿಶುದ್ಧೆ, ಪರಿಶುದ್ಧದಾಯೆ ಆದುಲ್ಲೆ; ಸರ್ವತ್ರಾಣದಾಯೆ, ವರ್ತಮಾನ, ಭೂತ, ಭವಿಷ್ಯತ್ ಕಾಲೊಡು ಉಪ್ಪುನಾಯೆ,” ಅಂದ್‌ದ್ ಪನೊಂದಿತ್ತ್‌ಂಡ್.

⁹ ಏನಿತ್ಯೇನಿಗ್ಲಾ ಬದುಕುನಾಯೆ ಆದ್ ಗದ್ದಿಗೆದ ಮಿತ್ತ್ ಕುಲ್ಲುದಿನಾಯಗ್ ಆ ನಾಲ್ ಜೀವಿಲು ಮೈಮೆ, ಮಾನ, ಉಪಕಾರ ಸಂದಾವೊಂದಿತ್ತ್‌ಂಡ್.

¹⁰ ಆ ಇರ್ವತ್ತನಾಲ್ ಮಂದಿ ಹಿರಿಯೆರ್ ಗದ್ದಿಗೆದ ಮಿತ್ತ್ ಕುಲ್ಲುದಿನಾಯನ ಕಾರ್‌ಗ್ ಅಡ್ಡಬೂರ್ದು ಏನಿತ್ಯೇನಿಗ್ಲಾ ಬದುಕುನಾಯಗ್ ಆರಾಧನೆ ಮಲ್ತ್‌ದ್ ತನ್ಕುಲೆ ಕಿರೀಟೊಲೆನ್ ಆ ಗದ್ದಿಗೆದ ಎದುರುಡು ದೀದ್,

¹¹ “ಕರ್ತವಾ, ಎಂಕುಲೆ ದೇವೆರೇ, ಈ ಮೈಮೆ, ಮಾನ, ಬಲ ಪಡೆಯುನೆಕ್ಕ್ ತಕ್ಕದಾಯೆ ಆದುಲ್ಲ, ಮಾತೆನ್ಲಾ ಸೃಷ್ಟಿ ಮಲ್ತ್‌ದಿನಾಯೆ ಈಯೇ; ಮಾತಲಾ ನಿನ ಚಿತ್ತೊಡ್ದೇ ಇತ್ತಿನವು, ನಿನ ಚಿತ್ತೊಡೇ ಉಂಡಾತಿನವು, ಅಂದ್‌ದ್ ಪನೊಂದು,” ಏನಿತ್ಯೇನಿಗ್ಲಾ ಉಪ್ಪುನಾಯನ್ ಆರಾಧನೆ ಮಲ್ತೊಂದಿತ್ತೆರ್.