ಪ್ರಕಟಣೆ 18 - ಪೊಸ ಒಡಂಬಡಿಕೆಬಾಬೆಲ್ ಪಟ್ಟಣದ ನಾಶ 1 ಉಂದು ಮಾತ ಆಯಿ ಬೊಕ್ಕ ಬಲತ್ತ ಅಧಿಕಾರ ಇತ್ತಿ ಬೊಕ್ಕೊರಿ ದೂತೆ ಪರಲೋಕೊಡ್ದು ಜತ್ತ್‌ದ್ ಬರ್ಪಿನೆನ್ ತೂಯೆ. ಆಯನ ಪ್ರಭಾವೊಡ್ದಾದ್ ಭೂಮಿಗ್ ಬೊಲ್ಪು ಉಂಡಾಂಡ್. 2 ಆಯೆ ಮಲ್ಲ ಸ್ವರೊಟ್ಟು ಬೊಬ್ಬೆ ದೀವೊಂದು, “ಬೂರಿಯಲ್, ಬೂರಿಯಲ್ ಬಾಬೆಲ್ ಪನ್ಪಿ ಮಲ್ಲ ಪಟ್ಟಣ ಬೂರಿಯಲ್. ದೆವ್ವೊಲು ಉಪ್ಪುನ ಜಾಗ್‌ಲಾ ಮಾತ ದುರಾತ್ಮೊಲೆಗ್ ಆಶ್ರಯಲಾ ಮಾತ ಮೈಲೆಲಾ ಪೇಸಿಗೆಲಾ ಇತ್ತಿ ಪಕ್ಕಿಲೆಗ್ಲಾ ಪಂಜರ ಆಯಲ್. 3 ಮಾತ ಜನಾಂಗೊಲು ಆಲೆನ ಹಾದ್ರದ ದ್ರಾಕ್ಷಾರಸೊನು ಪರಿಯೆರ್. ಲೋಕದ ಅರಸುನಕುಲು ಆಲೆನ ಒಟ್ಟುಗು ವ್ಯಭಿಚಾರ ಮಲ್ತೆರ್. ಆಲೆನ ಸುಖತ್ತ ಬಲೊಡ್ದು ಲೋಕದ ವ್ಯಾಪಾರಿಲು ಐಶ್ವರ್ಯವಂತೆರಾಯೆರ್,” ಅಂದ್‌ದ್ ಪಂಡೆ. 4 ಪರಲೋಕೊಡ್ದು ಬತ್ತಿ ಬೊಕ್ಕೊಂಜಿ ಸ್ವರೊನು ಕೇಂಡೆ ಅವು ಪಂಡಿನಿ ದಾನೆಂದ್ಂಡ, “ಎನ ಜನೊಕುಲೇ, ಆಲೆನ್ ಬುಡ್ದು ಬಲೆ. ನಿಕುಲು ಆಲೆನ ಪಾಪೊಲೆಡ್ ಪಾಲ್‌ದಾರೆರಾವೆರೆ ಬಲ್ಲಿ. ಆಲೆಗಾಪಿನ ಉಪದ್ರೊಲೆಡ್ ನಿಕುಲು ತಿಕ್ಕ್‌ದ್ ಬೂರಿಯೆರೆ ಬಲ್ಲಿ. 5 ಆಲೆನ ಪಾಪೊಲು ಒಂಜೆತ್ತ ಮಿತ್ತ್ ಒಂಜಿ ಸೇರ್ದ್ ಬಾನದ ಕೊಡಿ ಮುಟ್ಟ ಮುಟ್ಟುದುಂಡು. ದೇವೆರ್ ಆಲೆನ ಅನ್ಯಾಯೊನು ನೆನೆಪು ಮಲ್ತೊಂಡೆ. 6 ಬೇತೆಕ್ಲೆಗ್ ಆಲ್ ಮಲ್ತಿ ಲೆಕ್ಕನೇ ಆಲೆಗ್ಲಾ ಮಲ್ಪುಲೆ. ಆಲ್ ಮಲ್ತಿ ಕರ್ಮೊಲೆಗಾದ್ ಆಲೆಗ್ ರಡ್ಡ್ ಪಾಲ್ ಕೊರ್ಲೆ. ಆಲ್ ಕಲತಿನ ಬಾಜನೊಡು ಆಲೆಗ್ ರಡ್ಡೆತ್ತಾತ್ ಕಲತ್ ಕೊರ್ಲೆ. 7 ಆಲ್ ಏತ್‌ನೆಟ್ಟ ತನನೇ ಹೆಚ್ಚಾವೊಂದು ವೈಭೊವೊಡುಪ್ಪುವಲಾ ಅಡೆಮುಟ್ಟ ಆಲೆಗ್ ಬೇನೆನ್ಲಾ ದುಃಖೊನ್ಲಾ ಕೊರ್ಲೆ. ಆಲ್ ತನ ಉಡಲ್‌ಡ್, ‘ಯಾನ್ ರಾಣಿಯಾದ್ ಕುಲ್ಲೊಂದೆ, ಯಾನ್ ಕಂಡನಿ ಸೈತಿ ಗತಿದಾಂತಿನಾಲ್ ಅತ್ತ್. ಅಂಚಾದ್ ಯಾನ್ ಬುಲ್ಪುನವು ಅಗತ್ಯ ಇಜ್ಜಿ,’ ಅಂದ್‌ದ್ ಪನ್ಪಲ್. 8 ಆಲೆಗ್ ಮರಣ, ದುಃಖ, ಬರ ಇನ್ಪಿ ಇಕ್ಕಟ್ಟುಲು ಒಂಜೇ ದಿನೊಟು ಬರು. ಆಲ್ ತೂಟು ಪೊತ್ತುದು ಪೋಪಲ್. ದಾಯೆಗಂದ್ಂಡ ಆಲೆನ್ ನ್ಯಾಯತೀರ್ಪು ಮಲ್ಪು ದೇವೆರಾಯಿ ಕರ್ತವೆ ಶಕ್ತಿದಾಯೆ ಆದುಲ್ಲೆ.” 9 ಆಲೆಡೊಪ್ಪ ಹಾದ್ರ ಮಲ್ತ್‌ದ್ ಬೋಗಿಲಾದ್ ಬದ್‌ಕಿ ಭೂಮಿದ ಅರಸುಲು ಆಲೆನ ತೂತ ಪುಗೆನ್ ತೂನಗ 10 ಆಲೆನ ಸಂಕಟದ ದಿಸೆಡ್ದ್ ಪೋಡಿದ್ ದೂರೊಡು ಉಂತೊಂದು ಬೊಬ್ಬೆ ದೀವೊಂದು, ತಿಗಲೆ ಹಾಕೊಂದು, “ಅಯ್ಯೋ, ಅಯ್ಯೋ, ಮಲ್ಲಪಟ್ಟಣ, ಬಾಬೆಲೋ, ಬಲ ಇತ್ತಿ ಬಾಬೆಲೋ, ನಿಕ್ಕ್ ಏತ್ ಭಯಂಕರ ಸ್ಥಿತಿ ಆಂಡ್. ಒಂಜಿ ಗಳಿಗೆಡ್ ನಿನ ಮಿತ್ತ್ ದೇವೆರೆ ನ್ಯಾಯತೀರ್ಪು ಬತ್ತ್‌ಂಡತ್ತಾ?” ಅಂದ್‌ದ್ ಪನ್ಪೆರ್. 11 ಉಂದತ್ತಂದೆ ಲೋಕದ ವ್ಯಾಪಾರಿಲು ಆಲೆಗಾದ್ ಬುಲ್ತುದು ಅರಬಾಯಿ ದೀವೊಂದು, ತನ್ಕುಲೆ ಮಂಜಿಡ್ದ್ ಸಾಮಾನ್‌ಲೆನ್ ದೆತ್ತೊನುನಾಕುಲು ನನ ಇಜ್ಜೆರತ್ತಾ. 12 ಬಂಗಾರ್, ಬೊಳ್ಳಿ, ರತ್ನ, ಮುತ್ತು, ಎಡ್ಡೆ ನಾರ್‌ಮಡಿತ ಕುಂಟು, ನೇರಲೆ ಬಣ್ಣದ ಕುಂಟು, ರೇಶ್ಮೆ, ಕೆಂಪು ಬಣ್ಣದ ಕುಂಟು, ಕಮ್ಮೆನದ ಮರತ ವಸ್ತುಲು, ದಂತದ ಸಾಮಾನುಲು, ಎಡ್ಡೆ ಕ್ರಯತ್ತ ಮರ, ಪಿತ್ತಲೆ, ಕರ್ಬ, ಶಿಲೆ ನೆಡ್ದ್ ಮಲ್ತ್‌ದಿನ ಮಾತ ತರತ ಬಾಜನೊಲು 13 ಲವಂಗಚೆಕ್ಕೆ, ಧೂಪ, ರಕ್ತಬೋಳ, ಕಮ್ಮೆನದ ತೈಲ, ದ್ರಾಕ್ಷಾರಸ, ಎಣ್ಣೆ, ಎಡ್ಡೆ ಹಿಟ್ಟ್, ಗೋದಿ, ಕೈಕಂಜಿಲು, ಕುರಿ, ಕುದುರೆಲು, ರಥೊಲು, ಗುಲಾಮೆರ್, ನರಮಾನಿಲು ಉಂದೆನ್ ಮಾತೆನ್ ದೆತ್ತೊನುನಾಕುಲು ಏರ್ಲಾ ಇಜ್ಜೆರತ್ತಾ ಅಂದ್‌ದ್ ದುಃಖ ಮಲ್ಪುವೆರ್. 14 ವ್ಯಾಪಾರಿಲು ಆಲೆಗ್, “ಬಾಬೆಲ್ ನಿನ ಪ್ರಾಣ ಬಯಕಿ ಫಲವಸ್ತುಲು ನಿಕ್ಕ್ ತತ್ತ್‌ಂಡ್, ಮಾತ ಪೊರ್ಲು ಊಂಚಿ ಇತ್ತಿನವು ನಿನಡ್ದ್ ಪೋಂಡು, ಅವು ನಿಕ್ಕ್ ನನ ತಿಕ್ಕುನೇ ಇಜ್ಜಿ,” ಪಂಡ್ದ್ ಪಂಡೆರ್. 15 ವ್ಯಾಪಾರ ಮಲ್ತ್‌ದ್ ಆಲೆಡ್ದ್ ಐಶ್ವರ್ಯವಂತೆರಾಯಿ ವ್ಯಾಪಾರಿಲು ಆಲೆಗಾಯಿನ ಮಲ್ಲ ಬೇನೆನ್ ತೂದು ಪೋಡಿದ್ ದೂರ ಉಂತುದು ದುಃಖೊಡು ಬುಲ್ತೊಂದಿತ್ತೆರ್. 16 ಅಕುಲು “ಅಯ್ಯೋ, ಅಯ್ಯೋ, ಮೆಯಿಟ್ ಎಡ್ಡೆ ನಾರ್‌ಮಡಿತ ಕುಂಟು, ನೇರಲೆ, ಕೆಂಪು ಪಟ್ಟೆದ ಕುಂಟು ಪೊದೆತೊಂದು, ಬಂಗಾರ್, ರತ್ನ, ಮುತ್ತುಲೆಡ್ದ್ ತನನ್ ಐತ ಮಲ್ತೊಂದಿತ್ತಿ ಆ ಮಲ್ಲ ಪಟ್ಟಣೊಗು ವಾ ಗತಿ ಬತ್ತ್ಂಡ್. 17 ಆತ್ ಐಶ್ವರ್ಯ ಒಂಜೇ ಗಳಿಗೆಡ್ ನಾಶ ಆಂಡತ್ತಾ?” ಅಂದ್‌ದ್ ಪನೊಂದಿತ್ತೆರ್. ಉಂದತ್ತಂದೆ ಕಪ್ಪಲ್‌ದ ನಾವಿಕೆರ್ಲಾ ಗುರ್ಕಾರನಾಕುಲುಲಾ, ಕಪ್ಪಲ್‌ಡ್ ಪ್ರಯಾಣ ಮಲ್ಪುನಾಕುಲುಲಾ ಕೂಲಿದಾಕುಲುಲಾ ಕಡಲ್ಡ್ ಬೇಲೆನ್ ಮಲ್ತ್‌ದ್ ಬದುಕುನಾಕುಲುಲಾ ದೂರೊಡು ಉಂತೊಂದು, 18 ಪೊತ್ತೊಂದಿತ್ತಿ ಪುಗೆನ್ ತೂದು, “ಇಂಚಿತ್ತಿ ಮಲ್ಲಪಟ್ಟಣೊಗು ಸಮಾನವಾಯಿನವು ಒವ್ವಾಂಡಲಾ ಪಟ್ಟಣ ಉಂಡಾ?” ಪಂಡೆರ್. 19 ಅಪಗ ಅಕುಲು ತನ್ಕುಲೆ ದುಃಖೊನು ತೋಜಾವೆರೆಗಾದ್ರ ನೆಲತ್ತ ಮಣ್ಣ್‌ನ್ ತನ್ಕುಲೆ ತರೆತ ಮಿತ್ತ್ ದಕ್ಕೊಂದು ಬುಲ್ತೊಂದು ಅರಬಾಯಿ ದೀವೊಂದು, “ಅಯ್ಯೋ, ಅಯ್ಯೋ, ಕಡಲ್ಡ್ ಕಪ್ಪಲ್ ಇತ್ತಿನಾಕುಲು ಮಾತೆರ್ ಬಿಲೆ ಇತ್ತಿ ಸರಕುಲೆಡ್ದ್ ಐಶ್ವರ್ಯವಂತೆರಾದ್ ಮಲ್ತಿನ ಈ ಮಲ್ಲ ಪಟ್ಟಣೊಗು ಎಂಚಿತ್ತಿ ಗತಿ ಬತ್ತ್‌ಂಡತ್ತಾ. ಮೋಲ್ ಒಂಜೇ ಗಳಿಗೆಡ್ ಹಾಳ್ ಆಯಲ್ ಅತ್ತಾ,” ಅಂದ್‌ದ್ ಬುಲ್ತುದು ಪಂಡೆರ್. 20 “ಪರಲೋಕನೇ ಸಂತೋಷ ಮಲ್ಪುಲ, ದೇವಜನೊಕುಲೇ, ಅಪೊಸ್ತಲೆರೇ, ಪ್ರವಾದಿಲೇ, ಮೋಲ್ ನಿಕ್ಲೆಗ್ ಅನ್ಯಾಯ ಮಲ್ತಿನೆಕ್ಕಾದ್ ದೇವೆರ್ ಆಲೆಗ್ ತೀರ್ಪು ಮಲ್ತಿನೆಡ್ದ್ ಸಂತೋಷ ಮಲ್ಪುಲೆ ಅಂದ್‌ದ್ ಆ ಸ್ಚರ ಪಂಡ್ಂಡ್.” 21 ಅಪಗ ಬಲಿಷ್ಟೆ ಆದುಪ್ಪು ಒರಿ ದೂತೆ ಮಲ್ಲ ಬೀಸುನ ಕಲ್ಲ್ ದಂಚಿನ ಒಂಜಿ ಕಲ್ಲ್‌ನ್ ದೆರ್ತ್ತ್‌ದ್ ಕಡಲ್ದ ಉಲಯಿ ಪಾಡ್ದ್, “ಮಲ್ಲ ಪಟ್ಟಣ ಆದುಪ್ಪು ಬಾಬೆಲ್ ಇಂಚೆನೇ ಬೂರ್‌ಂಡ್ ನನ ಏಪೊಗ್ಲಾ ತೋಜಂದ್. 22 ಬಾಬೆಲ್ ನಿನಡ ವೀಣೆದಾಕುಲುಲಾ ವಾದ್ಯದಾಕುಲುಲಾ ಕೊಳಲ್ ತುತೂರಿದಾಕುಲುಲಾ ಮಲ್ಪು ಸ್ವರ ಏಪೊಗ್ಲಾ ಕೇನಂದ್. ನನ ವಾ ಕೈಗಾರಿಕೆ ಮಲ್ಪುನಾಕುಲುಲಾ ನಿನಡ ನನ ಏಪೊಗ್ಲಾ ತೂವರೆ ತಿಕ್ಕಯೆರ್. ಬೀಸುನ ಕಲ್ಲ್‌ದ ವಾ ಶಬ್ಧಲಾ ನನ ನಿನಡ ಏಪೊಗ್ಲಾ ಕೇನಂದ್. 23 ತುಡರ್‌ದ ಬೊಲ್ಪು ನಿನಡ ಏಪೊಗ್ಲಾ ತೋಜಂದ್. ಮದ್ಮಯೆ ಮದ್ಮಲಾಡ್ಲೆನ ಸಂತೋಷದ ಸ್ವರ ನಿನಡ ನನ ಕೇನಂದ್. ನಿನ ವ್ಯಾಪಾರಿಲು ಲೋಕೊಡೇ ಪುದರ್ ಪೋತಿನಾಕುಲಾದಿತ್ತೆರ್. ನಿನ ಮಾಟ ಮಂತ್ರೊಲೆಡ್ದ್ ಮಾತ ಜನಾಂಗದಾಕುಲು ಮರ್ಲಾಯೆರ್. 24 ಪ್ರವಾದಿಲೆ, ದೇವಜನೊಕುಲೆ ನೆತ್ತೆರ್‌‌ಲಾ ಭೂಮಿದ ಮಿತ್ತ್ ಕೆರ್ಪಾವೊಂಡಿನಾಕುಲೆನ ಮಾತೆರ್‌ನ ನೆತ್ತೆರ್‌‌ಲಾ ನಿನಡ ತಿಕ್ಕ್‌ಂಡತ್ತಾ ಅಂದ್‌ದ್ ಪಂಡೆ.” |
New Life Literature