ಪ್ರಕಟಣೆ 17 - ಪೊಸ ಒಡಂಬಡಿಕೆ

ಪುದರ್ ಪೋಯಿನ ಹಾದ್ರದಾಲ್‌

¹ ಬೊಕ್ಕ ಏಳ್‌ ಬಾಜನೊಲೆನ್ ಪತ್ತೊಂಡಿ ಏಳ್‌ ದೂತೆರೆಡ್ ಒರಿ ಎಂಕ್ ಬತ್ತ್‌ದ್ ಪಂಡಿನಿ, “ಬಲ, ದಿಂಜ ನೀರ್‌ದ ಮಿತ್ತ್ ಕುಲ್ಲುದಿನ ಆ ಮಲ್ಲ ಸೂಳೆಗಾಪಿ ನ್ಯಾಯತೀರ್ಪುನು ಯಾನ್ ನಿಕ್ಕ್ ತೋಜಾವೆ.

² ಆಲೆನ ಒಟ್ಟುಗು ಇಡೀ ಲೋಕದ ಅರಸುನಕುಲು ಆಲೆಡೊಪ್ಪ ಹಾದ್ರ ಮಲ್ತ್‌ದೆರ್. ಬೊಕ್ಕ ಈ ಲೋಕದ ಜನೊಕುಲು ಆಲೆನ ಹಾದ್ರದ ದ್ರಾಕ್ಷಾರಸೊನು ಪರ್ದ್ ಅಮಲ್ ಆತೆರ್.” ಅಂದ್‌ದ್ ಪಂಡೆ.

³ ಅಪಗ ಆಯೆ ದೇವೆರಾತ್ಮ ದಿಂಜಿದ್ ಎನನ್ ದೆರ್ತೊಂದು ಕಾಡ್‌ಗ್ ಪೋಯೆ. ಅಲ್ಪ ಯಾನ್ ಕೆಂಪು ಬಣ್ಣದ ಮೃಗತ ಮಿತ್ತ್ ಕುಲ್ಲೊಂದಿತ್ತಿ ಒಂಜಿ ಪೊಂಜೊವುನು ತೂಯೆ. ದೇವೆರೆನ ದೂಷಣೆ ಮಲ್ಪು ಪುದರ್‌ಲು ಆ ಮೃಗತ ಮೈಟ್ ದಿಂಜಿದಿತ್ತ್ಂಡ್. ಐಕ್ ಏಳ್‌ ತರೆಲಾ ಪತ್ತ್ ಕೊಂಬುಲುಲಾ ಇತ್ತ್ಂಡ್.

⁴ ಆ ಪೊಂಜೊವು ನೇರಲೆ ಬೊಕ್ಕ ಕೆಂಪು ಕುಂಟುಲೆನ್ ಪಾಡೊಂದು, ಬಂಗಾರ್, ರತ್ನ, ಮುತ್ತುಲೆಡ್ದ್ ಐತ ಆದಿತ್ತಲ್. ಆಲೆನ ಕೈಟ್ ಒಂಜಿ ಬಂಗಾರ್‌ದ ಬಾಜನ ಇತ್ತ್ಂಡ್. ಅವು ಅಶುದ್ಧ ಕಾರ್ಯೊಲೆಡ್ಲಾ ಹಾದ್ರೊಡು ಉಂಡಾಯಿನ ಸಂಗತಿಲೆಡ್ಲಾ ದಿಂಜಿದಿತ್ತ್ಂಡ್.

⁵ ಆಲೆನ ಮುಂಡೊಡು, “ಬಾಬೆಲ್ ಪನ್ಪಿ ಮಲ್ಲ ಪಟ್ಟಣ, ಭೂಮಿಡುಪ್ಪು ಸೂಳೆಲೆಗ್ಲಾ ಭೂಮಿದ ಅಶುದ್ಧ ಕಾರ್ಯೊಲೆಗ್ಲಾ ಅಪ್ಪೆ,” ಪನ್ಪಿ ಅರ್ಥೊನು ತೆರಿಪಾವು ಪುದರ್ ಬರೆದಿತ್ತ್‌ಂಡ್.

⁶ ಆ ಪೊಂಜೊವು ದೇವಜನೊಕುಲೆನ ಬೊಕ್ಕ ಯೇಸುಗು ಸಾಕ್ಷಿ ಕೊರ್ದು ಸೈತಿನಾಕುಲೆನ ನೆತ್ತೆರ್‌ನ್ ಪರ್ದ್ ಅಮಲ್ ಆದಿತ್ತಿನೆನ್ ತೂಯೆ. ಯಾನ್ ಆಲೆನ್ ತೂದು ಅಚ್ಚಿರ ಪಡೆಯೆ.

⁷ ಅಪಗ ಆ ದೂತೆ ಎಂಕ್ ಪಂಡಿನಿ, “ಈ ದಾಯೆಗ್ ಅಚ್ಚಿರ ಬುಡ್ಪ? ಈ ಪೊಂಜೊವುನಲಾ ಆಲೆನ ವಾಹನ ಆದಿತ್ತ್‌ದ್ ಏಳ್‌ ತರೆಲಾ ಪತ್ತ್ ಕೊಂಬುಲಾ ಇತ್ತಿ ಮೃಗೊಡ್ದು ತೆರಿದ್ ಬರ್ಪಿ ಗುಟ್ಟುನು ಯಾನ್ ನಿಕ್ಕ್ ತೆರಿಪಾವೆ.

⁸ ಈ ತೂಯಿನ ಆ ಮೃಗ ಸುರುಟ್ಟು ಇತ್ತ್ಂಡ್, ಆಂಡ ಇತ್ತೆ ಇಜ್ಜಿ. ಆಂಡ ಪಾತಾಳೊಡ್ದು ಆಯೆ ಬೇಗೊಡು ಮಿತ್ತ್ ಬತ್ತ್‌ದ್ ನಿತ್ಯ ನಾಶನೊಗು ಪೋಪೆ. ಲೋಕ ಉಂಡಾಯಿನೆಡ್ದಿಂಚಿ ಏರೇರೆನ ಪುದರ್ ಜೀವಬಾಧ್ಯೆರೆ ಪುಸ್ತಕೊಡು ಬರೆತಿಜಾ, ಅಕುಲು ಈ ಮೃಗೊನು ತೂದು ಉಂದು ಸುರುಟ್ಟು ಇತ್ತ್ಂಡ್, ಇತ್ತೆ ಇಜ್ಜಿ, ಕುಡ ಬರ್ಪುಂಡು ಅಂದ್‌ದ್ ತೆರಿದ್ ಅಚ್ಚಿರ ಪಡೆವೆರ್.

⁹ “ನೆಟ್ಟ್ ಜ್ಙಾನ ಇತ್ತಿ ಬುದ್ಧಿ ತೆರಿದಿನಾಯಗ್ ಮಾತ್ರ ಗೊತ್ತಾಪುಂಡು. ಆ ಏಳ್‌ ತರೆಕುಲು ಆ ಪೊಂಜೊವು ಕುಲ್ಲೊಂದಿನ ಏಳ್‌ ಗುಡ್ಡೆಲೆನ್ ತೋಜಾವುಂಡು.

¹⁰ ಅವು ಅತ್ತಂದೆ ಏಳ್‌ ರಾಜೆರೆಗ್ ಸೂಚನೆ ಆದುಂಡು. ಅಕ್ಲೆಡ್ ಐನ್ ರಾಜೆರ್ ಇದ ಮುಟ್ಟ ಬೂರ್ದು ಪೋತೆರ್; ಆಜನೆದಾಯೆ ಇತ್ತೆ ಆಳುವೆ; ಬೊಕ್ಕ ಏಳನೆದಾಯೆ ನನ ಬರಿಯೆರೆಗ್ ಉಲ್ಲೆ. ಆಂಡ ಆಯನ ಆಳಿಕೆ ಒಂತೆ ಮಾತ್ರ.

¹¹ ದುಂಬು ಇತ್ತ್‌ದ್ ಇತ್ತೆ ಉಪ್ಪಂದಿನ ಆ ಮೃಗನೇ ಎನ್ಮನೇ ಅರಸು. ಆಯೆ ಆ ಏಳ್‌ ರಾಜೆರೆಗ್ ಸೇರ್ದಿನಾಯೆ, ನಾಶನೊಗು ಪೋಪೆ.

¹² “ಈ ತೂಯಿನ ಆ ಪತ್ತ್ ಕೊಂಬುಲು ಅಂದ್ಂಡ, ರಾಜ್ಯೊನು ನನಲಾ ಆಳಂದಿನ ಪತ್ತ್ ರಾಜೆರ್‌. ಅಕುಲು ಒಂಜಿ ಗಳಿಗೆ ಮುಟ್ಟ ರಾಜಲೆಕ್ಕ ಆಳುನ ಅಧಿಕಾರೊನು ಮೃಗತೊಟ್ಟುಗು ಪಡೆವೆರ್.

¹³ ಅಕುಲು ಒಂಜೇ ಅಭಿಪ್ರಾಯ ಇತ್ತಿನಾಕುಲು ಆದಿತ್ತ್‌ದ್ ತನ್ಕುಲೆ ಬಲೊನ್ಲಾ ಅಧಿಕಾರೊನ್ಲಾ ಮೃಗೊಕ್ಕು ಕೊರ್ಪೆರ್.

¹⁴ ಅಕುಲು ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಮಿತ್ತ್ ಲಡಯಿ ಮಲ್ಪುವೆರ್. ಆಂಡ ಆಯೆ ಕರ್ತವೆರೆ ಕರ್ತವೆಲಾ ರಾಜಾದಿರಾಜೆಲಾ ಆದಿತ್ತಿನೆಡ್ದ್ ಅಕ್ಲೆನ್ ಗೆಂದುವೆ. ಬೊಕ್ಕ ದೇವೆರ್ ಲೆತ್ತಿನಾಕುಲುಲಾ ದೇವೆರ್ ಅಜತ್‌ದಿನಾಕುಲುಲಾ ನಂಬಿಗಸ್ತೆರ್‌ಲಾ ಆದುಪ್ಪು ಆಯ ಕಡೆತಾಕುಲು ಗೆಂದುನೆಟ್ಟ್ ಪಾಲ್‌ದಾರೆರಾಪೆರ್.”

¹⁵ ನನಲಾ ಆ ದೂತೆ ಎನಡ ಪಂಡಿನಿ, “ಆ ಸೂಳೆ ಕುಲ್ಲುದಿ ನೀರ್‌ನ್ ಈ ತೂಯತ್ತಾ, ಅವು ಜನೊಕುಲು, ಜನಾಂಗೊಲು, ಗೋತ್ರೊಲು ಬೊಕ್ಕ ಭಾಷೆಲು ಆದುಂಡು.

¹⁶ ಉಂದತ್ತಂದೆ ಪತ್ತ್ ಕೊಂಬುಲೆನ್ಲಾ ಮೃಗೊನ್ಲಾ ತೂಯತ್ತಾ, ನೆಡ್ದ್ ತೋಜಿದ್ ಬರ್ಪಿನಾಕುಲು ಆ ಸೂಳೆನ್ ಪಗೆ ಮಲ್ತೊಂದು ಆಲೆನ್ ಗತಿದಾಂತಿನಲೆ ಲೆಕ್ಕಲಾ, ಕುಂಟು ದಾಂತಿನಲೆಲೆಕ್ಕಲಾ ಮಲ್ತ್‌ದ್ ಆಲೆನ ಮಾಸೊನು ತಿಂದ್‌ದ್ ಆಲೆನ್ ತೂಟು ಪೊತ್ತಾದ್ ಬುಡ್ಪೆರ್.

¹⁷ ದಾಯೆಗಂದ್ಂಡ ಅಕುಲು ದೇವೆರೆ ಅಭಿಪ್ರಾಯೊಲೆನ್ ನಡಪಾವೆರೆಗ್ ಒಂಜೇ ಮನಸ್‌ದಾಕುಲು ಆದಿತ್ತ್‌ದ್ ತನ್ಕುಲೆ ರಾಜ್ಯೊನು ಮೃಗೊಕು ಕೊರಿಯೆರೆಗ್ಲಾ ದೇವೆರ್ ತನ ಪಾತೆರೊಲು ನಡಪುನೆಟ್ಟ ಅಕ್ಲೆನ ಮನಸ್‌ನ್ ಒತ್ತಾಯ ಮಲ್ತೆ.

¹⁸ “ಈ ತೂಯಿನ ಆ ಪೊಂಜೊವು ಭೂಮಿದ ಅರಸೆರೆ ಮಿತ್ತ್ ಅಧಿಕಾರ ಪಡೆದುಪ್ಪು ಮಲ್ಲಪಟ್ಟಣನೇ.”