ಪ್ರಕಟಣೆ 12 - ಪೊಸ ಒಡಂಬಡಿಕೆ

ಪೊಂಜೊವು ಬೊಕ್ಕ ಘಟಸರ್ಪೆ

¹ ಬೊಕ್ಕ ಪರಲೋಕೊಡು ಒಂಜಿ ಮಲ್ಲ ಗುರ್ತ ತೋಜ್ಂಡ್. ಸೂರ್ಯನ್ ಪೊದೆತೊಂದಿತ್ತಿ ಒಂಜಿ ಪೊಂಜೊವು ಇತ್ತಲ್. ಆಲೆನ ಕಾರ್‌ದ ತಿರ್ತ್ ಚಂದ್ರೆ ಇತ್ತೆ. ಆಲೆನ ತರೆತ ಮಿತ್ತ್ ಪದ್ರಾಡ್ ಬೊಳ್ಳಿಲುಪ್ಪು ಕಿರೀಟ ಇತ್ತ್ಂಡ್.

² ಆಲ್ ದಿಂಜಿದಿ ಬಂಜಿನಾಲಾದಿತ್ತ್‌ದ್ ಪೆದ್ದುನ ಸಂಕಟೊಡು ನರಳೊಂದಿತ್ತಲ್.

³ ಬಾನೊಡು ಬೊಕ್ಕೊಂಜಿ ಗುರ್ತ ತೋಜ್ಂಡ್. ಅಲ್ಪ ಕೆಂಪುದ ಮಲ್ಲ ಘಟಸರ್ಪೆ ಇತ್ತ್ಂಡ್, ಐಕ್ ಏಳ್‌ ತರೆಲಾ ಪತ್ತ್ ಕೊಂಬುಲಾ ಐತ ತರೆತ ಮಿತ್ತ್ ಏಳ್‌ ಕಿರೀಟಲಾ ಇತ್ತ್ಂಡ್.

⁴ ಐತ ಬೀಲ ಬಾನೊಡುಪ್ಪು ಬೊಳ್ಳಿಲೆಡ್ ಮೂಜೆಟ್ ಒಂಜಿ ಭಾಗೊನು ಒಯಿತ್‌ದ್ ಭೂಮಿಗ್ ದಕ್ಕ್‌ಂಡ್. ಪೆದ್ದೊಂದಿತ್ತಿ ಆ ಪೊಂಜೊವು ಪೆದ್ದಿ ಕೂಡ್ಲೆ ಆ ಬಾಲೆನ್ ದಿಂಗ್‌ದ್ ಬುಡೊಡು ಅಂದ್‌ದ್ ಆ ಘಟಸರ್ಪೆ ಅಲ್ಪನೇ ಕಾತೊಂದಿತ್ತ್‌ಂಡ್.

⁵ ಆಲ್ ಲೋಕದ ಮಾತ ಜನಾಂಗೊಲೆನ್ ಕರ್ಬದ ಕೋಲುಡ್ದು ಆಳುನ ಮಗನ್ ಪೆದ್ದಿಯಲ್. ಅಪಗ ಪಕ್ಕನೆ ಆ ಬಾಲೆನ್ ದೇವೆರೆ ಕಡೆಕ್ಲಾ ತನ ಗದ್ದಿಗೆದ ಕಡೆಕ್ಲಾ ಒಯ್ತೊಂಡು.

⁶ ಆ ಪೊಂಜೊವು ಕಾಡ್‌ಗ್ ಪಾರ್ದ್ ಪೋಯಲ್. ಆಲೆನ್ ಸಾರತ್ತ ಇರ್ನೂತ ಅಜ್ಪ ದಿನ ಮುಟ್ಟ ತಾಂಕೊಡು ಅಂದ್‌ದ್ ದೇವೆರ್ ಒಂಜಿ ಜಾಗ್‌ನ್ ತಯಾರ್ ಮಲ್ತ್‌ದಿತ್ತೆ.

⁷ ಬೊಕ್ಕ ಪರಲೋಕೊಡು ಲಡಯಿ ನಡತ್ಂಡ್. ಮಿಕಾಯೇಲೆಲಾ ಆಯನ ದೂತೆರ್‌ಲಾ ಘಟಸರ್ಪಡೊಪ್ಪ ಲಡಯಿ ಮಲ್ತೆರ್. ಲಡಯಿಡ್ ಘಟಸರ್ಪೆ ಸೋತು ಪೋಂಡು.

⁸ ಇಂಚ ಮೊಕ್ಲೆಗ್ ಪರಲೋಕೊಡು ಜಾಗ್ ಇಜ್ಜಾಂದೆ ಪೋಂಡು.

⁹ ಭೂಲೋಕೊಡು ಉಪ್ಪು ಮಾತೆರೆನ್ ಮೋಸ ಮಲ್ಪುನ ಆ ಮಲ್ಲ ಘಟಸರ್ಪೆ ಅಂದ್ಂಡ ಪಿಶಾಚಿ ಪಂಡ್ದ್‌ಲಾ, ಸೈತಾನೆ ಪಂಡ್ದ್‌ಲಾ ಪುದರಿತ್ತಿ ಪುರಾತನ ಸರ್ಪೆ ಪನ್ಪಿನಾಯೆಲಾ ಆಯಡೊಪ್ಪ ಆಯ ದೂತೆರ್ಲಾ ಪಿದಯಿ ನೂಕುದು ಭೂಮಿಗ್‌ ಪಾಡಿಯೆರ್.

¹⁰ ಅಪಗ ಪರಲೋಕೊಡು ಮಲ್ಲ ಸ್ವರೊಟ್ಟು ಇಂಚ ಪಂಡಿನೆನ್ ಕೇಂಡೆ, “ಇತ್ತೆ ರಕ್ಷಣೆಲಾ, ಬಲಲಾ ರಾಜ್ಯಲಾ ನಮ್ಮ ದೇವೆರೆಗ್ ಉಂಡಾಂಡ್. ಆಯೆ ಅಭಿಷೇಕ ಮಲ್ತಿನಾಯನ ಅಧಿಕಾರ ಕ್ರಿಸ್ತಡ್ ಇತ್ತೆ ಸುರು ಆಂಡ್. ಎಂಕುಲೆ ಸಹೋದರೆ ಸಹೋದ್ರಿಲೆನ್ ನಮ ದೇವೆರೆ ಎದುರುಡು ರಾತ್ರೆ ಪಗೆಲ್ ದೂರೊಂದುಪ್ಪುನ ಆ ದೂರುನಾಯನ್‌ ಪರಲೋಕೊಡ್ದು ನೂಕುದು ಪಾಡಿಯೆರ್.

¹¹ ಅಕುಲು ಮರಣ ಮುಟ್ಟ ತನ್ಕುಲೆ ಪ್ರಾಣೊನು ಪ್ರೀತಿ ಮಲ್ಪಂದೆ, ಕುರಿತ ಕಿನ್ನಿದ ನೆತ್ತೆರೆಡ್ದ್‌ಲಾ ತನ್ಕುಲೆ ಸಾಕ್ಷಿದ ಪಾತೆರೊಡ್ದುಲಾ ಆಯನ್ ಗೆಂದಿಯೆರ್.

¹² ಅಂಚಾಯಿನೆಡ್ದ್ ಪರಲೋಕೊಡುಪ್ಪುನಾಕುಲೇ, ಸಂತೋಷ ಮಲ್ಪುಲೆ. ಸೈತಾನೆ ತನ್ಕ್‌ ಉಪ್ಪು ಕಾಲ ಒಂತೆ ಅಂದ್‌ದ್ ತೆರಿದ್ ಭಯಂಕರ ಕೋಪೊಡು ಭೂಮಿಗ್ ಜತ್ತ್‌ದ್ ಬೈದೆ. ಅಂಚಾದ್ ಭೂಮಿಡ್ಲಾ ಸಮುದ್ರೊಡ್ಲಾ ಅಪತ್ತ್ ಬರಿಯೆರೆಗುಂಡು.”

¹³ ತಾನ್ ಭೂಮಿಗ್ ನೂಕುದು ಬೂರ್ದಿನೆನ್ ತೂದು ಘಟಸರ್ಪೆ, ಆ ಆಣ್ ಬಾಲೆನ್ ಪೆದ್ದಿನ ಪೊಂಜೊವುಗು ಭಂಗ ಕೊರಿಯೆರೆ ಗಿಡ್ತೊಂದು ಪೋಂಡು.

¹⁴ ಆಂಡ ಆಲ್ ಕಾಡ್‌ಡ್ ತನ್ಕಾದ್ ತಯಾರಾದಿತ್ತಿನ ಜಾಗ್‌ಗ್ ರಾವೊಂದು ಪೋಪಿಲೆಕ್ಕ ಆಲೆಗ್ ಮಲ್ಲ ಗಿಡಿಕುಪ್ಪು ರಡ್ಡ್ ರೆಂಕೆಲೆನ್ ಕೊರ್ದಿತ್ತ್‌ಂಡ್. ಅಲ್ಪ ಆಲ್ ಸರ್ಪದ ಕಣ್ಣ್‌ಗ್ ಮೂಜರೆ ವರ್ಸ ಮದೆ ಆದ್ ಇತ್ತಲ್.

¹⁵ ಬೊಕ್ಕ ಸರ್ಪೆ ತನ ಬಾಯಿಡ್ದ್ ನೀರ್‌ನ್ ತುದೆತ ಲೆಕ್ಕ ಜಪುಡಾದ್ ಆ ಪೊಂಜೊವು ಕೊಚ್ಚಿದ್ ಪೋಪಿಲೆಕ್ಕ ಪ್ರಯತ್ನ ಮಲ್ತೆ.

¹⁶ ಆಂಡ ಭೂಮಿ ಆ ಪೊಂಜೊವುನ ಸಹಾಯೊಗು ಬತ್ತ್‌ದ್ ಘಟಸರ್ಪನ ಬಾಯಿಡ್ದ್ ಬತ್ತಿನ ಮಾತ ನೀರ್‌ನ್ ದಿಂಗ್‌ದ್ ಪಾಡ್ಂಡ್.

¹⁷ ಅಪಗ ಘಟಸರ್ಪಗ್ ಬಾರೀ ಕೋಪ ಬತ್ತ್‌ದ್ ಆ ಪೊಂಜೊವುನ ಬಾಕಿ ಸಂತಾನದಾಕುಲೆಡೊಪ್ಪ ಅಂದ್ಂಡ ದೇವೆರೆ ಅಪ್ಪಣೆಲೆನ್ ಕೈಕೊಂದು ಯೇಸುಗಾದ್ ತನ್ಕುಲೆ ಸಾಕ್ಷಿನ್ ಪತ್ತೊಂದಿನಾಕುಲೆಡೊಪ್ಪ ಲಡಯಿಗ್ ಪಿದಾಡಿಯೆ.

¹⁸ ಆಯೆ ಬೊಕ್ಕ ಕಡಲ ಬರಿತ ಪೊಯ್ಯೆದ ಮಿತ್ತ್ ಉಂತೊಂಡೆ.