ಪ್ರಕಟಣೆ 11 - ಪೊಸ ಒಡಂಬಡಿಕೆ

ರಡ್ಡ್ ಸಾಕ್ಷಿಲು

¹ ಐಡ್ದ್ ಬೊಕ್ಕ ದಂಟೆದ ಲೆಕ್ಕ ಇತ್ತಿ ಒಂಜಿ ಲಪ್ಪುನ ಕೋಲುನು ಎನ ಕೈಕ್ ಕೊರ್ದು ಇಂಚ ಸ್ವರ ಆಂಡ್, “ಈ ಪೋದು ದೇವೆರೆ ಆಲಯೊನ್ಲಾ ಬಲಿಪೀಠೊನ್ಲಾ ಲತ್ತ್‌ದ್, ಆಲಯೊಡು ಆರಾಧನೆ ಮಲ್ಪುನಾಕುಲೆನ್ಲಾ ಲೆಕ್ಕ ಮಲ್ಪುಲ.

² ಆಲಯೊಗು ಪಿದಯಿ ಉಪ್ಪು ಜಾಲ್‌ನ್ ಲಪ್ಪಂದೆ ಬುಡ್ದು ಬುಡು. ಅವು ಪಿದಯಿದ ಜನೊಕುಲೆಗ್ ಬುಡ್ತುಂಡು. ಅಕುಲು ಪರಿಶುದ್ಧ ಪೇಂಟೆನ್‌ ನಲ್ಪತ್ತರಡ್ಡ್ ತಿಂಗೊಲು ದೊಂಕೊಂದುಪ್ಪುವೆರ್.

³ ಉಂದತ್ತಂದೆ ಎನ ಇರ್ವೆರ್ ಸಾಕ್ಷಿಲು ಗೋಣಿ ಪೊದೆತೊಂದು ಒಂಜಿ ಸಾರದ ಇರ್ನೂತ ಅಜ್ಪ ದಿನ ಮುಟ್ಟ ಪ್ರವಾದನೆ ಮಲ್ಪುಲೆಕ್ಕ ಮಲ್ಪುವೆ.”

⁴ ಭೂಮಿದ ಕರ್ತವ ಎದುರುಡು ಉಂತುದುಪ್ಪು ರಡ್ಡ್ ಇಪ್ಪೆದ ಮರೊಕುಲುಲಾ ರಡ್ಡ್ ದೀಪಕಂಬೊಲುಲಾ ಮೊಕುಲೇ.

⁵ ಮೊಕ್ಲೆಗ್ ಏರಾಂಡಲಾ ಹಾನಿ ಮಲ್ಪೊಡು ಅಂದ್‌ದ್ ಇತ್ತ್ಂಡ ಮೊಕ್ಲೆ ಬಾಯಿಡ್ದ್ ತೂ ಪಿದಾಡ್ದ್ ಮೊಕ್ಲೆನ ಪಗೆತಾಕುಲೆನ್ ಪೊತ್ತಾದ್ ಬುಡ್ಪುಂಡು. ಮೊಕ್ಲೆಗ್ ಕೇಡ್ ಮಲ್ಪೊಡು ಅಂದ್‌ದ್ ಬಯಕುನಾಕುಲೆಗ್ ಆ ರೀತಿಡ್ ಕೆರೊಡು.

⁶ ತನ್ಕುಲು ಪ್ರವಾದನೆ ಮಲ್ಪುನ ದಿನೊಕುಲೆಡ್ ಬರ್ಸ ಬೂರಂದಿಲೆಕ್ಕ ಬಾನೊನು ಮುಚ್ಚುನ ಅಧಿಕಾರ ಮೊಕ್ಲೆಗ್ ಉಂಡು. ಉಂದತ್ತಂದೆ ಮೊಕ್ಲೆಗ್ ಮನಸ್‌ಗ್ ಬತ್ತಿನಪಗ ಮಾತ ತುದೆ ಸಮುದ್ರೊಲೆ ನೀರ್‌ನ್ ನೆತ್ತೆರ್ ಮಲ್ಪೆರೆಗ್ಲಾ ಭೂಮಿಗ್ ಮಾತ ತರತ ಉಪದ್ರ ಕೊರಿಯೆರೆಗ್ಲಾ ಅಧಿಕಾರ ಉಂಡು.

⁷ ಮೊಕುಲು ತನ್ಕುಲೆ ಸಾಕ್ಷಿನ್ ಪಂಡ್ದ್ ಮುಗಿತಿ ಬೊಕ್ಕ ಪಾತಾಳೊಡ್ದು ಬತ್ತಿನ ಮೃಗ ಮೊಕ್ಲೆನ ಮಿತ್ತ್ ಬೂರ್ದು ಮೊಕ್ಲೆನ್ ಸೋಪಾದ್ ಕೆರ್ಪುಂಡು.

⁸ ಈ ಸಾಕ್ಷಿಲೆ ಪುಣೊಕುಲು ಮಲ್ಲ ಪಟ್ಟಣದ ಸಾದಿಡ್ ಬೂರ್ದುಪ್ಪುಂಡು. ಆ ಪಟ್ಟಣದ ಗುರ್ತೊಗು ಸೋದೋಮು ಪಂಡ್ದ್‌ಲಾ ಐಗುಪ್ತ ಪಂಡ್ದ್‌ಲಾ ಪುದರ್‌ಲು ಉಂಡು. ಅಕ್ಲೆ ಕರ್ತವನ್ಲಾ ಅವುಲೇ ಕ್ರುಸ್ಸುಡು ಪಾಡ್ದ್ ಇತ್ತೆರ್.

⁹ ಮಾತ ಪ್ರಜೆ, ಗೋತ್ರ, ಭಾಷೆ, ಜನಾಂಗೊಲೆಗ್ ಸೇರ್ದಿನಾಕುಲು ಈ ಸಾಕ್ಷಿಲೆ ಪುಣೊನು ಮೂಜರೆ ದಿನ ಮುಟ್ಟ ತೂವೊಂದೇ ಉಪ್ಪುವೆರ್. ಐಕ್ಲೆನ್ ಸಮಾಧಿಡ್ ದೀವೆರೆ ಬುಡ್ಪುಜೆರ್.

¹⁰ ಈ ರಡ್ಡ್ ಪ್ರವಾದಿಲು ಲೋಕದ ಜನೊಕುಲೆನ್ ಪೀಡೆ ಕೊರಿನೆಕ್ಕಾದ್ ಮೊಕುಲು ಸೈತಿನೆಕ್ಕ್ ಲೋಕದಾಕುಲು ಸಂತೋಷ ಮಲ್ತೊಂದು ಒರಿ ಒರಿಯಗ್ ಉಡಿಗೆರೆಲೆನ್ ಪಟ್ಟೊನ್ವೆರ್.

¹¹ ಆಂಡ ಮೂಜನೆ ದಿನತ ಬೊಕ್ಕ ದೇವೆರೆಡ್ದ್ ಜೀವದ ಆತ್ಮ ಆ ಪುಣೊಕುಲೆಡ್ ಸೇರುಂಡು; ಅಕುಲು ಕಾರೂರುದು ಉಂತಿಯೆರ್. ಅಕ್ಲೆನ್ ತೂಯಿನಾಕುಲೆಗ್ ಮಲ್ಲ ಪೋಡಿಗೆ ಪತ್ತ್ಂಡ್.

¹² ಬೊಕ್ಕ ಅಕ್ಲೆಗ್, “ಮುಲ್ಪ ಮಿತ್ತ್ ಬಲೆ,” ಪನ್ಪಿ ಸ್ವರ ಬಾನೊಡ್ದು ಪಂಡ್ಂಡ್. ಅವೆನ್ ಅಕುಲು ಕೇಂಡ್ದ್ ಅಕ್ಲೆನ ಪಗೆಮಾನಿಲು ತೂವೊಂದಿತ್ತಿಲೆಕ್ಕನೇ ಮುಗಲ್‌ಡ್ ಪರಲೋಕೊಗು ಏರ್ದ್ ಪೋಯೆರ್.

¹³ ಅವ್ವೇ ಗಳಿಗೆಡ್ ಮಲ್ಲ ಭೂಕಂಪ ಉಂಡಾದ್ ಆ ಪಟ್ಟಣದ ಪತ್ತೆಟ್ಟ್ ಒಂಜಿ ಪಾಲ್ ನಾಶಾದ್ ಪೋಂಡು. ಆ ಭೂಕಂಪೊಡ್ದು ಏಳ್‌ ಸಾರ ಜನೊಕುಲು ಸೈತ್ ಪೋಯೆರ್. ಒರಿದಿನಾಕುಲು ಪೋಡಿಗೆಡ್ ಪರಲೋಕದ ದೇವೆರೆಗ್ ಮೈಮೆನ್ ಕೊರಿಯೆರ್.

¹⁴ ರಡ್ಡನೆ ಅಪತ್ತ್ ಕರಿದ್ ಪೋಂಡು. ಇಂದಾ ಮೂಜನೇ ಅಪತ್ತ್ ಬೇಗನೆ ಬರ್ಪುಂಡು.

ಏಳನೆ ತುತೂರಿ

¹⁵ ಬೊಕ್ಕ ಏಳನೇ ದೂತೆ ತುತೂರಿ ಉರ್ಪುನಗ ಪರಲೋಕೊಡು ಮಲ್ಲ ಶಬ್ಧ ಆದ್ ಪಂಡಿನಿ, “ಲೋಕದ ರಾಜ್ಯಾಧಿಕಾರ ನಮ ಕರ್ತವಗ್ಲಾ ಆಯೆ ಅಭಿಷೇಕ ಮಲ್ತಿನಾಯಗ್ಲಾ ಉಂಡಾಂಡ್, ಆಯೆ ಏನಿತ್ಯೇನಿಗ್ಲಾ ಆಳುವೆ,” ಅಂದ್‌ದ್ ಪಂಡ್ಂಡ್.

¹⁶ ಐಡ್ದ್ ಬೊಕ್ಕ ದೇವೆರೆ ಎದುರುಡು ಗದ್ದಿಗೆಡ್ ಕುಲ್ಲುದಿತ್ತಿನ ಇರ್ವತ್ತನಾಲ್ ಹಿರಿಯೆರ್ ಅಡ್ಡಬೂರ್ದು,

¹⁷ ಪಂಡಿನಿ ದಾನೆಂದ್ಂಡ, “ಕರ್ತವಾ, ಸರ್ವಶಕ್ತೆ ಆದುಪ್ಪು ದೇವೆರೆ, ಉಪ್ಪುನಾಯೆ, ಇತ್ತಿನಾಯೆ ಈ ನಿನ ಮಲ್ಲ ಅಧಿಕಾರೊನು ವೈಸೊಂದು ಆಳಿನೆಡ್ದ್ ನಿಕ್ಕ್ ಉಪಕಾರ ಸ್ತುತಿ ಸಂದಾವ.

¹⁸ ಜನಾಂಗೊಲು ಕೋಪೊಡು ದಿಂಜಿದಿತ್ತ. ನಿನ ಕೋಪಲಾ ತೋಜಿದ್ ಬತ್ತ್ಂಡ್. ಸೈತಿನಾಕುಲು ತೀರ್ಪು ಹೊಂದುನ ಸಮಯ ಬತ್ತ್ಂಡ್, ನಿನ ಸೇವಕೆರಾಯಿ ಪ್ರವಾದಿಲೆಗ್ಲಾ ನಿನ ದೇವಜನೊಕುಲೆಗ್ಲಾ ನಿನ ಪುದರ್‌ಗ್ ಪೋಡಿಯು ಎಲ್ಯಾಕ್ಲೆಗ್ಲಾ ಮಲ್ಲಾಕ್ಲೆಗ್ಲಾ ಉಡಿಗೆರೆನ್ ಕೊರ್ದು ಲೋಕೊನು ನಾಶ ಮಲ್ಪುನಾಕುಲೆನ್ ನಾಶ ಮಲ್ಪೆರೆಲಾ ಸಮಯ ಬತ್ತ್ಂಡ್,” ಅಂದ್‌ದ್ ಆಯಗ್ ಆರಾಧನೆ ಮಲ್ತೆರ್.

¹⁹ ಅಪಗ ಪರಲೋಕೊಡುಪ್ಪು ದೇವೆರೆ ಆಲಯ ಜತ್ತ್ಂಡ್. ಆಯನ ಆಲಯೊಡು ಆಯ ಒಡಂಬಡಿಕೆದ ಮಂಜೂಷ ತೋಜ್ಂಡ್. ಉಂದತ್ತಂದೆ ಮಿಂಚಿ, ಶಬ್ಧ, ತೆಡಿಲ್, ಭೂಕಂಪ, ಮಲ್ಲ ಆನೆಕಲ್ಲ್‌ದ ಬರ್ಸ ಉಂಡಾಂಡ್.