ಮಾರ್ಕೆ 6 - ಪೊಸ ಒಡಂಬಡಿಕೆ

ನಜರೇತ್‌ಡ್ ಯೇಸುನು ತಿರಸ್ಕಾರ ಮಲ್ಪುನವು

¹ ಯೇಸು ಅಲ್ತ್‌ಡ್ದ್ ತನ ಊರುಗು ಪಿರ ಬತ್ತೆ. ಶಿಷ್ಯೆರ್ ಆಯನ ಬೆರಿಯೆ ಬತ್ತೆರ್.

² ಸಬ್ಬತ್‌ದಿನೊಟು ಸಭಾಮಂದಿರೊಗು ಪೋದು ಬೋಧನೆ ಮಲ್ಪರೆ ಸುರು ಮಲ್ತೆ. ಅವುಲು ಮಸ್ತ್ ಜನೊಕುಲು ಆಯನ ಬೋಧನೆ ಕೇಂಡ್ದ್ ಅಚ್ಚಿರ ಆಯೆರ್. “ಉಂಬ್ಯಗ್ ಈ ಪಾತೆರೊಲು ಒಲ್ತುಡ್ದು ಬತ್ತ್ಂಡ್? ಇಂಬ್ಯಗ್ ಉಪ್ಪುನ ಗೇನೊಲು ಎಂಚಿನವು? ಉಂಬ್ಯನ ಕೈಡ್ದ್ ಇಂಚಿತ್ತಿ ಕಾರ್ನಿಕೊಲು ಆಪಿನಾಂಡಲಾ ಎಂಚ?

³ ಉಂಬೆ ಮರತ ಬೇಲೆದಾಯೆ ಅತ್ತಾ? ಉಂಬೆ ಮರಿಯನ ಮಗೆ ಅತ್ತಾ? ಯಾಕೋಬು, ಯೋಸೆ, ಯೂದೆ, ಸೀಮೋನೆ ಮಾತ ಆಯನ ಮೆಗ್ಯಾಡ್ಲು ಅತ್ತಾ? ಇಂಬೆನ ಮೆಗ್ದಿಯಾಡ್ಲುಲಾ ಮಾತ ನಮೊಟ್ಟುಗು ಉಲ್ಲೆರತ್ತಾ?” ಅಂದ್‌ದ್ ತಿರಸ್ಕಾರ ಮಲ್ತೆರ್.

⁴ ಯೇಸು ಅಕ್ಲೆಡ, “ಪ್ರವಾದಿಗ್ ಮಾತ ಕಡೆಟ್ಲಾ ಮರ್ಯಾದಿ ಉಂಡು; ಆಂಡ ಸ್ವಂತ ಊರುಡ್ಲಾ, ಸ್ವಂತ ಜನೊಕುಲೆಡ್ಲಾ ಸ್ವಂತ ಇಲ್ಲಡ್ಲಾ ಮರ್ಯಾದಿ ಇಜ್ಜಿ,” ಪಂಡೆ

⁵ ಆಯೆ ಅಲ್ಪ ಕೆಲವು ಸೀಕ್‌ದಾಕುಲೆನ ಮಿತ್ತ್ ಕೈ ದೀದ್ ಗುಣ ಮಲ್ತಿನೇ ಅತ್ತಂದೆ ಬೇತೆ ವಾ ಕಾರ್ನಿಕೊಲೆನ್ಲಾ ಮಲ್ಪೆರೆ ಆಯಿಜಿ.

⁶ ಅಕ್ಲೆನ ಅಪನಂಬಿಕೆನ್ ತೂದು ಆಯೆ ಅಚ್ಚಿರ ಆಯೆ.

ಯೇಸು ಪದ್ರಾಡ್ ಶಿಷ್ಯೆರೆನ್ ಕಡಪುಡುನವು

⁷ ಬೊಕ್ಕ ಪದ್ರಾಡ್ ಶಿಷ್ಯೆರೆನ್ ಕೈತಲ್ ಲೆತ್ತ್‌ದ್ ಅಕ್ಲೆನ್ ಇರ್ವೆರ್ ಇರ್ವೆರಾದ್ ಕಡಪುಡಿಯೆ. ಕಡಪುಡುನಪಗ ಆಯೆ ಅಕ್ಲೆಗ್ ದೆವ್ವೊಲೆ ಮಿತ್ತ್ ಅಧಿಕಾರ ಕೊರಿಯೆ.

^8-9 “ಕೋಲು ಅತ್ತಂದೆ ಸಾದಿಗ್ ದಾಲಾ ದೆತ್ತೊಂದು ಪೋವಡೆ. ಬುತ್ತಿ, ಜೋಳಿಗೆ, ಸೊಂಟ್ಟಪಟ್ಟಿಡ್ ಕಾಸ್ ದಾಲ ಬೊಡ್ಚಿ, ಕಾರ್‌ಗ್ ಜೋಡು ಪಾಡೊಲಿ ಆಂಡ ರಡ್ಡ್ ಅಂಗಿ ಬೊಡ್ಚಿ,” ಅಂದ್‌ದ್ ಅಪ್ಪಣೆ ಕೊರಿಯೆ.

¹⁰ ಉಂದತ್ತಂದೆ ಆಯೆ ಅಕ್ಲೆಡ, “ನಿಕುಲು ಒಂಜಿ ಇಲ್ಲಗ್ ಪೋಂಡ, ಆ ಊರು ಬುಡ್ಪಿನೆಟ್ಟ, ಅವುಲೇ ಉಪ್ಪುಲೆ.

¹¹ ಬೊಕ್ಕ ಒವ್ವಾಂಡಲಾ ಒಂಜಿ ಊರುದಾಕುಲು ನಿಕ್ಲೆನ್ ಸೇರಾವಂದೆ, ನಿಕುಲು ಪನ್ಪಿ ಪಾತೆರೊನು ಕೇನಿಜೆರ್ಡ ಆ ಇಲ್ಲಡ್ದಾವಡ್, ಊರುಡ್ದಾವಡ್ ಪಿದಾಡ್ದ್ ಪೋನಗ ನಿಕ್ಲೆ ಕಾರ್‌ದ ಧೂಳುನು ಕುಡ್ತ್‌ದ್ ಪೋಲೆ. ಅವು ಅಕ್ಲೆಗ್ ಸಾಕ್ಷಿಯಾದ್ ಉಪ್ಪಡ್,” ಅಂದ್‌ದ್ ಪಂಡೆ.

¹² ಅಂಚೆನೇ ಅಕುಲು ಪಿದಾಡ್ದ್ ಪೋದು ಜನೊಕುಲೆಗ್, ನಿಕುಲು ಪಶ್ಚಾತಾಪ ಪಡೆಲೆ ಅಂದ್‌ದ್ ಸಾರಿಯೊಂದು,

¹³ ಮಸ್ತ್ ದೆವ್ವೊಲೆನ್ ಬುಡ್ಪಾದ್, ಕೆಲವು ಸೀಕ್‌ದಾಕುಲೆನ್ ಎಣ್ಣೆ ಪೂಜಿದ್ ಗುಣ ಮಲ್ತೆರ್.

ಸ್ನಾನಿಕೆ ಯೋಹಾನನ ಮರಣ

¹⁴ ಬೊಕ್ಕ ಅರಸು ಆಯಿ ಹೆರೋದೆ, ಯೇಸುನ ಸುದ್ಧಿನ್ ಕೇಂಡೆ. ದಾಯೆ ಪಂಡ ಆಯನ ಪುದರ್ ಮಸ್ತ್ ಜಾಗ್‌ಡ್ ಪುದರ್ ಪೋದಿತ್ತ್‌ಂಡ್, ಬೊಕ್ಕ ಜನೊಕುಲು ಆಯನ ಸಂಗತಿಡ್, “ಸ್ನಾನಿಕೆ ಆಯಿ ಯೋಹಾನೆ ಸೈತಿನಾಕುಲೆಡ್ದ್ ಲಕ್ಕ್‌ದ್ ಬೈದೆ. ಐಡ್ದಾವರ ಕಾರ್ನಿಕೊಲೆನ್ ನಡಪಾವು ಶಕ್ತಿ ಆಯಡ ಉಂಡು,” ಅಂದ್‌ದ್ ಪನೊಂದಿತ್ತೆರ್.

¹⁵ ಕೆಲೆವೆರ್, “ಆಯೆ ಎಲೀಯೆ,” ಬೊಕ್ಕ ಕೆಲೆವೆರ್, “ಆಯೆ ಒರಿ ಪ್ರವಾದಿ ಇಜ್ಜಿಡ ಪಿರಕ್‌ದ ಪ್ರವಾದಿಲೆಡ್ ಒರಿ,” ಪಂಡೆರ್.

¹⁶ ಆಂಡ ಹೆರೋದೆ ಆಯನ ಸುದ್ಧಿನ್ ಕೇಂಡ್ದ್, “ತಾನ್ ತರೆ ಕಡ್ಪಾದಿನ ಯೋಹಾನೆನೇ ಕುಡ ಲಕ್ಕ್‌ದ್ ಬೈದೆ,” ಪಂಡೆ

¹⁷ ಹೆರೋದೆ ಹೆರೋದ್ಯೆಲೆಗಾದ್ ಯೋಹಾನನ್ ಪತ್ತ್‌ದ್ ಸೆರೆಮನೆಟ್ ಪಾಡ್ದಿತ್ತೆ. ಆ ಹೆರೋದ್ಯೆಲ್ ಹೆರೋದನ ಪಲಯೆ ಆಯಿ ಫಿಲಿಪ್ಪನ ಬೊಡೆದಿ.

¹⁸ ಯೋಹಾನೆ ಹೆರೋದಗ್, “ನಿನ ಪಲಯನ ಬೊಡೆದಿನ್ ದೀವೊಂದುಪ್ಪುನವು ನ್ಯಾಯ ಅತ್ತ್,” ಅಂದ್‌ದ್ ಪನೊಂದಿತ್ತೆ.

¹⁹ ನೆಕ್ಕ್ ಹೆರೋದ್ಯೆಲ್ ಯೋಹಾನನ ಮಿತ್ತ್ ಪಗೆ ದೀವೊಂದು ಆಯನ್ ಕೆರ್ಪಾವೊಡು ಅಂದ್‌ದ್ ಇತ್ತ್ಂಡಲಾ ಆಲೆಡ ಆವಂದೆ ಪೋಂಡು.

²⁰ ದಾಯೆಗ್ ಪಂಡ, ಯೋಹಾನೆ ನೀತಿವಂತೆಲಾ ಪರಿಶುದ್ಧೆ ಆಯಿ ನರಮಾನಿ ಅಂದ್‌ದ್ ಹೆರೋದೆ ತೆರಿದ್ ಆಯಗ್ ಪೋಡಿದ್ ಆಯಗ್ ವಾ ಅಪಾಯಲಾ ಬರಂದಿಲೆಕ್ಕ ಜೋಕೆ ಮಲ್ತೊಂದಿತ್ತೆ. ಉಂದತ್ತಂದೆ ಯೋಹಾನೆ ಪಂಡಿನೆನ್ ಆಯೆ ಕೇಂಡಿನಪಗ ಉಡಲ್‌ಡ್ ಬಾರಿ ಗಲಿಬಿಲಿ ಪುಟ್ಟುಂಡಲಾ ಆಯನ ಪಾತೆರೊನು ಸಂತೋಷೊಡು ಕೇನೊಂದಿತ್ತೆ.

²¹ ಇಂಚ ಉಪ್ಪುನಗ ಹೆರೋದ್ಯೆಲೆಗ್ ಅನುಕೂಲವಾಯಿನ ದಿನ ಬತ್ತ್ಂಡ್. ಎಂಚಂದ್ಂಡ ಹೆರೋದನ ಪುಟ್ಟಿ ದಿನೊಟು ತನ ಸರಕಾರದ ಅಧಿಕಾರಿಲೆಗ್ಲಾ ಸೈನಿಕೆರೆ ಅಧಿಪತಿಲೆಗ್ಲಾ, ಗಲಿಲಾಯದ ಮುಖ್ಯಸ್ಥೆರೆಗ್ಲಾ ಲೇಸ್‌ಗ್ ಲೆಪ್ಪು ಕೊರ್ದುಪ್ಪುನಗ,

²² ಹೆರೋದ್ಯೆಲೆನ ಮಗಲ್ ಬತ್ತ್‌ದ್ ನಾಟ್ಯ ಮಲ್ತ್‌ದ್ ಹೆರೋದನ್ಲಾ ಆಯಡೊಪ್ಪ ಪಂತೆಡ್ ಕುಲ್ಲುದಿತ್ತಿನಾಕುಲೆನ್ಲಾ ಮೆಚ್ಚಾಯಲ್. ಅರಸುಗು ಆಲೆನ ನಾಟ್ಯೊನು ತೂದು ಆಲೆಡ, “ನಿಕ್ಕ್ ಬೋಡಿತ್ತಿನೆನ್ ಕೇನ್ಲ, ಯಾನ್ ನಿಕ್ಕ್ ಕೊರ್ಪೆ.

²³ ಈ ಎಂಚಿನ ಕೇಂಡಲಾ ಯಾನ್ ಕೊರಿಯೆರೆ ತಯಾರ್ ಉಲ್ಲೆ. ಎನ ರಾಜ್ಯೊಡು ಅರ್ಧ ರಾಜ್ಯೊನು ಕೇಂಡಲಾ ನಿಕ್ಕ್ ಕೊರ್ಪೆ,” ಅಂದ್‌ದ್ ಆಜ ದೀದ್ ಪಂಡೆ.

²⁴ ಅಪಗ ಆಲ್ ಪಿದಯಿ ಪೋದು, “ದಾದ ಕೇನೊಡು?” ಅಂದ್‌ದ್ ತನ ಅಪ್ಪೆಡ ಕೇನ್ನಗ ಆಲ್, “ಸ್ನಾನಿಕೆ ಆಯಿ ಯೋಹಾನನ ತರೆನ್ ಕೇನ್ಲ,” ಅಂದಲ್.

²⁵ ಕೂಡ್ಲೆ ಆಲ್ ಅರಸುನ ಕೈತಲ್‌ ಅಮಸರೊಡು ಬತ್ತ್‌ದ್, “ಸ್ನಾನಿಕೆ ಯೋಹಾನನ ತರೆನ್ ಕಡ್ತ್‌ದ್ ಹರಿವಾಣೊಡು ಎಂಕ್ ಇತ್ತೆನೆ ತರ್ಪಾದ್ ಕೊರ್ಲ,” ಅಂದ್‌ದ್ ಪಂಡಲ್.

²⁶ ಆ ಅರಸು ಮಸ್ತ್ ದುಃಖ ಮಲ್ತೆಡಲಾ ತಾನ್ ದೀವೊಂದಿನ ಆಜಡ್ದಾವರ ತನಡೊಪ್ಪ ಪಂತೆಡ್ ಕುಲ್ಲೊಂದಿತ್ತಿನಾಕುಲೆಗಾದ್‌ಲಾ ಆಲೆನ್ ತಿರಸ್ಕಾರ ಮಲ್ಪರೆ ಆಯಗ್ ಮನಸ್ ಇಜ್ಜಾಂಡ್.

^27-28 ಅಪಗನೆ ಅರಸು ತನ ಸಿಪಾಯಿಲೆಡ್ ಒರಿಯಗ್, ಈ ಪೋದು ಯೋಹಾನನ ತರೆನ್ ಕನತ್ ಕೊರು ಅಂದ್‌ದ್ ಅಪ್ಪಣೆ ಕೊರ್ದು ಕಡಪುಡಿಯೆ. ಆ ಸಿಪಾಯಿ ಸೆರೆಮನೆಕ್ಕ್‌ ಪೋದು, ಯೋಹಾನನ ತರೆನ್ ಕಡ್ತ್‌ದ್ ಹರಿವಾಣೊಡು ಕನತ್‌ದ್ ಆ ಪೊಣ್ಣಗ್ ಕೊರಿಯೆ; ಆ ಪೊಣ್ಣು ಅವೆನ್ ತನ ಅಪ್ಪೆಗ್ ಕೊರಿಯಲ್.

²⁹ ಯೋಹಾನನ ಶಿಷ್ಯೆರ್ ಈ ಸಂಗತಿನ್ ತೆರಿ ಕೂಡ್ಲೆ ಬತ್ತ್‌ದ್ ಆಯನ ಪುಣೊನು ಕೊನೊದು ಸಮಾಧಿಡ್ ದೀಯೆರ್.

ಐನ್ ಸಾರ ಜನೊಕುಲೆಗ್ ವಣಸ್

³⁰ ಅಪೊಸ್ತಲೆರ್ ಪಿರ ಯೇಸು ಕೈತಲ್‌ ಕೂಡ್ದು ಬತ್ತೆರ್. ಅಕುಲು ಮಲ್ತಿನ ಮಾತ ಬೋಧನೆನ್ ಬೊಕ್ಕ ಕಾರ್ಯೊನು ಆಯಗ್ ತೆರಿಪಾಯೆರ್.

³¹ ಯೇಸು ಅಕ್ಲೆಡ, “ನಿಕುಲು ಪ್ರತ್ಯೇಕಾದ್ ಕಾಡ್‌ಗ್ ಬತ್ತ್‌ದ್, ಒಂತೆ ಆಯಸ ದೆಪ್ಪುಲೆ,” ಅಂದ್‌ದ್ ಪಂಡೆ. ದಾಯೆಗಂದ್ಂಡ ಮಸ್ತ್ ಜನೊಕುಲು ಬರೊಂದು ಪೋವೊಂದು ಇತ್ತಿನೆಡ್ದ್ ಯೇಸುಗ್ಲಾ ಆಯನ ಶಿಷ್ಯೆರೆಗ್ಲಾ ವಣಸ್ ಮಲ್ಪೆರೆಗ್ ಪುರ್ಸೊತ್ತು ತಿಕ್ಕ್‌ಜಿ.

³² ಅಪಗ ಅಕುಲು ಓಡೊಡು ಪಿದಾಡ್ದ್ ಪ್ರತ್ಯೇಕಾದ್ ಕಾಡ್ ಜಾಗ್‌ಗ್ ಪೋಯೆರ್.

³³ ಆಂಡ ಅಕುಲು ಪೋಪಿನೆನ್ ಮಸ್ತ್ ಜನೊಕುಲು ತೂದು ಅಕ್ಲೆನ ಗುರ್ತೊನು ಪತ್ತ್‌ದ್ ಮಾತ ಊರುಲೆಡ್ದ್ ನಡತೊಂದು ಪಾರೊಂದು ಪೋದು ಅಕ್ಲೆಡ್ದ್ ದುಂಬು ಅಡೆಗ್ ಸೇರಿಯೆರ್.

³⁴ ಯೇಸು ಓಡೊಡ್ದು ಜಪ್ಪುನಗ ಮಸ್ತ್ ಜನೊಕುಲೆ ಗುಂಪುನು ತೂದು ಮೊಕುಲು ಕುರುಬೆದಾಂತಿ ಕುರಿಕುಲೆ ಲೆಕ್ಕ ಉಲ್ಲೆರತ್ತಾ ಪಂಡ್ದ್, ಕನಿಕರ ಪಡೆದ್ ಅಕ್ಲೆಗ್ ಬೋಧನೆ ಕೊರಿಯೆರೆ ತೊಡಗಿಯೆ.

³⁵ ಆತ್‌ನೆಟ್ಟ ಪೊರ್ತು ಕಂತಿನೆಡ್ದಾವರ ಆಯನ ಶಿಷ್ಯೆರ್ ಕೈತಲ್‌ ಬತ್ತ್‌ದ್, “ಉಂದು ಕಾಡ್, ಪೊರ್ತು ಮಸ್ತ್ ಆತ್ಂಡ್.

³⁶ ಈ ಜನೊಕುಲೆಗ್ ಅಪ್ಪಣೆ ಕೊರ್ಲ, ಮೊಕುಲು ಕೈತಲುಪ್ಪು ಊರುಲೆಗ್ ಬೊಕ್ಕ ಹಳ್ಳಿಲೆಗ್ ಪೋದು ತನ್ಕುಲೆ ವಣಸ್‌ಗಾದ್ ದಾಲಾಂಡಲಾ ದೆತ್ತೊನೆರೆ ಕಡಪುಡುಲ,” ಪಂಡಿನೆಕ್ಕ್‌

³⁷ ಅಪಗ ಯೇಸು, “ನಿಕುಲೇ ಅಕ್ಲೆಗ್ ವಣಸ್ ಕೊರ್ಲೆ,” ಅಂದ್‌ದ್ ಉತ್ತರ ಕೊರಿಯೆ. ಐಕ್‌ ಅಕುಲು, “ಎಂಕುಲು ಪೋದು ಇರ್ನೂದು ಬೊಳ್ಳಿದ ಕಾಸ್‌ಗ್ ರೊಟ್ಟಿನ್ ದೆತ್ತೊಂದು ಅಕ್ಲೆಗ್ ವಣಸ್ ಕೊರೊಡಾ?” ಕೇಂಡಿನೆಕ್ಕ್

³⁸ ಯೇಸು, “ನಿಕ್ಲೆಡ ಏತ್ ರೊಟ್ಟಿಲು ಉಂಡು? ಪೋದು ತೂಲೆ,” ಪಂಡೆ, ಅಕುಲು ತೆರಿಯೊಂದು ಬತ್ತ್‌ದ್, “ಎಂಕ್ಲೆಡ ಐನ್ ರೊಟ್ಟಿ ರಡ್ಡ್ ಮೀನ್ ಉಂಡು,” ಪಂಡೆರ್.

³⁹ ಅಪಗ ಯೇಸು ಅಕ್ಲೆಗ್ ಮಾತೆರೆಗ್ಲಾ ಪಜಿರ್‌ದ ಮಿತ್ತ್ ಪಂತೆ ಪಂತೆ ಆದ್ ಕುಲ್ಲಿಯೆರೆ ಅಪ್ಪಣೆ ಕೊರಿಯೆ.

⁴⁰ ಜನೊಕುಲು ನೂದೆತ್ತ ಪಂತೆ, ಐವದ ಪಂತೆದ ಲೆಕ್ಕ ಸಾಲಾದ್ ಕುಲ್ಲೊಂಡೆರ್.

⁴¹ ಐಡ್ದ್ ಬೊಕ್ಕ ಯೇಸು ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು, ನಿಕುಲು ಜನೊಕುಲೆಗ್ ಪಟ್ಟ್‌ಲೆ ಅಂದ್‌ದ್ ಶಿಷ್ಯೆರೆ ಕೈಕ್ ಕೊರ್ದು; ಆ ರಡ್ಡ್ ಮೀನ್‌ನ್ಲಾ ಮಾತೆರೆಗ್ ಪಟ್ಟಾಯೆ.

⁴² ಅಕುಲು ಮಾತೆರ್ಲಾ ಬೋಡಿತ್ತಿನಾತ್ ತಿಂದೆರ್.

⁴³ ಒರಿದಿನ ರೊಟ್ಟಿ ಬೊಕ್ಕ ಮೀನ್‌ದ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.

⁴⁴ ಅಂಜೊವುಲೆ ಹೆಚ್ಚಿಕಡಿಮೆ ಐನ್ ಸಾರ ವಣಸ್ ಮಲ್ತಿನಾಕುಲು ಇತ್ತೆರ್.

ಯೇಸು ನೀರ್‌ದ ಮಿತ್ತ್ ನಡುಪುನವು

⁴⁵ ಉಂದು ಆಯಿ ಕೂಡ್ಲೆ ಯೇಸು ತನ ಶಿಷ್ಯೆರೆಗ್, “ಯಾನ್ ಈ ಜನೊಕುಲೆ ಗುಂಪುಲೆನ್ ಕಡಪುಡ್ದು ಕೊರ್ಪಿನೆಟ್ಟ ನಿಕುಲು ಓಡ ಮಿತ್ತಾರ್ದ್ ಎನಡ್ದ್ ದುಂಬು ಆಯೆರೆಗ್ ಬೆತ್ಸಾಯಿದಗ್ ಪೋಲೆ,” ಅಂದ್‌ದ್ ಒತ್ತಾಯ ಮಲ್ತೆ.

⁴⁶ ಆಯೆ ಜನೊಕುಲೆ ಗುಂಪುನು ಕಡಪುಡಿ ಬೊಕ್ಕ ಪ್ರಾರ್ಥನೆ ಮಲ್ಪೆರೆಗಾದ್ ಗುಡ್ಡೆಗ್ ಪೋಯೆ.

⁴⁷ ಪೊರ್ತು ಕಂತಿ ಬೊಕ್ಕ ಓಡ ಕಡಲ್ದ ನಡುಟು ಇತ್ತ್ಂಡ್. ಅಪಗ ಯೇಸು ಒರಿಯೇ ಕಡಲ್ದ ಕರೆಟ್ ಇತ್ತೆ.

⁴⁸ ಗಾಳಿ ಎದುರುಡು ಬೀಜೊಂದಿತ್ತಿನೆಡ್ದ್ ಶಿಷ್ಯೆರ್‌ಲು ಓಡ ಒಚ್ಚು ಒಚ್ಚುದು ಒದ್ದಾಡುನೆನ್ ಯೇಸು ತೂಯೆ. ಅಪಗ ಹೆಚ್ಚಿಕಡಿಮೆ ನಾಲನೆ ಜಾಮೊಡು ಕಡಲ್ದ ಮಿತ್ತ್ ನಡತ್‌ದ್ ಅಕ್ಲೆನ್ ದಾಂಟ್‌ದ್ ದುಂಬು ಪೋವೊಂದಿತ್ತೆ.

⁴⁹ ಆಂಡ ಅಕುಲು ಕಡಲ್ದ ಮೇಲ್‌ಡ್ ಆಯೆ ನಡಪುನೆನ್ ತೂದು, “ಅವು ಭೂತ” ಅಂದ್‌ದ್ ಎನ್ನ್‌ದ್ ಜೋರುಡು ಕಲ್ಕಿಯೆರ್.

⁵⁰ ದಾಯೆಗ್ ಪಂಡ ಅಕುಲು ಮಾತೆರ್ಲಾ ಆಯನ್ ತೂದು ತಳಮಳ ಆಯೆರ್. ಯೇಸು ಅಪಗನೆ ಅಕ್ಲೆಡ ಪಾತೆರ್‌ದ್ ಅಕ್ಲೆಗ್, “ಧೈರ್ಯ ಮಲ್ಪುಲೆ, ಯಾನೇ, ಪೋಡ್ಯಡೆ,” ಅಂದ್‌ದ್ ಪಂಡೆ.

⁵¹ ಆಯೆ ಓಡೊನು ಮಿತ್ತಾರ್ದ್ ಅಕ್ಲೆನ ಕೈತಲ್‌ ಬತ್ತಿ ಬೊಕ್ಕ ಬಿರುಗಾಳಿ ಉಂತುದು ಪೋಂಡು. ಅಪಗ ಶಿಷ್ಯೆರ್ ಮಸ್ತ್ ಅಚ್ಚಿರ ಆಯೆರ್.

⁵² ದಾಯೆಗಂದ್ಂಡ, ಅಕುಲು ರೊಟ್ಟಿದ ಕಾರ್ನಿಕೊಲೆನ್ ತೂದುಲಾ ಅರ್ಥ ಮಲ್ತೊಂದಿಜೆರ್, ಅಕ್ಲೆನ ಉಡಲ್ ಕಲ್ಲಾದಿತ್ತ್‌ಂಡ್.

ಗೆನೇಜರೇತುಡು ಸೀಕ್‌ದಾಕುಲೆನ್ ಗುಣ ಮಲ್ಪುನವು

⁵³ ಅಕುಲು ಕಡಲ್‌ನ್ ದಾಂಟ್‌ದ್ ಗೆನೇಜರೇತುದ ಕರೆಕ್ ಮುಟ್ಟುದು ಓಡೊನು ಕಡಲ್ದ ಕರೆಟ್ ಕಟ್ಟಿಯೆರ್.

⁵⁴ ಅಕುಲು ಓಡೊಡ್ದು ಜತ್ತಿ ಕೂಡ್ಲೆ ಅಲ್ಪದ ಜನೊಕುಲು ಯೇಸುನ ಗುರ್ತ ಪತ್ತ್‌ದ್,

⁵⁵ ಊರೀಡಿ ತಿರ್ಗ್‌ದ್ ಸೀಕ್ ಸಂಕಟದಾಕುಲೆನ್ ಪಜೆಟ್ ತುಂಬೊಂದು ಯೇಸು ಓಲುಲ್ಲೆ ಅಂದ್‌ದ್ ಕೇಂಡೆರಾ, ಅಡೆಗಡೆಗ್ ಲೆತ್ತೊಂದು ಪೋಯೆರ್.

⁵⁶ ಆಯೆ ವಾ ಹಳ್ಳಿ, ವಾ ಊರು, ವಾ ಪೇಂಟೆಲೆಗ್ ಪೋಯೆನಾ ಅಲ್ಪದಾಕುಲು ಸೀಕ್‌ದಾಕುಲೆನ್ ಕನತ್‌ದ್ ಸಾದಿಲೆಡ್ ದೀದ್ ನಿನ ಕುಂಟುದ ಗೊಂಡೆನಾಂಡಲಾ ಮುಟ್ಟಿಯೆರೆ ಬುಡೊಡು ಅಂದ್‌ದ್ ಯೇಸುಡ ನಟ್ಟೊಂಡೆರ್. ಆಯನ್ ಮುಟ್ಟಿನಾಕುಲು ಮಾತ ಗುಣ ಆಯೆರ್.