ಮಾರ್ಕೆ 4 - ಪೊಸ ಒಡಂಬಡಿಕೆಬೆನ್ನಿದಾಯನ ಉಪಕತೆ ( ಮತ್ತಾಯೆ 13:19 ; ಲೂಕೆ 8:48 ) 1 ಯೇಸು ಕುಡ ಕಡಲ ಬರಿಟ್ಟ್ ಬೋಧನೆ ಮಲ್ಪೆರೆ ಸುರು ಮಲ್ತೆ. ದಿಂಜ ಜನ ಆಯನ ಕೈತಲ್‌ ಸೇರ್ದ್ ಬತ್ತಿನೆಡ್ದ್ ಆಯೆ ಕಡಲ್‌ಡಿತ್ತಿ ಓಡ ಮಿತ್ತಾರ್ದ್ ಕುಲ್ಲಿಯೆ. 2 ಆ ಜನೊಕುಲೆ ಗುಂಪು ಕಡಲ್ದ ಕರೆಟ್ ಇತ್ತೆರ್. ಅಪಗ ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಕೆಲವು ಬೋಧನೆ ಮಲ್ತೆ. ಆ ಬೋಧನೆಡ್ ಪಂಡಿನಿ ದಾನೆಂದ್ಂಡ, 3 “ಕೇನ್ಲೆ, ಬಿತ್ತುನಾಯೆ ಬಿತ್ತಿಯೆರೆ ಪಿದಾಡಿಯೆ. 4 ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್‌ಂಡ್. ಪಕ್ಕಿಲು ಬತ್ತ್‌ದ್ ತಿಂದ್‌ದ್ ಬುಡಿಯ. 5 ಕೆಲವು ಬಿತ್ತ್ ಮಣ್ಣ್‌ದಾಂತಿ ಪಾದೆದ ನೆಲೊಟ್ಟು ಬೂರ್‌ಂಡ್. ಮಣ್ಣ್ ತೆಲ್ಪು ಇತ್ತಿನೆಡ್ದ್ ಬೇಗ ಮುಂಗೆ ಬತ್ತ್ಂಡ್. 6 ಆಂಡ ಸೂರ್ಯನ ದೊಂಬು ಅರ್ಲುನಗ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ನುಂಗುದು ಪೋಂಡು. 7 ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಕ್ಲೆಡ್ ಬೂರ್‌ಂಡ್. ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಯಿನೆಡ್ದ್ ಅವು ಫಲ ಕೊರ್ಜಿ. 8 ಕೆಲವು ಬಿತ್ತ್ ಎಡ್ಡೆ ಭೂಮಿದ ಮಿತ್ತ್ ಬೂರ್ದು, ಅವು ಕೊಡಿದ್ ಬುಲೆದ್ ಫಲ ಕೊರ್ದು ಐಟ್ಟ್ ಕೆಲವು ಮುಪ್ಪದಾತ್, ಕೆಲವು ಅಜ್ಪದಾತ್, ಕೆಲವು ನೂದೆದಾತ್ ಫಲ ಕೊರ್ಯ.” 9 ಬೊಕ್ಕ ಅಕ್ಲೆಡ, “ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಪಂಡೆ. ಉಪಕತೆತ್ತ ಅರ್ಥ ಪನ್ಪಿನವು ( ಮತ್ತಾಯೆ 13:10-17 ; ಲೂಕೆ 8:9 , 10 ) 10 ಆಯೆ ಒರಿಯೇ ಉಪ್ಪುನಗ, ಆಯನ ಕೈತಲ್‌ದ ಪದ್ರಾಡ್ ಶಿಷ್ಯೆರ್‌ನಾಕುಲು ಆ ಉಪಕತೆತ್ತ ಸಂಗತಿಡ್ ಆಯಡ ಕೇಂಡೆರ್. 11 ಆಯೆ ಅಕ್ಲೆಡ ಪಂಡಿನಿ, “ದೇವೆರೆ ರಾಜ್ಯದ ಗುಟ್ಟು ನಿಕ್ಲೆಗ್ ಕೊರ್ತುಂಡು. ಆಂಡ ಪಿದಯಿದ ಜನೊಕುಲೆಗ್ ಉಪಕತೆತ್ತ ರೂಪೊಡು ತೆರಿಪಾವೆ, 12 ದಾಯೆಗ್ ಪಂಡ, ‘ಅಕುಲು ಕಣ್ಣ್‌ಡ್ ತೂಂಡಲಾ ಅಕ್ಲೆಗ್ ಗೊತ್ತಾಪುಜಿ, ಕೆಬಿಟ್ ಕೇಂಡಲಾ ಅಕ್ಲೆಗ್ ಅರ್ಥ ಆಪುಜಿ, ಅಂಚ ತೂದು ತೆರಿಯೊಂದು ಅಕುಲು ದೇವೆರೆ ಕಡೆಕ್ಕ್ ತಿರ್ಗಿಯೆರ್ಡ, ಪಾಪೊಡ್ದು ಮಾಪು ಅಕ್ಲೆಗ್ ಆಪುಂಡು.’” ಬಿತ್ತುನಾಯನ ಉಪಕತೆತ್ತ ಅರ್ಥ ಪನ್ಪಿನವು. ( ಮತ್ತಾಯೆ 13:18-23 ; ಲೂಕೆ 8:11-15 ) 13 ಐಡ್ದ್ ಬೊಕ್ಕ ಆಯೆ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ಈ ಉಪಕತೆತ್ತ ಅರ್ಥ ನಿಕ್ಲೆಗ್ ಗೊತ್ತಾಯಿಜಾ? ಅಂಚಾಂಡ ಬೇತೆ ಉಪಕತೆತ್ತ ಅರ್ಥ ನಿಕುಲು ಎಂಚ ತೆರಿಯೊನ್ವರ್? 14 ಬಿತ್ತುನಾಯೆ ಪಾತೆರೊನು ಬಿತ್ತುವೆ. 15 ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಸೈತಾನೆ ಬತ್ತ್‌ದ್ ಅಕ್ಲೆಡ್ ಬಿತ್ತ್‌ದಿತ್ತಿ ಪಾತೆರೊನು ದೆತ್ತ್‌ದ್ ಬುಡ್ಪೆ. ಮೊಕುಲೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತುಲು ಆದುಪ್ಪುವೆರ್. 16-17 ಅವ್ವೇ ಪ್ರಕಾರ ಬೇತೆ ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಸಂತೋಷೊಡು ಅವೆನ್ ಸ್ವೀಕಾರ ಮಲ್ಪುವೆರ್. ತನ್ಕುಲೆನ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್, ಮೊಕುಲು ಒಂತೆ ಕಾಲ ಮಾತ್ರ ಇತ್ತ್‌ದ್ ಆ ಪಾತೆರೊಡ್ದು, ಕಷ್ಟ ಆವಡ್ ಭಂಗ ಆವಡ್ ಬತ್ತ್ಂಡ, ಬೇಗನೇ ದಂಟ್‌ದ್ ಬೂರ್ವೆರ್. ಮೊಕುಲು ಪಾದೆ ಜಾಗ್‌ಡ್ ಬಿತ್ತ್ ಬೂರ್ದಿನಾಕುಲು ಆದುಪ್ಪುವೆರ್. 18-19 ನನ ಕೆಲೆವೆರ್ ಪಾತೆರೊನು ಕೇಂಡಲಾ ಲೋಕದ ಚಿಂತೆಲಾ, ಐಶ್ವರ್ಯೊಡ್ದು ಆಪಿನ ಮೋಸಲಾ, ತರತರತ ಇಚ್ಚೆಡ್ ಆ ಪಾತೆರೊನು ದೆಂಗಾವುನೆಡ್ದ್ ಫಲ ಕೊರಂದೆ ಉಪ್ಪುವೆರ್. ಮೊಕುಲೇ ಮುಳ್ಳುಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆರ್. 20 ಬೊಕ್ಕ ಕೆಲೆವೆರ್ ಪಾತೆರೊನು ಕೇಂಡ್ದ್ ಅಂಚೆನೆ ನಡತ್‌ದ್ ಮುಪ್ಪದಾತ್, ಅಜ್ಪದಾತ್, ನೂದೆದಾತ್ ಫಲೊನು ಕೊರ್ಪೆರ್. ಮೊಕುಲೇ ಬಿತ್ತ್ ಬೂರ್ದಿನ ಎಡ್ಡೆ ನೆಲ ಆದುಲ್ಲೆರ್.” ಅಂದ್‌ದ್ ಯೇಸು ಪಂಡೆ. ಕಲಸೆದುಲಯಿ ತುಡರ್ ( ಲೂಕೆ 8:16-18 ) 21 ಬೊಕ್ಕ ಯೇಸು ಅಕ್ಲೆಡ, “ತುಡರ್‌ನ್ ಕನತ್‌ದ್ ಕಲಸೆದುಲಯಿ ಇಜ್ಜಿಂಡ ಮಂಚವುದ ಅಡಿಟ್ಟ್ ದೀಪಿನ ಉಂಡಾ? ಅವೆನ್ ದೀಪಕಂಬದ ಮಿತ್ತ್ ದೀಪೆರತ್ತಾ? 22 ಮದೆ ಆದುಪ್ಪುನ ಮಾತಲಾ ಬೊಲ್ಪುಗು ಬರ್ಪುಂಡು, ಬೊಕ್ಕ ದೆಂಗಾದಿತ್ತಿನ ಒವಾಂಡಲಾ ಬೊಲ್ಪುಗು ಬರಂದೆ ಉಪ್ಪುಜಿ. 23 ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಅಂದ್‌ದ್ ಪಂಡೆ. 24 ಬೊಕ್ಕ ಆಯೆ ಅಕ್ಲೆಡ, “ನಿಕುಲು ಕೆಬಿ ಕೊರ್ಪಿನ ಸಂಗತಿಡ್ ಜಾಗ್ರತೆಡುಪ್ಪುಲೆ. ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್. ನಿಕ್ಲೆಗ್ ನನಲಾ ಸೇರಾದ್ ಕೊರ್ಪೆರ್. 25 ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು,” ಅಂದ್‌ದ್ ಪಂಡೆ. ಬುಲೆಪಿನ ಬಿತ್ತ್‌ದ ಉಪಕತೆ. 26-27 ಬೊಕ್ಕ ಆಯೆ ಕುಡ ಅಕ್ಲೆಡ, “ಒರಿ ನರಮಾನಿ ಭೂಮಿಡ್ ಬಿತ್ತ್ ಬಿತ್ತ್‌ದ್, ರಾತ್ರೆ ನಿದ್ರೆ ಮಲ್ತ್‌ದ್ ಪಗೆಲ್ಡ್ ಲಕ್ಕ್‌ದ್ ತೂನಗ ಆಯಗ್ ತೆರಿಯಂದಿಲೆಕ್ಕ ಬಿತ್ತ್ ಕೊಡಿದ್ ಬುಲೆಯುಂಡು. ಅಂಚೆನೇ ದೇವೆರೆ ರಾಜ್ಯಲಾ ಉಂಡು. 28 ಭೂಮಿ ದುಂಬತ್ತ ದೈ ಆದ್ ಬುಲೆದ್ ಪೈರ್ ಆದ್ ದಿಂಜಿದ್ ಕೊರಲ್ ತನ್ನಾತಿಗೆ ತಾನೇ ಬುಲೆಯುಂಡು. 29 ಕೆಯಿ ಬುಲೆಯಿ ಬೊಕ್ಕ ಕೊಯ್ಪಿನ ಕಾಲ ಬತ್ತ್ಂಡ್ ಅಂದ್‌ದ್, ಆಯೆ ಪರ್ಕತ್ತಿಡ್ದ್ ಕೊಯ್ಪಾವೆ,” ಪಂಡೆ. ದಾಸೆಮಿ ಬಿತ್ತ್‌ದ ಉಪಕತೆ ( ಮತ್ತಾಯೆ 13:31 , 32 , 34 ; ಲೂಕೆ 13:18 , 19 ) 30 ಬೊಕ್ಕ ಆಯೆ ಪಂಡಿನಿ, “ದೇವೆರೆ ರಾಜ್ಯೊನು ಒಯಿಕ್ ಸಮ ಮಲ್ಪುಗ? ವಾ ಉಪಕತೆಡ್ದ್ ಅವೆನ್ ತೋಜಾದ್ ಕೊರ್ಕ? 31 ಅವು ದಾಸೆಮಿದ ಬಿತ್ತ್‌ದ ಲೆಕ್ಕ ಉಂಡು. ಅವು ಭೂಮಿಡ್ ಉಪ್ಪು ಮಾತ ಬಿತ್ತ್‌ಲೆಡ್ದ್‌ಲಾ ಎಲ್ಯದವು ಆದುಂಡು. 32 ಬಿತ್ತಿ ಬೊಕ್ಕ ಅವು ಬುಲೆದ್ ಮಾತ ಕಾಯಿಕಜಿಪು ದೈಕ್ಲೆಡ್ದ್ ಮಲ್ಲ ಆದ್ ಮಲ್ಲ ಮಲ್ಲ ಗೆಲ್ಲ್‌ಲೆಡ್ದ್ ಬುಲೆದ್ ಐತ ಗೆಲ್ಲ್‌ಲೆಡ್ ಬಾನೊಡು ರಾಪಿನ ಪಕ್ಕಿಲೆಗ್ ಐತ ನಿರೆಲ್‌ಡ್ ಗೂಡು ಕಟ್ಟ್‌ದ್ ವಾಸ ಮಲ್ಪೆರೆ ಆಪುಂಡು,” ಅಂದ್‌ದ್ ಪಂಡೆ. 33 ಆಯೆ ಇಂಚಿತ್ತಿ ಮಸ್ತ್ ಉಪಕತೆಲೆಡ್ದ್ ಜನೊಕುಲೆಗ್ ಅರ್ಥ ಆಪಿಲೆಕ್ಕ ದೇವೆರೆ ಪಾತೆರೊನು ಪನೊಂದಿತ್ತೆ. 34 ಉಪಕತೆದಾಂತೆ ಆಯೆ ಒಂಜೆನ್ಲಾ ಪಂಡಿಜೆ. ಆಂಡ ಆಯೆ ತನ ಶಿಷ್ಯೆರೆಡೊಪ್ಪ ಪ್ರತ್ಯೇಕಾದ್ ಉಪ್ಪುನಗ ಮಾತಲಾ ಬುಡ್ಪಾದ್ ಪನೊಂದಿತ್ತೆ. ಯೇಸು ಬಿರುಗಾಳಿನ್ ಉಂತಾಯಿನವು ( ಮತ್ತಾಯೆ 8:23-27 ; ಲೂಕೆ 8:22-25 ) 35 ಅವ್ವೇ ದಿನೊಟು ಬೈಯದಗ ಯೇಸು ಶಿಷ್ಯೆರೆಡ, “ನಮ ಆಪೆದ ಬರಿಕ್ಕ್ ಪೋಯಿ,” ಅಂದ್‌ದ್ ಪಂಡೆ. 36 ಅಕುಲು ಆ ಜನೊಕುಲೆನ ಗುಂಪುನು ಬುಡ್ದು ಯೇಸುನು ಅವ್ವೇ ಓಡೊಡು ಲೆತ್ತೊಂದು ಪೋಯೆರ್. ಬೇತೆ ಓಡೊಲುಲಾ ಅಲ್ಪ ಇತ್ತ್ಂಡ್. 37 ಅಕುಲು ಆ ಓಡೊಡು ಪೋವೊಂದುಪ್ಪುನಗ, ಒಂಜಿ ಮಲ್ಲ ಬಿರುಗಾಳಿ ಲಕ್ಕ್‌ದ್, ಶೆರೆಕ್ಕುಲು ಆ ಓಡೊಗು ಹಾಕ್‌ದ್, ನೀರ್ ಓಡದುಲಯಿ ದಿಂಜೆರೆ ಸುರು ಆಂಡ್. 38 ಯೇಸು ಓಡದ ಒಂಜಿ ಮೂಲೆಡ್ ತಲೆಂಬುಡು ತರೆ ದೀದ್ ನಿದ್ರೆ ಮಲ್ತೊಂದಿತ್ತೆ. ಅಕುಲು ಆಯನ್ ಲಕ್ಕಾದ್, “ಗುರು, ಎಂಕುಲು ಮುರ್ಕೊಂದುಲ್ಲ ನಿಕ್ಕ್ ಚಿಂತೆ ಇಜ್ಜಾ?” ಅಂದ್‌ದ್ ಕೇಂಡೆರ್. 39 ಆಯೆ ಲಕ್ಕ್‌ದ್ ಗಾಳಿನ್ ದಟ್ಟಿಯೆ ಕಡಲ್‌ಗ್, “ಗೌಜಿ ಮಲ್ಪಡ, ಶಾಂತ ಆಲ,” ಅಂದ್‌ದ್ ಅಪ್ಪಣೆ ಕೊರಿಯೆ, ಅಪಗನೆ ಗಾಳಿ ಉಂತುದು, ಕಡಲ್ ಶಾಂತ ಆಂಡ್. 40 ಯೇಸು ತನ ಶಿಷ್ಯೆರೆಡ, “ನಿಕುಲು ದಾಯೆಗ್ ಪೋಡಿವರ್ ನನಲಾ ನಿಕ್ಲೆಗ್ ನಂಬಿಕೆ ಇಜ್ಜಾ?” ಅಂದ್‌ದ್ ಕೇನ್ನಗ, 41 ಅಕುಲು ದಿಂಜ ಪೋಡಿದ್, “ಉಂಬೆ ಏರಾದುಪ್ಪೆ? ಗಾಳಿಲಾ ಕಡಲ್‌ಲಾ ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. |
New Life Literature