ಮಾರ್ಕೆ 16 - ಪೊಸ ಒಡಂಬಡಿಕೆಯೇಸುನ ಪುನರುತ್ಥಾನ ( ಮತ್ತಾಯೆ 28:18 ; ಲೂಕೆ 24:1-12 ; ಯೋಹಾನೆ 20:1-10 ) 1 ಸಬ್ಬತ್‌ದಿನ ಆಯಿ ಬೊಕ್ಕ, ಮಗ್ದಲದ ಮರಿಯಲಾ ಯಾಕೋಬುನ ಅಪ್ಪೆ ಮರಿಯಲಾ ಸಲೋಮಿಲಾ ಯೇಸುನ ಶರೀರೊಗು ಪೂಜೆರೆಗಾದ್ ಕಮ್ಮೆನದ ಎಣ್ಣೆನ್ ಕ್ರಯೊಕು ದೆತ್ತೊಂಡೆರ್. 2 ವಾರದ ಸುರುತ್ತ ದಿನತ ಪುಲ್ಯಕಾಂಡೆ ಪೊರ್ತು ಮೂಡುನಗ ಅಕುಲು ಸಮಾಧಿಗ್ ಬತ್ತೆರ್. 3 ಅಕುಲು ಪೋವೊಂದುಪ್ಪುನಗ, “ಸಮಾಧಿದ ಬಾಕಿಲ್‌ಡ್ ಮುಚ್ಚಿದಿತ್ತಿನ ಕಲ್ಲ್‌ನ್ ನೂಕುದು ಪುರೆಲ್ಪಾವುನಾಕುಲು ಏರುಲ್ಲೆರ್?” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್. 4 ಅಕುಲು ಸಮಾಧಿದಡೆಗ್ ಬತ್ತಿನಪಗ ಆ ಮಲ್ಲ ಕಲ್ಲ್ ಪೊರೆಲ್ಪಾದಿತ್ತಿನೆನ್ ತೂಯೆರ್. 5 ಅಕುಲು ಸಮಾಧಿದ ಉಲಯಿ ಪೋನಗ, ಒರಿ ಜವ್ವನೆ ಬೊಲ್ದು ಅಂಗಿನ್ ಪಾಡೊಂದು ಬಲತ್ತ ಮರ್ಗಿಲ್‌ಡ್ ಕುಲ್ಲುದಿನೆನ್ ತೂದು ಪೋಡಿಯೆರ್. 6 ಆಯೆ ಅಕ್ಲೆಗ್, “ಪೋಡ್ಯಡೆ, ಕ್ರುಸ್ಸುಗು ಪಾಡ್ದಿತ್ತಿನ ನಜರೇತ್‌ದ ಯೇಸುನು ನಾಡುವರತ್ತಾ. ಆಯೆ ಜೀವಾದ್ ಲಕ್ಕ್‌ದೆ. ಮುಲ್ಪ ಇಜ್ಜೆ. ಆಯನ್ ದೀತಿನ ಜಾಗ್ ಉಂದೇ ತೂಲೆ. 7 ಇತ್ತೆ ನಿಕುಲು ಪೋದು, ಆಯನ ಶಿಷ್ಯೆರೆಗ್ಲಾ ಪೇತ್ರಗ್ಲಾ, ‘ಆಯೆ ನಿಕ್ಲೆಗ್ ಪಂಡಿಲೆಕ್ಕ ನಿಕ್ಲೆಡ್ದ್ ದುಂಬು ಗಲಿಲಾಯೊಗು ಪೋವೊಂದುಲ್ಲೆ, ನಿಕುಲು ಆಯನ್ ಅವುಲು ತೂವರ್,’ ಅಂದ್‌ದ್ ತೆರಿಪಾಲೆ,” ಪಂಡ್ದ್ ಪಂಡೆ. 8 ಆ ಪೊಂಜೊವುಲು ಅಚ್ಚಿರ ಆದ್ ನಡುಗೊಂದು, ಕೂಡ್ಲೆ ಪಿದಯಿ ಬತ್ತ್‌ದ್, ಸಮಾಧಿಡ್ದ್ ಪಾರ್‌ಪೋಯೆರ್. ಅಕುಲು ಪೋಡಿನೆಡ್ದ್ ಏರೆಗ್ಲಾ ದಾಲಾ ಪಂಡಿಜೆರ್. ಮಗ್ದಲದ ಮರಿಯಗ್ ಯೇಸು ತೋಜಿದ್ ಬರ್ಪಿನವು ( ಮತ್ತಾಯೆ 28:9 , 10 ; ಯೋಹಾನೆ 20:11-18 ) 9 (ವಾರದ ಸುರುತ್ತ ದಿನತ ಪುಲ್ಯಕಾಂಡೆ ಯೇಸು ಜೀವ ಆದ್ ಲಕ್ಕಿ ಬೊಕ್ಕ ಮಗ್ದಲದ ಮರಿಯಗ್ ಸುರುಟ್ಟು ತೋಜಿದ್ ಬತ್ತೆ. ಯೇಸು ಆಲೆಗ್ ಪತ್ತ್‌ದಿತ್ತಿ ಏಳ್ ದೆವ್ವೊಲೆನ್ ಬುಡ್ಪಾದಿತ್ತೆ. 10 ಆಲ್ ಪೋದು ಆಯೆ ತೋಜಿದ್ ಬತ್ತಿನೆನ್ ಆಯಡೊಪ್ಪ ಇತ್ತಿನಾಕುಲೆಗ್ ತೆರಿಪಾಯಲ್. ಮೊಕುಲು ದುಃಖೊಡು ಬುಲ್ತೊಂದಿತ್ತೆರ್. 11 ಆಯೆ ಬದ್‌ಕ್‌ದೆ, ಎಂಕ್ ತೋಜಿಯೆ ಪನ್ಪಿ ಪಾತೆರೊನು ಪನ್ನಗ, ಅಕುಲು ನಂಬಿಜೆರ್. ಯೇಸು ಇರ್ವೆರ್ ಶಿಷ್ಯೆರೆಗ್ ತೋಜಿದ್ ಬರ್ಪಿನವು ( ಲೂಕೆ 24:13-35 ) 12 ಉಂದಾಯಿ ಬೊಕ್ಕ ಶಿಷ್ಯೆರೆಡ್ ಇರ್ವೆರ್ ಒಂಜಿ ಹಳ್ಳಿಗ್ ನಡತೊಂದು ಪೋವೊಂದುಪ್ಪುನಗ, ಯೇಸು ಅಕ್ಲೆಗ್ ಬೇತೆ ರೂಪೊಡು ತೋಜಿದ್ ಬತ್ತೆ. 13 ಅಕುಲು ಪೋದು ಒರಿದಿನಾಕುಲೆಗ್ ತೆರಿಪಾಯೆರ್. ಆಂಡ ಅಕುಲುಲಾ ನಂಬಿಜೆರ್. ಯೇಸು ಪತ್ತೊಂಜಿ ಶಿಷ್ಯೆರೆಗ್ ತೋಜಿದ್ ಬರ್ಪಿನವು ( ಮತ್ತಾಯೆ 28:16-20 ; ಲೂಕೆ 24:36-49 ; ಯೋಹಾನೆ 20:19-23 ; ಅಪೊ.ಕ್ರಿ 1:6-8 ) 14 ಕೆಲವು ದಿನೊಡ್ದು ಬೊಕ್ಕ ಪತ್ತೊಂಜಿ ಶಿಷ್ಯೆರ್ ವಣಸ್‌ಗ್ ಕುಲ್ಲುದಿತ್ತಿನಪಗ ಯೇಸು ಅಕ್ಲೆಗ್ಲಾ ತೋಜಿದ್ ಬತ್ತೆ. ತಾನ್ ಜೀವ ಆದ್ ಲಕ್ಕಿ ಬೊಕ್ಕ ತನನ್ ತೂಯಿನಾಕುಲೆನ ಪಾತೆರೊನು ಅಕುಲು ನಂಬಂದೆ ಇತ್ತಿ ಕಾರಣೊಗು ಆಯೆ ಅಕುಲು ನಂಬಂದಿನೆಕ್ಕ್‌ಲಾ ಅಕ್ಲೆನ ಕಠಿಣ ಉಡಲ್‌ಗಾದ್‌ಲಾ ದಟ್ಟಿಯೆ. 15 ಯೇಸು ಅಕ್ಲೆಡ, “ನಿಕುಲು ಲೋಕದ ಮಾತ ಕಡೆಕ್ಕ್ ಪೋದು ಸುವಾರ್ತೆನ್ ಮಾತ ಸೃಷ್ಟಿಗ್ ಸಾರಿಲೆ. 16 ನಂಬುದು ದೀಕ್ಷಾಸ್ನಾನ ಮಲ್ಪಾವೊನುನಾಯಗ್ ರಕ್ಷಣೆ ತಿಕ್ಕುಂಡು. ನಂಬಂದಿನಾಯೆ ತೀರ್ಪುಗು ಒಳಗಾಪೆ. 17 ಉಂದತ್ತಂದೆ ನಂಬುನಾಕುಲೆಡ್ದ್ ಈ ಕಾರ್ನಿಕೊಲು ಆಪುಂಡು. ಅಕುಲು ಎನ ಪುದರ್‌ಡ್ ದೆವ್ವೊಲೆನ್ ಬುಡ್ಪಾವೆರ್. ಪೊಸ ಭಾಷೆಲೆನ್ ಪಾತೆರುವೆರ್, 18 ಅಕುಲು ಸರ್ಪೊಲೆನ್ ಪತಿಯೆರ್ಡಲಾ ವಿಷತವು ಒವ್ವೆನ್ಲಾ ಪರಿಯೆರ್ಡಲಾ ಅಕ್ಲೆಗ್ ದಾಲಾ ಆವಂದ್. ಅಕುಲು ಸೀಕ್‌ದಾಕುಲೆ ಮಿತ್ತ್ ಕೈ ದೀಂಡ ಗುಣ ಆವು,” ಅಂದ್‌ದ್ ಪಂಡೆ. ಯೇಸು ಪರಲೋಕೊಗು ಪೋಯಿನವು ( ಲೂಕೆ 24:50-53 ; ಅಪೊ.ಕ್ರಿ 1:9-11 ) 19 ಕರ್ತವೆ ಆಯಿ ಯೇಸು ಅಕ್ಲೆಡ ಪಾತೆರಿ ಬೊಕ್ಕ ಪರಲೋಕೊಗು ಏರ್ದ್ ಪೋದು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ. 20 ಐಡ್ದ್ ಬೊಕ್ಕ ಶಿಷ್ಯೆರ್ ಪಿದಾಡ್ದ್ ಪೋದು, ಮಾತ ಕಡೆಕ್ಲಾ ಸುವಾರ್ತೆನ್ ಸಾರಿಯೆರ್. ಬೊಕ್ಕ ಕರ್ತವೆ ಅಕ್ಲೆ ಒಟ್ಟುಗು ಬೇಲೆ ಮಲ್ತೊಂದು, ಕಾರ್ನಿಕೊಲೆಡ್ದ್ ಸುವಾರ್ತೆನ್ ಬಲ ಮಲ್ತೊಂದಿತ್ತೆ.) |
New Life Literature