ಮತ್ತಾಯೆ 9 - ಪೊಸ ಒಡಂಬಡಿಕೆಪಕ್ಷವಾತದಾಯನ್ ಗುಣ ಮಲ್ತಿನವು ( ಮಾರ್ಕೆ 2:1-12 ; ಲೂಕೆ 5:17-26 ) 1 ಯೇಸು ಓಡೊಗು ಮಿತ್ತಾದ್ ಕಡಲ್ ದಾಂಟ್‌ದ್ ತನ ಊರುಗು ಬತ್ತೆ. 2 ಅಲ್ಪ ಬನ್ನಗ ಪಜೆಟ್ಟ್‌ ಬೂರ್ದಿತ್ತಿ ಒರಿ ಪಕ್ಷವಾತದಾಯನ್ ಕೆಲೆವೆರ್ ಆಯನ ಕೈತಲ್‌ ತುಂಬೊಂದು ಬತ್ತೆರ್. ಯೇಸು ಅಕ್ಲೆ ನಂಬಿಕೆನ್ ತೂದು ಪಕ್ಷವಾತದಾಯಗ್ “ಮಗಾ ಧೈರ್ಯೊಡು ಉಪ್ಪುಲ, ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ. 3 ಆಂಡ ಅಲ್ಪ ಇತ್ತಿನ ಶಾಸ್ತ್ರಿಲೆಡ್ ಕೆಲೆವೆರ್, “ಇಂಬೆ ದೇವದೂಷಣೆ ಮಲ್ತೊಂದುಲ್ಲೆ,” ಪಂಡ್ದ್ ತನ್ಕುಲೆ ಉಲಯಿ ಪಾತೆರೊಂದಿತ್ತೆರ್. 4 ಯೇಸು ಅಕ್ಲೆ ಆಲೋಚನೆ ತೆರಿದ್, “ದಾಯೆ ನಿಕುಲು ನಿಕ್ಲೆ ಉಡಲ್‌ಡ್ ಬೊಡ್ಚಾಂದಿ ಆಲೋಚನೆನ್ ಮಲ್ತೊಂದುಲ್ಲರ್? 5 ಒವ್ವು ಸುಲಭ? ‘ನಿನ ಪಾಪೊಲು ಮಾಪು ಆತ್ಂಡ್ ಪನ್ಪಿನವಾ,’ ಇಜ್ಜಿಂಡ, ‘ಲಕ್ಕ್‌ದ್ ನಡಪುಲ ಪನ್ಪಿನವಾ?’ 6 ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಪಕ್ಷವಾತದಾಯನ್ ತೂದು, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋ!” ಪಂಡೆ. 7 ಆಯೆ ಲಕ್ಕ್‌ದ್ ಇಲ್ಲಗ್ ಪೋಯೆ. 8 ಜನೊಕುಲು ಉಂದೆನ್ ತೂದು ಪೋಡಿದ್ ನರಮಾನಿಗ್ ಇಂಚಿತ್ತಿ ಅಧಿಕಾರೊನು ಕೊರಿನೆಕ್ಕ್ ದೇವೆರೆನ್ ಪುಗರಿಯೆರ್. ಸುಂಕದಾಯನ್ ಲೆಪ್ಪುನವು ( ಮಾರ್ಕೆ 2:13-17 ; ಲೂಕೆ 5:27-32 ) 9 ಯೇಸು ಅಲ್ತ್‌ಡ್ದ್ ಪೋವೊಂದುಪ್ಪುನಗ ಸುಂಕ ವಸೂಲಿ ಮಲ್ತೊಂದಿತ್ತಿ ಮತ್ತಾಯೆ ಪನ್ಪಿನಾಯನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಆಯನ್ ಲೆಪ್ಪುನಗ ಆಯೆ ಲಕ್ಕ್‌ದ್ ಆಯನ ಬೆರಿಯೆ ಪೋಯೆ. 10 ಐಡ್ದ್ ಬೊಕ್ಕ ಆಯೆ ಆಯನ ಇಲ್ಲಡ್ ವಣಸ್‌ಗ್ ಕುಲ್ಲೊಂದುಪ್ಪುನಗ ಮಸ್ತ್ ಜನ ಸುಂಕದಾಕುಲುಲಾ ಪಾಪಿಷ್ಟೆರ್‌ಲಾ ಬತ್ತ್‌ದ್ ಯೇಸುನ ಬೊಕ್ಕ ಆಯ ಶಿಷ್ಯೆರೆ ಪಂತೆಡೇ ಕುಲ್ಲೊಂಡೆರ್. 11 ಪರಿಸಾಯೆರ್ ಅವೆನ್ ತೂದು ಯೇಸುನ ಶಿಷ್ಯೆರೆಡ, “ನಿಕ್ಲೆ ಗುರು, ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ದಾಯೆಗ್ ವಣಸ್ ಮಲ್ಪುವೆ?” ಅಂದ್‌ದ್ ಕೇಂಡೆರ್. 12 ಯೇಸು ಉಂದೆನ್ ಕೇಂಡ್ದ್, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು.” 13 ಬೊಕ್ಕ ಅಕ್ಲೆಗ್, “ನಿಕುಲು ಪೋದು, ‘ಎಂಕ್ ಬಲಿ ಬೊಡ್ಚಿ ಕನಿಕರನೇ ಬೋಡು,’ ಪನ್ಪಿ ಪಾತೆರದ ಅರ್ಥೊನು ಕಲ್ತೊನ್ಲೆ ಯಾನ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್ ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಅಂದ್‌ದ್ ಪಂಡೆ. ಉಪವಾಸದ ಬಗೆಟ್ ( ಮಾರ್ಕೆ 2:18-22 ; ಲೂಕೆ 5:33-39 ) 14 ಯೋಹಾನನ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್, “ಎಂಕುಲುಲಾ ಪರಿಸಾಯೆರ್‌ಲಾ ದಿಂಜ ಉಪವಾಸ ಮಲ್ಪುವ, ಆಂಡ ನಿನ ಶಿಷ್ಯೆರ್ ದಾಯೆಗ್ ಉಪವಾಸ ಮಲ್ಪುಜೆರ್?” ಅಂದ್‌ದ್ ಕೇಂಡೆರ್. 15 ಯೇಸು ಅಕ್ಲೆಗ್, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪ ಮುಟ್ಟ ದುಃಖ ಮಲ್ಪುವೆರಾ? ಆಂಡ ಮದ್ಮಯನ್ ಅಕ್ಲೆ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು, ಅಪಗ ಅಕುಲು ಉಪವಾಸ ಮಲ್ಪುವೆರ್. 16 ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಪಾಡ್ದಿ ಪತ್ಯೆ ಕುಂಟುನು ಒಯ್ತ್‌ದ್ ಪರ್ತೆಲ್ ಹೆಚ್ಚಾವು. 17 ಉಂದತ್ತಂದೆ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್. ದಿಂಜಾಂಡ ಚೀರವು ಪುಡಾದ್ ದ್ರಾಕ್ಷಾರಸ ಗುತ್ತುದು ಪೋಪುಂಡು, ಚೀರವು ಹಾಳಾಪುಂಡು. ಆಂಡ ಪೊಸ ದ್ರಾಕ್ಷಾರಸೊನು ಪೊಸ ಚರ್ಮದ ಚೀರವುಡು ಪಾಡ್ದ್ ದೀಪೆರ್. ಅಪಗ ರಡ್ಡ್‌ಲಾ ಒರಿಯುಂಡು.” ಅಂದ್‌ದ್ ಪಂಡೆ. ಯಾಯಿರೆನ ಮಗಲ್ ಬೊಕ್ಕ ಸೀಕ್‌ದ ಪೊಂಜೊವು ( ಮಾರ್ಕೆ 5:21-43 ; ಲೂಕೆ 8:40-56 ) 18 ಇಂಚ ಆಯೆ ಅಕ್ಲೆಡ ಪಾತೆರೊಂದುಪ್ಪುನಗ ಒರಿ ಅಧಿಕಾರಿ ಬತ್ತ್‌ದ್ ಆಯನ ಕಾರ್‌ಗ್ ಅಡ್ಡಬೂರ್ದು, “ಎನ ಮಗಲ್ ಇತ್ತೆ ಸೈತ್ ಪೋಯಲ್; ಆಂಡಲಾ ಈ ಬತ್ತ್‌ದ್ ಆಲೆನ ಮಿತ್ತ್ ನಿನ ಕೈ ದೀಯಡ ಆಲ್ ಬದುಕುವಲ್.” ಅಂದ್‌ದ್ ನಟ್ಟೊನ್ನಗ 19 ಯೇಸು ಲಕ್ಕ್‌ದ್ ಆ ಅಧಿಕಾರಿನ ಬೆರಿಯೆ ಪೋನಗ ಶಿಷ್ಯೆರ್‌ಲಾ ಆಯನ ಬೆರಿಯೆ ಪೋಯೆರ್. 20-21 ಅಪಗ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು, “ಯಾನ್ ಆಯ ಕುಂಟುನು ಮುಟ್ಟುಂಡ, ಎಂಕ್ ಗುಣ ಆವು,” ಅಂದ್‌ದ್ ಮನಸ್‌ಡ್ ಎನ್ನೊಂದು ಪಿರವುಡು ಬತ್ತ್‌ದ್ ಯೇಸುನ ಕುಂಟುದ ಗೊಂಡೆನ್ ಮುಟ್ಟಿಯಲ್. 22 ಯೇಸು ಪಿಜಿರ್‌ದ್ ಆಲೆನ್ ತೂದು, “ಮಗಲೇ! ಧೈರ್ಯಾದುಪ್ಪುಲ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಅಂದ್‌ದ್ ಪಂಡೆ. ಆ ಕ್ಷಣೊಟೇ ಆ ಪೊಂಜೊವು ಗುಣ ಆಯಲ್. 23 ಐಡ್ದ್ ಬೊಕ್ಕ ಯೇಸು ಆ ಅಧಿಕಾರಿನ ಇಲ್ಲಗ್ ಬತ್ತ್‌ದ್ ವಾದ್ಯದಾಕುಲೆನ್ಲಾ ಬೊಬ್ಬೆ ಪಾಡೊಂದಿತ್ತಿನ ಜನೊಕುಲೆ ಗುಂಪುಲೆನ್ಲಾ ತೂದು 24 ಅಕ್ಲೆಗ್, “ನಿಕುಲು ಪಿದಯಿ ಪೋಲೆ. ಪೊಣ್ಣು ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್.” ಇಂಚ ಪನ್ನಗ ಅಕುಲು ಆಯಗ್ ಗೇಲಿ ಮಲ್ತೆರ್. 25 ಜನೊಕುಲೆನ್ ಪಿದಾಯಿ ಕಡಪುಡಿ ಬೊಕ್ಕ ಯೇಸು ಉಲಯಿ ಪೋದು ಆಲೆನ ಕೈ ಪತ್ತಿನಪಗ ಆಲ್ ಲಕ್ಕಿಯಲ್. 26 ಈ ಸುದ್ಧಿ ಊರು ಇಡೀ ಪರಡ್ಂಡ್. ಕುರುಡನ್ ಗುಣ ಮಲ್ತಿನವು 27 ಯೇಸು ಅಲ್ತ್‌ಡ್ದ್ ಪೋನಗ ಇರ್ವೆರ್ ಕುರುಡೆರ್, “ದಾವೀದ್ ಮಗಾ ಎಂಕ್ಲೆನ್ ಕರುಣೆ ಮಲ್ಪುಲ!” ಅಂದ್‌ದ್ ಬುಲ್ತೊಂದು ಆಯ ಬೆರಿಯೆ ಪೋಯೆರ್. 28 ಆಯೆ ಇಲ್ಲಡೆ ಬನ್ನಗ ಆ ಕುರುಡೆರ್ ಆಯನ ಒಟ್ಟುಗು ಇಲ್ಲದುಲಯಿ ಪೋಯೆರ್. ಯೇಸು ಅಕ್ಲೆಡ, “ಯಾನ್ ಉಂದೆನ್ ಮಲ್ಪೊಲಿಯಾ ಪಂಡ್ದ್ ನಂಬುವರಾ?” ಪಂಡಿನೆಕ್ಕ್, “ಅಂದ್ ಕರ್ತವಾ, ಎಂಕುಲು ನಂಬುವ,” ಪಂಡೆರ್. 29 ಅಪಗ ಆಯೆ ಅಕ್ಲೆ ಕಣ್ಣ್‌ಲೆನ್ ಮುಟ್ಟುದು, “ನಿಕುಲು ನಂಬಿ ಲೆಕ್ಕನೇ, ನಿಕ್ಲೆಗ್ ಆವಡ್,” ಅಂದ್‌ದ್ ಪಂಡೆ. 30 ಅಪಗನೆ ಅಕ್ಲೆಗ್ ಕಣ್ಣ್ ತೋಜ್ಂಡ್. ಬೊಕ್ಕ ಯೇಸು ಅಕ್ಲೆಡ, “ಉಂದು ಏರೆಗ್ಲಾ ತೆರಿಯೆರೆಗೇ ಬಲ್ಲಿ ಅಂದ್‌ದ್ ಕಂಡಿತಾದ್ ಪಂಡೆ.” 31 ಆಂಡ ಅಕುಲು ಅಲ್ಪಡ್ದ್ ಪಿದಾಡ್ದ್ ಪೋದು ಆ ಸೀಮೆಡ್ ಇಡೀ ಆಯನ ಸುದ್ಧಿನ್ ಪಂಡೆರ್. ಪೊಟ್ಟನ್ ಗುಣ ಮಲ್ತಿನವು 32 ಅಕುಲು ಪಿದಾಡ್ನಗ, ಒರಿ ದೆವ್ವ ಪತ್ತ್‌ದಿ ಪೊಟ್ಟನ್ ಯೇಸು ಕೈತಲ್‌ ಕನತೆರ್. 33 ಆಯೆ ದೆವ್ವೊನು ಪಿದಯಿ ಪಾಡಿ ಬೊಕ್ಕ ಪೊಟ್ಟೆ ಪಾತೆರಿಯೆ. ಐಕ್ ಜನೊಕುಲು, “ಇಂಚಿತ್ತಿನೆನ್ ಎಂಕುಲು ಇಡೀ ಇಸ್ರಾಯೇಲ್ ಜನೊಕುಲೆಡ್ ತೂತಿನೆ ಇಜ್ಜಿ,” ಅಂದ್‌ದ್ ಅಚ್ಚಿರ ಆಯೆರ್. 34 ಆಂಡ ಪರಿಸಾಯೆರ್, “ಇಂಬೆ ದೆವ್ವೊಲೆ ಮುಖ್ಯಸ್ಥನ ಸಹಾಯೊಡ್ದು ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪಂಡೆರ್. ಬುಲೆ ಜಾಸ್ತಿ ಬೇಲೆದಾಕುಲು ಕಮ್ಮಿ 35 ಯೇಸು ಮಾತ ಪಟ್ಟಣಲೆನ್ಲಾ, ಹಳ್ಳಿಲೆನ್ಲಾ ತಿರ್ಗ್‌ದ್ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಪರಲೋಕ ರಾಜ್ಯದ ಸುವಾರ್ತೆನ್ ಸಾರಿದ್ ಮಾತ ತರತ ಸೀಕ್‌ಲೆನ್ ಮಾತ ತರತ ಬೇನೆಲೆನ್ ಗುಣ ಮಲ್ತೊಂದು ಬತ್ತೆ. 36 ಆಂಡ ಜನೊಕುಲೆ ಗುಂಪುಲೆನ್ ತೂದು ಅಕುಲು ಕುರುಬೆದಾಂತಿ ಕುರಿಕುಲೆ ಲೆಕ್ಕ ಬೆಂಗ್‌ದ್ ಬಚ್ಚಿದ್ ಪೋತೆರತ್ತಾ ಅಂದ್‌ದ್ ಅಕ್ಲೆ ಮಿತ್ತ್ ಕನಿಕರ ಪಡೆಯೆ. 37 ತನ ಶಿಷ್ಯೆರೆಡ, “ಬುಲೆ ಮಸ್ತ್ ಉಂಡು, ಆಂಡ ಬೇಲೆದಾಕುಲು ಕಮ್ಮಿ. 38 ಅವೆಡ್ದಾವರ ಬುಲೆತ ಯಜಮಾನಡ, ಆಯೆ ತನ ಬುಲೆಕ್ ಬೇಲೆದಾಕುಲೆನ್ ಕಡಪುಡೊಡು ಅಂದ್‌ದ್ ನಟ್ಟೊನ್ಲೆ,” ಅಂದ್‌ದ್ ಪಂಡೆ. |
New Life Literature