ಮತ್ತಾಯೆ 7 - ಪೊಸ ಒಡಂಬಡಿಕೆತೀರ್ಪು ಮಲ್ಪಡೆ ( ಲೂಕೆ 6:37 , 38 , 41 , 42 ) 1 “ತೀರ್ಪು ಮಲ್ಪಡೆ, ಅಪಗ ನಿಕ್ಲೆಗ್ಲಾ ತೀರ್ಪು ಆಪುಜಿ. 2 ನಿಕುಲು ಮಲ್ಪುನ ತೀರ್ಪುಗು ಸರಿಯಾದ್ ನಿಕ್ಲೆಗ್ಲಾ ತೀರ್ಪು ಆಪುಂಡು, ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್. 3 ಈ ನಿನ ಕಣ್ಣ್‌ಡುಪ್ಪು ಕಜವುನ್ ತೂವಂದೆ ನಿನ ಸಹೋದ್ರನ ಕಣ್ಣ್‌ಡುಪ್ಪು ಧೂಳುನು ದಾಯೆಗ್ ತೂಪ? 4 ಈ ನಿನ ಸಹೋದ್ರಗ್, ‘ನಿನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪುವೆ ಬಲ,’ ಅಂದ್‌ದ್ ಎಂಚ ಪನ್ಪ? ನಿನ ಕಣ್ಣ್‌ಡೇ ಕಜವು ಉಂಡತ್ತಾ. 5 ಕಪಟಿಯೇ, ದುಂಬತ್ತ ನಿನ ಕಣ್ಣ್‌ದುಲಯಿದ ಕಜವುನ್ ದೆತ್ತ್ ಪಾಡ್ಲ. ಐಡ್ದ್ ಬೊಕ್ಕ ನಿನ ಸಹೋದ್ರನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪೆರೆ ಸರಿಟ್ಟ್ ತೋಜುಂಡು. 6 “ಪರಿಶುದ್ಧದೆನ್ ನಾಯಿಗ್ ಪಾಡಡೆ; ನಿಕಲ್ನ ಮುತ್ತುಲೆನ್ ಪಂಜಿಲೆ ಎದುರುಡು ಬಿರ್ಕಡೆ, ಬಿರ್ಕಿಯರ್ಡ ಐಕುಲು ಅವೆನ್ ಕಾರ್‌ಡ್ ದೊಂಕುದು ಪಿರ ಬತ್ತ್‌ದ್ ನಿಕ್ಲೆನ್ ತಿಗ್ತ್ ಪಾಡು. ಕೇನೊನ್ಲೆ ಅಪಗ ಕೊರುವು ( ಲೂಕೆ 11:9-13 ) 7 “ಕೇನೊನ್ಲೆ, ಅಪಗ ನಿಕ್ಲೆಗ್ ಕೊರುವು. ನಾಡ್‌ಲೆ ಅಪಗ ನಿಕ್ಲೆಗ್ ತಿಕ್ಕು. ಬೊಟ್ಟುಲೆ ಅಪಗ ನಿಕ್ಲೆಗ್ ಜಪ್ಪು. 8 ದಾಯೆಗಂದ್ಂಡ ಕೇನುನ ಪ್ರತಿಯೊರಿಯಗ್ಲಾ ಕೊರ್ಪುಂಡು, ನಾಡುನಾಯಗ್ ತಿಕ್ಕುಂಡು, ಬೊಟ್ಟುನಾಯಗ್ ಜಪ್ಪುಂಡು. 9 ನಿಕ್ಲೆಡ್ ಏರಾಂಡಲಾ ರೊಟ್ಟಿ ಕೇನುನ ಮಗಕ್ಕ್ ಕಲ್ಲ್‌ನ್ ಕೊರುವೆನಾ? 10 ಮೀನ್ ಕೇಂಡ ಉಚ್ಚುನು ಕೊರುವೆನಾ. 11 ಅಂಚಾಂಡ ಪಡಿಕೆಂತಿನಕುಲಾಯಿ ನಿಕುಲು ನಿಕ್ಲೆನ ಜೋಕುಲೆಗ್ ಎಡ್ಡೆ ವಸ್ತುಲೆನ್ ಕೊರ್ಪಿನಕುಲಾಂಡ; ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ತನಡ ಕೇನುನಾಕುಲೆಗ್ ಏತೋ ಹೆಚ್ಚಾದ್ ಎಡ್ಡೆ ವಸ್ತುಲೆನ್ ಕೊರುವೆತ್ತಾ? 12 “ಆಂಡಲಾ ಜನೊಕುಲು ನಿಕ್ಲೆಗ್ ಎಂಚೆಂಚಿನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುವೆರಾ, ಅವೆನೇ ನಿಕುಲು ಅಕ್ಲೆಗ್ ಮಲ್ಪುಲೆ. ಉಂದೇ ನ್ಯಾಯಕಟ್ಟ್‌ದ ಬೊಕ್ಕ ಪ್ರವಾದಿಲೆನ ಬೋಧನೆದ ಸಾರಾಂಶ. ಇಕ್ಕ್‌ಟ್ಟ್‌ದ ಮಾರ್ಗ ( ಲೂಕೆ 13:24 ) 13 “ಇಕ್ಕಟ್ಟಾಯಿ ಬಾಕಿಲ್‌ಡ್ದ್ ಉಲಯಿ ಪೋಲೆ. ದಾಯೆಗಂದ್ಂಡ ನಾಶಾನೊಗು ಪೋಪಿ ಬಾಕಿಲ್ ಮಲ್ಲ, ಸಾದಿ ಅಗೆಲ, ಐಟ್ಟ್ ಪೋಪಿನಾಕುಲು ಮಸ್ತ್ ಜನ. 14 ನಿತ್ಯಜೀವೊಗು ಪೋಪಿ ಬಾಕಿಲ್ ಇಕ್ಕಟ್ಟ್‌ದವು. ಸಾದಿಲಾ ಭಂಗದವು; ಅವೆನ್ ನಾಡ್ ಪತ್ತುನಾಕುಲು ಒಂತೆ ಜನ. ಮರತ ಫಲ ( ಲೂಕೆ 6:43 , 44 ) 15 “ಸುಳ್ಳು ಪ್ರವಾದಿಲೆ ಸಂಗತಿಡ್ ಜಾಗ್ರತೆ. ಅಕುಲು ಕುರಿತ ವೇಶೊಡು ನಿಕ್ಲೆ ಕೈತಲ್‌ ಬರ್ಪೆರ್ ಆಂಡ ಉಲಯಿ ತೂಂಡ ತಿಂದ್ ಪಾಡುನ ಚೆನ್ನನಾಯಿಲೆ! 16 ಅಕ್ಲೆನ ಕಾರ್ಯೊಲೆಡ್ದ್ ಅಕ್ಲೆನ್ ತೆರಿಯೊನ್ವರ್. ಮುಳ್ಳು ಗಿಡೊಕ್ಲೆಡ್ದ್ ದ್ರಾಕ್ಷೆದ ಪರ್ಂದ್ ಅತ್ತ್‌ಡ ಕಲ್ಲಿಲೆಡ್ದ್ ಅಂಜೂರದ ಪರ್ಂದ್ ಕೊಯ್ಪಿನವು ಉಂಡಾ? 17 ಅಂಚೆನೇ ಎಡ್ಡೆಂತಿನ ಮರ ಎಡ್ಡೆ ಫಲ ಕೊರ್ಪುಂಡು, ಹಾಳ್ ಮರ ಹಾಳ್ ಫಲ ಕೊರ್ಪುಂಡು. 18 ಎಡ್ಡೆ ಮರ ಹಾಳ್ ಫಲೊನು ಕೊರಂದ್, ಅಂಚೆನೇ ಹಾಳ್ ಮರ ಎಡ್ಡೆ ಫಲೊನು ಕೊರಂದ್. 19 ಎಡ್ಡೆ ಫಲ ಕೊರಂದಿ ಮಾತ ಮರೊನು ಕಡ್ತ್‌ದ್ ತೂಕು ಪಾಡ್ವೆರ್. 20 ಇಂಚ ಉಪ್ಪುನಪಗ ಅಕ್ಲೆ ಕಾರ್ಯೊಲೆಡ್ದ್ ಅಕ್ಲೆನ್ ತೆರಿಯೊನ್ವರ್. ಯಾನ್ ನಿನನ್ ತೆರಿದಿಜಿ ( ಲೂಕೆ 13:25-27 ) 21 “ಎನನ್ ಕರ್ತವಾ, ಕರ್ತವಾ! ಪನ್ಪಿನಾಕುಲು ಮಾತೆರ್ ಪರಲೋಕ ರಾಜ್ಯೊಡು ಸೇರುವರಂದ್ ಎನ್ನಡೆ; ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತೊನು ಮಲ್ಪುನಾಯೆನೇ ಪರಲೋಕ ರಾಜ್ಯದ ಉಲಯಿ ಸೇರುವೆ. 22 ಕರ್ತವಾ, ಕರ್ತವಾ ನಿನ ಪುದರ್‌ದ ಮಿತ್ತ್ ಎಂಕುಲು ಪ್ರವಾದನೆ ಮಲ್ತ್‌ಜನಾ? ನಿನ ಪುದರ್‌ಡ್ ದೆವ್ವೊಲೆನ್ ಬುಡ್ಪಾದ್‌ದಿಜನಾ? ನಿನ ಪುದರ್‌ಡ್ ದಿಂಜ ಬಲತ್ತ ಕಾರ್ಯೊಲೆನ್ ಮಲ್ತ್‌ಜನಾ ಅಂದ್‌ದ್ ಆ ತೀರ್ಪುದ ದಿನೊಕ್ಲೆಡ್ ಏತೋ ಜನೊಕುಲು ಎಂಕ್ ಪನ್ವೆರ್. 23 ಅಪಗ ಯಾನ್ ಅಕ್ಲೆಗ್, ‘ನಿಕ್ಲೆನ ಗುರ್ತ ಎಂಕಿಜ್ಜಿ, ಅನ್ಯಾಯಗಾರೆರೇ, ಎನನ್ ಬುಡ್ದು ಪೋಲೆ ಅಂದ್‌ದ್ ಮಾತೆರೆ ಎದುರುಡು ಪಂಡ್ದ್ ಬುಡ್ಪೆ.’ ಬಿರ್ಸೆ ಬೊಕ್ಕ ಹೆಡ್ಡೆ ( ಲೂಕೆ 6:47-49 ) 24 “ಅವೆಡ್ದಾವರ, ಈ ಎನ ಪಾತೆರೊಲೆನ್ ಕೇಂಡ್ದ್ ಐತ ಲೆಕ್ಕನೆ ನಡಪುನಾಯೆ ತನ ಇಲ್ಲ್‌ನ್ ಪಾದೆದ ಮಿತ್ತ್ ಕಟ್ಟ್‌ದಿ ಬುದ್ಧಿ ಇತ್ತಿ ನರಮಾನಿಗ್ ಸಮ ಆದುಲ್ಲೆ. 25 ಕಟ್ಟಿ ಬೊಕ್ಕ ಬರ್ಸ ದೊರಿಂಡ್, ಬೊಲ್ಲ ಬತ್ತ್ಂಡ್; ನಾಲ್ ಕಡೆಡ್ದ್ ಗಾಳಿ ಬೀಜ್‌ದ್ ಆ ಇಲ್ಲಗ್ ಹಾಕ್‌ಂಡ್, ಆಂಡಲಾ ಐತ ಪಂಚಾಂಗ ಪಾದೆದ ಮಿತ್ತ್ ಇತ್ತಿನೆಡ್ದ್ ಅವು ಮಗ್‌ರ್ದ್‌ಜಿ. 26 “ಆಂಡ ಎನ ಪಾತೆರೊಲೆನ್ ಕೇಂಡ್ದ್‌ಲಾ ಐತ ಲೆಕ್ಕನೆ ನಡಪಂದಿನಾಯೆ ಪೊಯ್ಯೆದ ಮಿತ್ತ್ ಇಲ್ಲನ್ ಕಟ್ಟ್‌ದಿ ಬುದ್ಧಿದಾಂತಿ ನರಮಾನಿಗ್ ಸಮ ಆದುಲ್ಲೆ. 27 ಕಟ್ಟಿ ಬೊಕ್ಕ ಬರ್ಸ ದೊರಿಂಡ್, ಬೊಲ್ಲ ಏರ್‌ಂಡ್, ಗಾಳಿ ಬೀಜ್‌ದ್ ಆ ಇಲ್ಲಗ್ ಹಾಕ್‌ಂಡ್. ಅಪಗ ಆ ಇಲ್ಲ್ ಜರಿದ್ ಬೂರ್ದು ನೆಲ ಸಮ ಆಂಡ್.” ಯೇಸುನ ಅಧಿಕಾರ 28 ಯೇಸು ಈ ಪಾತೆರೊಲೆನ್ ಪಂಡ್ದ್ ಮುಗಿತಿ ಬೊಕ್ಕ ಆ ಜನೊಕುಲೆ ಗುಂಪು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್. 29 ದಾಯೆಗಂದ್ಂಡ ಆಯೆ ಅಕ್ಲೆ ಶಾಸ್ತ್ರಿಲೆ ಲೆಕ್ಕ ಬೋಧನೆ ಕೊರಂದೆ, ಅಧಿಕಾರ ಇತ್ತಿನಾಯಲೆಕ್ಕ ಅಕ್ಲೆಗ್ ಬೋಧನೆ ಕೊರಿಯೆ. |
New Life Literature