ಮತ್ತಾಯೆ 6 - ಪೊಸ ಒಡಂಬಡಿಕೆ

ಬಡವೆರೆಗ್ ಸಹಾಯ

¹ “ಜನೊಕುಲು ತೂವೊಡು ಅಂದ್‌ದ್ ನಿಕ್ಲೆನ ಧರ್ಮಕಾರ್ಯೊನು ಅಕ್ಲೆನ ಎದುರುಡು ಮಲ್ಪೆರೆ ಬಲ್ಲಿ. ಅಂಚ ಮಲ್ತರ್ಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆರೆಡ್ದ್ ನಿಕ್ಲೆಗ್ ಫಲ ತಿಕ್ಕಂದ್.

² “ಅಂಚಾದ್ ಈ ದಾನ ಮಲ್ಪುನಗ ನಿನ ಎದುರುಡು ಕೊಂಬು ಉರ್ಪಾವಡ. ಜನೊಕುಲೆಡ್ದ್ ಪುಗರಿಕೆ ಪಡೆಯೊಡು ಅಂದ್‌ದ್ ಕಪಟಿಲು ಸಭೆತ ಮಂದಿರೊಲೆಡ್ಲಾ ಸಾದಿದ ಮೂಲೆಡ್ಲಾ ಅಂಚ ಮಲ್ಪುವೆರ್. ಅಕುಲು ತನ್ಕುಲೆಗ್ ಬರೊಡಾಯಿ ಫಲ ತಿಕ್ಕ್‌ದಾಂಡ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

³ ಈ ದಾನ ಕೊರ್ನಗ ಗುಟ್ಟುಡು ಉಪ್ಪಡ್. ನಿನ ಬಲತ್ತ ಕೈ ಮಲ್ತಿನವು ದತ್ತ ಕೈಕ್‌ಲಾ ತೆರಿಯಂದೆ ಉಪ್ಪಡ್.

⁴ ಗುಟ್ಟುಡು ಕೊರ್ಪಿ ದಾನೊನು ತೂಪಿನ ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರುವೆ.

ಪ್ರಾರ್ಥನೆದ ಬಗೆಟ್

⁵ “ನಿಕುಲು ಪ್ರಾರ್ಥನೆ ಮಲ್ಪುನಗ ಕಪಟಿಲೆ ಲೆಕ್ಕ ಮಲ್ಪಡೆ. ಜನೊಕುಲು ತೂವೊಡು ಅಂದ್‌ದ್ ಅಕುಲು ಸಭೆತ ಮಂದಿರೊಲೆಡ್ಲಾ ಕೂಡು ಮಾರ್ಗೊಲೆಡ್ಲಾ ಉಂತೊಂದು ಪ್ರಾರ್ಥನೆ ಮಲ್ಪೆರೆ ಬಯಕುವೆರ್. ಅಕ್ಲೆಗ್ ಪ್ರತಿಫಲ ಅಪಗನೇ ಪಡೆದಾತ್ತ್ಂಡ್ ಪನ್ಪಿನೆನ್ ನಿಕ್ಲೆಗ್ ನಿಜಾದ್ ಪನ್ಪೆ.

⁶ ಆಂಡ ಈ ಪ್ರಾರ್ಥನೆ ಮಲ್ಪೊಡಾಂಡ ನಿನ ಕೋಣೆದುಲಯಿ ಪೋದು ಬಾಕಿಲ್‌ನ್ ಮುಚ್ಚೊಂದು ನಿನ ಉಡಲ್‌ಡ್ ಉಪ್ಪು ನಿನ ಅಮ್ಮೆರೆಗ್ ಪ್ರಾರ್ಥನೆ ಮಲ್ಪುಲ. ಉಡಲ್‌ಡುಪ್ಪು ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರುವೆ.

⁷ “ಆಂಡ ಪ್ರಾರ್ಥನೆ ಮಲ್ಪುನಗ ಪಿದಯಿದ ಜನೊಕುಲೆ ಲೆಕ್ಕ ಪಂಡಿನೆನೇ ಪನಡ; ಅಕುಲು ಮಸ್ತ್ ಪಾತೆರ್‌ಂಡ ತನ್ಕುಲೆ ಪ್ರಾರ್ಥನೆನ್ ದೇವೆರ್ ಕೇನ್ವೆರ್ ಅಂದ್‌ದ್ ಎನ್ನುವೆರ್.

⁸ ಅಂಚಾಯಿನೆಡ್ದ್‌ ನಿಕುಲು ಅಕ್ಲೆನ ಲೆಕ್ಕ ಆವಡೆ. ನಿಕುಲು ನಿಕ್ಲೆನ ಅಮ್ಮೆರೆಡ ನಟ್ಟೊನುನೆಡ್ದ್ ದುಂಬೇ ನಿಕ್ಲೆಗ್ ಎಂಚೆಂಚಿನ ಅಗತ್ಯದವು ಪನ್ಪಿನವು ಆಯಗ್ ತೆರಿದುಂಡು.

⁹ ಅವೆಡ್ದಾವರ ನಿಕುಲು ಇಂಚ ಪ್ರಾರ್ಥನೆ ಮಲ್ಪೊಡು. ‘ಪರಲೋಕೊಡುಪ್ಪು ಎಂಕುಲೆ ಅಮ್ಮೆರೇ, ನಿನ ಪುದರ್ ಪರಿಶುದ್ಧ ಆವಡ್.

¹⁰ ನಿನ ರಾಜ್ಯ ಬರಡ್, ನಿನ ಚಿತ್ತ ಪರಲೋಕೊಡು ಆಪಿಲೆಕ್ಕನೇ ಭೂಲೋಕೊಡ್ಲಾ ಆವಡ್.

¹¹ ಎಂಕುಲೆ ದಿನದಿನತ ಪಡಿನ್ ಎಂಕ್ಲೆಗ್ ಇನಿ ಕೊರ್ಲ.

¹² ಎಂಕ್ಲೆಗ್ ತಪ್ಪು ಮಲ್ತಿನಾಕುಲೆಗ್ ಎಂಕುಲು ಮಾಪು ಮಲ್ಪುಲೆಕ್ಕ, ಎಂಕ್ಲೆನ ತಪ್ಪುಲೆನ್ಲಾ ಮಾಪು ಮಲ್ಪುಲ.

¹³ ಎಂಕ್ಲೆನ್ ಶೋಧನೆದ ಉಲಯಿ ಸೇರಾವಂದೆ, ಕೇಡ್‌ಡ್ದ್ ಎಂಕ್ಲೆನ್ ತಪ್ಪಾಲ.’

¹⁴ “ನಿಕುಲು ಜನೊಕುಲೆ ತಪ್ಪುಲೆನ್ ಮಾಪು ಮಲ್ತರ್ಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುವೆ.

¹⁵ ಆಂಡ, ನಿಕುಲು ಜನೊಕುಲೆ ತಪ್ಪುನು ಮಾಪು ಮಲ್ಪಂದೆ ಪೋಂಡ ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುಜೆ.

ಉಪವಾಸ

¹⁶ “ಉಪವಾಸ ಮಲ್ಪುನಗ ಕಪಟಿಲೆ ಲೆಕ್ಕ ಮೋನೆನ್ ಬಾಡಾವೊಡ್ಚಿ, ತನ್ಕುಲು ಉಪವಾಸೊಡುಲ್ಲ ಅಂದ್‌ದ್ ಜನೊಕುಲೆಗ್ ತೋಜಾವೆರೆಗಾದ್ ತನ್ಕುಲೆ ಮೋನೆನ್ ವಿಕಾರ ಮಲ್ತೊನ್ವೆರ್. ಅಕ್ಲೆಗ್ ತನ್ಕುಲೆ ಫಲ ಅಪಗನೇ ತಿಕ್ಕ್ಂಡ್ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ.

¹⁷ ಆಂಡ ಈ ಉಪವಾಸ ಮಲ್ಪುನಗ ತರೆಕ್ ಎಣ್ಣೆ ಪಾಡೊಂದು ಮೋನೆನ್ ದೆಕ್ಕೊನ್ಲ.

¹⁸ ಇಂಚ ಮಲ್ತ್ಂಡ ಈ ಉಪವಾಸೊಡುಲ್ಲ ಪಂಡ್ದ್ ಜನೊಕುಲೆಗ್ ತೋಜಂದೆ ಇತ್ತ್ಂಡಲಾ ಉಡಲ್‌ಡ್ ಇತ್ತಿ ನಿನ ಅಮ್ಮೆರೆಗ್ ಈ ಉಪವಾಸೊಡುಲ್ಲ ಪಂಡ್ದ್ ತೋಜಿದ್ ಬರುವ. ಉಡಲ್‌ದ ಉಲಯಿ ನಡಪುನೆನ್ ತೂಪಿನ ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರ್ಪೆ.

ಗಂಟ್ ಕಟ್ಟಡೆ

¹⁹ “ಭೂಲೋಕೊಡು ಗಂಟ್ ಮಲ್ತ್ ದೀವೊನಡೆ; ಮುಲ್ಪ ಪುರಿ ಪತ್ತ್‌ದ್ ಕಲೆಂಗಿಡ್ದ್‌ ಹಾಳಾದ್ ಪೋಪುಂಡು; ಮೂಲು ಕಲ್ವೆರ್ ಮಾಟೆ ಕುರೆದ್ ಕಂಡೊನುವೆರ್.

²⁰ ಆಂಡ ಪರಲೋಕೊಡು ಗಂಟ್ ಮಲ್ತ್ ದೀವೊನ್ಲೆ; ಅಲ್ಪ ಪುರಿ ಪತ್ತ್‌ದ್ ಕಲೆಂಗಿಡ್ದ್‌ ಹಾಳಾದ್ ಪೋಪುಜಿ; ಅಲ್ಪ ಕಲ್ವೆರ್ ಮಾಟೆ ಮಲ್ತ್‌ದ್ ಕಂಡೊನುನಲಾ ಇಜ್ಜಿ.

²¹ ನಿನ ಗಂಟ್ ಇತ್ತಿನಲ್ಪನೇ ನಿನ ಮನಸ್ ಉಪ್ಪುಂಡತ್ತಾ?

ಬೊಲ್ಪು ಕೊರ್ಪಿ ಕಣ್ಣ್

²² “ಕಣ್ಣ್ ಶರೀರೊಗು ತುಡರ್ ಆದುಂಡು. ಇಂಚ ಉಪ್ಪುನಗ ನಿನ ಕಣ್ಣ್ ಸರ್ತ ಇತ್ತ್ಂಡ ನಿನ ಇಡೀ ಶರೀರಲಾ ಬೊಲ್ಪಾದುಪ್ಪುಂಡು.

²³ ಆಂಡ ನಿನ ಕಣ್ಣ್ ಪಡಿಕೆ ಆದಿತ್ತ್ಂಡ ನಿನ ಶರೀರಲಾ ಕತ್ತಲೆ ಆದುಪ್ಪು. ಅಂಚಾನಗ ನಿನಡುಪ್ಪು ಬೊಲ್ಪೇ ಕತ್ತಲೆ ಆದಿತ್ತ್ಂಡ ಆ ಕತ್ತಲೆ ಏತ್ ಪಂಡ್ದ್ ಪನೊಲಿ.

ದೇವೆರೆ ಆಸ್ತಿ

²⁴ “ಏರ್ಲಾ ರಡ್ಡ್ ಯಜಮಾನನ ಚಾಕ್ರಿ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಒರಿಯನ್ ಪಗೆ ಮಲ್ತ್‌ದ್ ಬೊಕ್ಕೊರಿಯನ್ ಪ್ರೀತಿ ಮಲ್ಪುವೆ. ಇಜ್ಜಾಂಡ ಒರಿಯನ್ ಎಡ್ಡೆ ಮಲ್ತೊಂದು ಬೊಕ್ಕೊರಿಯನ್ ತಾತ್ಸಾರ ಮಲ್ಪುವೆ. ನಿಕುಲು ದೇವೆರೆನ್ಲಾ ಕಾಸ್‌ನ್ಲಾ ಒಟ್ಟುಗು ಸೇವೆ ಮಲ್ಪೆರೆ ಆವಂದ್.

²⁵ “ಈ ಕಾರಣೊಗಾದ್ ನಿಕ್ಲೆ ಪ್ರಾಣೊಗು ಒವೆನ್ ತಿನೊಡು, ಒವೆನ್ ಪರೊಡು, ನಮ ಶರೀರದ ರಕ್ಷಣೆಗ್ ಒವೆನ್ ಪೊದೆತೊನೊಡು ಅಂದ್‌ದ್ ಚಿಂತೆ ಮಲ್ಪಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ವಣಸ್‌ಡ್ದ್ ಪ್ರಾಣ ಮಿತ್ತ್‌ದವು, ಅಂಗಿ ಕುಂಟುಡ್ದು ಶರೀರ ಮಿತ್ತ್‌ದವು ಆದುಂಡತ್ತಾ?”

²⁶ ಬಾನೊಡು ರಾಪಿನ ಪಕ್ಕಿಲೆನ್ ತೂಲೆ, ಐಕುಲು ಬಿತ್ತುಜ, ಕೊಯ್ಪುಜ, ತುಪ್ಪೆಲೆಡ್ ದಿಂಜಾವೊನುಜ. ಆಂಡಲಾ ಪರಲೋಕೊಡುಪ್ಪು ನಿಕ್ಲೆ ಅಮ್ಮೆ ಐಕ್ಲೆನ್ ತಾಂಕ್‌ದ್ ಕಾಪುವೆ. ಐಕ್ಲೆಡ್ದ್ ನಿಕುಲು ಏತೋ ಹೆಚ್ಚ್‌ದಾಕುಲತ್ತಾ?

²⁷ ಚಿಂತೆ ಮಲ್ತ್ ಮಲ್ತ್‌ದ್ ನಿಕ್ಲೆ ಶರೀರೊಡು ಒಂಜಿ ಮೊರಂಗೆ ಉದ್ಧ ಆವೆರೆ ಏರೆಡ್ದಾವು?

²⁸ “ಉಂದತ್ತಂದೆ ನಿಕುಲು ಅಂಗಿ ಕುಂಟುದ ಬಗೆಟ್ ಚಿಂತೆ ಮಲ್ಪುನು ದಾಯೆ? ಕಾಡ್‌ದ ಪೂ ಬುಲೆಪಿನ ರೀತಿನ್ ತೂದು ತೆರಿಲೆ.

²⁹ ಐಕುಲು ಬೆನ್ಪುಜ, ನೂಲು ನೆಯ್ಪುಜ, ಆಂಡಲಾ ಆ ಪೂಕುಲೆಡ್ ಒಂಜೆಕ್ಕ್ ಉಪ್ಪು ಅಲಂಕಾರ ಅರಸು ಆದುಪ್ಪು ಸೊಲೊಮೋನುಗು ತನ ಮಾತ ಮೈಮೆಡ್ ಉಪ್ಪುನಗಲಾ ಇತ್ತ್‌ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ.

³⁰ ಓ ಒಂತೆ ನಂಬುನಾಕುಲೇ, ಇನಿ ಇತ್ತ್‌ದ್ ಎಲ್ಲೆ ದಿಕ್ಕೆಲ್‌ದ ಪಾಲಾಪಿ ಕಾಡ್‌ದ ಪಜಿರ್‌ಗ್ ದೇವೆರ್ ಇಂಚ ಪೊದೆಪಾವೆಡ ಅವೆಡ್ದ್ ಏತೋ ಹೆಚ್ಚಾದ್ ನಿಕ್ಲೆಗ್ ತುತ್ತಾದ್ ಪೊದೆಪಾವೆ ಅತ್ತಾ?

³¹ “ಇಂಚ ಉಪ್ಪುನಗ ಒವೆನ್ ತಿನೊಡು? ಒವೆನ್ ಪರೊಡು? ಒವೆನ್ ಪೊದೆತೊನೊಡು? ಅಂದ್‌ದ್ ಚಿಂತೆ ಮಲ್ಪಡೆ.

³² ನೆಕ್ಕ್ ಮಾತೆಕ್ ಪಿದಯಿದ ಜನೊಕುಲು ತುಲ್ಲುವೆರ್. ಉಂದು ಮಾತ ನಿಕ್ಲೆಗ್ ಬೋಡಂದ್‌ದ್ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆರೆಗ್ ತೆರಿದುಂಡು.

³³ ಅಂಚಾದ್ ನಿಕುಲು ದುಂಬತ್ತ ದೇವೆರೆ ರಾಜ್ಯೊನು ಬೊಕ್ಕ ಆಯ ನೀತಿನ್ ಬಯಕ್ಲೆ. ಉಂದೆತ್ತ ಒಟ್ಟುಗು ಮಾತಲಾ ನಿಕ್ಲೆಗ್ ತಿಕ್ಕುಂಡು.

³⁴ ಅಂಚಾದ್ ನಿಕುಲು ಏಲ್ಲೆದ ಚಿಂತೆ ಮಲ್ಪೊಡ್ಚಿ. ಏಲ್ಲೆಗ್ ಎಂಚಿನ ಬೋಡು ಅವು ಏಲ್ಲೆನೇ ಚಿಂತೆ ಮಲ್ಪುಂಡು. ಆ ಪೊರ್ತುದ ಕಾಟ ಆ ಪೊರ್ತುಗೆ ಯಾವು.