ಮತ್ತಾಯೆ 25 - ಪೊಸ ಒಡಂಬಡಿಕೆ

ಪತ್ತ್ ಕನ್ಯಪೊಣ್ಣುಲೆ ಉಪಕತೆ

¹ “ಆ ಸಮಯೊಡು ಪರಲೋಕ ರಾಜ್ಯ ತನ್ಕುಲೆ ತುಡರ್‌ಲೆನ್ ದೆತ್ತೊಂದು ಮದ್ಮಯನ್ ಎದುಕೊನಿಯೆರೆ ಪಿದಾಡ್ದಿ ಪತ್ತ್ ಮಂದಿ ಕನ್ಯಪೊಣ್ಣುಲೆಗ್ ಸಮ ಆದುಪ್ಪುಂಡು.

² ಐಟ್ಟ್ ಐನ್ ಮಂದಿ ಹೆಡ್ಡೆರ್, ಐನ್ ಮಂದಿ ಬುದ್ಧಿವಂತೆರ್.

³ ಹೆಡ್ಡೆರ್ ತನ್ಕುಲೆ ತುಡರ್‌ಲೆನ್ ದೆತ್ತೊಂಡೆರ್, ಆಂಡ ಎಣ್ಣೆ ದೆತ್ತೊಂಜೆರ್.

⁴ ಬುದ್ಧಿವಂತೆರ್ ತನ್ಕುಲೆ ತುಡರ್‌ದೊಟ್ಟುಗು ಕುಪ್ಪಿಡ್ ಎಣ್ಣೆಲಾ ದೆತ್ತೊಂಡೆರ್.

⁵ ಮದ್ಮಯೆ ಬರಿಯೆರೆ ತಡ ಆನಗ ಅಕುಲು ಮಾತ ಕಣ್ಣ್ ಕೂರ್ದು ನಿದ್ರೆ ಮಲ್ತೆರ್.

⁶ ಆಂಡ ನಡು ರಾತ್ರೆಡ್, ‘ಇಂದಾ, ಮದ್ಮಯೆ! ಆಯನ್ ಎದುಕೊನಿಯೆರೆ ಬಲೆ,’ ಅಂದ್‌ದ್ ಲೆಪ್ಪು ಆಂಡ್.

⁷ ಅಪಗ ಕನ್ಯಪೊಣ್ಣುಲು ಮಾತ ಲಕ್ಕ್‌ದ್ ತನ್ಕುಲೆ ತುಡರ್‌ಲೆನ್ ಸಮ ಮಲ್ತೆರ್.

⁸ ಆಂಡ ಹೆಡ್ಡೆರೆ ತುಡರ್‌ಡ್ ಎಣ್ಣೆ ಇಜ್ಜಾಂದೆ ತೆಕೊಂದಿತ್ತ್‌ಂಡ್, ಅಪಗ ಹೆಡ್ಡೆರ್ ಬುದ್ಧಿವಂತೆರ್‌ಡ, ‘ಎಂಕ್ಲೆಗ್ ಒಂತೆ ಎಣ್ಣೆ ಕೊರ್ಲೆ,

⁹ ಎಂಕುಲೆ ತುಡರ್ ತೆಕ್ಕೊಂದುಂಡು,’ ಅಂದ್‌ದ್ ಪಂಡೆರ್. ಐಕ್ ಆ ಬುದ್ಧಿವಂತೆರ್, ‘ನಿಕ್ಲೆಗ್ ಕೊರ್‌ಂಡ ಎಂಕುಲೆಗ್ಲಾ ನಿಕ್ಲೆಗ್ಲಾ ಯಾವಂದ್; ನಿಕುಲು ಮಾರುನಾಕುಲೆ ಕೈತಲ್‌ ಪೋದು ದೆತ್ತೊನುನವು ಎಡ್ಡೆ,’ ಪಂಡೆರ್.

¹⁰ ಅಕುಲು ದೆತ್ತೊನಿಯೆರೆ ಪೋಯಿನಪಗ ಮದ್ಮಯೆ ಬತ್ತೆ. ತಯಾರಾದಿತ್ತಿನಾಕುಲು ಆಯ ಒಟ್ಟುಗು ಮದ್ಮೆದ ಇಲ್ಲದ ಉಲಯಿ ಪೋಯೆರ್. ಬಾಕಿಲ್ ಮುಚ್ಚಿಂಡ್.

¹¹ ಐಡ್ದ್ ಬೊಕ್ಕ ಒರಿದಿ ಕನ್ಯಪೊಣ್ಣುಲು ಬತ್ತ್‌ದ್ ‘ಕರ್ತವಾ, ಕರ್ತವಾ, ಎಂಕ್ಲೆಗ್ ಬಾಕಿಲ್ ಜಪ್ಪುಲೆ,’ ಪಂಡ್ದ್ ಬೊಟ್ಟುನಗ

¹² ಆಯೆ ಉತ್ತರ ಕೊರ್ದು, ‘ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಏರ್ಂದ್ ಎಂಕ್ ಗೊತ್ತಿಜ್ಜಿ,’

¹³ ದಾಯೆಗಂದ್ಂಡ ನರಮಾನಿ ಮಗೆ ಬರ್ಪಿ ದಿನ ಆವಡ್, ಗಳಿಗೆ ಆವಡ್ ನಿಕ್ಲೆಗ್ ಗೊತ್ತಿಜ್ಜಾಂದಿನೆಡ್ದ್ ಎಚ್ಚರಿಕೆಡುಪ್ಪುಲೆ.

ಮೂಜಿ ಬೇಲೆದಾಕುಲೆನ ಉಪಕತೆ

¹⁴ “ಪರಲೋಕ ರಾಜ್ಯ ಇಂಚಾದುಂಡು. ಪರದೇಶೊಗು ಪೋಪಿನ ಒರಿ ಯಜಮಾನೆ, ತನ ಬೇಲೆದಾಕುಲೆನ್ ಲೆತ್ತ್‌ದ್ ಅಕ್ಲೆಗ್ ತನ ಆಸ್ತಿನ್ ಅಕ್ಲೆ ಜವಾಬ್ದಾರಿಡ್ ಬುಡ್ತಿಲೆಕ್ಕ ಉಂಡು.

¹⁵ ಆಯೆ ಒರಿಯಗ್ ಐನ್ ತಲಾಂತ್, ಒರಿಯಗ್ ರಡ್ಡ್ ತಲಾಂತ್, ಒರಿಯಗ್ ಒಂಜಿ ತಲಾಂತ್, ಇಂಚ ಅಕ್ಲೆನ ಸಾಮರ್ಥ್ಯದ ಪ್ರಕಾರ ಕೊರ್ದು ಬೇತೆ ಒಂಜಿ ದೇಶೊಗು ಪೋಯೆ.

¹⁶ ಐನ್ ತಲಾಂತ್ ತಿಕ್ಕಿನಾಯೆ ಅವೆನ್ ಪೋದು ವ್ಯಾಪಾರೊಗು ಪಾಡ್ದ್ ನನಲಾ ಐನ್ ತಲಾಂತ್ ಲಾಭ ಮಲ್ತೆ;

¹⁷ ಅಂಚೆನೇ ರಡ್ಡ್ ತಲಾಂತ್ ತಿಕ್ಕಿನಾಯೆ ನನಲಾ ರಡ್ಡ್ ತಲಾಂತ್ ಸಂಪಾದನೆ ಮಲ್ತೆ,

¹⁸ ಆಂಡ ಒಂಜಿ ತಲಾಂತ್ ತಿಕ್ಕಿನಾಯೆ ಪೋದು ನೆಲ ಗರ್ತ್‌ದ್ ತನ ಯಜಮಾನನ ಕಾಸ್‌ನ್ ದೆಂಗಾದ್ ದೀಯೆ.

¹⁹ ಮಸ್ತ್ ಸಮಯೊಡ್ದು ಬೊಕ್ಕ ಆ ಬೇಲೆದಾಕುಲೆ ಯಜಮಾನೆ ಬತ್ತ್‌ದ್ ಅಕ್ಲೆಡ್ದ್ ಲೆಖ್ಖ ದೆತ್ತೊಂಡೆ.

²⁰ ಐನ್ ತಲಾಂತ್ ತಿಕ್ಕಿನಾಯೆ ದುಂಬು ಬತ್ತ್‌ದ್ ನನಲಾ ಐನ್ ತಲಾಂತ್ ಹೆಚ್ಚ್ ಕನತ್‌ದ್, ‘ಯಜಮಾನ, ಈ ಎಂಕ್ ಐನ್ ತಲಾಂತ್ ಕೊರ್ತ ಅತ್ತಾ, ಇಂದಾ, ನನಲಾ ಐನ್ ತಲಾಂತ್ ಹೆಚ್ಚ್ ಸಂಪಾದನೆ ಮಲ್ತ್‌ದೆ,’ ಪಂಡೆ.

²¹ ಐಕ್ ಆಯ ಯಜಮಾನೆ, ‘ಬಲ, ನಂಬಿಗಸ್ತೆ ಆಯಿ ಎಡ್ಡೆ ಬೇಲೆದಾಯಾ ಈ ಒಂತೆ ಕೆಲಸೊಡು ನಂಬಿಗಸ್ತೆ ಆದಿತ್ತ, ಮಲ್ಲ ಕೆಲಸೊಡು ನಿನನ್ ದೀಪೆ, ನಿನ ಯಜಮಾನನ ಸಂತೊಷೊಗು ಸೇರ್‌ಲ,’ ಪಂಡೆ.

²² ಅಪಗ ರಡ್ಡ್ ತಲಾಂತ್ ತಿಕ್ಕಿನಾಯೆ ದುಂಬು ಬತ್ತ್‌ದ್, ‘ಯಜಮಾನ, ರಡ್ಡ್ ತಲಾಂತ್ ಎಂಕ್ ಒಪ್ಪಿಸಾದ ಅತ್ತಾ; ಐಡ್ದ್ ನನಲಾ ರಡ್ಡ್ ತಲಾಂತ್ ಹೆಚ್ಚ್ ಸಂಪಾದನೆ ಮಲ್ತ್‌ದೆ,’ ಪಂಡೆ.

²³ ಆಯ ಯಜಮಾನೆ ಆಯಡ, ‘ಬಲ ನಂಬಿಗಸ್ತೆ ಆಯಿ ಎಡ್ಡೆ ಬೇಲೆದಾಯಾ ಈ ಒಂತೆ ಕೆಲಸೊಡು ನಂಬಿಗಸ್ತೆ ಆದಿತ್ತ, ಮಲ್ಲ ಕೆಲಸೊಡು ನಿನನ್ ದೀಪೆ, ನಿನ ಯಜಮಾನನ ಸಂತೊಷೊಗು ಸೇರ್‌ಲ,’ ಅಂದ್‌ದ್ ಪಂಡೆ.

²⁴ ಐಡ್ದ್ ಬೊಕ್ಕ ಒಂಜಿ ತಲಾಂತ್ ತಿಕ್ಕಿನಾಯೆಲಾ ದುಂಬು ಬತ್ತ್‌ದ್, ‘ಯಜಮಾನ, ಈ ಕಠಿಣ ನರಮಾನಿ, ಈ ಬಿರ್ಕಂದಿನಲ್ಪ ಕೊಯ್ಪಿನಾಯೆ, ಈ ಪಾಡಂದಿನಲ್ಪ ಬುಲೆನ್ ರಾಶಿ ಮಲ್ತೊನುನಾಯೆ ಅಂದ್‌ದ್ ತೆರಿದ್

²⁵ ಪೋಡಿದ್ ಪೋದು ಈ ನಿನ ತಲಾಂತ್‌ನ್ ಭೂಮಿಡ್ ದೆಂಗಾದ್ ದೀದಿತ್ತೆ; ಇಂದಾ, ನಿನ್ನವು ನಿಕ್ಕ್ ಉಪ್ಪಡ್,’ ಪಂಡೆ.

²⁶ ಅಪಗ ಆಯನ ಯಜಮಾನೆ ಆಯಗ್, ‘ಮೆಯಿ ಬಗ್ಗಂದಿನಾಯಾ ಪ್ರಯೋಜನದಾಂತಿ ಬೇಲೆದಾಯಾ, ಈ ಯಾನ್ ಬಿರ್ಕಂದಿನಲ್ಪ ಕೊಯ್ಪಿನಾಯೆ, ಬೊಕ್ಕ ಪಾಡಂದಿನಲ್ಪ ಬುಲೆನ್ ರಾಶಿ ಮಲ್ತೊನುನಾಯೆ ಅಂದ್‌ದ್ ನಿಕ್ಕ್ ಗೊತ್ತಿತ್ತ್ಂಡತ್ತಾ?

²⁷ ಅಂಚಾಂಡ ಈ ಎನ ಕಾಸ್‌ನ್ ಸಾಹುಕಾರನ ಕೈತಲ್‌ ಬಡ್ಡಿಗ್ ಪಾಡೊಡಿತ್ತ್‌ಂಡ್. ಯಾನ್ ಬತ್ತ್‌ದ್ ಎನ್ನೆನ್ ಬಡ್ಡಿಸಮೇತ ದೆತ್ತೊಂದ್ವೆ ಅತ್ತಾ,’ ಅಂದ್‌ದ್ ಪಂಡೆ.

²⁸ ತನ ಸೇವಕೆರೆಗ್, ‘ಆಯಡ್ದ್ ಆ ತಲಾಂತ್ ದೆತ್ತೊಂದು ಪತ್ತ್ ತಲಾಂತ್ ಇತ್ತಿನಾಯಗ್ ಕೊರ್ಲೆ.

²⁹ ದಾಯೆ ಪಂಡ ಇತ್ತಿನಾಕುಲೆಗ್ ದೇವೆರ್ ಹೆಚ್ಚಾದ್ ಕೊರುವೆ, ಅಕ್ಲೆಗ್ ನನಲಾ ಹೆಚ್ಚಾಪುಂಡು; ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು.

³⁰ ಬೊಕ್ಕ ಪ್ರಯೋಜನದಾಂತಿ ಬೇಲೆದಾಯನ್ ಪಿದಯಿ ಕತ್ತಲೆಗ್ ಪಾಡ್ದ್ ಬುಡ್ಲೆ ಅಂದ್‌ದ್ ಪಂಡೆ. ಅಲ್ಪ ಅರ್ಪಟಲಾ, ಕಟಕಟ ಕೂಲಿ ಕಡೆಪಿನವುಲಾ ಉಪ್ಪುಂಡು.’

ಕುರಿ ಬೊಕ್ಕ ಏಡ್

³¹ “ಉಂದತ್ತಂದೆ ನರಮಾನಿ ಮಗೆ ತನ ಮೈಮೆಡ್ ಮಾತ ಪರಿಶುದ್ಧ ದೂತೆರೆಲಾ ಆಯಡೊಪ್ಪ ಬನ್ನಗ ತನ ಮೈಮೆದ ಗದ್ದಿಗೆಡ್ ಕುಲ್ಲುವೆ;

³² ಬೊಕ್ಕ ಮಾತ ದೇಶೊಲೆ ಜನೊಕುಲು ಆಯ ದುಂಬು ಸೇರ್ದ್ ಬರ್ಪೆರ್. ಕುರುಬೆ ಏಡ್‌ಲೆನ್ಲಾ, ಕುರಿಕುಲೆನ್ಲಾ ಬೇತೆ ಬೇತೆ ಮಲ್ಪುಲೆಕ್ಕನೇ ಆಯೆ ಅಕ್ಲೆನ್ ಬೇತೆ ಬೇತೆ ಮಲ್ಪುವೆ

³³ ಕುರಿಕುಲೆನ್ ತನ ಬಲತ್ತ ಮರ್ಗಿಲ್‌ಡ್, ಏಡ್‌ಲೆನ್ ತನ ದತ್ತ ಮರ್ಗಿಲ್‌ಡ್ ಉಂತಾವೆ.

³⁴ ಅಪಗ ಅರಸು ತನ ಬಲತ್ತ ಮರ್ಗಿಲ್‌ಡ್ ಉಪ್ಪುನಾಕುಲೆಗ್, ‘ಎನ ಅಮ್ಮೆರೆನ ಆಶೀರ್ವಾದ ಪಡೆಯಿನಾಕುಲೆ ಬಲೆ, ಲೋಕಾದಿಡ್ದ್ ನಿಕ್ಲೆಗಾದ್ ತಯಾರಾದುಪ್ಪು ರಾಜ್ಯೊನು ಬೊಕ್ಕ ಬಾಧ್ಯಸ್ತಿಗೆದ ಹಕ್ಕ್‌ನ್ ದೆತ್ತೊನ್ಲೆ.

³⁵ ಯಾನ್ ಬಡವುಡಿತ್ತೆ, ಎಂಕ್ ವಣಸ್ ಕೊರಿಯರ್; ಯಾನ್ ಬಾಜೆಲ್‌ಡಿತ್ತೆ, ಎಂಕ್ ಪರಿಯೆರೆ ಕೊರಿಯರ್; ಪರದೇಶಿ ಆದಿತ್ತೆ, ಎನನ್ ಸೇರಾವೊಂಡರ್;

³⁶ ಕುಂಟುದಾಂತಿನಾಯೆ ಆದಿತ್ತೆ, ನಿಕುಲು ತುತ್ಯೆರೆ ಕೊರಿಯರ್; ಸೀಕ್‌ಡ್ ಬೂರ್ದಿತ್ತೆ, ಎನನ್ ಆರೈಕೆ ಮಲ್ಪೆರೆ ಬತ್ತರ್; ಸೆರೆಮನೆಟ್ ಇತ್ತೆ, ಎನನ್ ತೂಯೆರೆ ಬತ್ತರ್,’ ಅಂದ್‌ದ್ ಪನ್ಪೆ.

³⁷ ಐಕ್ ನೀತಿವಂತೆರ್, ‘ಕರ್ತವಾ, ಏಪ ಈ ಬಡವುಡಿತ್ತಿನೆನ್ ತೂದು ನಿಕ್ಕ್ ವಣಸ್ ಕೊರಿಯ? ಇಜ್ಜಿಡ ನಿಕ್ಕ್ ಬಾಜೆಲ್ ಆತಿನೆನ್ ತೂದು ಪರಿಯೆರೆ ಕೊರಿಯ?

³⁸ ಏಪ ಈ ಪರದೇಶಿ ಆದುಪ್ಪುನೆನ್ ತೂದು ಸೇರಾವೊಂಡ? ಇಜ್ಜಿಡ ನಿಕ್ಕ್ ಕುಂಟುದಾಂತೆ ಉಪ್ಪುನೆನ್ ತೂದು ತುತ್ಯೆರೆ ಕೊರಿಯ?

³⁹ ಎಂಕುಲು ಏಪ ಈ ಸೀಕ್‌ಡ್ ಬೂರ್ದಿನೆನ್ ತೂದು ಆರೈಕೆ ಮಲ್ತ್‌ದಿನಿ? ಅತ್ತ್‌ಡ ಸೆರೆಮನೆಟ್ ಇತ್ತಿನೆನ್ ತೂದು ನಿನನ್ ತೂಯೆರೆ ಬತ್ತ,’ ಅಂದ್‌ದ್ ಕೇನ್ವೆರ್.

⁴⁰ ಐಕ್ ಅರಸು, ‘ಎನ ಸಹೋದ್ರೆರೆಡ್ ಬಜೀ ಅಲ್ಪೆರಾಯಿ ಒರಿಯಗ್ ಎಂಚೆಂಚಿನ ಮಲ್ತರಾ ಅವು ಎಂಕ್ ಮಲ್ತಿಲೆಕ್ಕ ಆಂಡ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,’ ಅಂದ್‌ದ್ ಪಂಡೆ.

⁴¹ ಐಡ್ದ್ ಬೊಕ್ಕ ಆಯೆ ದತ್ತ ಮರ್ಗಿಲ್‌ಡ್ ಉಪ್ಪುನಾಕುಲೆಗ್, ‘ಶಾಪಗ್ರಸ್ತೆರೇ, ಎನನ್ ಬುಡ್ದು ಪಿಶಾಚಗ್ಲಾ, ಆಯ ದೂತೆರೆಗ್ಲಾ ತಯಾರಾದುಪ್ಪು ನಿತ್ಯ ತೂತ ಉಲಯಿ ಪೋಲೆ.

⁴² ಯಾನ್ ಬಡವುಡಿತ್ತೆ, ನಿಕುಲು ಎಂಕ್ ವಣಸ್ ಕೊರ್ಜರ್; ಯಾನ್ ಬಾಜೆಲ್‌ಡಿತ್ತೆ, ನಿಕುಲು ಎಂಕ್ ಪರಿಯೆರೆ ಕೊರ್ಜರ್;

⁴³ ಪರದೇಶಿ ಆದಿತ್ತೆ, ನಿಕುಲು ಎನನ್ ಸೇರಾವೊಂಡಿಜರ್; ಕುಂಟುದಾಂತಿನಾಯೆ ಆದಿತ್ತೆ, ನಿಕುಲು ಎಂಕ್ ತುತ್ಯೆರೆ ಕೊರ್ಜರ್; ಸೀಕ್‌ಡ್ ಬೂರ್ದಿತ್ತೆ, ಸೆರೆಮನೆಟ್ ಇತ್ತೆ, ನಿಕುಲು ಎನನ್ ಆರೈಕೆ ಮಲ್ಪೆರೆ ಬತ್ತಿಜರ್,’ ಅಂದ್‌ದ್ ಪಂಡೆ.

⁴⁴ ಐಕ್ ಅಕುಲುಲಾ, ‘ಕರ್ತವಾ, ಏಪ ಈ ಬಡವುಡಿತ್ತಿನೆನ್ಲಾ, ಬಾಜೆಲ್‌ಡ್ ಇತ್ತಿನೆನ್ಲಾ, ಈ ಪರದೇಶಿಯಾದ್ ಇತ್ತಿನೆನ್ಲಾ, ಈ ಕುಂಟುದಾಂತಿನಾಯೆ ಆದಿತ್ತಿನೆನ್ಲಾ, ಈ ಸೀಕ್‌ಡ್ ಬೂರ್ದಿತ್ತಿನೆನ್‌ಲಾ, ಈ ಸೆರೆಮನೆಟ್ ಇತ್ತಿನೆನ್ಲಾ ತೂದು ನಿಕ್ಕ್ ಚಾಕ್ರಿ ಮಲ್ಪಂದೆ ಪೋಯ?’ ಪನ್ವೆರ್.

⁴⁵ ಅಪಗ ಆಯೆ ಉತ್ತರ ಕೊರ್ದು, ‘ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಈ ಬಜೀ ಅಲ್ಪೆರಾಯಿ ಒರಿಯಗ್ ಎಂಚೆಂಚಿನ ಮಲ್ಪಂದೆ ಉಲ್ಲರಾ ಅವೆನ್ ಎಂಕ್‌ಲಾ ಮಲ್ಪಂದಿಲೆಕ್ಕ ಆಂಡ್,’ ಅಂದ್‌ದ್ ಪಂಡೆ.

⁴⁶ ಬೊಕ್ಕ ಮೊಕುಲು ನಿತ್ಯ ಶಿಕ್ಷೆಗ್ಲಾ, ನೀತಿವಂತೆರ್ ನಿತ್ಯಜೀವೊಗ್ಲಾ ಪೋಪೆರ್,” ಅಂದ್‌ದ್ ಪಂಡೆ.