ಮತ್ತಾಯೆ 23 - ಪೊಸ ಒಡಂಬಡಿಕೆ

ಶಾಸ್ತ್ರಿಲೆ ಬಗೆಟ್ ಎಚ್ಚರಿಕೆ

¹ ಬೊಕ್ಕ ಯೇಸು ಜನೊಕುಲೆ ಗುಂಪುಗ್ಲಾ, ತನ ಶಿಷ್ಯೆರೆಗ್ಲಾ ಪಂಡಿನಿ ದಾನೆ ಪಂಡ,

² “ಶಾಸ್ತ್ರಿಲುಲಾ ಪರಿಸಾಯೆರ್‌ಲಾ ಮೋಶೆನ ಗದ್ದಿಗೆಡ್ ಕುಲ್ಲೊಂದುಲ್ಲೆರ್.

³ ಅಂಚಾಯಿನೆಡ್ದ್ ಅಕುಲು ನಿಕ್ಲೆಗ್ ಎಂಚೆಂಚಿನ ಪನ್ಪೆರಾ ಅವೆನ್ ಮಾತ ಮಲ್ಪುಲೆ, ತಾಳೊನ್ಲೆ. ಆಂಡ ಅಕ್ಲೆನ ನಡತೆದ ಲೆಕ್ಕ ನಡಪಡೆ. ಅಕುಲು ಪನ್ಪಿನೆ ಅತ್ತಂದೆ ಅಂಚ ನಡಪುಜೆರ್.

⁴ ಅಕುಲು ಜನೊಕುಲೆ ಮಿತ್ತ್ ತುಂಬೆರೆ ತೀರಂದಿ ಪುದೆಕ್ಲೆನ್ ತುಂಬಾವೆರ್; ಆಂಡ ತನ್ಕುಲು ಆ ಪುದೆಕ್ಲೆನ್ ಒಂಜಿ ಬಿರೆಲ್‌ಡ್ದ್‌ಲಾ ಮುಟ್ಟುಜೆರ್.

⁵ ಅಕುಲು ತನ್ಕುಲೆ ಬೇಲೆ ಮಾತ ಜನೊಕುಲೆಗ್ ತೋಜೊಡು ಅಂದ್‌ದ್ ಮಲ್ಪುವೆರ್. ತನ್ಕುಲು ಶಾಸ್ತ್ರದ ಪಟ್ಟಿಲೆನ್ ಅಗೆಲ ದೀದ್ ಮುಂಡೊಡು ಕಟ್ಟ್‌ದ್ ಕುಂಟುದ ಗೊಂಡೆಲೆನ್ ಉದ್ಧ ಮಲ್ಪುವೆರ್.

⁶ ಉಂದತ್ತಂದೆ ಲೇಸ್‌ಲೆಡ್ ಸುರುತ್ತ ಪಂತೆ, ಸಭಾಮಂದಿರೊಡು ಮಲ್ಲಸ್ಥಾನೊಲು,

⁷ ಅಂಗಡಿ ಸಾದಿಲೆಡ್ ವಂದನೆಲು, ಜನೊಕುಲೆಡ್ದ್ ಬೋಧಕೆರಂದ್‌ದ್ ಪನ್ಪಾವೊನ್ನವು ಅಕ್ಲೆಗ್ ಇಷ್ಟ.

⁸ ಆಂಡ ನಿಕುಲು ಬೋಧಕೆರಂದ್‌ದ್ ಪನ್ಪಾವೊನಡೆ; ದಾಯೆಗ್ ಪಂಡ ಕ್ರಿಸ್ತೆ ಒರಿಯೇ ನಿಕ್ಲೆಗ್ ಬೋಧಕೆ, ನಿಕುಲು ಮಾತ ಸಹೋದ್ರೆರ್.

⁹ ಉಂದತ್ತಂದೆ ಭೂಲೋಕೊಡು ಏರೆನ್ಲಾ ಎಂಕುಲೆ ಅಮ್ಮೆ ಅಂದ್‌ದ್ ಲೆಪ್ಪಡೆ, ಪರಲೋಕೊಡುಪ್ಪು ಒರಿಯೇ ನಿಕ್ಲೆಗ್ ಅಮ್ಮೆ.

¹⁰ ಬೊಕ್ಕ ಗುರುಕುಲು ಅಂದ್‌ದ್ ಲೆಪ್ಪಾವೊನಡೆ; ಕ್ರಿಸ್ತೆ ಒರಿಯೇ ನಿಕ್ಲೆಗ್ ಗುರು.

¹¹ ನಿಕ್ಲೆಡ್ ಮಿತ್ತ್‌ದ ಸ್ಥಾನೊಡು ಉಪ್ಪುನಾಯೆ ನಿಕ್ಲೆನ ಸೇವಕೆ ಆದುಪ್ಪೊಡು.

¹² ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.

ಕಪಟಿಲಾಯಿ ಶಾಸ್ತ್ರಿಲೆಗ್ ಬೋಧನೆ

¹³ “ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ಪರಲೋಕ ರಾಜ್ಯದ ಬಾಕಿಲ್‌ನ್ ನರಮಾನಿಲೆ ಎದುರು ಮುಚ್ಚಿದ್ ಬುಡ್ಪರ್, ನಿಕುಲಾಂಡಲಾ ಉಲಯಿ ಪೋಪುಜರ್, ಉಲಯಿ ಪೋವೊಡಂದ್ ಉಪ್ಪುನಾಕುಲೆನ್ಲಾ ಪೋಯೆರೆ ಬುಡ್ಪುಜರ್.

¹⁴ ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ತೂಪೆರ್ ಪಂಡ್ದ್ ಉದ್ಧದ ಪ್ರಾರ್ಥನೆನ್ ಮಲ್ಪುವರ್, ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್. ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್.

¹⁵ ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಒರಿಯನ್ ನಿಕ್ಲೆನ ಜಾತಿಗ್ ಸೇರಾಯೆರೆ ಬೋಡಾದ್ ಭೂಮಿನ್ಲಾ ಕಡಲ್‌ನ್ಲಾ ಸುತ್ತುದು ಬರ್ಪರ್. ಆಯೆ ಸೇರಿ ಬೊಕ್ಕ ಆಯನ್ ನಿಕ್ಲೆಡ್ದ್ ರಡ್ದ್ ಪಾಲ್ ನರಕದಾಯಾದ್ ಮಲ್ಪುವರ್.

¹⁶ “ಅಯ್ಯೋ, ಸಾದಿ ತೂಪಾವುನ ಕುರುಡೆರೇ, ‘ಒರಿ ದೇವಾಲಯದ ಮಿತ್ತ್ ಆಜ ದೀಯೆಡ ಅವು ದಾಲ ಆಜ ಅತ್ತ್,’ ಆಂಡ ‘ಒರಿ ದೇವಾಲಯದ ಬಂಗಾರ್‌ದ ಮಿತ್ತ್ ಆಜ ದೀವೊಂಡೆಡ ಅವೆನ್ ನಡಪಾವೊಡೇ,’ ಅಂದ್‌ದ್ ಪನ್ಪರ್.

¹⁷ ಮರ್ಲೆರೇ, ಕುರುಡೆರೇ, ಒವು ಹೆಚ್ಚ್‌ದವು? ಬಂಗಾರನಾ, ಬಂಗಾರ್‌ನ್ ಪರಿಶುದ್ಧ ಮಲ್ಪುನ ದೇವಾಲಯನಾ?

¹⁸ ‘ಒರಿ ಬಲಿಪೀಠದ ಮಿತ್ತ್ ಆಜ ದೀವೊಂಡೆಡ ಅವು ದಾಲ ಆಜ ಅತ್ತ್,’ ಆಂಡ ‘ಐಟ್ಟುಪ್ಪು ಕಾಣಿಕೆದ ಮಿತ್ತ್ ಆಜ ದೀಯೆಡ ಅವೆನ್ ನಡಪಾವೊಡೇ,’ ಅಂದ್‌ದ್ ಪನ್ಪರ್.

¹⁹ ಕುರುಡೆರೇ ಒವು ಹೆಚ್ಚ್‌ದವು? ಕಾಣಿಕೆನಾ, ಆ ಕಾಣಿಕೆನ್ ಪರಿಶುದ್ಧ ಮಲ್ಪುನ ಬಲಿಪೀಠನಾ?

²⁰ ಇಂಚಾಯಿನೆಡ್ದ್ ಬಲಿಪೀಠದ ಮಿತ್ತ್ ಆಜ ಪಾಡ್‌ಂಡ ಐತ ಮಿತ್ತ್‌ಲಾ ಐತ ಮಿತ್ತುಪ್ಪು ಮಾತೆತ್ತ ಮಿತ್ತ್‌ಲಾ ಆಜ ಪಾಡಿಲೆಕ್ಕ ಆಂಡ್.

²¹ ದೇವಾಲಯದ ಮಿತ್ತ್ ಆಜ ದೀಂಡ ಐತ ಮಿತ್ತ್‌ಲಾ ಐಟ್ಟ್ ಉಪ್ಪುನಾಯನ ಮಿತ್ತ್‌ಲಾ ಆಜ ದೀಯಿಲೆಕ್ಕ ಆಂಡ್. ಅಂಚೆನೇ ದೇವಾಲಯದ ಆಜ ಪಾಡುನಾಯೆ ಆಯೆ ದೇವಾಲಯದ ಮಿತ್ತ್‌ಲಾ ಬೊಕ್ಕ ಐಟ್ಟ್ ಉಪ್ಪುನ ದೇವೆರೆನ ಮಿತ್ತ್‌ಲಾ ಆಜ ಪಾಡುಲೆಕ್ಕ ಆಂಡ್.

²² ಪರಲೋಕದ ಮಿತ್ತ್ ಆಜ ಪಾಡುನಾಯೆ ದೇವೆರೆ ಗದ್ದಿಗೆದ ಮಿತ್ತ್‌ಲಾ ಐಟ್ಟ್ ಕುಲ್ಲುದಿನಾಯನ ಮಿತ್ತ್‌ಲಾ ಆಜ ಪಾಡುಲೆಕ್ಕ ಆಂಡ್.

²³ “ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಪುದಿನ, ಮೆತ್ತೆ, ಸಬ್ಬಸಿಗೆ ಸೊಪ್ಪು, ಜೀರ್ದರಿಲೆಡ್ ಪತ್ತೆಟ್ಟ್ ಒಂಜಿ ಪಾಲ್ ಕೊರ್ಪರ್ ಸರಿ, ಆಂಡ ನ್ಯಾಯಕಟ್ಟ್‌ಡ್ ಮಾರ್ಯಾದಿಡುಪ್ಪುನ ನ್ಯಾಯೊನ್ಲಾ, ಕರುಣೆನ್ಲಾ, ನಂಬಿಕೆನ್ಲಾ ಬುಡ್ದು ಬುಡಿಯರ್. ಉಂದೆನ್ ಮಲ್ಪೊಡಾದಿತ್ತ್‌ಂಡ್; ಅವೆನ್ಲಾ ಬುಡಿಯೆರೆ ಬಲ್ಲಿ.

²⁴ ಸಾದಿ ತೋಜಾವುನ ಕುರುಡೆರೆ, ನಿಕುಲು ಉಮಿಲ್ ಗಾಳ್ಯುನಾಕುಲುಲಾ ಒಂಟೆ ದಿಂಗುನಾಕುಲುಲಾ

²⁵ ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಚೊಂಬು, ಬಟ್ಟಲ್‌ನ್ ಪಿದಾಯಿಡ್ದ್ ಸೂಕ್ಷ್ಮೊಡು ದೆಕ್ಕುವರ್, ಆಂಡ ಉಲಯಿಡ್ದ್ ಕಲೆಂಗ್ ಪತ್ತಿದಿನವು ದುರಾಸೆಡ್ದ್‌ಲಾ ಸುಲಿಗೆಲೆಡ್ದ್‌ಲಾ ದಿಂಜಿದಿನವು ಆದುಪ್ಪುಂಡು.

²⁶ ಕುರುಡೆ ಆದುಪ್ಪು ಪರಿಸಾಯಾ, ದುಂಬತ್ತ ಚೊಂಬು, ಬಟ್ಟಲ್ದ ಉಲಯಿದೆನ್ ದೆಕ್ಕ್‌ಲ ಅಪಗ ಪಿದಯಿದವುಲಾ ಮಿಂಚ್ಚುಂಡು.

²⁷ “ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಸುಣ್ಣ ಕೊರ್ತಿ ಸಮಾಧಿದ ಲೆಕ್ಕ ಉಲ್ಲರ್. ಆ ಸಮಾಧಿ ಪಿದಯಿಡ್ದ್ ಬಾರಿ ಪೊರ್ಲು ತೋಜುಂಡು, ಆಂಡ ಉಲಯಿ ತೂಂಡ ಸೈತಿನಾಕುಲೆನ ಎಲುಡ್ದುಲಾ, ಮಾತ ಗಲೀಜಿಡ್ದ್‌ಲಾ ದಿಂಜಿದಿಪ್ಪುಂಡು.

²⁸ ಅಂಚೆನೇ ನಿಕುಲುಲಾ ಪಿದಯಿ ಜನೊಕುಲೆಗ್ ನೀತಿವಂತೆರ್ ಲೆಕ್ಕ ತೋಜಾವೊನ್ವರ್ ಸರಿ, ಉಲಯಿ ಕಪಟೊಡ್ದುಲಾ ಅನ್ಯಾಯೊಡ್ದುಲಾ ದಿಂಜಿದಿನಕುಲಾದುಲ್ಲರ್.

ಕಪಟಿಲೆಗ್ ಆಪಿ ಶಿಕ್ಷೆ

²⁹ “ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಪ್ರವಾದಿಲೆ ಸಮಾಧಿಲೆನ್ ಕಟ್ಟ್‌ದ್ ನೀತಿವಂತೆರೆ ಗೋರಿಲೆನ್ ಸಿಂಗಾರ ಮಲ್ತ್‌ದ್

³⁰ ಎಂಕುಲು ಎಂಕಲ್ನ ಹಿರಿಯೆರೆ ಕಾಲೊಡು ಇತ್ತುದ್ವಡ ಪ್ರವಾದಿಲೆ ನೆತ್ತೆರ್‌ಡ್ ಪಾಲ್‌ದಾರೆರ್ ಆತ್ವಯ ಪನ್ಪರ್.

³¹ ಅಂಚಾಂಡ ನಿಕುಲು ಪ್ರವಾದಿಲೆನ್ ಕೆರಿನಕುಲೆ ಜೋಕುಲೇ ಅಂದ್‌ದ್ ನಿಕ್ಲೆಗ್ ನಿಕುಲೇ ಸಾಕ್ಷಿ ಆದುಲ್ಲರ್.

³² ಎಡ್ಡೆ, ನಿಕುಲು ನಿಕ್ಲೆ ಹಿರಿಯೆರೆ ಪಾಪದ ಆಳತೆನ್ ಪೂರ್ತಿ ಮಲ್ಪುಲೆ.

³³ ಕಂದೊಡಿಲೇ! ಸರ್ಪ ಜಾತಿಲೇ ನರಕದ ದಂಡನೆಗ್ ಎಂಚ ತಪ್ಪವೊನ್ವರ್?

³⁴ ಅಂಚಾಯಿನೆಡ್ದ್ ತೂಲೇ, ಯಾನ್ ನಿಕ್ಲೆ ಕೈತಲ್‌ ಪ್ರವಾದಿಲೆನ್ಲಾ, ಬುದ್ಧಿವಂತೆರೆನ್ಲಾ ಶಾಸ್ತ್ರಿಲೆನ್ಲಾ ಕಡಪುಡ್ವೆ; ಅಕ್ಲೆಡ್ ಕೆಲೆವೆರೆನ್ ಕೆರುವರ್‌, ಕ್ರುಸ್ಸುಗು ಪಾಡ್ವರ್; ಕೆಲೆವೆರೆನ್ ನಿಕ್ಲೆ ಸಭಾಮಂದಿರೊಲೆಡ್ ಸೋಂಟೆಡ್ ಹಾಕ್‌ದ್ ಊರುಡ್ದು ಊರುಗು ಗಿಡ್ತೊಂದು ಪೋವರ್.

³⁵ ಇಂಚ ನೀತಿವಂತೆ ಆದಿತ್ತಿ ಹೇಬೇಲ್‌ನ ನೆತ್ತೆರೆಡ್ದ್ ಸುರುವಾದ್ ದೇವಾಲಯೊಗ್ಲಾ, ಬಲಿಪೀಠದ ನಡುಟು ನಿಕುಲು ಕೆರ್ದ್ ಪಾಡಿನ ಬರಕೀಯನ ಮಗೆ ಆದುಪ್ಪು ಜಕರೀಯನ ನೆತ್ತೆರ್ ಮುಟ್ಟ ಭೂಮಿದ ಮಿತ್ತ್ ಜಪುಡಾಯಿನ ನೀತಿವಂತೆರೆ ನೆತ್ತೆರೆಡ್ದ್ ಆಯಿನ ಅಪರಾಧ ನಿಕ್ಲೆ ತರೆತ ಮಿತ್ತ್ ಬರು.

³⁶ ಅವು ಮಾತ ಈ ಸಂತಾನದ ಮಿತ್ತ್ ಬರು ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

ಯೆರೂಸಲೇಮುಗು ಬೋಡಾದ್ ದುಃಖ ಪಡೆಯಿನವು

³⁷ “ಯೆರೂಸಲೇಮೋ, ಯೆರೂಸಲೇಮೋ ಪ್ರವಾದಿಲೆ ಪ್ರಾಣ ದೆಪ್ಪುನಾಲೇ, ದೇವೆರ್ ನಿನ ಕೈತಲ್‌ ಕಡಪುಡ್ದು ಕೊರ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರ್ಪಿನಾಲೇ, ಕೋರಿ ತನ ಕಿನ್ನಿಲೆನ್ ರೆಂಕೆದ ಅಡಿಟ್ಟ್ ಕುಲ್ಲಾವುಲೆಕ್ಕ ನಿನ ಜೋಕುಲೆನ್ ಕುಲ್ಲಾಯೆರೆ ಎಂಕ್ ಏತೋ ಸರ್ತಿ ಮನಸಿತ್ತ್‌ಂಡ್. ಆಂಡ ನಿಕ್ಲೆಗ್ ಮನಸ್‌ದಾಂತೆ ಪೋಂಡು.

³⁸ ತೂಲೇ, ನಿಕ್ಲೆನ ಆಲಯ ಕಾಲಿ ಆದ್ ಬೂರ್ದುಂಡು.

³⁹ ಇತ್ತೆಡ್ದ್, ‘ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ,’ ಪಂಡ್ದ್ ಪನ್ಪಿನ ಮುಟ್ಟ ನಿಕುಲು ಎನನ್ ತೂಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ.”