ಮತ್ತಾಯೆ 19 - ಪೊಸ ಒಡಂಬಡಿಕೆ

ಕಂಡನಿ ಬೊಡೆದಿಯಾಡ್ಲೆ ನಡವಳಿಕೆ

¹ ಯೇಸು ಈ ಪಾತೆರೊಲೆನ್ ಮುಗಿತಿ ಬೊಕ್ಕ ಗಲಿಲಾಯೊನು ಬುಡ್ದು ಯೊರ್ದಾನ್ ತುದೆತ ಆಯೆರೆಗ್ ಪೋದು ಯೂದಾಯ ಪ್ರಾಂತೊಗು ಬತ್ತೆ.

² ಮಸ್ತ್ ಜನೊಕುಲು ಆಯ ಬೆರಿಯೆ ಗುಂಪುಗುಂಪಾದ್ ಪೋಯೆರ್. ಆಯೆ ಅಕ್ಲೆನ್ ಅವುಲೇ ಗುಣ ಮಲ್ತೆ.

³ ಅಪಗ ಪರಿಸಾಯೆರ್ ಆಯನ ಕೈತಲ್‌ ಬತ್ತ್‌ದ್ ಆಯನ್ ಪರೀಕ್ಷೆ ಮಲ್ಪೊಡು ಪನ್ಪಿ ಯೋಚನೆಡ್, “ಒರಿ ಒವುಲಾ ಒಂಜಿ ಕಾರಣೊಡ್ದು ತನ ಬೊಡೆದಿನ್ ಬುಡ್ದು ಬುಡ್ಪಿನವು ನ್ಯಾಯನಾ,” ಅಂದ್‌ದ್ ಕೇಂಡೆರ್.

⁴ ಐಕ್ ಯೇಸು, “ನರಮಾನಿನ್ ಉಂಡು ಮಲ್ತಿನಾಯೆ ಆದಿಡೇ ಅಕ್ಲೆನ್ ಆಣ್ ಪೊಣ್ಣಾದ್ ಉಂಡು ಮಲ್ತ್‌ದೆ.

⁵ ಅಕ್ಲೆ ಸಂಗತಿಡ್, ‘ಈ ಕಾರಣೊಡ್ದು ಆಣ್ ಮಗೆ ಅಪ್ಪೆನ್ಲಾ ಅಮ್ಮೆರೆನ್ಲಾ ಬುಡ್ದು ತನ ಬೊಡೆದಿನ್ ಸೇರುವೆ. ಅಕುಲು ಇರ್ವೆರ್ ಒಂಜೇ ಶರೀರ ಆದುಪ್ಪುವೆರ್,’ ಅಂದ್‌ದ್ ಪನ್ತಿನೆನ್ ನಿಕುಲು ಓದುದಿಜರಾ?

⁶ ಇಂಚ ಉಪ್ಪುನಗ ಅಕುಲು ನನ ಇರ್ವೆರತ್ತ್, ಒಂಜೇ ಶರೀರ ಆದುಪ್ಪುವೆರ್. ಅಂಚಾಯಿನೆಡ್ದ್ ದೇವೆರ್ ಕೂಡಾಯಿನೆನ್ ನರಮಾನಿಲು ಬೇತೆ ಮಲ್ಪೆರೆ ಬಲ್ಲಿ,” ಪಂಡೆ.

⁷ ಅಕುಲು ಆಯನ್, “ಅಂಚಾಂಡ ತ್ಯಾಗಪತ್ರ ಕೊರ್ದು ಆಲೆನ್ ಬುಡ್ದು ಬುಡೊಲಿ ಅಂದ್‌ದ್ ಮೋಶೆ ದಾಯೆ ಅಪ್ಪಣೆ ಕೊರಿಯೆ,” ಅಂದ್‌ದ್ ಕೇಂಡೆರ್.

⁸ ಐಕ್ ಯೇಸು ಅಕ್ಲೆಡ, “ಮೋಶೆ ನಿಕ್ಲೆನ ಹಟೊನು ತೂದು ನಿಕ್ಲೆನ ಬೊಡೆದಿಯಾಡ್ಲೆನ್ ಬುಡ್ದು ಬುಡಿಯೆರೆ ಅಪ್ಪಣೆ ಕೊರಿಯೆ, ಆಂಡ ಆದಿಡ್ದೇ ಅಂಚ ಇಜ್ಜಾಂಡ್.

⁹ ಬೊಕ್ಕ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ವ್ಯಭಿಚಾರ ಮಲ್ತಿ ಕಾರಣೊಗಾದ್ ಅತ್ತಂದೆ ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಪ್ಪುವೆ.” ಪಂಡೆ.

¹⁰ ಐಕ್ ಶಿಷ್ಯೆರ್ ಬೊಡೆದಿನ ಸಂಗತಿಡ್ ಕಂಡನಿನ ಧರ್ಮ ಇಂಚ ಇತ್ತ್ಂಡ ಮದ್ಮೆ ಆವಂದೆ ಉಪ್ಪುನವು ಎಡ್ಡೆ ಅತ್ತಾ ಪಂಡೆರ್.

¹¹ ಯೇಸು ಅಕ್ಲೆಡ, “ಉಂದು ಮಾತೆರೆಗ್ಲಾ ಒಪ್ಪಿಯೆರೆ ಆವಂದ್,” ಆಂಡ “ದೇವೆರ್ ಏರೆಗ್ ವರ ಕೊರ್ತೆನಾ ಅಕ್ಲೆಗ್ ಮಾತ್ರ.

¹² ಅಪ್ಪೆನ ಗರ್ಭೊಡ್ದು ಶಿಕಂಡಿಲಾದ್ ಪುಟ್ಟಿನಾಕುಲು ಕೆಲೆವೆರ್ ಉಲ್ಲೆರ್. ನರಮಾನಿಡ್ದ್ ಶಿಕಂಡಿಲಾಯಿನಾಕುಲು ಕೆಲೆವೆರ್ ಉಲ್ಲೆರ್. ಬೊಕ್ಕ ಪರಲೋಕ ರಾಜ್ಯೊಗಾದ್ ತನ್ಕುಲೆನ್ ತನ್ಕುಲೇ ಶಿಕಂಡಿಲಾದ್ ಮಲ್ತೊಂಡಿನಾಕುಲು ಕೆಲೆವೆರ್ ಉಲ್ಲೆರ್. ಅಂಗೀಕಾರ ಮಲ್ಪುನಾಯೆ ಅಂಗೀಕಾರ ಮಲ್ಪಡ್,” ಅಂದ್‌ದ್ ಪಂಡೆ.

ಜೋಕುಲೆನ್ ಆಶೀರ್ವದಿಪುನವು

¹³ ಅಪಗ ಕೆಲೆವೆರ್ ತನ್ಕುಲೆ ಎಲ್ಯ ಜೋಕುಲೆನ್ ಯೇಸುನ ಕೈತಲ್‌ ಕನತ್‌ದ್ ಆಯೆ ಅಕ್ಲೆ ಮಿತ್ತ್ ಕೈ ದೀದ್ ಪ್ರಾರ್ಥನೆ ಮಲ್ಪೊಡಂದ್ ಕೇಂಡಿನಪಗ ಶಿಷ್ಯೆರ್ ಅಕ್ಲೆನ್ ದಟ್ಟಿಯೆರ್.

¹⁴ ಯೇಸು ಅಕ್ಲೆಡ, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ. ಅಕ್ಲೆಗ್ ಅಡ್ಡಿ ಮಲ್ಪಡೆ. ಪರಲೋಕ ರಾಜ್ಯ ಇಂಚಿತ್ತಿನಾಕುಲೆನವೇ,”

¹⁵ ಬೊಕ್ಕ ಜೋಕುಲೆನ ಮಿತ್ತ್ ಕೈ ದೀದ್ ಆಶೀರ್ವಾದ ಮಲ್ತೆ. ಐಡ್ದ್ ಬೊಕ್ಕ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ.

ಐಶ್ವರ್ಯವಂತೆ ಜವನ್ಯೆ

¹⁶ ಅಪಗ ಒರಿ ಬತ್ತ್‌ದ್ ಆಯಡ, “ಬೋಧಕಾ, ಯಾನ್ ನಿತ್ಯಜೀವೊನು ಪಡೆಯೊಡಾಂಡ ಎಂಚಿನ ಎಡ್ಡೆ ಕಾರ್ಯ ಮಲ್ಪೊಡು,” ಅಂದ್‌ದ್ ಕೇನ್ನಗ

¹⁷ ಐಕ್ ಯೇಸು ಆಯಡ, “ಎಡ್ಡೆಂತಿನೆತ್ತ ಬಗೆಟ್ ಎನಡ ದಾಯೆಗ್ ಕೇನ್ವ? ಎಡ್ಡೆಂತಿನಾಯೆ ಒರಿಯೇ, ಆಂಡ ಆ ನಿತ್ಯಜೀವೊಡು ಸೇರೊಡಾಂಡ ದೇವೆರೆ ಅಪ್ಪಣೆಲೆಗ್ ತಕ್ಕ ನಡತೊನ್ಲ,” ಅಂದ್‌ದ್ ಪಂಡೆ.

¹⁸ ಆಯೆ, “ಅವು ಎಂಚಿನವು,” ಅಂದ್‌ದ್ ಕೇನ್ನಗ ಯೇಸು, “ಮಾನ್ಯ ಕೆರಿಯೆರೆ ಬಲ್ಲಿ, ವ್ಯಭಿಚಾರ ಮಲ್ಪೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ನಿನ ಅಪ್ಪೆಗ್ಲಾ ಅಮ್ಮೆರೆಗ್ಲಾ ಸನ್ಮಾನ ಮಲ್ಪೊಡು.

¹⁹ ಬೊಕ್ಕ ನಿನಲೆಕ್ಕನೇ ನಿನ ನಿರೆತಾಯನ್ ಪ್ರೀತಿ ಮಲ್ಪೊಡು ಪನ್ಪಿನವೇ.”

²⁰ ಆ ಜವನ್ಯೆ ಆಯಡ, “ಉಂದೆಕ್ಕ್ ಮಾತ ಸರಿಯಾದ್ ನಡತೊಂದೆ; ನನ ಎಂಚಿನ ಕಡಿಮೆ ಆದುಪ್ಪು?” ಅಂದ್‌ದ್ ಕೇನ್ನಗ

²¹ ಯೇಸು ಆಯಡ, “ಮಾತಲಾ ಸರಿ ಆವೊಡ್ಡ ಪೋದು ನಿನ ಆಸ್ತಿನ್ ಮಾರ್ದ್ ಬಡವೆರೆಗ್ ಕೊರ್ಲ; ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ.

²² ಆ ಜವನ್ಯಗ್ ಮಸ್ತ್ ಆಸ್ತಿ ಇತ್ತಿನೆಡ್ದ್ ಈ ಪಾತೆರೊನು ಕೇಂಡ್ದ್ ದುಃಖೊಡು ಪಿರ ಪೋಯೆ.

²³ ಅಪಗ ಯೇಸು ತನ ಶಿಷ್ಯೆರೆನ್ ತೂದು, “ನಿಕ್ಲೆಗ್ ನಿಜಾದ್ ಪನ್ಪೆ, ಐಶ್ವರ್ಯವಂತೆ ಪರಲೋಕ ರಾಜ್ಯೊಡು ಸೇರುನವು ಕಷ್ಟ.

²⁴ ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್ ಒಂಜಿ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ ಅಂದ್‌ದ್ ನಿಕ್ಲೆಗ್ ಕುಡ ಪನ್ಪೆ,” ಪಂಡೆ

²⁵ ಶಿಷ್ಯೆರ್ ಉಂದೆನ್ ಕೇಂಡ್ದ್ ಅಚ್ಚಿರ ಆದ್, “ಇಂಚಾಂಡ, ಏರೆಗ್ ರಕ್ಷಣೆ ಆವು?” ಅಂದ್‌ದ್ ಕೇನ್ನಗ

²⁶ ಯೇಸು ಅಕ್ಲೆನ್ ತೂದು, “ಉಂದು ನರಮಾನಿಲೆಗ್ ಅಸಾದ್ಯದವು; ಆಂಡ ದೇವೆರೆಗ್ ಮಾತಲಾ ಸಾದ್ಯನೇ,” ಪಂಡೆ.

ಯೇಸುನು ಬುಡ್ಪಿನಾಯಗ್ ತಿಕ್ಕುನ ಪ್ರತಿಫಲ

²⁷ ಅಪಗ ಪೇತ್ರೆ ಉತ್ತರ ಕೊರ್ದು ಆಯಡ, “ಇಂದಾ, ಎಂಕುಲು ಮಾತ ಬುಡ್ದು ನಿನ ಬೆರಿಯೆ ಬೈದ; ಎಂಕ್ಲೆಗ್ ಎಂಚಿನ ತಿಕ್ಕುಂಡು?” ಅಂದ್‌ದ್ ಕೇಂಡೆ.

²⁸ ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ. ಪೊಸ ಸೃಷ್ಟಿಡ್ ನರಮಾನಿ ಮಗೆ ತನ ಮೈಮೆದ ಗದ್ದಿಗೆದ ಮಿತ್ತ್ ಕುಲ್ಲುನಗ ಎನ ಬೆರಿಯೆ ಬರ್ಪಿ ನಿಕುಲುಲಾ ಪದ್ರಾಡ್ ಗದ್ದಿಗೆಡ್ ಕುಲ್ಲೊಂದು ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ನ್ಯಾಯತೀರ್ಪು ಮಲ್ಪುವರ್.

²⁹ ಬೊಕ್ಕ ಎನ ಪುದರ್‌ಗಾದ್ ಇಲ್ಲ್‌ನಾವಡ್, ಮೆಗ್ಯೆಪಲಯನಾವಡ್, ಮೆಗ್ದಿಪಲಿನಾವಡ್, ಅಪ್ಪೆನಾವಡ್, ಅಮ್ಮೆರೆನಾವಡ್, ಜೋಕುಲೆನಾವಡ್, ಆಸ್ತಿನಾವಡ್ ಬುಡ್ದುಬುಡ್ತಿನಾಕುಲೆಗ್ ನೂದು ತಲಾಂತ್ ಹೆಚ್ಚ್ ತಿಕ್ಕುಂಡು. ಬೊಕ್ಕ ಅಕುಲು ನಿತ್ಯಜೀವೊಗು ಬಾಧ್ಯಸ್ತೆರಾಪೆರ್.

³⁰ ಆಂಡ ಮಸ್ತ್ ಜನ ಸುರುತ್ತಾಕುಲು ಕಡೆತ್ತಾಕುಲು ಆಪೆರ್; ಕಡೆತ್ತಾಕುಲು ಸುರುತ್ತಾಕುಲು ಆಪೆರ್.”