ಮತ್ತಾಯೆ 18 - ಪೊಸ ಒಡಂಬಡಿಕೆ

ತಗ್ಗ್‌ತನತ್ತ ಬಗೆಟ್

¹ ಆ ಸಮಯೊಡು ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಪರಲೋಕ ರಾಜ್ಯೊಡು ಏರ್ ಮಲ್ಲಾಯೆ?” ಅಂದ್‌ದ್ ಕೇನ್ನಗ

² ಆಯೆ ಎಲ್ಯ ಬಾಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆನ ನಡುಟು ಉಂತಾದ್

³ ಅಕ್ಲೆಡ, “ನಿಕುಲು ಪಶ್ಚಾತಾಪ ಪಡೆದ್ ಕುಡೊರ ಎಲ್ಯ ಜೋಕುಲೆ ಲೆಕ್ಕ ಆವಂದೆ ಪೋಯಿಜರ್ಡ ಪರಲೋಕ ರಾಜ್ಯೊಗು ಪೋಪಿನೆ ಇಜ್ಜಿ, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

⁴ ಇಂಚ ಉಪ್ಪುನೆಡ್ದ್ ಏರ್ ಈ ಎಲ್ಯ ಬಾಲೆದಲೆಕ್ಕ ತನನ್ ತಗ್ಗಾವೊನ್ವೆನಾ, ಆಯೆನೇ ಪರಲೋಕ ರಾಜ್ಯೊಡು ಮಲ್ಲಾಯೆ.

⁵ ಉಂದತ್ತಂದೆ ಏರಾಂಡಲಾ ಎನ ಪುದರ್‌ಡ್ ಇಂಚಿನ ಒಂಜಿ ಬಾಲೆನ್ ಸೇರಾವೊಂಡೆಡ, ಎನನ್ ಸೇರಾವೊಂಡಿಲೆಕ್ಕ ಆಂಡ್.

ಪಾಪೊಡ್ದು ನರಕೊಗು ಸಾದಿ

⁶ “ಎನ ಮಿತ್ತ್ ನಂಬಿಕೆ ದೀಪಿನ ಈ ಎಲ್ಯಾಕುಲೆಡ್ ಒರಿಯಗ್ ಏರಾಂಡಲಾ ಅಡ್ಡಿ ಮಲ್ತೆಡ ಅಂಚಿನಾಯನ ಕಂಟೆಲ್‌ಗ್ ಮಲ್ಲ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್ದ ಗುಂಡಿಗ್ ಮುರ್ಕಾವುನವು ಎಡ್ಡೆ ಅವು.

⁷ ಅಡ್ಡಿಲು ಬರ್ಪಿನೆಡ್ದ್ ಲೋಕೊಗು ಏತೋ ಕೇಡ್. ಅಡ್ಡಿಲು ಎಂಚಾಂಡಲಾ ಬರು. ಆಂಡಲಾ ವಾ ನರಮಾನಿಡ್ದ್ ಅಡ್ಡಿ ಆಪುಂಡಾ ಆಯನ ಗತಿನ್ ದಾನೆಂದ್ ಪನೊಲಿ?

⁸ “ಅಂಚಾಂಡ ನಿನ ಕೈಯಾವಡ್ ಕಾರಾವಡ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ದ್ ಬುಡ್ಲ, ಕೈಕಾರ್ ರಡ್ಡ್‌ಲಾ ಇತ್ತ್‌ದ್ ತೆಕ್ಕಂದಿ ತೂಟು ಪಾಡ್ದಿನಾಯೆ ಆಪಿನೆಡ್ದ್ ಕೈಕಾರ್ ಕಳೆವೊಂದಿನಾಯೆ ಆದ್ ಜೀವೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.

⁹ ನಿನ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ಲ, ರಡ್ಡ್ ಕಣ್ಣ್ ಇತ್ತಿನಾಯೆ ಆದಿತ್ತ್‌ದ್ ತೂತ ನರಕೊಗು ಬೂರುನೆಡ್ದ್ ಒಂಜೇ ಕಣ್ಣ್ ಇತ್ತಿನಾಯೆ ಆದ್ ಜೀವೊಗು ಸೇರುನವು ನಿಕ್ಕ್ ಏತೋ ಎಡ್ಡೆ.

ತತ್ತ್ ಪೋಯಿ ಕುರಿ

¹⁰ “ಈ ಎಲ್ಯಾಕುಲೆಡ್ ಒರಿಯನಾಂಡಲಾ ಸಸಾರ ಮಲ್ಪಂದಿಲೆಕ್ಕ ತೂವೊನ್ಲೆ; ಅಕ್ಲೆ ದೂತೆರ್ ಪರಲೋಕೊಡು ಏಪಲಾ ಎನ ಅಮ್ಮೆರೆನ ಮೋನೆ ತೂವೊಂದುಲ್ಲೆರ್,” ಅಂದ್‌ದ್ ನಿಕ್ಲೆಗ್ ಪನ್ಪೆ.

¹¹ ನರಮಾನಿ ಮಗೆ ತತ್ತ್‌ದ್ ಪೋಯಿನೆನ್ ರಕ್ಷಣೆ ಮಲ್ಪೆರೆ ಬತ್ತೆ.

¹² “ನಿಕ್ಲೆಗ್ ಎಂಚ ತೋಜುಂಡು? ಒರಿ ನರಮಾನಿಗ್ ನೂದು ಕುರಿಕುಲು ಉಪ್ಪುನಗ ಐಟ್ಟ್ ಒಂಜಿ ಕುರಿ ತತ್ತ್‌ದ್ ಪೋಂಡ ಆಯೆ ಸೊನ್ಪತ್ತೊರ್ಂಬ ಕುರಿಕುಲೆನ್ ಗುಡ್ಡೆಡ್ ಬುಡ್ದು, ತಪ್ಪಾವೊಂದು ಪೋತಿನ ಒಂಜಿ ಕುರಿನ್ ನಾಡೊಂದು ಪೋಪೆ ಅತ್ತಾ.

¹³ ಅವು ತಿಕ್ಕ್ಂಡ, ತತ್ತ್‌ದ್ ಪೋವಂದಿ ಸೊನ್ಪತ್ತೊರ್ಂಬ ಕುರಿಕುಲೆಡ್ದ್ ಆ ಒಂಜಿ ಕುರಿಕ್ಕಾದ್ ಮಸ್ತ್ ಸಂತೋಷ ಮಲ್ಪುವೆ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

¹⁴ ಅಂಚೆನೇ ಈ ಎಲ್ಯಾಕುಲೆಡ್ ಒರಿಯಾಂಡಲಾ ನಾಶಾದ್ ಪೋಪಿನವು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆ ಚಿತ್ತ ಅತ್ತ್.

ಪಾಪೊಗು ಪರಿಹಾರ

¹⁵ “ಉಂದತ್ತಂದೆ ನಿನ ಸಹೋದರೆ ನಿಕ್ಕ್ ತಪ್ಪು ಮಲ್ತೆಡ ಈ ಪೋದು ಇರ್ವೆರೆ ಉಪ್ಪುನಪಗ ಆಯನ ತಪ್ಪುನು ಆಯಗ್ ತೆರಿಪಾಲ. ಆಯೆ ನಿನ ಪಾತೆರೊನು ಕೇಂಡೆಡ ನಿನ ಸಹೋದ್ರನ್ ಗೆಂದಿಯ.

¹⁶ ಆಯೆ ಕೇನಂದೆ ಪೋಂಡ ರಡ್ಡ್ ಮೂಜಿ ಜನ ಸಾಕ್ಷಿದಾಕುಲೆ ಬಾಯಿಡ್ದ್ ಪ್ರತಿಯೊಂಜಿ ಪಾತೆರಲಾ ನಿಗಂಟ್ ಆಪಿಲೆಕ್ಕ ನನಲಾ ಒರಿ ಇರ್ವೆರೆನ್ ನಿನಡೊಪ್ಪ ಲೆತ್ತೊಂದು ಪೋಲ.

¹⁷ ಆಯೆ ಅಕ್ಲೆ ಪಾತೆರೊನ್ಲಾ ಕೇಂಡಿಜೆಡ ಸಭೆಕ್ ಪನ್ಲ; ಆಂಡ ಸಭೆತಲಾ ಪಾತೆರೊನು ಕೇನಂದೆ ಪೋಯೆಡ ಆಯೆ ನಿಕ್ಕ್ ಪಿದಯಿದ ಜನೊಕುಲೆ ಲೆಕ್ಕಲಾ, ಸುಂಕದಾಯಲೆಕ್ಕಲಾ ಉಪ್ಪಡ್.

¹⁸ “ಭೂಲೋಕೊಡು ನಿಕುಲು ಒವೆನ್ ಕಟ್ಟುವರಾ, ಅವು ಪರಲೋಕೊಡ್ಲಾ ಕಟ್ಟ್‌ದುಪ್ಪು. ಬೊಕ್ಕ ಭೂಲೋಕೊಡು ನಿಕುಲು ಒವೆನ್ ಗಿರ್ಪುವರಾ ಅವು ಪರಲೋಕೊಡ್ಲಾ ಗಿರ್ಪುಂಡು, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.

¹⁹ ಉಂದತ್ತಂದೆ ನಿಕ್ಲೆಡ್ ಇರ್ವೆರ್ ಒಟ್ಟಾದ್ ನಟ್ಟೊನುನ ಒವ್ವಾಂಡಲಾ ಒಂಜಿ ಕಾರ್ಯದ ಸಂಗತಿಲಾವಡ್ ಭೂಲೋಕೊಡು ಒಂಜೇ ಮನಸಾದಿತ್ತ್ಂಡ ಅವು ಪರಲೋಕೊಡುಪ್ಪು ಎನ ಅಮ್ಮೆರೆಡ್ದ್ ಅಕ್ಲೆಗ್ ಒದಗ್‌ದ್ ಬರು, ಅಂದ್‌ದ್ ಕುಡ ನಿಕ್ಲೆಗ್ ಪನ್ಪೆ.

²⁰ ದಾಯೆ ಪಂಡ ಇರ್ವೆರಾವಡ್, ಮೂವೆರಾವಡ್ ಎನ ಪುದರ್‌ಡ್ ಓಲ್ ಒಟ್ಟು ಸೇರ್ದ್ ಬರ್ಪೆರಾ ಅವುಲು ಅಕ್ಲೆ ನಡುಟು ಯಾನ್ ಉಲ್ಲೆ,” ಪಂಡೆ.

ಕನಿಕರದಾಂತಿ ಚಾಕ್ರಿದಾಯನ ಉದಾರಣೆ

²¹ ಅಪಗ ಪೇತ್ರೆ ಆಯ ಕೈತಲ್‌ ಬತ್ತ್‌ದ್, “ಕರ್ತವಾ, ಎನ ಸಹೋದರೆ ಎಂಕ್ ತಪ್ಪು ಮಲ್ತ್ಂಡ ಏತ್ ಸರ್ತಿ ಮಾಪು ಮಲ್ಪೊಡು? ಏಳ್ ಸರ್ತಿಯ,” ಅಂದ್‌ದ್ ಕೇಂಡೆ.

²² ಐಕ್ ಯೇಸು ಆಯಡ, “ಏಳ್ ಸರ್ತಿ ಪಂಡ್ದ್ ಅತ್ತ್, ಏಳ್ಪತ್ತ ಏಳ್ ಸರ್ತಿಅಂದ್‌ದ್ ನಿಕ್ಕ್ ಪನ್ಪೆ.

²³ “ಉಂದೆಕ್ಕಾದ್ ಪರಲೋಕ ರಾಜ್ಯ ತನ ಸೇವಕೆರೆಡ್ದ್ ಲೆಖ್ಖ ದೆತ್ತೊನಿಯೆರೆ ಮನಸ್ ಇತ್ತಿ ಒರಿ ಅರಸುಗು ಸಮ ಆದುಂಡು.

²⁴ ಆಯೆ ಲೆಖ್ಖ ದೆತ್ತೊನಿಯೆರೆ ಸುರು ಮಲ್ತಿನಪಗ ಕೋಟ್ಯಾಂತರ ದುಡ್ಡು ಸಾಲ ಮಲ್ತಿನಾಯನ್ ಒರಿಯನ್ ಆಯ ಕೈತಲ್‌ ಪತ್ತ್‌ದ್ ಕನತೆರ್.

²⁵ ಆ ಸಾಲ ಸಂದಾಯೆರೆ ಆಯಡ ದಾಲಾ ಇಜ್ಜಂದಿನೆಡ್ದ್ ಆಯನ ಧನಿ ಆಯನ್ಲಾ, ಆಯನ ಬೊಡೆದಿ ಜೋಕುಲೆನ್ಲಾ, ಆಯನ ಮಾತ ಬದ್‌ಕ್‌ನ್ಲಾ ಮಾರ್ದ್ ಸಂದಾಯ ಮಲ್ಪೆರೆ ಅಪ್ಪಣೆ ಕೊರಿಯೆ.

²⁶ ಆ ಚಾಕ್ರಿದಾಯೆ ಆಯ ಕಾರ್‌ಗ್ ಅಡ್ಡಬೂರ್ದು ಆಯಡ, ‘ಧನಿ ಒಂತೆ ತಡೆತೊನು, ನಿಕ್ಕ್ ಕೊರ್ಪಿನೆನ್ ಯಾನ್ ಕೊರ್ದು ಸಂದಾವೆ,’ ಅಂದ್‌ದ್ ಅಡ್ಡಬೂರ್ಯೆ.

²⁷ ಆ ಚಾಕ್ರಿದಾಯನ ಧನಿ ಕನಿಕರೊಡು ಆಯನ್ ಬುಡ್ಪಾದ್ ಆ ಸಾಲೊನು ಬುಡ್ದು ಬುಡಿಯೆ.

²⁸ “ಐಡ್ದ್ ಬೊಕ್ಕ ಆ ಚಾಕ್ರಿದಾಯೆ ಪಿದಯಿ ಬತ್ತ್‌ದ್ ತನ್ಕ್ ನೂದು ಪಣವು ಕೊರೊಡಿತ್ತಿ ಒರಿ ಜತೆ ಚಾಕ್ರಿದಾಯನ್ ತೂದು ಆಯನ್ ಪತ್ತ್‌ದ್, ‘ಎನ ಸಾಲ ಸಂದಾಲ,’ ಅಂದ್‌ದ್ ಆಯನ ಕೆಕ್ಕಿಲ್ ಪೊಜೆಂಕಿಯೆ.

²⁹ ಅಪಗ ಆಯನ ಜತೆ ಚಾಕ್ರಿದಾಯೆ ಆಯ ಕಾರ್‌ಗ್ ಬೂರ್ದು, ‘ಒಂತೆ ತಡೆತೊನು, ಬೂಟಾವೆ,’ ಅಂದ್‌ದ್ ನಟ್ಟೊಂಡೆ.

³⁰ ಆಂಡ ಆಯೆ ಒಪ್ಪಿಯಂದೆ ಲಕ್ಕ್‌ದ್ ಪೋದು, ಕೊರೊಡಾಪಿನ ಮಾತ ಸಾಲೊನ್ಲಾ ಸಂದಾವುನೆಟ್ಟ ಆಯನ್ ಸೆರೆಮನೆಟ್ ಪಾಡಿಯೆ.

³¹ ಆಯ ಜತೆ ಚಾಕ್ರಿದಾಕುಲು ನಡೆತಿ ಸಂಗತಿನ್ ತೂದು ಬಾರೀ ಬೇಜಾರ್ ಮಲ್ತ್‌ದ್ ಧನಿ ಕೈತಲ್‌ ಬತ್ತ್‌ದ್ ಸಂಗತಿಲೆನ್ ತೆರಿಪಾಯೆರ್.

³² ಅಪಗ ಯಜಮಾನೆ ಆಯನ್ ಲೆಪ್ಡಾದ್, ‘ಓ ನೀಚ ಚಾಕ್ರಿದಾಯಾ,’ ಈ ಎನನ್ ನಟ್ಟೊಂಡಿನೆಕ್ಕ್ ನಿನ ಸಾಲೊನು ಪೂರ ಮಾಪು ಮಲ್ತೆ.

³³ ‘ಯಾನ್ ನಿಕ್ಕ್ ಕನಿಕರ ತೋಜಾಯಿಲೆಕ್ಕ ಈ ನಿನ ಜತೆ ಚಾಕ್ರಿದಾಯಗ್ ಕನಿಕರ ತೋಜಾಯೆರೆ ಬಲ್ಲಿತ್ತ್‌ಂಡಾ,’ ಪಂಡೆ.

³⁴ ಕೋಪೊಡು ಆಯನ ಧನಿ ತನ್ಕ್ ಕೊರೊಡಾಯಿನ ಸಾಲ ಸಂದುನೆಟ್ಟ ಆಯನ್ ಕಷ್ಟ ಕೊರ್ಪಿನಾಕುಲೆ ಕೈಕ್ ಒಚ್ಚಿದ್ ಕೊರಿಯೆ.

³⁵ ನಿಕ್ಲೆಡ್ ಪ್ರತಿಯೊರಿಲಾ ತನ ಸಹೋದ್ರನ ಪಾಪೊನು ಪೂರ್ತಿ ಮನಸ್‌ಡ್ದ್ ಮಾಪು ಮಲ್ಪಂದೆ ಪೋಯರ್ಡ, ಪರಲೋಕೊಡುಪ್ಪು ಎನ ಅಮ್ಮೆ ನಿಕ್ಲೆಗ್ ಅಂಚೆನೇ ಮಲ್ಪುವೆ,” ಪಂಡೆ.