ಮತ್ತಾಯೆ 17 - ಪೊಸ ಒಡಂಬಡಿಕೆಯೇಸುನ ರೂಪಾಂತರ ( ಮಾರ್ಕೆ 9:2-13 ; ಲೂಕೆ 9:28-36 ) 1 ಆಜಿ ದಿನೊಡ್ದು ಬೊಕ್ಕ ಯೇಸು ಪೇತ್ರನ್, ಯಾಕೋಬು ಬೊಕ್ಕ ಆಯನ ಮೆಗ್ಯೆ ಯೋಹಾನನ್ ಪ್ರತ್ಯೇಕಾದ್ ಒಂಜಿ ಎತ್ತರ ಗುಡ್ಡೆಗ್ ಲೆತ್ತೊಂದು ಪೋಯೆ. 2 ಅಲ್ಪ ಅಕ್ಲೆನ ಕಣ್ಣೆದುರುಡು ಆಯನ ರೂಪ ಬೇತೆ ಆಂಡ್; ಆಯ ಮೋನೆ ಸೂರ್ಯದಲೆಕ್ಕ ಮಿಂಚಿಂಡ್; ಆಯೆ ಪಾಡ್ದಿನ ಕುಂಟುಲು ಬೊಲ್ಪುದ ಲೆಕ್ಕನೇ ಬೊಲ್ದಾಂಡ್. 3 ಉಂದತ್ತಂದೆ ಮೋಶೆಲಾ ಎಲೀಯೆಲಾ ಆಯಡೊಪ್ಪ ಪಾತೆರೊಂದು ಅಕ್ಲೆಗ್ ತೋಜಿಯೆರ್. 4 ಅಪಗ ಪೇತ್ರೆ ಯೇಸುಡ, “ಕರ್ತವ, ನಮ ಮೂಲೇ ಉಪ್ಪುನವು ಎಡ್ಡೆ. ಈ ಒಪ್ಪಿಯಡ ಮುಲ್ಪ ಮೂಜಿ ಗುಡಾರ ಕಟ್ಟ್‌ಗ; ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ. 5 ಇಂಚ ಪಾತೆರೊಂದು ಉಪ್ಪುನಪಗನೇ ಬೊಲ್ಪುದ ಮುಗಲ್ ಅಕ್ಲೆನ ಮಿತ್ತ್ ನಿರೆಲಾಂಡ್. ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಆಯನ ಪಾತೆರೊನು ಕೇನ್ಲೆ.” ಅಂದ್‌ದ್ ಒಂಜಿ ಮಲ್ಲ ಸ್ವರ ಆಂಡ್. 6 ಶಿಷ್ಯೆರ್ ಉಂದೆನ್ ಕೇಂಡ್ದ್ ಪೋಡಿದ್ ನೆಲಕ್ ಕಬ್ಬೆ ಬೂರಿಯೆರ್. 7 ಆಂಡ ಯೇಸು ಕೈತಲ್‌ ಬತ್ತ್‌ದ್ ಅಕ್ಲೆನ್ ಮುಟ್ಟುದು, “ಲಕ್ಕ್‌ಲೆ, ಪೋಡ್ಯಡೆ,” ಪಂಡೆ. 8 ಅಕುಲು ಕಣ್ಣ್ ದೆರ್ತ್ತ್ ತೂನಗ ಯೇಸುವೇ ಮಾತ್ರ ಅತ್ತಂದೆ ಬೇತೆ ಏರೆನ್ಲಾ ತೂಯಿಜೆರ್. 9 ಅಕುಲು ಆ ಗುಡ್ಡೆಡ್ದ್ ಜತ್ತ್‌ದ್ ಬರೊಂದುಪ್ಪುನಗ ಯೇಸು ಅಕ್ಲೆಡ, “ನಿಕುಲು ಇತ್ತೆ ತೂಯಿನ ದರ್ಶನೊನು ನರಮಾನಿ ಮಗೆ ಸೈತ್‌ದ್ ಜೀವಾದ್ ಲಕ್ಕ ಮುಟ್ಟ ಏರೆಗ್ಲಾ ಪನಿಯೆರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿಯೆ. 10 ಅಪಗ ಆಯನ ಶಿಷ್ಯೆರ್, “ಎಲೀಯೆ ಸುರುಟ್ಟು ಬರ್ಪಿನವು ಅಗತ್ಯ ಅಂದ್‌ದ್ ಶಾಸ್ತ್ರಿಲು ದಾಯೆಗ್ ಪನ್ಪೆರ್?” ಆಯಡ ಕೇಂಡೆರ್. 11 ಐಕ್ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ಎಲೀಯೆ ಸುರುಟ್ಟು ಬತ್ತ್‌ದ್ ಮಾತೆನ್ ಸರಿ ಮಲ್ಪುನವು ನಿಜ. 12 ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಎಲೀಯೆ ಬತ್ತ್‌ದ್ ಪೋಯೆ, ಜನೊಕುಲು ಆಯನ್ ತೆರಿಯಂದೆ ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ಆಯಗ್ ಮಲ್ತೆರ್. ಆಯಗ್ ಆದುಪ್ಪುಲೆಕ್ಕನೇ ನರಮಾನಿ ಮಗಕ್ಲಾ ಅಕ್ಲೆ ಕಡೆಡ್ದ್ ಭಂಗ ಆಪುಂಡು.” ಪಂಡ್ದ್ ಉತ್ತರ ಕೊರಿಯೆ. 13 ಅಪಗ ಸ್ನಾನಿಕೆ ಯೋಹಾನನ ಬಗೆಟ್ ತನ್ಕುಲೆಗ್ ಈ ಪಾತೆರೊನು ಪಂಡೆ ಅಂದ್‌ದ್ ಶಿಷ್ಯೆರ್ ತೆರಿಯೊಂಡೆರ್. ಮೂರ್ಚಂಡೆ ಸೀಕ್‌ದಾಯನ್ ಗುಣ ಮಲ್ತಿನವು ( ಮಾರ್ಕೆ 9:14-29 ; ಲೂಕೆ 9:37-43 ) 14 ಅಕುಲು ಜನೊಕುಲೆ ಗುಂಪುದಡೆ ಬತ್ತಿನಪಗ, ಒರಿ ಆಯ ಕೈತಲ್‌ ಬತ್ತ್‌ದ್ ಆಯ ದುಂಬು ಮೊರಂಪೂರ್ದು, 15 “ಕರ್ತವಾ, ಎನ ಮಗಕ್ಕ್ ಕನಿಕರ ತೋಜಾಲ, ಮೂರ್ಚಂಡೆ ಸೀಕ್‌ಡ್ ಬಾರಿ ಕಷ್ಟ ಪಡೆಪೆ. ಅಪಗಪಗ ತೂಟುಲಾ ನೀರ್‌ಡ್ಲಾ ಬೂರೊಂದುಪ್ಪುವೆ. 16 ಆಯನ್ ನಿನ ಶಿಷ್ಯೆರೆ ಕೈತಲ್‌ ಕನತ್‌ದ್ ತೋಜಾಯೆ, ಆಂಡ ಆಯನ್ ಗುಣ ಮಲ್ಪೆರೆ ಅಕ್ಲೆಡ್ದ್ ಆವಂದೆ ಪೋಂಡು,” ಪಂಡೆ. 17 ಐಕ್ ಯೇಸು, “ಓ! ನಂಬಿಕೆದಾಂತಿ ಮೂರ್ಖ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ಆಯನ್ ಇಂಚಿ ಎನ ಕೈತಲ್‌ ಲೆತ್ತೊಂದು ಬಲೆ,” ಪಂಡೆ. 18 ಯೇಸು ಅವೆನ್ ದಟ್ಟಿನಗ, ದೆವ್ವ ಆಯನ್ ಬುಡ್ದು ಪೋಂಡು; ಆ ಕ್ಷಣೊಟೇ ಆ ಆಣ್ ಗುಣ ಆಯೆ. 19 ಐಡ್ದ್ ಬೊಕ್ಕ ಶಿಷ್ಯೆರ್ ಪ್ರತ್ಯೇಕಾದ್ ಯೇಸು ಕೈತಲ್‌ ಬತ್ತ್‌ದ್, “ಅವೆನ್ ಬುಡ್ಪಾಯೆರೆ ಎಂಕ್ಲೆಡ್ದ್ ದಾಯೆಗ್ ಆಯಿಜಿ,” ಅಂದ್‌ದ್ ಕೇಂಡೆರ್. 20 ಐಕ್ ಆಯೆ ಅಕ್ಲೆಡ, “ನಿಕ್ಲೆ ನಂಬಿಕೆ ಕಡಿಮೆ ಆಯಿನೆಡ್ದ್ ಆಯಿಜಿ. ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ ದಾಸೆಮಿದಾತ್ ನಂಬಿಕೆ ಇತ್ತ್ಂಡ, ನಿಕುಲು ಈ ಗುಡ್ಡೆಗ್, 21 ‘ಮುಲ್ತುಡ್ದು ಅಡೆಗ್ ಪೋಲ,’ ಅಂದ್‌ದ್ ಪಂಡ್ಂಡ ಅವುಲಾ ಪೋವು. ನಿಕ್ಲೆ ಕೈಟ್ ಆವಂದಿನ ಕೆಲಸೊಲು ಒಂಜಿಲಾ ಇಜ್ಜಿ. ಆಂಡ ಇಂಚಿತ್ತಿ ದೆವ್ವೊಲು ಪ್ರಾರ್ಥನೆಡ್ದ್ ಉಪವಾಸೊಡ್ದು ಅತ್ತಂದೆ ಪಿದಾಡುಜಿ.” ಯೇಸು ತನ ಮರಣೊನು ಕುಡೊರ ತೆರಿಪಾವುನವು ( ಮಾರ್ಕೆ 9:30-32 ; ಲೂಕೆ 9:43-45 ) 22 ಗಲಿಲಾಯೊಡು ಅಕುಲು ಒಟ್ಟು ಸೇರೊಂದುಪ್ಪುನಗ ಯೇಸು ಅಕ್ಲೆಡ, “ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್. 23 ಅಕುಲು ಆಯನ್ ಕೆರ್ವೆರ್; ಸೈತ್‌ದ್ ಮೂಜನೇ ದಿನೊಟು ಆಯೆ ಜೀವಾದ್ ಲಕ್ಕ್‌ದ್ ಬರುವೆ,” ಅಂದ್‌ದ್ ಪಂಡೆ. ಅವೆನ್ ಕೇಂಡ್ದ್ ಅಕುಲು ಬಾರೀ ದುಃಖ ಮಲ್ತೆರ್. ದೇವಾಲಯೊಗು ತೆರಿಗೆ 24 ಅಕುಲು ಕಪೆರ್ನೌಮುಗು ಬತ್ತಿನಪಗ ದೇವಾಲಯೊಗಾದ್ ತೆರಿಗೆ ದೆತ್ತೊನುನಾಕುಲು ಪೇತ್ರ ಕೈತಲ್‌ ಬತ್ತ್‌ದ್, “ನಿಕ್ಲೆ ಬೋಧಕೆ ದೇವಾಲಯದ ತೆರಿಗೆ ಕೊರ್ಪುಜೆನಾ?” ಅಂದ್‌ದ್ ಕೇಂಡಿನಪಗ, “ಅಂದ್ ಸಂದಾವೆ,” ಪಂಡೆ. 25 ಪೇತ್ರೆ ಇಲ್ಲದುಲಯಿ ಬತ್ತಿನಪಗ ಯೇಸು ಆಯಡ್ದ್ ದುಂಬೇ, “ಸೀಮೋನಾ ನಿಕ್ಕ್ ಎಂಚ ತೋಜುಂಡು? ಈ ಪ್ರಪಂಚದ ಅರಸೆರ್ ಏರೆಡ್ದ್ ತೆರಿಗೆ ಇಜ್ಜಿಡ ಸುಂಕ ದೆತ್ತೊನುವೆರ್? ತನ್ಕುಲೆ ಜೋಕುಲೆಡ್ದಾ ಇಜ್ಜಿಂಡ ಬೇತೆಕ್ಲೆಡ್ದಾ?” ಅಂದ್‌ದ್ ಕೇಂಡೆ. 26 ಬೇತೆಕ್ಲೆಡ್ದ್ ಪಂಡ್ದ್ ಉತ್ತರ ಕೊರಿನಪಗ ಯೇಸು ಆಯಡ, “ಅಂಚಾಂಡ ಜೋಕುಲು ಐಕ್ ಸೇರ್ದಿನಾಕುಲು ಅತ್ತತ್ತಾ. 27 ಆಂಡಲಾ ಎಂಕುಲೆ ಸಂಗತಿಡ್ ಅಕುಲು ಬೇಜಾರ್ ಮಲ್ತೊನೆರೆ ಬಲ್ಲಿ. ಈ ಕಡಲ್‌ಗ್ ಪೋದು ಗಾಳ ಪಾಡ್ದ್ ದುಂಬತ್ತ ತಿಕ್ಕುನ ಮೀನ್ ದೆರ್ಪುಲ. ಐತ ಬಾಯಿ ಬಿಚ್ಚಾನಗ ಒಂಜಿ ಬೊಳ್ಳಿದ ಪಾವೊಲಿ ತಿಕ್ಕು. ಅವೆನ್ ದೆತ್ತೊಂದು ಪೋದು ಎಂಕ್ಲೆನ ಇರ್ವೆರೆನ ತೆರಿಗೆ ಅಂದ್‌ದ್ ಅಕ್ಲೆಗ್ ಕೊರು,” ಅಂದ್‌ದ್ ಪಂಡೆ. |
New Life Literature