ಲೂಕೆ 5 - ಪೊಸ ಒಡಂಬಡಿಕೆ

ಯೇಸು ಸುರುತ್ತ ನಾಲ್ ಶಿಷ್ಯೆರೆನ್ ಲೆಪ್ಪುನವು

¹ ಒಂಜಿ ದಿನ ಜನೊಕುಲು ಗೆನೇಜರೇತು ಕೆರೆತಲ್ಪ ಗುಂಪು ಸೇರ್ದ್ ದೇವೆರೆ ಪಾತೆರೊನು ಕೇನೊಂದಿತ್ತೆರ್.

² ಕೆರೆತ ಬರಿಟ್ಟ್ ಉಂತುದಿತ್ತಿ ಯೇಸು ರಡ್ಡ್ ಓಡೊಲೆನ್ ತೂಯೆ. ಮೀನ್ ಪತ್ತುನಾಕುಲು ತನ್ಕುಲೆ ಬಲೆನ್ ದೆಕ್ಕೊಂದಿತ್ತೆರ್.

³ ಐಟ್ಟ್ ಸೀಮೋನನ ಓಡೊಡು ಯೇಸು ಕುಲ್ಲುದು ಕಡಲ ಕರೆಡ್ದ್ ಒಂತೆ ದೂರ ಒಚ್ಚಿಲ ಅಂದ್‌ದ್ ಆಯಡ ಪಂಡೆ, ಬೊಕ್ಕ ಆಯೆ ಓಡದುಲಯಿ ಕುಲ್ಲೊಂದೆ ಆ ಜನೊಕುಲೆ ಗುಂಪುಗು ಬೋಧನೆ ಮಲ್ತೆ.

⁴ ಪಾತೆರ ಮುಗಿ ಬೊಕ್ಕ ಯೇಸು ಸೀಮೋನುಗು ಪಂಡೆ, “ನಿಕುಲು ಗುಂಡಿ ಇತ್ತಿ ಜಾಗ್‌ಗ್ ಓಡೊನು ಒಚ್ಚಿದ್ ಮೀನ್‌ದ ಬೋಂಟೆಗ್ ಬಲೆ ಪಾಡ್ಲೆ,” ಪಂಡೆ.

⁵ ಐಕ್ ಸೀಮೋನು ಗುರೂ, “ಎಂಕುಲು ರಾತ್ರೆ ಇಡೀ ಕಷ್ಟ ಬತ್ತಡಲಾ ದಾಲಾ ತಿಕ್ಕಿಜಿ, ಆಂಡ ನಿನ ಪಾತೆರದ ಮಿತ್ತ್ ಬಲೆ ಪಾಡ್ವ,” ಅಂದ್‌ದ್ ಪಂಡೆ.

⁶ ಪಾಡಿ ಬೊಕ್ಕ ಮೀನ್‌ದ ರಾಶಿಯೇ ತಿಕ್ಕ್‌ದ್ ಅಕ್ಲೆನ ಬಲೆ ಪರಿಯೆರೆ ಮುಟ್ಟ ಆಂಡ್.

⁷ ಅಪಗ ಅಕುಲು ಬೊಕ್ಕೊಂಜಿ ಓಡೊಡಿತ್ತಿ ಪಾಲ್‌ದಾರೆರೆನ್ ಲೆತ್ತ್‌ದ್, ಎಂಕ್ಲೆಗ್ ಸಹಾಯ ಮಲ್ಪುಲೆ ಅಂದ್‌ದ್ ಪಂಡೆರ್. ಅಕುಲು ಬತ್ತ್‌ದ್ ಅಕ್ಲೆನ ರಡ್ಡ್ ಓಡೊಲೆಡ್ ಮೀನ್‌ಲೆನ್ ದಿಂಜಾವನಗ ಅವು ಮುರ್ಕುನಡೆ ಮುಟ್ಟ ಆಂಡ್.

⁸ ಸೀಮೋನು ಪೇತ್ರೆ ಉಂದೆನ್ ತೂದು ಯೇಸುನ ಕಾರ್‌ಗ್ ಮೊರಂಪೂರೂದು, “ಕರ್ತವಾ, ಯಾನ್ ಪಾಪಿಷ್ಟೆ; ಎನನ್ ಬುಡ್ದು ಪೋಲ,” ಪಂಡೆ.

⁹ ದಾಯೆಗಂದ್ಂಡ ಆಯಗ್ಲಾ ಆಯಡೊಪ್ಪ ಇತ್ತಿನಾಕುಲೆಗ್ಲಾ ತನ್ಕುಲು ಪತ್ತಿನ ಮೀನ್‌ದ ರಾಶಿ ತೂದು ಅಚ್ಚಿರ ಆದಿತ್ತ್ಂಡ್.

¹⁰ ಸೀಮೋನುನ ಪಾಲ್‌ದಾರೆರಾದುಪ್ಪು ಜೆಬೆದಾಯನ ಜೋಕುಲಾಯಿ ಯಾಕೋಬು ಬೊಕ್ಕ ಯೋಹಾನೆಲಾ ಅಂಚೆನೇ ಅಚ್ಚಿರ ಆಯೆರ್. ಬೊಕ್ಕ ಯೇಸು ಸಿಮೋನುಗು, “ಪೋಡ್ಯಡ, ಆಂಡ ಇನಿಡ್ದ್ ಈ ನರಮಾನಿಲೆನ್ ಪತ್ತುನಾಯೆ ಆದುಪ್ಪುವ,” ಅಂದ್‌ದ್ ಪಂಡೆ.

¹¹ ಅಕುಲು ತನ್ಕುಲೆ ಓಡೊಲೆನ್ ಕಡಲ್ದ ಕರೆಕ್ ಕನತ್‌ದ್ ಮಾತೆನ್ಲಾ ಬುಡ್ದು ಆಯ ಬೆರಿಯೆ ಪೋಯೆರ್.

ಯೇಸು ಕೊಷ್ಟದಾಯನ್ ಗುಣ ಮಲ್ಪುನವು

¹² ಯೇಸು ಒಂಜಾನೊಂಜಿ ಊರುಡುಪ್ಪುನಗ ಮೆಯಿ ನಿಲ್ಕೆ ಕೊಷ್ಟ ಪತ್ತ್‌ದಿನಾಯೆ ಯೇಸುನು ತೂದು ಅಡ್ಡಬೂರ್ದು, “ಕರ್ತವಾ, ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಪಂಡ್ದ್ ನಟ್ಟಿಯೆ.

¹³ ಯೇಸು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು ಶುದ್ಧ ಆಲ,” ಅಂದ್‌ದ್ ಪಂಡೆ. ಅಪಗನೆ ಆಯನ ಕೊಷ್ಟ ಬುಡ್ದು ಪೋಂಡು.

¹⁴ ಅಪಗ ಯೇಸು ಆಯಡ ಈ ಉಂದೆನ್ ಏರೆಗ್ಲಾ ಪನೊಡ್ಚಿ; ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಲೆಕ್ಕನೇ ನಿನ ಶುದ್ಧಾಚಾರೊಗು ಬೋಡಾದ್ ಕಾಣಿಕೆ ಅರ್ಪಣೆ ಮಲ್ಪುಲ ಇನ್ಪಿ ಅಪ್ಪಣೆ ಆಯಗ್ ಕೊರಿಯೆ. ಅವು ಜನೊಕುಲೆಗ್ ಸಾಕ್ಷಿ ಆವಡ್ ಪಂಡೆ.

¹⁵ ಆಂಡಲಾ ಆಯನ ಸುದ್ಧಿ ಹೆಚ್ಚಾದ್ ಪರಡ್ಂಡ್. ಜನೊಕುಲು ಆಯನ ಬೋಧನೆನ್ ಕೇನಿಯೆರೆ ತನ್ಕುಲೆ ಸೀಕ್ ಸಂಕಟೊಲೆಡ್ದ್ ಗುಣ ಆಯೆರೆ ಗುಂಪುಗುಂಪಾದ್ ಸೇರಿಯೆರ್.

¹⁶ ಆಂಡ ಆಯೆ ಒರಿಯೇ ಏಪಲಾ ಜನಮಾನಿದಾಂತಿ ಜಾಗ್‌ಗ್ ಪೋದು ಪ್ರಾರ್ಥನೆ ಮಲ್ತೊಂದಿತ್ತೆ.

ಯೇಸು ಪಕ್ಷವಾತದಾಯನ್ ಗುಣ ಮಲ್ಪುನವು

¹⁷ ಒಂಜಾನೊಂಜಿ ದಿನೊಟು ಯೇಸು ಬೋಧನೆ ಮಲ್ತೊಂದುಪ್ಪುನಗ ಗಲಿಲಾಯದ ಮಾತ ಊರುಲೆಡ್ದ್‌ಲಾ ಯೂದಾಯದ ಮಾತ ಗ್ರಾಮೊಲೆಡ್ದ್‌ಲಾ ಯೆರೂಸಲೇಮುಡ್ದುಲಾ ಬತ್ತಿತ್ತಿ ಪರಿಸಾಯೆರ್‌ಲಾ ನ್ಯಾಯಕಟ್ಟ್‌ದ ಬೋಧಕೆರ್‌ಲಾ ಆಯನ ಕೈತಲ್‌ ಕುಲ್ಲುದಿತ್ತೆರ್. ಸೀಕ್‌ದಾಕುಲೆನ್ ಗುಣ ಮಲ್ಪೆರೆ ಕರ್ತವ ಬಲ ಯೇಸುಡ ಇತ್ತ್ಂಡ್.

¹⁸ ಇಂಚ ಉಪ್ಪುನಗ ಕೆಲವು ಅಂಜೊವುಲು ಒರಿ ಪಕ್ಷವಾತದಾಯನ್ ಮಂಚವುದ ಮಿತ್ತ್ ತುಂಬೊಂದು ಬತ್ತೆರ್. ಆಯನ್ ಉಲಯಿ ಕೊನೊದು ಯೇಸುನ ಎದುರುಡು ದೀವೊಡು ಪಂಡ್ದ್ ಪ್ರಯತ್ನ ಮಲ್ತೆರ್.

¹⁹ ಆಂಡ ಜನೊಕುಲೆ ಮಲ್ಲ ಗುಂಪು ಇತ್ತಿನೆಡ್ದಾವರ ಆಯನ್ ಉಲಯಿ ಲೆತ್ತೊಂದು ಪೋವೆರೆ ಆವಂದೆ, ಅಕುಲು ಮಾಡ್‌ಗ್ ಮಿತ್ತಾದ್ ಓಡು ದೆತ್ತ್‌ದ್ ಆಯನ್ ಪಜೆದೊಟ್ಟುಗು ಯೇಸುನ ಎದುರುಡು ಜಪುಡಾಯೆರ್.

²⁰ ಆಯೆ ಅಕ್ಲೆನ ನಂಬಿಕೆನ್ ತೂದು, “ಸಹೋದ್ರ, ನಿನ ಪಾಪೊಲು ಮಾಪು ಆತ್ಂಡ್,” ಪಂಡೆ.

²¹ ಐಕ್ ಆ ಶಾಸ್ತ್ರಿಲುಲಾ ಪರಿಸಾಯೆರ್‌ಲುಲಾ, ದೇವದೂಷಣೆ ಪಾತೆರುನಾಯೆ ಇಂಬೆ ಏತೆತ್ತಾಯೆ? ಪಾಪೊಲೆನ್ ಮಾಪು ಮಲ್ಪುನವು ದೇವೆರ್ ಒರಿಯಡ್ದೇ ಅತ್ತಂದೆ ಬೊಕ್ಕ ಏರೆಡ್ದ್ ಆವು ಅಂದ್‌ದ್ ಪನೊಂದಿತ್ತೆರ್.

²² ಅಕುಲು ಅಂಚ ಪನೊಂದುಪ್ಪುನೆನ್ ಯೇಸು ತೆರಿಯೊಂದು ಅಕ್ಲೆಡ, “ನಿಕುಲು ನಿಕ್ಲೆನ ಉಡಲ್‌ಡ್ ದಾಯೆಗ್ ಅಂಚ ಎನ್ನುವರ್?

²³ ಒವು ಸುಲಭ, ‘ನಿನ ಪಾಪೊಲು ಮಾಪು ಆತ್ಂಡ್,’ ಪನ್ಪಿನವಾ? ‘ಲಕ್ಕ್‌ದ್ ನಡಪುಲ ಪನ್ಪಿನವಾ?’

²⁴ ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಆ ಪಕ್ಷವಾತದಾಯನ್ ತೂದು, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋಲ, ಅಂದ್‌ದ್ ನಿಕ್ಕ್ ಪನ್ಪೆ,” ಪಂಡೆ.

²⁵ ಅಪಗನೆ ಆಯೆ ಅಕ್ಲೆನ ಎದುರು ಲಕ್ಕ್‌ದ್ ತಾನ್ ಜೆತ್ತ್‌ದಿತ್ತಿ ಪಜೆನ್ ಪತ್ತೊಂದು ದೇವೆರೆನ್ ಪುಗರೊಂದು ಇಲ್ಲಗ್ ಪೋಯೆ.

²⁶ ತೂಯಿನಾಕುಲು ಮಾತೆರ್ಲಾ ಅಚ್ಚಿರ ಆದ್ ದೇವೆರೆನ್ ಪುಗರಿಯೆರ್. ಬೊಕ್ಕ ಅಕುಲು ಪೋಡಿದ್, “ನಮ ಇನಿ ತೂವಂದಿನೆನ್ ತೂಯ!” ಪಂಡೆರ್.

ಯೇಸು ಲೇವಿನ್ ಲೆಪ್ಪುನವು

²⁷ ಉಂದು ಆಯಿ ಬೊಕ್ಕ ಪಿದಾಡ್ದ್ ಪೋವೊಂದುಪ್ಪುನಗ ಸುಂಕ ದೆತ್ತೊನಿಯೆರೆ ಕುಲ್ಲೊಂದಿತ್ತಿ ಲೇವಿ ಪನ್ಪಿ ಒರಿ ಸುಂಕದಾಯನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಆಯನ್ ಲೆಪ್ಪುನಗ

²⁸ ಆಯೆ ಲಕ್ಕ್‌ದ್ ಮಾತೆನ್ಲಾ ಬುಡ್ದು ಆಯನ ಬೆರಿಯೆ ಪೋಯೆ.

²⁹ ಐಡ್ದ್ ಬೊಕ್ಕ ಲೇವಿ ತನ ಇಲ್ಲಡ್ ಯೇಸುಗು ಒಂಜಿ ಮಲ್ಲ ಲೇಸ್‌ದ ವಣಸ್ ಏರ್ಪಾಡ್ ಮಲ್ತೆ. ಅಲ್ಪ ಸುಂಕದಾಕುಲುಲಾ ಬಾಕಿದಾಕುಲುಲಾ ಯೇಸು ಕುಲ್ಲುದಿತ್ತಿ ಪಂತೆಡೇ ವಣಸ್‌ಗ್ ಕುಲ್ಲುದಿತ್ತೆರ್.

³⁰ ಅವೆನ್ ತೂದು ಪರಿಸಾಯೆರೆಡೊಪ್ಪ ಇತ್ತಿ ಶಾಸ್ತ್ರಿಲು ಆಯನ ಶಿಷ್ಯೆರೆಡ ಗುಟ್ಟುಡು, “ನಿಕುಲು ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ಉನ್ಪಿನಿ ದಾಯೆಗ್?” ಅಂದ್‌ದ್ ಕೇಂಡೆರ್.

³¹ ಐಕ್ ಯೇಸು, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ; ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು.

³² ಪಶ್ಚಾತಾಪ ಪಡೆಲೆ ಪಂಡ್ದ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್. ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಅಂದ್‌ದ್ ಅಕ್ಲೆಗ್ ಉತ್ತರ ಕೊರಿಯೆ.

ಉಪವಾಸದ ಸಂಗತಿಡ್ ಪ್ರಶ್ನೆ

³³ ಅಕುಲು ಆಯಗ್, “ಯೋಹಾನನ ಶಿಷ್ಯೆರ್ ಅಪಗಪಗ ಉಪವಾಸ ಪ್ರಾರ್ಥನೆ ಮಲ್ಪುವೆರ್; ಅಂಚೆನೇ ಪರಿಸಾಯೆರೆ ಶಿಷ್ಯೆರ್‌ಲಾ ಉಪವಾಸ ಪ್ರಾರ್ಥನೆ ಮಲ್ಪುವೆರ್; ಆಂಡ ನಿನ ಶಿಷ್ಯೆರ್ ಉನ್ಪಿನಿ ಪರ್ಪಿನಿ ದಾಯೆಗ್?” ಅಂದ್‌ದ್ ಪನ್ನಗ,

³⁴ ಯೇಸು ಅಕ್ಲೆಗ್, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪುನಗ ಅಕ್ಲೆನ್ ಉಪವಾಸ ಕುಲ್ಲಾವೆರೆ ನಿಕ್ಲೆಡ್ದ್ ಆವಾ?

³⁵ ಆಂಡ ಮದ್ಮಯನ್ ಅಕ್ಲೆನ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು; ಅಪಗ ಆ ಕಾಲೊಡು ಉಪವಾಸ ಮಲ್ಪುವೆರ್,” ಅಂದ್‌ದ್ ಉತ್ತರ ಕೊರಿಯೆ.

³⁶ ಅಕ್ಲೆಗ್ ಒಂಜಿ ಉಪಕತೆನ್ಲಾ ಪಂಡೆ ಅವು ದಾದ ಪಂಡ, “ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಕುಂಟು ಪರಿದ್ ಪೋವು ಅತ್ತಂದೆ ಪೊಸ ಕುಂಟುದ ಪತ್ತೆ ಪರತೆಕ್ಕ್ ಎಡ್ಡೆ ತೋಜುಜಿ.

³⁷ ಬೊಕ್ಕ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್; ದಿಂಜಾಂಡ ಆ ಪೊಸ ದ್ರಾಕ್ಷಾರಸತ್ತ ಚೀರವು ಪುಡಾದ್ ಪೊಸ ದ್ರಾಕ್ಷಾರಸಲಾ ಚೀರವುಲಾ ಹಾಳಾದ್ ಪೋಪುಂಡು.

³⁸ ಅಂಚ ಪೊಸ ದ್ರಾಕ್ಷಾರಸೊನು ಪೊಸ ಚೀರವುಡು ಪಾಡ್ದ್ ದೀವೊಡು.

³⁹ ಉಂದತ್ತಂದೆ ಪರ ಅಮಲ್‌ದ ದ್ರಾಕ್ಷಾರಸೊನು ಪರಿನಾಯೆ ಪೊಸತ್ತ್ ಬೋಡು ಪನ್ಪುಜೆ; ‘ಪರತ್ತೇ ಎಡ್ಡೆಂತಿನವು,’ ಪನ್ಪೆ.”