ಲೂಕೆ 24 - ಪೊಸ ಒಡಂಬಡಿಕೆಯೇಸುನ ಪುನರುತ್ಥಾನ ( ಮತ್ತಾಯೆ 28:1-10 ; ಮಾರ್ಕೆ 16:1-8 ; ಯೋಹಾನೆ 20:1-10 ) 1 ಆ ಪೊಂಜೊವುಲು ವಾರದ ಸುರುತ್ತ ದಿನೊಟು ಪುಲ್ಯ ಆನಗ ತನ್ಕುಲು ತಯಾರ್ ಮಲ್ತ್‌ದಿತ್ತಿ ಕಮ್ಮೆನದ ಎಣ್ಣೆನ್ ದೆತ್ತೊಂದು ಸಮಾಧಿಗ್ ಬತ್ತೆರ್. 2 ಸಮಾಧಿ ಮುಚ್ಚಿದಿತ್ತಿನ ಕಲ್ಲ್ ಪೊರೆಲ್‌ದಿತ್ತೆನೆನ್ ತೂದು ಉಲಯಿ ಪೋಯೆರ್. 3 ಆಂಡ ಯೇಸು ಕರ್ತವನ ಶರೀರ ಅಲ್ಪ ಇಜ್ಜಾಂಡ್. 4 ಅಕುಲು ಗಲಿಬಿಲಿ ಆಯೆರ್. ಅಪಗ ಮಿಂಚುನ ಅಂಗಿ ಪಾಡೊಂದಿತ್ತಿ ಇರ್ವೆರ್ ಅಂಜೊವುಲು ಅಕಸ್ಮತಾದ್ ಅಕ್ಲೆನ ಬರಿಟ್ಟೆ ಉಂತೊಂಡೆರ್. 5 ಆ ಪೊಂಜೊವುಲು ಪೋಡಿದ್ ತನ್ಕುಲೆ ಮೋನೆಲೆನ್ ನೆಲಕ್ ಬಗ್ಗಾಯೆರ್. ಆ ಅಂಜೊವುಲು ಅಕ್ಲೆಗ್, “ಬದುಕುನಾಯನ್ ಸೈತಿನಾಕುಲೆ ಸಮಾಧಿಡ್ ನಾಡುನು ದಾಯೆಗ್?” 6-7 ಆಯೆ ಮುಲ್ಪ ಇಜ್ಜೆ, ಆಯೆ ಜೀವಾದ್ ಲಕ್ಕ್‌ದೆ. ಆಯೆ ಗಲಿಲಾಯೊಡು ಇತ್ತಿನಪಗ ನರಮಾನಿ ಮಗನ್ ಪಾಪಿಷ್ಟೆರಾದುಪ್ಪು ನರಮಾನಿಲೆ ಕೈಕ್ ಒಪ್ಪಿಯಾದ್ ಕ್ರುಸ್ಸುಗ್ ಪಾಡ್ದ್ ಮೂಜನೇ ದಿನೊಟು ಲಕ್ಕ್‌ದ್ ಬರ್ಪಿನವು ಅಗತ್ಯ ಅಂದ್‌ದ್ ನಿಕ್ಲೆಗ್ ಪನ್ತಿನೆನ್ ನೆನೆಪು ಮಲ್ತೊನ್ಲೆ ಅಂದ್‌ದ್ ಪಂಡೆರ್. 8 ಪೊಂಜೊವುಲು ಆಯನ ಪಾತೆರೊಲೆನ್ ನೆನೆಪುಗು ದೆತ್ತೊಂದು 9 ಸಮಾಧಿಡ್ದ್ ಪಿರ ಬತ್ತ್‌ದ್ ಪತ್ತೊಂಜಿ ಜನ ಅಪೊಸ್ತಲೆರೆಗ್ಲಾ ಒರಿದಿನಾಕುಲೆಗ್ಲಾ ತೆರಿಪಾಯೆರ್. 10 ಆ ಪೊಂಜೊವುಲು ಏರ್ ಅಂದ್ಂಡ ಮಗ್ದಲದ ಮರಿಯ, ಯೋಹನ್ನ, ಯಾಕೋಬುನ ಅಪ್ಪೆ ಆಯಿ ಮರಿಯ ಮೊಕುಲೇ. ಮೊಕ್ಲೆನ ಒಟ್ಟುಗಿತ್ತಿ ಪೊಂಜೊವುಲುಲಾ ಅಪೊಸ್ತಲೆರೆಗ್ ಈ ಸಂಗತಿಲೆನ್ ಪಂಡೆರ್. 11-12 ಅಕುಲು ನಂಬಿಜೆರ್; ಅಕ್ಲೆಗ್ ತಮಾಸೆದ ಪಾತೆರದ ಲೆಕ್ಕ ತೋಜ್ಂಡ್. ಆಂಡ ಪೇತ್ರೆ ಲಕ್ಕ್‌ದ್ ಸಮಾಧಿಗ್ ಪಾರ್‌ಪೋದು ಬಗ್ಗ್‌ದ್ ತೂಯೆ. ಅಲ್ಪ ಯೇಸುನ ಶರೀರೊಗು ಸುತ್ತುದಿನ ನಾರ್‌ದ ಕುಂಟುನು ಮಾತ್ರ ತೂದು ಅಚ್ಚಿರ ಆದ್ ಪಿದಾಡ್ದ್ ಪೋಯೆ. ಎಮ್ಮಾಹುಗು ಪೋಪಿನವು ( ಮಾರ್ಕೆ 16:12 , 13 ) 13 ಅವ್ವೇ ದಿನೊಟು ಶಿಷ್ಯೆರೆಡ್ ಇರ್ವೆರ್ ಯೆರೂಸಲೇಮುಗು ಏಳ್ ಮೈಲ್ ದೂರೊಡಿತ್ತಿ ಎಮ್ಮಾಹು ಪನ್ಪಿ ಹಳ್ಳಿಗ್ ಪೋವೊಂದುಪ್ಪುನಗ 14 ನಡತಿ ಪ್ರತಿ ಒಂಜಿ ಕಾರ್ಯೊಲೆ ಬಗೆಟ್ ಪಾತೆರೊಂದಿತ್ತೆರ್. 15 ಅಕುಲು ಪಾತೆರೊಂದು ಚರ್ಚೆ ಮಲ್ತೊಂದು ಪೋನಗ ಯೇಸು ಕೈತಲ್‌ ಬತ್ತ್‌ದ್ ಅಕ್ಲೆಡೊಪ್ಪ ಪೋಯೆ. 16 ಆಂಡ ಅಕ್ಲೆಗ್ ಆಯನ ಗುರ್ತ ಪತ್ತಿಯೆರೆ ಆಯಿಜಿ. ಕಣ್ಣ್ ಕಟ್ಟಿಲೆಕ್ಕ ಆಂಡ್. 17 ಯೇಸು ಅಕ್ಲೆಡ ನಿಕುಲು ಮಾರ್ಗೊಡು ಪೋವೊಂದು ಚರ್ಚೆ ಮಲ್ತ್‌ದ್ ಪಾತೆರೊಂದುಪ್ಪು ಈ ಸಂಗತಿಲು ದಾದ ಅಂದ್‌ದ್ ಕೇನ್ನಗ ಅಕುಲು ಮೋನೆ ಬಾಡ್‌ದಿನಕುಲಾದ್ ಉಂತಿಯೆರ್. 18 ಅಕ್ಲೆಡ್ ಕ್ಲೆಯೋಫೆ ಪನ್ಪಿನಾಯೆ ಆಯಗ್ ಯೆರೂಸಲೇಮುಡು ಬುಡಾರ ಮಲ್ಪುನಾಕುಲೆಡ್ ನಿಕ್ಕ್ ಒರಿಯಗ್ ಮಾತ್ರ ಗೊತ್ತಿಜ್ಜಾ? ಅಂದ್‌ದ್ ಕೇನ್ನಗ 19 ಆಯೆ ಅಕ್ಲೆಡ, “ವಾ ಸಂಗತಿಲು?” ಅಂದ್‌ದ್ ಕೇಂಡೆ. ಐಕ್ ಅಕುಲು, “ನಜರೇತ್‌ದ ಯೇಸುನ ಸಂಗತಿಲು. ಆಯೆ ದೇವೆರೆ ಎದುರುಡು ಬೊಕ್ಕ ಜನೊಕುಲೆ ಎದುರುಡು ಕಾರ್ಯೊಡ್ಲಾ ಪಾತೆರೊಡ್ಲಾ ಬಲ ಇತ್ತಿ ಪ್ರವಾದಿ ಆದಿತ್ತೆ. 20 ಆಯನ್ ಪ್ರಧಾನಯಾಜಕೆರ್‌ಲಾ ನಮ ಅಧಿಕಾರಿಲುಲಾ ಮರಣದ ನ್ಯಾಯತೀರ್ಪುಗು ಒಪ್ಪಿಸಾದ್ ಕ್ರುಸ್ಸುಗ್ ಪಾಡಾಯೆರ್. 21 ಇಸ್ರಾಯೇಲ್ ಜನೊಕುಲೆನ್ ಬುಡ್ಪಾಯೆರೆ ತಕ್ಕಂತಿನಾಯೆ ಆಯೆನೇ ಅಂದ್‌ದ್ ಎಂಕುಲು ನಿರೀಕ್ಷೆ ಮಲ್ತೊಂದಿತ್ತ. ಉಂದು ಮಾತ್ರ ಅತ್ತಂದೆ ಆ ಕಾರ್ಯೊಲು ನಡತ್‌ದ್ ಇನಿಕ್ ಮೂಜನೇ ದಿನ; 22 ಆಂಡ ಕೆಲವು ಪೊಂಜೊವುಲು ಬೊಲ್ಪು ಆನಗ ಸಮಾಧಿದ ಕೈತಲ್‌ ಪೋದು 23 ಆಯನ ಶರೀರೊನು ತೂವಂದೆ ತನ್ಕುಲೆಗ್ ದೂತೆರ್ ದರ್ಶನ ಕೊರ್ದು ಯೇಸು ಜೀವಾದ್ ಲಕ್ಕ್‌ದೆ ಅಂದ್‌ದ್ ಪಂಡಿನೆನ್ ಅಕುಲು ತೆರಿಪಾದ್ ಎಂಕ್ಲೆಗ್ ಮಲ್ಲ ಅಚ್ಚಿರೊನು ಉಂಡು ಮಲ್ತೆರ್. 24 ಎಂಕ್ಲೆನ ಒಟ್ಟುಗು ಇತ್ತಿನಾಕುಲೆಡ್ದ್ ಕೆಲೆವೆರ್ ಸಮಾಧಿಗ್ ಪೋದು ಆ ಪೊಂಜೊವುಲು ಪಂಡಿಲೆಕ್ಕನೇ ತೂಯೆರ್; ಆಯನ್ ಮಾತ್ರ ತೂಯಿಜೆರ್,” ಅಂದ್‌ದ್ ಪಂಡೆರ್. 25 ಯೇಸು ಅಕ್ಲೆಗ್ ಬುದ್ಧಿದಾಂತಿನಾಕುಲೇ, ಪ್ರವಾದಿಲು ಪಂಡಿನೆನ್ ಮಾತೆನ್ ನಂಬುನ ಮಂದ ಉಡಲ್‌ದಾಕುಲೇ, 26 ಕ್ರಿಸ್ತೆ ಇಂಚಿತ್ತಿ ಭಂಗೊಲೆನ್ ಅನುಭವ ಮಲ್ತ್‌ದ್ ತನ ಮಲ್ಲ ಮೈಮೆದ ಸ್ಥಾನೊಗು ಪರಲೋಕೊಗು ಸೇರುನವು ಅಗತ್ಯದವು ಆದಿತ್ತ್‌ಂಡತ್ತಾ? 27 ಬೊಕ್ಕ ಯೇಸು ತನ ಬಗೆಟ್ ಮೋಶೆ ಬೊಕ್ಕ ಮಾತ ಪ್ರವಾದಿಲೆ ಶಾಸ್ತ್ರೊಡು ಬರೆತಿಲೆಕ್ಕ ಅವೆನ್ ಮಾತ ಅಕ್ಲೆಗ್ ಬುಡ್ಪಾದ್ ಪಂಡೆ. 28 ಅಕುಲು ಪೋವೊಂದುಪ್ಪುನ ಹಳ್ಳಿದ ಕೈತಲ್‌ ಬನ್ನಗ ಆಯೆ ನನಲಾ ದುಂಬು ಪೋಪಿಲೆಕ್ಕ ತೋಜ್ಂಡ್. 29 ಆಂಡ ಅಕುಲು ಬೈಯ ಆಂಡ್ ಪೊರ್ತು ಕಂತೊಂದು ಬತ್ತ್ಂಡ್ ಎಂಕ್ಲೆನ ಒಟ್ಟುಗು ತಡೆಲ ಅಂದ್‌ದ್ ಆಯಗ್ ಒತ್ತಾಯ ಮಲ್ಪುನಗ ಆಯೆ ಅಕ್ಲೆನ ಒಟ್ಟುಗು ಉಂತಿಯೆರೆ ಊರುದುಲಯಿ ಪೋಯೆ. 30 ಆಯೆ ಅಕ್ಲೆನ ಒಟ್ಟುಗು ವಣಸ್‌ಗ್ ಕುಲ್ಲುದಿನಪಗ ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ತುಂಡು ಮಲ್ತ್‌ದ್, 31 ಅಕ್ಲೆಗ್ ಕೊರ್ನಗ ಅಕ್ಲೆನ ಕಣ್ಣ್‌ಲು ಜತ್ತ್ಂಡ್, ಯೇಸುನ ಗುರ್ತ ಪತ್ತಿಯೆರ್; ಆ ಸಮಯೊಡು ಆಯೆ ಅಕ್ಲೆನ ಕಣ್ಣ್‌ಗ್ ತೋಜಂದೆ ಪೋಯೆ. 32 ಐಡ್ದ್ ಬೊಕ್ಕ ಅಕುಲು ಒರಿಯಗ್ ಒರಿ ಆಯೆ ಸಾದಿಡ್ ಎಂಕ್ಲೆನ ಒಟ್ಟುಗು ಪಾತೆರ್‌ನಗಲಾ ಶಾಸ್ತ್ರೊಲೆ ಅರ್ಥೊನು ನಂಕ್ ಬುಡ್ಪಾದ್ ಪನ್ನಗಲಾ ಎಂಕುಲೆ ಉಡಲ್ ತೂ ಪೊತ್ತಿಲೆಕ್ಕ ಆಂಡತ್ತಾ ಪಂಡೆರ್. 33 ಅವ್ವೇ ಗಳಿಗೆಡ್ ಅಕುಲು ಇರ್ವೆರ್‌ಲಾ ಯೆರೂಸಲೇಮುಗು ಪಿರ ಪೋಯೆರ್. ಅಲ್ಪ ಪತ್ತೊಂಜಿ ಜನ ಶಿಷ್ಯೆರ್‌ಲಾ, 34 ಅಕ್ಲೆನ ಒಟ್ಟುಗು ಇತ್ತಿನಾಕುಲುಲಾ ಸೇರೊಂದು, ಕರ್ತವೆ ಲಕ್ಕ್‌ದಿನಿ ನಿಜ, ಆಯೆ ಸೀಮೋನಗ್ ತೋಜಿದ್ ಬತ್ತೆ ಅಂದ್‌ದ್ ಪನೊಂದಿತ್ತೆರ್. 35 ಉಂದೆನ್ ತೂದು ಆ ರಡ್ಡ್ ಶಿಷ್ಯೆರ್ ಸಾದಿಡ್ ನಡತಿ ಸಂಗತಿನ್ಲಾ ರೊಟ್ಟಿ ತುಂಡು ಮಲ್ಪುನೆನ್ ತೂದು ಆಯನ ಗುರ್ತ ಪತ್ತಿಯ ಪಂಡ್ದ್‌ಲಾ ಒರಿದಿನಾಕುಲೆಗ್ ತೆರಿಪಾಯೆರ್. ಯೇಸು ಶಿಷ್ಯೆರೆಗ್ ತೋಜಿದ್ ಬರ್ಪಿನವು ( ಮತ್ತಾಯೆ 28:16-20 ; ಮಾರ್ಕೆ 16:14-18 ; ಯೋಹಾನೆ 20:19-23 ; ಅಪೊ.ಕ್ರಿ 1:6-8 ) 36 ಆ ರಡ್ಡ್ ಶಿಷ್ಯೆರ್ ಈ ಸಂಗತಿಡ್ ಪಾತೆರೊಂದುಪ್ಪುನಗ ಯೇಸುವೇ ಅಕ್ಲೆನ ನಡುಟು ಉಂತುದು ನಿಕ್ಲೆಗ್ ಸಮಾಧಾನ ಆವಡ್ ಅಂದ್‌ದ್ ಅಕ್ಲೆಗ್ ಪಂಡೆ. 37 ಅಕುಲು ತೂಯಿನವು ಆತ್ಮ ಅಂದ್‌ದ್ ಪೋಡಿದ್ ನಡಿಗಿಯೆರ್. 38 ಆಯೆ ಅಕ್ಲೆಡ, “ದಾಯೆಗ್ ಗಲಿಬಿಲಿ ಆಪರ್? ನಿಕುಲು ಉಡಲ್‌ಡ್ ಅಂಚ ದಾಯೆಗ್ ಎನ್ನುವರ್? ಎನ ಕೈ ಕಾರ್‌ಲೆನ್ ತೂಲೆ, ಯಾನೇ ಅತ್ತಾ. ಎನನ್ ಮುಟ್ಟುದು ತೂಲೆ, 39 ನಿಕ್ಲೆಗ್ ತೋಜುನ ಪ್ರಕಾರ ಎಂಕ್ ಮಾಸಲಾ ಎಲುಲಾ ಉಂಡು; ಅವು ಆತ್ಮೊಗು ಇಜ್ಜಿ,” ಅಂದ್‌ದ್ ಪಂಡೆ. 40 ಉಂದೆನ್ ಪಂಡಿ ಬೊಕ್ಕ ಆಯೆ ತನ ಕೈ ಕಾರ್‌ಲೆನ್ ಅಕ್ಲೆಗ್ ತೋಜಾಯೆ. 41 ಆಂಡ ಅಕುಲು ಸಂತೋಷದ ದಿಸೆಟ್ಟ್ ನನಲಾ ನಂಬಂದೆ ಅಚ್ಚಿರ ಪಡೆಯೊಂದುಪ್ಪುನಗ ಆಯೆ ಅಕ್ಲೆಡ, “ತಿನಿಯೆರೆ ದಾದಾಂಡಲಾ ಮುಲ್ಪ ಉಂಡಾ?” ಅಂದ್‌ದ್ ಕೇಂಡೆ. 42 ಅಕುಲು ಕೈತಿ ಮೀನ್‌ದ ಒಂಜಿ ತುಂಡು ಆಯಗ್ ಕೊರಿಯೆರ್. 43 ಆಯೆ ದೆತ್ತೊಂದು ಅಕ್ಲೆನ ಎದುರುಡೆ ತಿಂದೆ. 44 ಬೊಕ್ಕ ಆಯೆ ಅಕ್ಲೆಡ, “ಯಾನ್ ನಿಕ್ಲೆಡೊಪ್ಪ ಉಪ್ಪುನಗ ಉಂದೆನ್ ಮಾತ ನಿಕ್ಲೆಗ್ ತೆರಿಪಾದಿಜೆನಾ? ಎನ ಬಗೆಟ್ ಮೋಶೆನ ನ್ಯಾಯಕಟ್ಟ್‌ಡ್ಲಾ ಪ್ರವಾದಿಲೆ ಗ್ರಂಥೊಲೆಡ್ಲಾ ಕೀರ್ತನೆಲೆಡ್ಲಾ ಬರೆತಿ ಮಾತ ನಡಪುನವು ಅಗತ್ಯ ಅಂದ್‌ದ್ ನಿಕ್ಲೆಗ್ ಪನ್ತೆ ಅತ್ತಾ?” ಪಂಡೆ. 45 ಬೊಕ್ಕ ಅಕ್ಲೆನ ಉಡಲ್‌ನ್ ಜತ್ತ್‌ದ್ ಶಾಸ್ತ್ರ ವಚನೊಲೆನ್ ತೆರಿಯೊನುಲೆಕ್ಕ ಆಯೆ ಅಕ್ಲೆಗ್ ಬುಡ್ಪಾದ್ ಪಂಡೆ. 46 ಯೇಸು ಅಕ್ಲೆಡ, “ಇಂಚೆನೆ ಬರೆತ್ಂಡ್ ಕ್ರಿಸ್ತೆ ಭಂಗ ಬತ್ತ್‌ದ್ ಸೈತ್‌ದ್ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರುವೆ. 47 ಬೊಕ್ಕ ಪಾಪೊಲೆ ಪರಿಹಾರೊಗಾದ್ ಮಾತೆರ್ಲಾ ಪಶ್ಚಾತಾಪ ಪಡೆಯೊಡು ಪನ್ಪಿ ಪಾತೆರ ಯೆರೂಸಲೇಮುಡ್ದು ಸುರು ಆದ್ ಸಮಸ್ತ ಭೂಲೋಕೊಡು ಉಪ್ಪುನ ಮಾತ ಜನಾಂಗದ ಜನೊಕುಲೆಗ್ ಆಯನ ಪುದರ್‌ಡ್ ಸಾರಿಯೊಡು ಪಂಡ್ದ್‌ಲಾ ಬರೆತ್ಂಡ್. 48 ಉಂದೆತ್ತ ಸಂಗತಿಡ್ ನಿಕುಲೇ ಸಾಕ್ಷಿ ಆದುಪ್ಪುವರ್. 49 ಇಂದಾ, ಎನ ಅಮ್ಮೆ ವಾಗ್ದಾನ ಮಲ್ತಿನ ಪರಿಶುದ್ಧಾತ್ಮೊನು ನಿಕ್ಲೆಗ್ ಕಡಪುಡ್ದು ಕೊರ್ಪೆ. ದೇವೆರ್ ಮಿತ್ತ್‌ದ ಲೋಕೊಡ್ದು ಆತ್ಮದ ಬಲ ಕೊರ್ಪಿನೆಂಗೆ ನಿಕುಲು ಯೆರೂಸಲೇಮುಡೇ ಕಾತೊಂದುಪ್ಪುಲೆ,” ಅಂದ್‌ದ್ ಪಂಡೆ. ಯೇಸು ಪರಲೋಕೊಗು ಏರ್ದ್ ಪೋಯಿನವು ( ಮಾರ್ಕೆ 16:19 , 20 ; ಅಪೊ.ಕ್ರಿ 1:9-11 ) 50 ಬೊಕ್ಕ ಆಯೆ ಅಕ್ಲೆನ್ ಬೇಥಾನ್ಯ ಮುಟ್ಟ ಲೆತ್ತೊಂದು ಪೋಯೆ. ಯೇಸು ತನ ಕೈ ದೆರ್ತ್ತ್‌ದ್ ಅಕ್ಲೆನ್ ಆಶೀರ್ವಾದ ಮಲ್ತೆ. 51 ಆಶೀರ್ವಾದ ಮಲ್ತೊಂದುಪ್ಪುನಗನೇ ಆಯೆ ಅಕ್ಲೆನ್ ಬುಡ್ದು, ಪರಲೋಕೊಗು ಏರ್ದ್ ಪೋಯೆ. 52 ಅಕುಲು ಆಯಗ್ ಆರಾಧನೆ ಮಲ್ತ್‌ದ್ ಬಾರಿ ಸಂತೋಷೊಡು ಯೆರೂಸಲೇಮುಗು ಪಿರ ಪೋಯೆರ್. 53 ಅವುಲು ಏಪಲಾ ದೇವಾಲಯೊಗು ಪೋದು ದೇವೆರೆನ್ ಪುಗರೊಂದಿತ್ತೆರ್. |
New Life Literature