ಲೂಕೆ 21 - ಪೊಸ ಒಡಂಬಡಿಕೆವಿಧವೆನ ಕಾಣಿಕೆ ( ಮಾರ್ಕೆ 12:41-44 ) 1 ಯೇಸು ತರೆ ದೆರ್ತ್ತ್‌ದ್ ತೂದು ಐಶ್ವರ್ಯವಂತೆರ್ ಕಾಣಿಕೆನ್ ಕಾಣಿಕೆ ಪೆಟ್ಟಿಗೆಡ್ ಪಾಡುನೆನ್ ತೂಯೆ. 2 ಒಂಜಿ ಬಡ ವಿಧವೆ ಬತ್ತ್‌ದ್ ರಡ್ಡ್ ಕಾಸ್‌ನ್ ಪಾಡುನೆನ್ ತೂಯೆ. 3 ನಿಕ್ಲೆಗ್ ಸತ್ಯಾದ್ ಪನ್ಪೆ, “ಈ ಬಡ ವಿಧವೆ ಮಾತೆರೆಡ್ದ್ ಹೆಚ್ಚ್ ಪಾಡ್ದಲ್. 4 ಎಂಚಂದ್ಂಡ ಮಾತೆರ್ ತನ್ಕುಲೆಗ್ ಒರಿದಿನೆಟ್ಟ್ ಪಾಡ್ದೆರ್. ಮೋಲಾಂಡಲಾ ತನ ಬಡತನೊಡ್ಲಾ ತನಡಿತ್ತಿ ಬದ್‌ಕ್‌ನೇ ಕೊರ್ದು ಬುಡಿಯಲ್,” ಅಂದ್‌ದ್ ಪಂಡೆ. ಯೇಸು ದೇವಾಲಯದ ನಾಶನದ ಬಗೆಟ್ ಪಾತೆರುನವು ( ಮತ್ತಾಯೆ 24:1 , 2 ; ಮಾರ್ಕೆ 13:1 , 2 ) 5 ಶಿಷ್ಯೆರ್ ಕೆಲೆವೆರ್ ದೇವಾಲಯದ ಬಗೆಟ್ ಅವು ಪೊರ್ಲುದ ಕಲ್ಲ್‌ಲೆಡ್ದ್‌ಲಾ ಕಾಣಿಕೆಲೆಡ್ದ್‌ಲಾ ಅಲಂಕಾರ ಆದುಂಡು ಪನೊಂದುಪ್ಪುನಗ 6 ಯೇಸು ಅಕ್ಲೆಗ್, “ನಿಕುಲು ಉಂದೆನ್ ಮಾತ ತೂಪರತ್ತಾ? ಮುಲ್ಪ ಕಲ್ಲ್‌ದ ಮಿತ್ತ್ ಕಲ್ಲ್ ಒರಿಯಂದೆ ಮಾತ ಬೂರ್ದು ಪೋಪಿ ದಿನೊಕುಲು ಬರ್ಪುಂಡು,” ಅಂದ್‌ದ್ ಪಂಡೆ. ಭಂಗೊಲು ಬೊಕ್ಕ ಉಪದ್ರೊಲು ( ಮತ್ತಾಯೆ 24:3-14 ; ಮಾರ್ಕೆ 13:3-13 ) 7 ಅಪಗ ಅಕುಲು ಬೋಧಕಾ, “ಅಂಚಾಂಡ ಉಂದು ಏಪ ಆವು? ಬೊಕ್ಕ ಉಂದು ಆಪಿ ಸಮಯದ ಗುರ್ತ ಎಂಚಿನ ಆದುಪ್ಪು,” ಅಂದ್‌ದ್ ಕೇಂಡೆರ್. 8 ಅಪಗ ಯೇಸು ಅಕ್ಲೆಗ್, “ನಿಕುಲು ಮೋಸೊಗು ಬಲಿ ಆವಂದಿಲೆಕ್ಕ ತೂವೊನ್ಲೆ. ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಪನೊಂದು ‘ಆ ಕಾಲ ಕೈತಲಾಂಡ್’ ಪಂಡ್ದ್‌ಲಾ ಪನ್ವೆರ್; ಅಕ್ಲೆನ ಬೆರಿಯೆ ಪೋವಡೆ. 9 ಉಂದತ್ತಂದೆ ಲಡಯಿಲಾ ಗಡಿಬಿಡಿಲಾ ಆಪಿನೆನ್ ನಿಕುಲು ಕೇನ್ನಗ ಪೋಡ್ಯಡೆ; ದಾಯೆ ಪಂಡ ಇಂಚಿತ್ತಿ ಗುರ್ತೊಲು ದುಂಬು ತೋಜಿದ್ ಬರ್ಪಿನವು ಅಗತ್ಯ; ಆಂಡಲಾ ಅಪಗನೆ ಅಂತ್ಯಕಾಲ ಬರ್ಪುಜಿ.” 10 ಬೊಕ್ಕ ಆಯೆ ಅಕ್ಲೆಡ ಪಂಡಿನಿ ದಾನೆಂದ್ಂಡ, “ಜನಾಂಗದ ವಿರೋಧಾದ್ ಜನಾಂಗೊಲುಲಾ; ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು. 11 ಬೊಕ್ಕ ಮಲ್ಲ ಭೂಕಂಪೊಲು ಆಪುಂಡು; ಅಲ್ಪಲ್ಪ ಬರಗಾಲ, ಉಪದ್ರೊಲು ತೋಜಿದ್ ಬರ್ಪುಂಡು; ಭಯಂಕರ ಘಟನೆಲು, ಬಾನೊಡು ಮಲ್ಲ ಗುರ್ತೊಲು ತೋಜಿದ್ ಬರ್ಪುಂಡು. 12 ಆಂಡ ಉಂದು ಮಾತ ನಡಪುನೆಡ್ದ್ ದುಂಬು ಎನ ಪುದರ್‌ಗಾದ್ ಅಕುಲು ನಿಕ್ಲೆನ್ ಪತ್ತ್‌ದ್ ಸಭಾಮಂದಿರದ ಬೊಕ್ಕ ಸೆರೆಮನೆತ ಅಧಿಕಾರಿಲೆನ ವಶೊಕ್ಕು ಕೊರುವೆರ್. ನಿಕ್ಲೆನ್ ಅರಸುಲೆ ಎದುರುಡು ಅಧಿಕಾರಿಲೆ ಎದುರುಡು ಲೆತ್ತೊಂದು ಪೋದು ಭಂಗ ಬರ್ಪಾವೆರ್. 13 ಉಂದು ನಿಕ್ಲೆಗ್ ಸಾಕ್ಷಿ ಪನಿಯೆರೆ ಅನುಕೂಲ ಆಪುಂಡು. 14 ನಿಕುಲು ದಾದ ಉತ್ತರ ಕೊರೊಡು ಪನ್ಪಿ ಬಗೆಟ್ ಎಂಕುಲು ಸುರುಟ್ಟೇ ಆಲೋಚನೆ ಮಲ್ಪುಜ ಅಂದ್‌ದ್ ನಿಕ್ಲೆನ ಉಡಲ್‌ಡ್ ನಿಚ್ಚಯ ಮಲ್ತೊನ್ಲೆ. 15 ದಾಯೆ ಪಂಡ ನಿಕ್ಲೆನ ಮಾತ ಪಗೆನಾಕುಲು ಎದುರುಂತಿಯೆರೆಲಾ ಎದುರು ಪಾತೆರಿಯೆರೆಲಾ ಆವಂದಿ ಬಾಯಿನ್ಲಾ ಬುದ್ಧಿನ್ಲಾ ಯಾನೇ ನಿಕ್ಲೆಗ್ ಕೊರ್ಪೆ. 16 ಆಂಡ ಅಪ್ಪೆ ಅಮ್ಮಾಡ್ಲು, ಪಲಯೆ, ಮೆಗ್ಯಾಡ್ಲು, ಕುಟುಂಬದಾಕುಲು, ಸ್ನೇಹಿತೆರ್ ನಿಕ್ಲೆನ್ ಒಚ್ಚಿದ್ ಕೊರುವೆರ್; ಬೊಕ್ಕ ನಿಕ್ಲೆಡ್ ಕೆಲೆವೆರೆನ್ ಕೆರ್ಪಾವೆರ್. 17 ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. 18 ಆಂಡಲಾ ನಿಕ್ಲೆನ ತರೆಕುಜಲ್ ಒಂಜಿಲಾ ತಿರ್ತ್ ಬೂರಂದ್. 19 ನಿಕ್ಲೆ ತಾಳ್ಮೆಡ್‌ ನಿಕ್ಲೆ ಪ್ರಾಣೊಲೆನ್ ಒರಿತೊನುವರ್. ಭಯಂಕರ ದಿನೊಕುಲು ( ಮತ್ತಾಯೆ 24:15-21 ; ಮಾರ್ಕೆ 13:14-19 ) 20 “ಆಂಡ ಸೈನ್ಯೊಲು ಯೆರೂಸಲೇಮು ಪಟ್ಟಣದ ಸುತ್ತಲಾ ಉಪ್ಪುನೆನ್ ನಿಕುಲು ತೂನಗ ಅವು ಅಂತ್ಯಾಪಿನ ಕಾಲ ಮುಟ್ಟ ಬತ್ತ್‌ಂಡ್‌ಂದ್ ತೆರಿಯೊನ್ಲೆ. 21 ಅಪಗ ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್; ಪಟ್ಟಣೊಡು ಇತ್ತಿನಾಕುಲು ಪಿದಾಡ್ದ್ ಪೋವಡ್; ಹಳ್ಳಿದಾಕುಲು ಪೇಂಟೆದ ಉಲಯಿ ಪೋವಂದೆ ಉಪ್ಪಡ್. 22 ದಾಯೆಗಂದ್ಂಡ ಬರೆತಿನವು ಮಾತ ನಡಪೆರೆಗಾದ್ ‘ಅವು ನ್ಯಾಯತೀರ್ಪುದ ದಿನೊಕುಲು ಆದುಂಡು.’ 23 ಆ ದಿನೊಟು ಬಂಜಿನಾಕುಲೆಗ್ಲಾ, ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್. ಭೂಮಿದ ಮಿತ್ತ್ ಮಲ್ಲ ಭಂಗಲಾ ಈ ಜನೊಕುಲೆ ಮಿತ್ತ್ ಕೋಪಲಾ ಉಪ್ಪು. 24 ಅಕುಲು ಕತ್ತಿದ ಬಾಯಿಗ್ ಬೂರ್ವೆರ್; ಅಕ್ಲೆನ್ ಮಾತ ಬೇತೆ ದೇಶೊಲೆಗ್ ಸೆರೆ ಪತ್ತ್‌ದ್ ಕೊನೊವೆರ್; ಪಿದಯಿದ ಜನೊಕುಲೆನ ಸಮಯ ಮುಗಿಯುನ ಮುಟ್ಟ ಯೆರೂಸಲೇಮು ಪಟ್ಟಣ ಪಿದಯಿದ ಜನೊಕುಲೆಡ್ದ್ ತೊರ್ಪಾಟೊಗು ಬಲಿಯಾಪುಂಡು. ನರಮಾನಿ ಮಗೆ ಕುಡ ಬರ್ಪಿನವು ( ಮತ್ತಾಯೆ 24:29-31 ; ಮಾರ್ಕೆ 13:24-27 ) 25 “ಉಂದತ್ತಂದೆ ಸೂರ್ಯೆ ಚಂದ್ರೆ ನಕ್ಷತ್ರೊಲೆಡ್ ಗುರ್ತೊಲು ತೋಜುಂಡು. ಭೂಮಿದ ಮಿತ್ತ್ ಕಡಲ್ದ ಬೊಕ್ಕ ಸೆರೆಕ್ಕುಲೆ ಶಬ್ಧೊಡ್ದು ಜನೊಕುಲೆಗ್ ದಿಕ್ಕ್ ತೋಜಂದೆ ಸಂಕಟ ಉಂಡಾಪುಂಡು. 26 ಬಾನದ ಶಕ್ತಿ ಪಂದ್‌ದ್ ಪೋಪಿನೆಡ್ದ್ ನರಮಾನಿಲು ಪೋಡಿಗೆ ಪತ್ತ್‌ದಿನಾಕುಲಾದ್ ಲೋಕೊಡು ದಾದ ಆಪುಂಡು ಅಂದ್‌ದ್ ಎದುರು ತೂವೊಂದು ಜೀವ ಪೋಯಿಲೆಕ್ಕ ಆವು. 27 ಅಪಗ ನರಮಾನಿ ಮಗೆ ಬಲೊಟ್ಲಾ ಬಾರಿ ಮೈಮೆಡ್ಲಾ ಮುಗಲ್‌ಡ್ ಬರ್ಪಿನೆನ್ ತೂಪರ್. 28 ಆಂಡ ಉಂದು ಆವೊಡ್ದುಂಬೇ ಮಿತ್ತ್ ತೂಲೆ, ನಿಕ್ಲೆನ ತರೆ ದೆರ್ಪುಲೆ, ನಿಕ್ಲೆನ ಬುಡುಗಡೆ ಕೈತಲಾತ್ತ್ಂಡ್,” ಅಂದ್‌ದ್ ಪಂಡೆ. ಅಂಜೂರದ ಮರತ ಪಾಠ ( ಮತ್ತಾಯೆ 24:32-35 ; ಮಾರ್ಕೆ 13:28-31 ) 29 ಆಯೆ ಅಕ್ಲೆಗ್ ಒಂಜಿ ಉಪಕತೆ ಪಂಡೆ, “ಅಂಜೂರದ ಮರೊನು ತೂಲೆ. 30 ಅವು ತೆಗ್‌ಲ್‌ನಗ ಇತ್ತೆ ಅರೆಗಾಲ ಬತ್ತ್ಂಡ್ ಅಂದ್‌ದ್ ನಿಕುಲಾದೆ ತೆರಿಯೊನ್ವರ್. 31 ಅಂಚೆನೇ ಉಂದೆನ್ ತೂನಗ ದೇವೆರೆ ರಾಜ್ಯ ಕೈತಲುಂಡು, ಅಂದ್‌ದ್ ತೆರಿಯೊನ್ಲೆ. 32 ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ. 33 ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ. ಎಚ್ಚರಿಕೆ ಆದುಪ್ಪುಲೆ 34 “ನಿಕ್ಲೆನ ಬಗೆಟ್ ಜಾಗ್ರತೆ ಆದುಪ್ಪುಲೆ. ಬಂಜಾರ ವಣಸ್‌ಡ್ದ್‌ಲಾ ಅಮಲ್‌ಡ್ದ್‌ಲಾ ಲೋಕದ ಚಿಂತೆಲೆಡ್ದ್‌ಲಾ ನಿಕ್ಲೆ ಉಡಲ್ ದುನ್ನ ಆದಿತ್ತಿನೆಡ್ದ್, 35 ಆ ದಿನ ಗೊತ್ತಿಜ್ಜಂದೆನೆ ಒರನೆ ಇಡೀ ಭೂಮಿಡುಪ್ಪುನಾಕುಲೆ ಮಾತೆರೆ ಮಿತ್ತ್ ಉರ್ಲುದ ಲೆಕ್ಕನೆ ಬರು. 36 ಅಂಚಾಯಿನೆಡ್ದ್ ಉಂದು ಆಪಿನವು ಮಾತೆಕ್ ತಪ್ಪಾವೊನಿಯೆರೆಲಾ ನರಮಾನಿ ಮಗನ ಎದುರುಡು ಉಂತಿಯೆರೆಗ್ಲಾ ನಿಕುಲು ಪೂರ್ತಿ ಶಕ್ತಿವಂತೆರ್ ಆಪಿಲೆಕ್ಕ ಮಾತ ಕಾಲೊಡ್ಲಾ ದೇವೆರೆಡ ನಟ್ಟೊಂದು ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ. 37 ಆಯೆ ಪಗೆಲ್ಡ್ ದೇವಾಲಯೊಡು ಬೋಧನೆ ಮಲ್ತೊಂದು ರಾತ್ರೆಡ್ ಪೇಂಟೆದ ಪಿದಯಿ ಪೋದು ಇಪ್ಪೆಗುಡ್ಡೆಡ್ ತಡೆಯೆ. 38 ಜನೊಕುಲು ಮಾತೆರ್ ಆಯನ ಬೋಧನೆನ್ ಕೇನಿಯೆರೆ ಕಾಂಡೆ ದೇವಾಲಯೊಗು ಬರೊಂದಿತ್ತೆರ್. |
New Life Literature