ಲೂಕೆ 20 - ಪೊಸ ಒಡಂಬಡಿಕೆ

ಯೇಸುನ ಅಧಿಕಾರೊನು ಪ್ರಶ್ನೆ ಮಲ್ತಿನವು

¹ ಒಂಜಿ ದಿನ ಯೇಸು ದೇವಾಲಯೊಡು ಜನೊಕುಲೆಗ್ ಬೋಧನೆ ಮಲ್ತೊಂದು ಸುವಾರ್ತೆ ಸಾರಿಯೊಂದುಪ್ಪುನಪಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಸಭೆತ ಹಿರಿಯಾಕುಲುಲಾ ಯೇಸುನ ಕೈತಲ್‌ ಬತ್ತ್‌ದ್

² “ಈ ವಾ ಅಧಿಕಾರೊಡು ಉಂದೆನ್ ಮಾತ ಮಲ್ತೊಂದುಲ್ಲ? ಈ ಅಧಿಕಾರೊನು ನಿಕ್ಕ್ ಏರ್ ಕೊರಿಯೆರ್?” ಅಂದ್‌ದ್ ಕೇಂಡಿನೆಕ್ಕ್

³ ಯೇಸು ಅಕ್ಲೆಡ, “ಯಾನ್ಲಾ ನಿಕ್ಲೆಡ ಒಂಜಿ ಪಾತೆರ ಕೇನ್ವೆ ಎಂಕ್ ಪನ್ಲೆ.

⁴ ದೀಕ್ಷಾಸ್ನಾನ ಮಲ್ಪಾವುನ ಅಧಿಕಾರ ಯೋಹಾನಗ್ ಪರಲೋಕೊಡ್ದಾ ನರಮಾನಿಲೆಡ್ದಾ?” ಅಂದ್‌ದ್ ಕೇಂಡೆ.

⁵ ಅಕುಲು ಒಟ್ಟು ಕೂಡುದು ಚರ್ಚೆ ಮಲ್ತೆರ್, “‘ಪರಲೋಕೊಡ್ದು,’ ಅಂದ್‌ದ್ ನಮ ಪಂಡ್ಂಡ, ‘ನಿಕುಲು ಆಯನ್ ದಾಯೆಗ್ ನಂಬುಜರ್?’ ಅಂದ್‌ದ್ ಪನುವೆ.

⁶ ‘ನರಮಾನಿಲೆಡ್ದ್ ಬೈದ್‌ಂಡ್,’ ಅಂದ್‌ದ್ ಪಂಡ್ಂಡ, ಜನೊಕುಲು ಮಾತೆರ್ಲಾ ಯೋಹಾನನ್ ಪ್ರವಾದಿ ಅಂದ್‌ದ್ ನಂಬೊಂದು ಉಪ್ಪುನೆಡ್ದ್ ಅಕುಲು ನಮನ್ ಕಲ್ಲ್ ದಕ್ಕ್‌ದ್ ಕೆರ್ವೆರ್,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

⁷ ಐಡ್ದ್ ಬೊಕ್ಕ ಅಕುಲು, “ಅವು ಒಲ್ತುಡ್ದು ಬತ್ತ್ಂಡ್ ಪಂಡ್ದ್ ಎಂಕ್ಲೆಗ್ ಗೊತ್ತುಜ್ಜಿ,” ಅಂದ್‌ದ್ ಉತ್ತರ ಕೊರಿಯೆರ್.

⁸ ಅಪಗ ಯೇಸು ಅಕ್ಲೆಗ್, “ಉಂದೆನ್ ವಾ ಅಧಿಕಾರೊಡು ಮಲ್ಪುವೆನಾ ಅವೆನ್ ಯಾನ್ಲಾ ನಿಕ್ಲೆಗ್ ಪನ್ಪುಜಿ,” ಅಂದ್‌ದ್ ಪಂಡೆ.

ದ್ರಾಕ್ಷೆತೋಟದ ಒಕ್ಕೆಲ್‌ದಾಕುಲೆನ ಉಪಕತೆ

⁹ ಅಪಗ ಯೇಸು ಜನೊಕುಲೆಗ್ ಒಂಜಿ ಉಪಕತೆನ್ ಪನಿಯೆರೆ ಸುರು ಮಲ್ತೆ, “ಒರಿ ನರಮಾನಿ ಒಂಜಿ ದ್ರಾಕ್ಷೆತೋಟೊನು ಮಲ್ತ್‌ದ್ ಅವೆನ್ ಒಕ್ಕೆಲ್‌ದಾಕುಲೆಗ್ ಬೆನಿಯೆರೆ ಕೊರ್ದು ಬೊಕ್ಕೊಂಜಿ ದೇಶೊಗು ಪೋದು ಅಲ್ಪ ಮಸ್ತ್ ಕಾಲ ಇತ್ತೆ.

¹⁰ ಫಲತ್ತ ಕಾಲ ಬನ್ನಗ ದ್ರಾಕ್ಷೆತೋಟದ ಬುಲೆತ ಪಾಲ್‌ನ್ ದೆತ್ತೊನೊರೆಗಾದ್ ಒರಿ ಚಾಕ್ರಿದಾಯನ್ ಒಕ್ಕೆಲ್‌ದಾಕುಲೆನ ಕೈತಲ್‌ ಕಡಪುಡಿಯೆ. ಆಂಡ ಆ ಒಕ್ಕೆಲ್‌ದಾಕುಲು ಆಯಗ್ ಹಾಕ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್.

¹¹ ಆ ಧನಿ ನನೊರಿ ಬೇಲೆದಾಯನ್ ಕಡಪುಡ್ನಗ ಅಕುಲು ಆಯನ್ಲಾ ಹಾಕ್‌ದ್ ಅವಮಾನ ಮಲ್ತ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್.

¹² ಬೊಕ್ಕ ಮೂಜನೆದಾಯನ್ ಕಡಪುಡ್ನಗ ಅಕುಲು ಆಯನ್ಲಾ ಗಾಯ ಆಪಿನಾತ್ ಹಾಕ್‌ದ್ ಪಿದಯಿ ಪಾಡಿಯೆರ್.

¹³ ಅಪಗ ಆ ದ್ರಾಕ್ಷೆತೋಟದ ಧನಿ, ‘ಯಾನ್ ನನ ದಾನೆ ಮಲ್ಪೊಲಿ? ಎನ ಪ್ರೀತಿದ ಮಗನ್ ಕಡಪುಡ್ವೆ, ಒಂಜಿ ವೇಳೆ ಆಯಗಾಂಡಲಾ ಮರ್ಯಾದಿ ತೋಜಾವೆರೆ ಯಾವು,’ ಅಂದ್‌ದ್ ಪಂಡೆ.

¹⁴ ಆಂಡ ಆ ಒಕ್ಕೆಲ್‌ದಾಕುಲು ಯಜಮಾನನ ಮಗನ್ ತೂದು, ‘ಇಂಬೆನೇ ಹಕ್ಕ್‌ದಾರೆ, ಇಂಬ್ಯನ್ ಕೆರ್ದ್ ಪಾಡ್‌ಗ, ಇಂಬ್ಯನ ಸೊತ್ತು ನಮ್ಮವು ಆವು,’ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.

¹⁵ ಬೊಕ್ಕ ಅಕುಲು ಆಯನ್ ದ್ರಾಕ್ಷೆತೋಟೊಡ್ದು ಪಿದಯಿ ನೂಕುದು ಕೆರ್ದ್ ಪಾಡಿಯೆರ್. “ಅಂಚಾಂಡ ದ್ರಾಕ್ಷೆತೋಟದ ಧನಿ ಅಕ್ಲೆಗ್ ಎಂಚಿನ ಮಲ್ಪೆ?

¹⁶ ಆಯೆ ಬತ್ತ್‌ದ್ ಆ ಒಕ್ಕೆಲ್‌ದಾಕುಲೆನ್ ನಾಶ ಮಲ್ತ್‌ದ್, ತನ ತೋಟೊನು ಬೇತೆಕ್ಲೆಗ್ ಕೊರುವೆ.” ಉಂದೆನ್ ಜನೊಕುಲು ಕೇಂಡ್ದ್, “ದೇವೆರ್ ಅಂಚ ಆವೆರೆ ಬುಡಿಯೆರೆ ಬಲ್ಲಿ,” ಪಂಡೆರ್.

¹⁷ ಆಂಡ ಯೇಸು ಅಕ್ಲೆನ್ ದೃಷ್ಟಿ ದೀದ್ ತೂದು, “ಅಂಚಾಂಡ, ‘ಇಲ್ಲ್ ಕಟ್ಟುನಾಕುಲು ಬೊಡ್ಚಿಂದ್‌ದ್ ಬುಡ್ತಿನ ಕಲ್ಲೇ ಮೂಲೆದ ತರೆಕಲ್ಲಾಂಡ್,’ ಅಂದ್‌ದ್ ಬರೆತಿ ಪಾತೆರದ ಅರ್ಥ ಎಂಚಿನಾದುಪ್ಪು?

¹⁸ ಈ ಕಲ್ಲ್‌ದ ಮಿತ್ತ್ ಬೂರುನ ಪ್ರತಿಯೊರಿಲಾ ತುಂಡು ತುಂಡಾದ್ ಪೋಪೆ; ಉಂದು ಏರೆನ ಮಿತ್ತ್ ಬೂರುಂಡಾ ಆಯನ್ ಪೊಡಿ ಪೊಡಿ ಮಲ್ಪುಂಡು,” ಅಂದ್‌ದ್ ಪಂಡೆ.

ತೆರಿಗೆ ಕೊರ್ಪಿನ ಸಂಗತಿಡ್ ಚರ್ಚೆ

¹⁹ ಶಾಸ್ತ್ರಿಲುಲಾ ಪ್ರಧಾನಯಾಜಕೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ತನ್ಕ್‌ಲೆಗೇ ಈ ಉಪಕತೆನ್ ಪಂಡೆ ಅಂದ್‌ದ್ ತೆರಿಯೊಂದು; ಅವ್ವೇ ಗಳಿಗೆಡ್ ಆಯನ್ ಪತ್ತಿಯೆರೆ ಸಮಯ ತೂವೊಂದಿತ್ತೆರ್, ಆಂಡ ಜನೊಕುಲೆಗ್ ಪೋಡಿಯೆರ್.

²⁰ ಬೊಕ್ಕ ಅಕುಲು ಯೇಸುನು ಅಧಿಕಾರೊಗ್ಲಾ ಅಧಿಪತಿನ ವಶೊಕ್ಲಾ ಒಪ್ಪಿಸಾವೊಡು ಅಂದ್‌ದ್ ಕಾತೊಂದಿತ್ತೆರ್. ನೀತಿವಂತೆರೆಲೆಕ್ಕ ನಟನೆ ಮಲ್ಪು ಗೂಢಾಚಾರೆರೆನ್ ಆಯನ ಪಾತೆರೊಲೆಡ್ ಎಂಚಾಂಡಲಾ ಪತ್ತಿಯೆರೆ ತಿಕ್ಕೆನಾ ಅಂದ್‌ದ್ ಕಡಪುಡಿಯೆರ್.

²¹ ಮೊಕುಲು ಯೇಸುಡ, “ಬೋಧಕಾ, ಈ ಸರಿಯಾದ್ ಪಾತೆರೊಂದು ಬೋಧನೆ ಮಲ್ಪುವ; ನಿನ ಮೋನೆಡ್ ದಾಕ್ಷಿಣದಾಂತೆ ದೇವೆರೆ ಮಾರ್ಗೊನು ಸತ್ಯ ಆದ್ ಬೋಧನೆ ಮಲ್ಪುನಾಯೆ ಆದುಲ್ಲ ಅಂದ್‌ದ್ ತೆರಿದ.

²² ರೋಮ್ ದೇಶದ ಅರಸು ಆಯಿ ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ?” ಅಂದ್‌ದ್ ಕೇಂಡೆರ್.

²³ ಯೇಸು ಅಕ್ಲೆನ ಉಪಾಯೊನು ತೆರಿಯೊಂದು ಅಕ್ಲೆಗ್ ಪಂಡೆ,

²⁴ “ಎಂಕ್ ಒಂಜಿ ಪಾವೊಲಿನ್ ತೋಜಾಲೆ, ಉಂದೆಟ್ ಏರೆನ ತರೆಲಾ ಮುದ್ರೆಲಾ ಉಂಡು?” ಅಂದ್‌ದ್ ಕೇಂಡಿನೆಕ್ಕ್, ಅಕುಲು “ಕೈಸರನವು,” ಅಂದ್‌ದ್ ಪಂಡೆರ್.

²⁵ ಅಂಚಾಂಡ, “ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ.

²⁶ ಆಯನ ಪಾತೆರೊಡು ಅಕ್ಲೆಗ್ ದಾಲಾ ತಪ್ಪು ತಿಕ್ಕಂದೆ ಜನೊಕುಲೆ ಎದುರುಡು ಆಯೆ ಕೊರಿನ ಉತ್ತರೊಗು ಅಚ್ಚಿರ ಆದ್ ಮನಿಪಂದೆ ಕುಲ್ಲಿಯೆರ್.

ಸೈತಿನ ಏಳ್ ಕಂಡನಿಯಾಡ್ಲು

²⁷ ಬೊಕ್ಕ ಸೈತಿನಾಕುಲು ಲಕ್ಕ್‌ನವು ಇಜ್ಜಿ ಅಂದ್‌ದ್ ಪನ್ಪಿನ ಸದ್ದುಕಾಯೆರೆಡ್ ಕೆಲೆವೆರ್ ಯೇಸು ಕೈತಲ್‌ ಬತ್ತ್‌ದ್ ಆಯಗ್ ಪ್ರಶ್ನೆ ಮಲ್ತೆರ್.

²⁸ “ಬೋಧಕಾ. ‘ಮದ್ಮೆ ಆದಿತ್ತಿನಾಯೆ ಜೋಕುಲು ಇಜ್ಜಂದೆ ಸೈತ್ಂಡ ಆಯನ ಮೆಗ್ಯೆ ಆಲೆನ್ ಮದ್ಮೆ ಮಲ್ತೊಂದು ತನ ಪಲಯಗ್ ಸಂತಾನೊನು ಪಡೆಯೊಡು ಅಂದ್‌ದ್ ಮೋಶೆ ಎಂಕ್ಲೆಗ್ ಬರೆದ್ ದೀತೆ ಅತ್ತಾ?’

²⁹ ಅಂಚೆನೇ, ಏಳ್ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಬೊಡೆದಿ ಮಲ್ತೊಂದು ಜೋಕುಲುದಾಂತೆ ಸೈತೆ.

^30-31 ರಡ್ಡನೆದಾಯೆಲಾ ಆಯಡ್ದ್ ಬೊಕ್ಕ ಮೂಜನೆದಾಯೆಲಾ ಆಲೆನ್ ಮದ್ಮೆ ಮಲ್ತೊಂಡೆರ್ ಉಂದೇ ರೀತಿ ಏಳ್ ಜನಲಾ ಮದ್ಮೆ ಮಲ್ತೊಂದು ಜೋಕುಲುದಾಂತೆ ಸೈತೆರ್.

³² ಕಡೆಕ್ಕ್ ಆ ಪೊಂಜೊವುಲಾ ಸೈತಲ್.

³³ ಅಂಚಾಂಡ ಪುನರುತ್ಥಾನೊಡು ಆ ಪೊಂಜೊವು ಏರೆನ ಬೊಡೆದಿ ಆದುಪ್ಪುವಲ್? ಆಲೆನ್ ಏಳ್ವೆರ್ಲಾ ಮದ್ಮೆ ಆದಿತ್ತೆರ್ ಅತ್ತಾ?” ಪಂಡೆರ್.

³⁴ ಯೇಸು ಅಕ್ಲೆಗ್, “ಈ ಲೋಕದ ಜನೊಕುಲು ಮದ್ಮೆ ಮಲ್ತೊನುವೆರ್, ಮದ್ಮೆ ಮಲ್ತ್ ಕೊರ್ಪೆರ್.

³⁵ ಆಂಡ ಆ ಲೋಕೊಡು ಸೈತಿನಾಕುಲೆಡ್ದ್ ಕುಡ ಲಕ್ಕ್‌ದ್ ನನೊಂಜಿ ಜನ್ಮೊಗು ತಕ್ಕಾದಿತ್ತಿನಾಕುಲು ಮದ್ಮೆ ಮಲ್ತೊನ್ಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್.

³⁶ ಅಕುಲು ನನ ಸೈಪಿನಿಲಾ ಇಜ್ಜಿ. ಸೈತಿನಾಕುಲೆಡ್ದ್ ಲಕ್ಕ್‌ದ್ ದೂತೆರೆಗ್ ಸರಿಯಾದ್ ದೇವೆರೆ ಜೋಕುಲು ಆಪೆರ್.

³⁷ ಸೈತಿನಾಕುಲು ಬದ್‌ಕ್‌ದ್ ಲಕ್ಕುವೆರ್ ಪನ್ಪಿನೆನ್ ಮೋಶೆಲಾ ಪನ್ತೆ. ಆಯೆ ಪುದೆಲ್‌ದ ಸಂಗತಿದ ಅದ್ಯಾಯೊಡು, ಕರ್ತವನ್ ಅಬ್ರಹಾಮುನ ದೇವೆರ್ ಇಸಾಕನ ದೇವೆರ್ ಯಾಕೋಬುನ ದೇವೆರ್, ಅಂದ್‌ದ್ ಪನ್ತೆ.

³⁸ ಆಯೆ ಸೈತಿದಿನಾಕುಲೆನ ದೇವೆರ್ ಅತ್ತ್, ಜೀವ ಇತ್ತಿನಾಕುಲೆನ ದೇವೆರಾದುಲ್ಲೆ. ಆಯನ ದೃಷ್ಟಿಡ್ ಮಾತೆರ್ಲಾ ಬದುಕುನಾಕುಲೇ,” ಅಂದ್‌ದ್ ಪಂಡೆ.

³⁹ ಶಾಸ್ತ್ರಿಲೆಡ್ ಕೆಲೆವೆರ್, “ಬೋಧಕಾ, ಸರಿಯಾದ್ ಪಂಡ,” ಪಂಡೆರ್.

⁴⁰ ಆಯಡ ನನ ದಾಲಾ ಕೇನಿಯೆರೆ ಅಕ್ಲೆಗ್ ಏರೆಗ್ಲಾ ಧೈರ್ಯ ಬತ್ತಿಜಿ.

ಕ್ರಿಸ್ತನ ಸಂಗತಿಡ್ ಪ್ರಶ್ನೆ

⁴¹ ಅಪಗ ಆಯೆ, “ಬರೊಡಾಯಿ ಕ್ರಿಸ್ತೆ ದಾವೀದನ ಮಗೆ ಅಂದ್‌ದ್ ಪನ್ಪೆರತ್ತಾ ಅವು ಎಂಚ?” ಕೇಂಡೆ.

^42-43 “‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ಪುನ ಮುಟ್ಟ ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ,’ ಅಂದ್‌ದ್ ಕೀರ್ತನೆ ಗ್ರಂಥೊಡು ದಾವೀದೆ ತಾನೇ ಪನ್ಪೆ ಅತ್ತಾ?

⁴⁴ ದಾವೀದೆ ಆಯನ್ ‘ಕರ್ತವೆ’ ಅಂದ್‌ದ್ ಪಂಡಿ ಬೊಕ್ಕ ಆಯೆ ಆಯಗ್ ಮಗೆ ಆಪಿನವು ಎಂಚ?” ಅಂದ್‌ದ್ ಅಕ್ಲೆಡ ಕೇಂಡೆ.

ಶಾಸ್ತ್ರಿಲೆ ಬಗೆಟ್ ಎಚ್ಚರಿಕೆ

⁴⁵ ಜನೊಕುಲು ಮಾತೆರ್ ಕೇನೊಂದುಪ್ಪುನಗ ಆಯೆ ತನ ಶಿಷ್ಯೆರೆಗ್ ಪಂಡೆ;

⁴⁶ “ಶಾಸ್ತ್ರಿಲೆ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. ನೇಲ್ಯ ಅಂಗಿನ್ ಪಾಡೊಂದು ನಡಪುನವು, ಅಂಗಡಿ ಸಾದಿಲೆಡ್ ವಂದನೆಲು, ಸಭಾಮಂದಿರೊಡು ಮಲ್ಲಸ್ಥಾನೊಲು, ಲೇಸ್‌ಲೆಡ್ ಸುರುತ್ತ ಪಂತೆ, ಉಂದೆನ್ ಮಾತ ಇಷ್ಟ ಮಲ್ಪುನಾಕುಲಾದುಲ್ಲೆರ್.

⁴⁷ ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್, ತೋರಿಕೆಗಾದ್ ಉದ್ಧದ ಪ್ರಾರ್ಥನೆನ್ ಮಲ್ಪುವೆರ್. ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್,” ಅಂದ್‌ದ್ ಪಂಡೆ.