ಲೂಕೆ 2 - ಪೊಸ ಒಡಂಬಡಿಕೆಯೇಸು ಕ್ರಿಸ್ತನ ಪುಟ್ಟು ( ಮತ್ತಾಯೆ 1:18-25 ) 1 ಆ ಕಾಲೊಡು ಇಡೀ ರಾಜ್ಯೊಡು ಖಾನೇಷ್‌ಮಾರಿ ಬರೆಪಾವೊಡು ಪನ್ಪಿ ಅಪ್ಪಣೆ ಚಕ್ರವರ್ತಿ ಆದಿತ್ತಿ ಔಗುಸ್ತಡ್ದ್ ಪಿದಾಡ್‌ಂಡ್. 2 ಕುರೇನ್ಯೆ ಸುರಿಯ ದೇಶದ ಅಧಿಪತಿ ಆದುಪ್ಪುನಗ ಈ ಖಾನೇಷ್‌ಮಾರಿ ನಡತ್ಂಡ್. 3 ಅಪಗ ಖಾನೇಷ್‌ಮಾರಿ ಬರೆಪಾವೆರೆಗಾದ್ ಮಾತೆರ್ಲಾ ತನ್ಕುಲೆ ಊರುಲೆಗ್ ಪಿದಾಡಿಯೆರ್. 4-5 ಯೋಸೇಫುಲಾ ತಾನ್ ದಾವೀದ್ ಸಂತಾನದಾಯೆಲಾ ಗೋತ್ರದಾಯೆಲಾ ಆದಿತ್ತಿನೆಡ್ದ್ ಖಾನೇಷ್‌ಮಾರಿ ಬರೆಪಾವೆರೆಗಾದ್ ತನ್ಕ್ ನಿಚ್ಚಯ ಆದಿತ್ತಿ ಮರಿಯ ಒಟ್ಟುಗು ಗಲಿಲಾಯದ ನಜರೇತ್ ಪನ್ಪಿ ಊರುಡ್ದು ಪಿದಾಡ್ದ್ ಯೂದಾಯೊಡುಪ್ಪು ಬೇತ್ಲೆಹೇಮು ಪನ್ಪಿ ದಾವೀದನ ಊರುಗು ಪೋಯೆ. ಅಪಗ ಮರಿಯ ದಿಂಜಿದಿ ಬಂಜಿನಾಲ್ ಆದಿತ್ತಲ್. 6 ಅಕುಲು ಅಲ್ಪ ಉಪ್ಪುನಗ ಆಲೆಗ್ ದಿನ ದಿಂಜಿಂಡ್. 7 ಆಲ್ ತನ ಕಡೀರ ಆಣ್ ಬಾಲೆನ್ ಪೆದ್ದ್‌ದ್ ಕುಂಟುಡು ಸುತ್ತುದು ಬೈಪಣೆಡ್ ಜೆಪುಡಾಯಲ್. ದಾಯೆಗಂದ್ಂಡ ಅಕ್ಲೆಗ್ ಛತ್ರೊಡು ಓಲುಲಾ ಜಾಗ್ ತಿಕ್ಕಿಜಿ. ಕುರುಬೆರ್ ಬೊಕ್ಕ ದೂತೆರ್ 8 ಆ ಊರುಡು ರಾತ್ರೆಡ್ ಕುರುಬೆರ್ ಕಂಡೊಡು ತನ್ಕುಲೆ ಕುರಿಕುಲೆ ಪುಂಡುನು ಕಾತೊಂದಿತ್ತೆರ್. 9 ಅಪಗ ಕರ್ತವ ದೂತೆ ಬತ್ತ್‌ದ್ ಅಕ್ಲೆನ ಎದುರುಡು ಉಂತಿಯೆ. ಕರ್ತವ ಮೈಮೆ ಅಕ್ಲೆನ ಸುತ್ತ ದಿಂಜಿಂಡ್; ಅವೆನ್ ತೂದು ಅಕುಲು ಮಸ್ತ್ ಪೋಡಿಯೆರ್. 10 ಆ ದೂತೆ ಅಕ್ಲೆಗ್, “ಪೋಡ್ಯಡೆ, ಕೇನ್ಲೆ, ಜನೊಕುಲೆಗ್ ಮಾತೆರೆಗ್ಲಾ ದಿಂಜ ಸಂತೋಷ ಉಂಡಾಪಿ ಎಡ್ಡೆ ವರ್ತಮಾನೊನು ತೆರಿಪಾವೆ. 11 ಅವು ದಾನೆಂದ್ಂಡ, ಈ ಗಳಿಗೆಡ್ ನಿಕ್ಲೆಗಾದ್ ದಾವೀದ್ ಊರುಡು ಒರಿ ರಕ್ಷಕೆ ಪುಟ್ಟುದೆ. ಆಯೆ ಕರ್ತವೆ ಆದುಪ್ಪು ಕ್ರಿಸ್ತೆನೇ. 12 ನಿಕ್ಲೆಗ್ ಗೊತ್ತಾವೆರೆ ಗುರ್ತ ದಾನೆಂದ್ಂಡ, ಕುಂಟುಡು ಸುತ್ತುದಿನ ಒಂಜಿ ಬಾಲೆ ಬೈಪಣೆಡ್ ಜೆಯ್ದಿನೆನ್ ತೂವರ್,” ಅಂದ್‌ದ್ ಪಂಡೆ. 13 ಅಪಗನೆ ಆ ದೂತಡೊಪ್ಪ ಪರಲೋಕೊಡ್ದು ಒಂಜಿ ಮಲ್ಲ ದೂತೆರೆಸೈನ್ಯ ತೋಜಿದ್ ಬತ್ತ್‌ದ್ ದೇವೆರೆನ್ ಪುಗರೊಂದು ಪಂಡೆರ್, 14 “ಪರಲೋಕೊಡುಪ್ಪು ದೇವೆರೆಗ್ ಮೈಮೆ, ಭೂಲೋಕೊಡು ನರಮಾನಿಲೆಗ್ ಸಮಾಧಾನ. ದೇವೆರ್ ಅಕ್ಲೆನ್ ಮೆಚ್ಚುವೆರ್.” 15 ದೂತೆರ್ ಅಕ್ಲೆನ ಕೈತಲ್‌ಡ್ದ್ ಪರಲೋಕೊಗು ಪೋಯಿ ಬೊಕ್ಕ ಕುರುಬೆರ್, “ನಮ ಇತ್ತೆನೇ ಬೇತ್ಲೆಹೇಮುಗು ಪೋದು ಕರ್ತವೆ ನಂಕ್ ತೆರಿಪಾಯಿ ಈ ಸಂಗತಿಲೆನ್ ತೂಕ ಲಕ್ಕ್‌ಲೆ,” ಅಂದ್‌ದ್ ಒರಿಯಡೊರಿ ಪಾತೆರೊಂದು, 16 ಅಪಗನೆ ಮರಿಯನ್ಲಾ ಯೋಸೇಫುನ್ಲಾ ಬೈಪಣೆಡ್ ಜೆತ್ತ್‌ದಿತ್ತಿ ಆ ಬಾಲೆನ್ಲಾ ತೂಯೆರೆ ಪೋಯೆರ್. 17 ಬಾಲೆನ್ ತೂಯಿ ಬೊಕ್ಕ ಅಕುಲು ಆ ಬಾಲೆದ ಬಗೆಟ್ ದೇವದೂತೆರ್ ತನ್ಕುಲೆಗ್ ಪಂಡಿ ಪಾತೆರೊನು ತೆರಿಪಾಯೆರ್. 18 ಕುರುಬೆರ್ ಪಂಡಿನ ಪಾತೆರೊನು ಕೇಂಡಿನ ಮಾತೆರ್ಲಾ ಸೋದ್ಯ ಆಯೆರ್. 19 ಆಂಡ ಮರಿಯ ಆ ಪಾತೆರೊಲೆನ್ ತನ ಉಡಲ್‌ಡ್ ದೀದ್ ಎನ್ನೊಂದಿತ್ತಲ್. 20 ಕುರುಬೆರ್ ತನ್ಕ್‌ಲೆಗ್ ದೂತೆರ್ ಪಂಡಿಲೆಕ್ಕ ಮಾತ ಸಂಗತಿಲೆನ್ ಕೇಂಡ್ದ್ ತೂದು ದೇವೆರೆನ್ ಪುಗರೊಂದುಲಾ ಸುಗಿತೊಂದುಲಾ ಪಿರ ಪೋಯೆರ್. ಯೇಸುನ ಸುನ್ನತಿ 21 ಆ ಬಾಲೆ ಪುಟ್ಟುದು ಎನ್ಮನೆ ದಿನೊಟು ಸುನ್ನತಿ ಮಲ್ಪು ದಿನತಾನಿ ಯೇಸು ಪಂಡ್ದ್ ಪುದರ್ ದೀಯೆರ್. ಬಾಲೆ ಗರ್ಭೊಡು ಉಂಡಾಪಿ ದುಂಬೇ ದೂತೆರ್ ಅವ್ವೇ ಪುದರ್‌ನ್ ದೀವೊಡು ಪಂಡ್ದಿತ್ತೆರ್. ದೇವಾಲಯೊಡು ಯೇಸುನ ಸಮರ್ಪಣೆ 22 ಮೋಶೆನ ನ್ಯಾಯಕಟ್ಟ್‌ದ ಪ್ರಕಾರ ಅಕ್ಲೆನ ಶುದ್ಧಾಚಾರದ ದಿನೊಕುಲು ಮುಗಿ ಬೊಕ್ಕ ಆ ಬಾಲೆನ್ ಯೆರೂಸಲೇಮುಗು ಲೆತ್ತೊಂದು ಪೋಯೆರ್. 23 ದಾಯೆಗ್ ಪಂಡ ಕಡೀರ ಆಣ್ ಬಾಲೆನ್ ಕರ್ತವಗ್ ಪರಿಶುದ್ಧದವು ಅಂದ್‌ದ್ ಅರ್ಪಣೆ ಮಲ್ಪೊಡಂದ್‌ದ್ ಕರ್ತವ ನ್ಯಾಯಕಟ್ಟ್‌ಡ್ ಬರೆದುಂಡು. 24 ಐಕಾದ್ ಕರ್ತವ ನ್ಯಾಯಕಟ್ಟ್ ಪಂಡಿಲೆಕ್ಕ ಒಂಜಿ ಜೋಡಿ ಪಾರಿವಾಳ ಇಜ್ಜಿಂಡ ರಡ್ಡ್ ಪಾರಿವಾಳದ ಕಿನ್ನಿಲೆನ್ ಬಲಿ ಕೊರೊಡಿತ್ತ್‌ಂಡ್. 25 ಆ ಸಮಯೊಡು ಯೆರೂಸಲೇಮುಡು ಸಿಮೆಯೋನೆ ಪನ್ಪಿ ಒರಿ ನರಮಾನಿ ಇತ್ತೆ. ಆಯೆ ನೀತಿವಂತೆಲಾ ಭಕ್ತಿದಾಯೆಲಾ ಆದಿತ್ತೆ. ಇಸ್ರಾಯೇಲ್ ಜನೊಕುಲೆನ ಸಂತೈಸಿಕೆ ಕೊರ್ಪಿನಾಯೆ ಏಪ ಬರುವೆ ಅಂದ್‌ದ್ ಕಾತೊಂದಿತ್ತೆ. ಆಯೆ ಪರಿಶುದ್ಧಾತ್ಮೊನು ಪಡೆದಿತ್ತೆ. 26 ಕರ್ತವೆ ಕಡಪುಡೊಡಾಯಿನ ಕ್ರಿಸ್ತನ್ ತೂವಂದೆ ಈ ಸೈಪುಜ ಅಂದ್‌ದ್ ಪರಿಶುದ್ಧಾತ್ಮೊಡ್ದು ಆಯಗ್ ಅಪ್ಪಣೆ ಆದಿತ್ತ್ಂಡ್. 27 ಆಯೆ ಪರಿಶುದ್ಧಾತ್ಮದ ಪ್ರೇರೆಣೆಡ್ದ್ ದೇವಾಲಯೊಗು ಬತ್ತೆ; ನ್ಯಾಯಕಟ್ಟ್‌ದ ಪ್ರಕಾರ ಯೇಸುನ ಅಪ್ಪೆಅಮ್ಮೆ ಬಾಲೆನ್ ದೇವಾಲಯದ ಉಲಯಿ ಲೆತ್ತೊಂದು ಬನ್ನಗ. 28 ಸಿಮೆಯೋನೆ ಬಾಲೆನ್ ತೂದು ತನ ಕೈಟ್ ದೆತ್ತೊಂದು ದೇವೆರೆನ್ ಪುಗರ್‌ದ್ ಪಂಡಿನಿ, 29 “ಕರ್ತವಾ, ನಿನ ಪಾತೆರ ನಡತ್ಂಡ್; ಇತ್ತೆ ಸಮಾಧಾನೊಡು ಪೋವೆರೆ ನಿನ ದಾಸಗ್ ಅಪ್ಪಣೆ ಆಂಡ್. 30 ಈ ನೇಮಕ ಮಲ್ತಿ ರಕ್ಷಕನ್ ಯಾನ್ ಕಣ್ಣಾರೆ ತೂಯೆ. 31 ಮಾತ ಜನೊಕುಲೆಗ್ ತೋಜಿದ್ ಬರ್ಪಿಲೆಕ್ಕ ಆಯನ್ ಒದಗಾದ್ ಕೊರ್ತ. 32 ಆಯೆ ಪಿದಯಿದ ಜನೊಕುಲೆಗ್ ಗೇನ ಮೂಡುನ ಬೊಲ್ಪು, ನಿನ ಜನೊಕುಲಾಯಿ ಇಸ್ರಾಯೇಲ್ಯೆರೆಗ್ ಪುಗರಿಗೆ,” ಅಂದ್‌ದ್ ಪಂಡೆ. 33 ಆ ಬಾಲೆದ ಬಗೆಟ್ ಈ ಪಾತೆರೊಲೆನ್ ಕೇಂಡ್ದ್ ಬಾಲೆದ ಅಪ್ಪೆಲಾ ಅಮ್ಮೆಲಾ ಅಚ್ಚಿರ ಆಯೆರ್. 34 ಸಿಮೆಯೋನೆ ಅಕ್ಲೆನ್ ಆಶೀರ್ವದಿತ್‌ದ್ ಅಪ್ಪೆ ಆದುಪ್ಪು ಮರಿಯಗ್, “ಇಂದಾ, ಈ ಬಾಲೆ, ಇಸ್ರಾಯೇಲ್ಯೆರೆಡ್ ಮಸ್ತ್ ಜನ ಬೂರುನೆಕ್ಕ್‌ಲಾ ಲಕ್ಕುನೆಕ್ಕ್‌ಲಾ ಕಾರಣ ಆದುಪ್ಪುವೆ; ಬೊಕ್ಕ ಜನೊಕುಲು ಎದುರು ಪಾತೆರಿಯೆರೆಗ್ಲಾ ಗುರ್ತ ಆದುಪ್ಪುವೆ; 35 ಇಂಚ ಮಸ್ತ್ ಜನೊಕುಲೆನ ಉಡಲ್‌ದ ವಿಚಾರೊಲು ಪಿದಯಿ ಬರು. ಈ ಕಾರಣೊಗಾದ್ ಇಂಬೆ ಪುಟ್ಟುದೆ. ಉಂದತ್ತಂದೆ ನಿನ ಪ್ರಾಣೊಗು ಬರ್ಚಿ ಕಂತಿಲೆಕ್ಕ ಆವು,” ಅಂದ್‌ದ್ ಪಂಡೆ. ಅನ್ನನ ಪ್ರವಾದನೆ 36 ಅಪಗ ಅಸೇರ್ ಜಾತಿದ ಫನುವೇಲ್‌ನ ಮಗಲಾಯಿ ಅನ್ನ ಪನ್ಪಿ ಒರ್ತಿ ಪ್ರವಾದಿನಿ ಇತ್ತಲ್. ಆಲ್ ಮಸ್ತ್ ಪ್ರಾಯದಾಲ್ ಆದಿತ್ತಲ್. ಆಲ್ ಮದ್ಮೆ ಆದ್ ಏಳ್ ವರ್ಸ ಮಾತ್ರ ಕಂಡನಿಡೊಪ್ಪ ಬದ್‌ಕ್‌ದ್ ಎಣ್ಪತ್ತನಾಲ್ ವರ್ಸ ವಿಧವೆ ಆದಿತ್ತಲ್. 37 ಆಲ್ ದೇವಾಲಯೊಡೇ ಇತ್ತ್‌ದ್ ಉಪವಾಸ ಪ್ರಾರ್ಥನೆ ಮಲ್ತೊಂದು ರಾತ್ರೆ ಪಗೆಲ್ ದೇವೆರೆ ಸೇವೆ ಮಲ್ತೊಂದಿತ್ತಲ್. 38 ಆಲ್ ಅವ್ವೇ ಗಳಿಗೆಡ್ ಕೈತಲ್‌ ಬತ್ತ್‌ದ್ ದೇವೆರೆಡ್ದ್ ಆಯಿ ಉಪಕಾರೊನು ನೆನೆತ್‌ದ್ ಪುಗರೊಂದು ಯೆರೂಸಲೇಮುದ ಬುಡುಗಡೆನ್ ಕಾತೊಂದಿತ್ತಿ ಮಾತೆರೆಡ ಈ ಬಾಲೆದ ಸಂಗತಿಡ್ ಪಾತೆರಿಯಲ್. 39 ಐಡ್ದ್ ಬೊಕ್ಕ ಅಕುಲು ಕರ್ತವ ನ್ಯಾಯಕಟ್ಟ್‌ಗ್ ಸರಿಯಾದ್ ಮಾತೆನ್ಲಾ ಮುಗಿತಿ ಬೊಕ್ಕ ಗಲಿಲಾಯೊಡುಪ್ಪು ನಜರೇತ್ ಪನ್ಪಿ ತನ್ಕುಲೆ ಊರುಗು ಪಿರ ಪೋಯೆರ್. 40 ಆ ಬಾಲೆ ಬಲತ್‌ದ್ ಗೇನೊಡು ದಿಂಜಿದ್ ಆತ್ಮೊಡು ಬಲ ಹೊಂದಿಯೆ, ಬೊಕ್ಕ ದೇವೆರೆ ದಯ ಆಯನ ಮಿತ್ತ್ ಇತ್ತ್ಂಡ್. ಪಿರ ನಜರೇತ್‌ಗ್ ಪೋಪಿನವು 41 ಆಯನ ಅಪ್ಪೆಅಮ್ಮೆ ಪ್ರತಿ ವರ್ಸಲಾ ಪಸ್ಕ ಪರ್ಬದ ಜಾತ್ರೆಗ್ ಯೆರೂಸಲೇಮುಗು ಪೋವೊಂದಿತ್ತೆರ್. 42 ಯೇಸು ಪದ್ರಾಡ್ ವರ್ಸದಾಯೆ ಆದುಪ್ಪುನಗ ಅಕುಲು ಪರ್ಬದ ಕಟ್ಟ್‌ದ ಪ್ರಕಾರ ಅಡೆಗ್ ಪೋಯೆರ್. 43 ಪರ್ಬದ ದಿನೊಲೆನ್ ಮುಗಿತ್‌ದ್ ಪಿರ ಬನ್ನಗ ಬಾಲೆ ಯೇಸು ಯೆರೂಸಲೇಮುಡೇ ಉಂತಿಯೆ. ಆಯನ ಅಪ್ಪೆಅಮ್ಮೆ ತೆರಿಯಂದೆ ಪೋಯೆರ್. 44 ಆಯೆ ಜಾತ್ರೆದ ಗುಂಪುಡು ಸೇರೊಂದೆ ಅಂದ್‌ದ್ ಎನ್ನ್‌ದ್ ಒಂಜಿ ದಿನತ ಪ್ರಯಾಣ ಮಲ್ತ್‌ದ್ ಕುಟುಂಬದಾಕುಲೆಡ್ಲಾ ಗುರ್ತ ಇತ್ತಿನಕುಲೆಡ್ಲಾ ಆಯನ್ ನಾಡ್‌ಂಡಲಾ ತಿಕ್ಕಿಜೆ. 45 ಅಕುಲು ಪಿರ ಯೆರೂಸಲೇಮುಗು ನಾಡೊಂದು ಪೋಯೆರ್. 46 ಮೂಜಿ ದಿನೊಡ್ದು ಬೊಕ್ಕ ಆಯನ್ ದೇವಾಲಯೊಡು ತೂಯೆರ್. ಆಯೆ ಬೋಧಕೆರೆ ನಡುಟು ಕುಲ್ಲೊಂದು ಅಕ್ಲೆನ ಬೋಧನೆನ್ ಕೇನೊಂದು ಪ್ರಶ್ನೆ ಮಲ್ತೊಂದಿತ್ತೆ. 47 ಆಯೆ ಪನ್ಪಿ ಪಾತೆರೊಲೆನ್ ಕೇಂಡಿನ ಮಾತೆರ್ಲಾ ಆಯನ ಬುದ್ಧಿಗ್ಲಾ ಉತ್ತರೊಗ್ಲಾ ಅಚ್ಚಿರ ಆಯೆರ್. 48 ಅಪ್ಪೆಲಾ ಅಮ್ಮೆಲಾ ಆಯನ್ ತೂದು ಸೋದ್ಯ ಆಯೆರ್; ಬೊಕ್ಕ ಆಯನ ಅಪ್ಪೆ ಮಗಾ, “ಈ ಎಂಕ್ಲೆಗ್ ದಾಯೆಗ್ ಇಂಚ ಮಲ್ತ? ನಿನ ಅಮ್ಮೆಲಾ ಯಾನ್ಲಾ ನಿನನ್ ಏತ್ ಚಿಂತೆಡ್ ನಾಡೊಂದು ಬತ್ತ.” 49 ಪಂಡಿನಪಗ ಆಯೆ, “ನಿಕುಲು ಎನನ್ ದಾಯೆಗ್ ನಾಡುವರ್? ಯಾನ್ ಎನ ಅಮ್ಮೆರೆ ಇಲ್ಲಡ್ ಉಪ್ಪೊಡು ಪನ್ಪಿನವು ನಿಕ್ಲೆಗ್ ತೆರಿದಿಜಾ?” ಅಂದ್‌ದ್ ಉತ್ತರ ಕೊರಿಯೆ. 50 ಆಂಡ ಅಕುಲು ಆಯೆ ಪಂಡಿನ ಪಾತೆರದ ಅರ್ಥೊನು ತೆರಿಜೆರ್. 51 ಬೊಕ್ಕ ಆಯೆ ಅಕ್ಲೆಡೊಪ್ಪ ನಜರೇತ್ ಊರುಗು ಬತ್ತ್‌ದ್ ಅಕ್ಲೆಗ್ ಅಧೀನ ಆದಿತ್ತೆ. ಆಯನ ಅಪ್ಪೆ ಈ ಪಾತೆರೊಲೆನ್ ತನ ಉಡಲ್‌ಡ್ ದೀವೊಂಡಲ್. 52 ಯೇಸು ಬುದ್ಧಿಡ್ಲಾ ಶರೀರೊಡ್ಲಾ ಬಲತೊಂದು ಬತ್ತೆ; ಉಂದತ್ತಂದೆ ದೇವೆರೆನ ಬೊಕ್ಕ ನರಮಾನಿಲೆನ ದಯ ಆಯನ ಮಿತ್ತ್ ಹೆಚ್ಚಾವೊಂದು ಬತ್ತ್ಂಡ್. |
New Life Literature