ಲೂಕೆ 18 - ಪೊಸ ಒಡಂಬಡಿಕೆ

ವಿಧವೆ ಬೊಕ್ಕ ನ್ಯಾಯತೀರ್ಪು

¹ ಐಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆಗ್, ಬೇಜಾರ್ ಮಲ್ತೊನಂದೆ ಏಪಲಾ ಪ್ರಾರ್ಥನೆ ಮಲ್ತೊಂದುಪ್ಪುಲೆ ಅಂದ್‌ದ್ ಒಂಜಿ ಉಪಕತೆನ್ ಪಂಡೆ.

² “ಒಂಜಾನೊಂಜಿ ಊರುಡು ಒರಿ ನ್ಯಾಯಾಧಿಪತಿ ಇತ್ತೆ. ಆಯೆ ದೇವೆರೆಗ್ ಪೋಡಿಯಂದೆ ನರಮಾನಿಲೆನ್ಲಾ ಲಕ್ಷ್ಯ ಮಲ್ಪಂದೆ ಇತ್ತೆ.

³ ಅವ್ವೇ ಊರುಡು ಒರ್ತಿ ವಿಧವೆ ಇತ್ತಲ್. ಆಲ್ ಆಯನ ಕೈತಲ್‌ ಬತ್ತ್‌ದ್, ‘ಎನ ಪಗೆಮಾನಿಲೆಡ್ದ್ ಎನನ್ ನ್ಯಾಯ ತೀರ್ತ್‌ದ್ ಬುಡ್ಪಾಲ ಅಂದ್‌ದ್ ನಟ್ಟೊಂದಿತ್ತಲ್!’

⁴ ಆಯೆ ಕೆಲವು ದಿನ ಮನಸ್ ಕೊರ್ಜೆ. ‘ಯಾನ್ ದೇವೆರೆಗ್ ಪೋಡಿಯುನಾಯೆ ಅತ್ತ್; ನರಮಾನಿಲೆನ್ ಗಣ್ಯ ಮಲ್ಪುನಾಯೆಲಾ ಅತ್ತ್.

⁵ ಆಂಡಲಾ ಈ ವಿಧವೆ ಗಡಿಗಡಿ ಬತ್ತ್‌ದ್ ಕಾಟ ಕೊರ್ಪಿನೆಡ್ದ್ ಆಲೆನ್ ನ್ಯಾಯ ತೀರ್ತ್‌ದ್ ಬುಡ್ಪಾವೆ; ಇಜ್ಜಾಂಡ ಮೋಲು ಬತ್ತ್‌ದ್ ಕಡೆಕ್ಕ್ ಎನ ಜೀವೊನು ಅರ್ಧ ಮಲ್ಪಲ್,’” ಅಂದ್‌ದ್ ಎನ್ನೊಂಡೆ.

⁶ ಕರ್ತವೆ ಈ ಉಪಕತೆನ್ ಪಂಡಿ ಬೊಕ್ಕ, “ಇಂದಾ, ಅನ್ಯಾಯಗಾರೆ ಆಯಿ ಈ ನ್ಯಾಯಾಧಿಪತಿ ಎನ್ನೊಂಡಿನೆನ್ ಆಲೋಚನೆ ಮಲ್ಪುಲೆ.

⁷ ದೇವೆರೆನ್ ಅಜತೊಂಡಿನಾಕುಲು ರಾತ್ರೆ ಪಗೆಲ್ ಮುರೆಡ್ನಗ ಆಯೆ ಅಕ್ಲೆ ಸಂಗತಿಡ್ ತಡ ಮಲ್ತ್ಂಡಲಾ ಅಕ್ಲೆ ನ್ಯಾಯೊನು ತೀರ್ಪಂದೆ ಉಪ್ಪೆನಾ?

⁸ ಅಕ್ಲೆಗ್ ಬೇಗ ನ್ಯಾಯ ತೀರ್ಸಾವೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಇಂಚ ಇತ್ತ್ಂಡಲಾ ನರಮಾನಿ ಮಗೆ ಬನ್ನಗ ಭೂಮಿದ ಮಿತ್ತ್ ನಂಬಿಕೆನ್ ತೂವೆನಾ?” ಪಂಡೆ.

ಪರಿಸಾಯೆ ಬೊಕ್ಕ ಸುಂಕದಾಯನ ಉಪಕತೆ

⁹ ಉಂದತ್ತಂದೆ ತನ್ಕುಲೇ ನೀತಿವಂತೆರ್ ಅಂದ್‌ದ್ ನಂಬೊಂದು ಬಾಕಿದಾಕುಲೆನ್ ಉದಾಸೀನದಾಕುಲು ಎನ್ನುನಾಕುಲೆಗ್ ಯೇಸು ಒಂಜಿ ಉಪಕತೆನ್ ಪಂಡೆ.

¹⁰ ಅವು ದಾದ ಪಂಡ, “ಪ್ರಾರ್ಥನೆ ಮಲ್ಪೆರೆಗಾದ್ ರಡ್ಡ್ ಜನೊಕುಲು ದೇವಾಲಯೊಗು ಪೋಯೆರ್. ಒರಿ ಪರಿಸಾಯೆ, ಒರಿ ಸುಂಕದಾಯೆ.

¹¹ ಪರಿಸಾಯೆ ಉಂತೊಂದು ಪ್ರಾರ್ಥನೆ ಮಲ್ಪುನಗ ದೇವೆರೇ, ‘ಯಾನ್ ಲೂಟಿ ಮಲ್ಪುನಾಯೆ ಅತ್ತ್, ಅನ್ಯಾಯಗಾರೆ ಅತ್ತ್, ವ್ಯಭಿಚಾರ ಮಲ್ಪುನಾಯೆ ಅತ್ತ್, ಬಾಕಿದ ಜನೊಕುಲೆ ಲೆಕ್ಕ ಯಾನತ್ತ್, ಈ ಸುಂಕದಾಯನ ಲೆಕ್ಕಲಾ ಅತ್ತ್. ಅಂಚಾಯಿನೆಡ್ದ್ ನಿಕ್ಕ್ ಉಪಕಾರ ಸಂದಾವೆ.

¹² ವಾರೊಗು ರಡ್ಡ್ ಸರ್ತಿ ಉಪವಾಸ ಮಲ್ಪುವೆ, ಯಾನ್ ಸಂಪಾದನೆ ಮಲ್ತಿನೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಕೊರ್ಪೆ,’ ಅಂದ್‌ದ್ ಪಂಡೊಂಡೆ.

¹³ ಆಂಡ ಆ ಸುಂಕದಾಯೆ ದೂರೊಡು ಉಂತುದು ಬಾನದ ಕಡೆಕ್ಕ್ ಕಣ್ಣ್ ಜತ್ತ್‌ದ್ ತೂವೆರೆಲಾ ಮನಸಿಜ್ಜಂದೆ ತಿಗಲೆಗ್ ಹಾಕೊಂದು, ‘ದೇವೆರೇ ಪಾಪಿ ಆಯಿ ಎಂಕ್ ಕನಿಕರ ತೋಜಾಲ!’ ಅಂದ್‌ದ್ ನಟ್ಟಿಯೆ.

¹⁴ ಉಂಬೆ ನೀತಿವಂತೆ ಆದ್ ತನ ಇಲ್ಲಗ್ ಪೋಯೆ. ಆ ಪರಿಸಾಯೆ ಸುಂಕದಾಯ ಲೆಕ್ಕ ನೀತಿವಂತೆ ಆದ್ ಪೋಯಿಜೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.”

ಎಲ್ಯ ಜೋಕುಲೆನ್ ಆಶೀರ್ವಾದ ಮಲ್ತಿನವು

¹⁵ ಕೆಲೆವೆರ್ ಜೋಕುಲೆನ್ ಯೇಸು ಮುಟ್ಟೊಡು ಅಂದ್‌ದ್ ಆಯನ ಕೈತಲ್‌ ಕನತಿನಪಗ ಶಿಷ್ಯೆರ್ ತೂದು ಅಕ್ಲೆನ್ ದಟ್ಟಿಯೆರ್.

¹⁶ ಆಂಡ ಯೇಸು ಆ ಜೋಕುಲೆನ್ ತನ ಕೈತಲ್‌ ಲೆಪುಡಾದ್, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ; ಅಕ್ಲೆಗ್ ಅಡ್ಡಿ ಮಲ್ಪಡೆ; ದೇವೆರೆ ರಾಜ್ಯ ಇಂಚಿತ್ತಿನಾಕುಲೆನವೇ.

¹⁷ ನಿಕ್ಲೆಗ್ ನಿಜಾದ್ ಪನ್ಪೆ, ಬಾಲೆದಲೆಕ್ಕ ಒರಿ ದೇವೆರೆ ರಾಜ್ಯೊನು ದೆತ್ತೊನುಜೆಡ, ಆಯೆ ಐತ ಉಲಯಿ ಪೋವಯೆ,” ಅಂದ್‌ದ್ ಪಂಡೆ.

ಐಶ್ವರ್ಯವಂತೆ ನರಮಾನಿ

¹⁸ ಒರಿ ಅಧಿಕಾರಿ ಬತ್ತ್‌ದ್ ಯೇಸುಡ, “ಎಡ್ಡೆ ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೆರೆ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ.

¹⁹ ಯೇಸು ಆಯಡ, “ಎನನ್ ಎಡ್ಡೆಂತಿನಾಯೆ ಅಂದ್‌ದ್ ದಾಯೆಗ್ ಪನ್ಪ? ದೇವೆರ್ ಒರಿಯೇ ಅತ್ತಂದೆ ಬೇತೆ ಏರ್ಲಾ ಎಡ್ಡೆಂತಿನಾಯೆ ಇಜ್ಜೆ.

²⁰ ‘ವ್ಯಭಿಚಾರ ಮಲ್ಪೆರೆ ಬಲ್ಲಿ, ಮಾನ್ಯ ಕೆರಿಯೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ನಿನ ಅಪ್ಪೆಅಮ್ಮನ್ ಸನ್ಮಾನ ಮಲ್ಪೊಡು ಪನ್ಪಿ ದೇವೆರೆ ಅಪ್ಪಣೆಲು ನಿಕ್ಕ್ ಗೊತ್ತುಂಡತ್ತಾ?’” ಅಂದ್‌ದ್ ಪಂಡೆ.

²¹ ಐಕ್ ಆಯೆ, “ಯಾನ್ ಎಲ್ಲಿಡ್ದಿಂಚಿಲಾ ಉಂದೆಕ್ಕ್ ಮಾತೆಕ್ಲಾ ಸರಿಯಾದ್ ನಡತೊಂದು ಬೈದೆ.” ಪಂಡ್ದ್ ಪನ್ನಗ,

²² ಯೇಸು ಅವೆನ್ ಕೇಂಡ್ದ್ ಆಯಡ, “ನಿನಡ ಒಂಜಿ ಕಮ್ಮಿ ಉಂಡು. ಪೋದು ನಿನ ಆಸ್ತಿನ್ ಮಾತೆನ್ ಮಾರ್ದ್ ಬಡವೆರೆಗ್ ಕೊರ್ಲ. ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ.

²³ ಆಯೆ ಮಸ್ತ್ ಐಶ್ವರ್ಯವಂತೆ ಆದಿತ್ತಿನೆಡ್ದ್ ಉಂದೆನ್ ಕೇಂಡ್ದ್ ಮಸ್ತ್ ದುಃಖ ಮಲ್ತೆ.

²⁴ ಅಪಗ ಯೇಸು ಆಯನ್ ತೂದು, “ಐಶ್ವರ್ಯ ಇತ್ತಿನಾಕುಲು ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ.

²⁵ ಅಂದ್, ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ,” ಪಂಡೆ.

²⁶ ಈ ಪಾತೆರೊನು ಕೇಂಡಿನಾಕುಲು, “ಏರೆಗ್ ರಕ್ಷಣೆ ಆವು?” ಅಂದ್‌ದ್ ಕೇನ್ನಗ

²⁷ ಯೇಸು, “ನರಮಾನಿಲೆಗ್ ಅಸಾಧ್ಯದ ಕಾರ್ಯೊಲು ದೇವೆರೆಗ್ ಸಾದ್ಯ,” ಪಂಡೆ.

²⁸ ಅಪಗ ಪೇತ್ರೆ, “ಇಂದಾ, ಎಂಕುಲು ಎಂಕ್ಲೆ ಇಲ್ಲ್ ಬದ್‌ಕ್‌ನ್ ಬುಡ್ದು ನಿನ ಬೆರಿಯೆ ಬೈದ,” ಅಂದ್‌ದ್ ಪಂಡೆ.

²⁹ ಐಕ್ ಆಯೆ, “ನಿಕ್ಲೆಗ್ ನಿಜಾದ್ ಪನ್ಪೆ ಏರ್ ದೇವೆರೆ ರಾಜ್ಯೊಗಾದ್ ಇಲ್ಲ್‌ನಾವಡ್ ಬೊಡೆದಿನಾವಡ್ ಮೆಗ್ಯೆಪಲಯಾಡ್ಲೆನಾವಡ್ ಅಪ್ಪೆಅಮ್ಮನಾವಡ್ ಬಾಲೆಲೆನಾವಡ್ ಬುಡ್ತಿನಾಕುಲೆಗ್‌

³⁰ ಇತ್ತೆದ ಲೋಕೊಡೇ ಮಸ್ತ್ ಪಾಲ್ ತಿಕ್ಕ್‌ದೇ ತಿಕ್ಕುಂಡು, ಬೊಕ್ಕ ಬರ್ಪಿ ಲೋಕೊಡು ನಿತ್ಯಜೀವಲಾ ತಿಕ್ಕುಂಡು,” ಅಂದ್‌ದ್ ಪಂಡೆ.

ಯೇಸುನ ಮರಣೊನು ಮೂಜನೆ ಸರ್ತಿ ತೆರಿಪಾವುನವು

³¹ ಆಯೆ ತನ ಪದ್ರಾಡ್ ಶಿಷ್ಯೆರೆನ್ ಬರಿಕ್ಕ್ ಲೆತ್ತೊಂದು ಪೋದು ಅಕ್ಲೆಗ್, “ತೂಲೆ, ಎಂಕುಲು ಯೆರೂಸಲೇಮುಗು ಪೋವೊಂದುಲ್ಲ; ಬೊಕ್ಕ ನರಮಾನಿ ಮಗನ ಬಗೆಟ್ ಪ್ರವಾದಿಲು ಬರೆತಿನವು ಮಾತಲಾ ಪೂರ್ತಿ ಆವು; ಎಂಚ ಪಂಡ,

³² ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್. ಮೊಕುಲು ಆಯಗ್ ಗೇಲಿ ಮಲ್ತ್‌ದ್, ನೆರ್ಪೆರ್, ಆಯನ ಮಿತ್ತ್ ಉಬ್ಬಿದ್, ಆಯಗ್ ಚಾಟಿಡ್ ಹಾಕ್‌ದ್, ಕೆರ್ದ್ ಪಾಡ್ವೆರ್,

³³ ಬೊಕ್ಕ ಆಯೆ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ.”

³⁴ ಅಕುಲು ಈ ಸಂಗತಿನ್ ಒಂಜೆನ್ಲಾ ಅರ್ಥ ಮಲ್ತೊನ್ಜೆರ್, ಈ ಪಾತೆರೊಲು ಅಕ್ಲೆಗ್ ಮದೆಯಾಯಿನೆಡ್ದ್ ಐತ ಅರ್ಥೊನು ಅಕುಲು ತೆರಿಯಂದೆ ಪೋಯೆರ್.

ಯೇಸು ಕುರುಡನ್ ಗುಣ ಮಲ್ತಿನವು

³⁵ ಯೇಸು ಯೆರಿಕೋವುಗು ಕೈತಲ್‌ ಬನ್ನಗ ಸಾದಿದ ಬರಿಟ್ಟ್ ಒರಿ ಕುರುಡೆ ಕುಲ್ಲೊಂದು ನಟ್ಟೊಂದಿತ್ತೆ.

³⁶ ಆಯೆ ಜನೊಕುಲೆನ ಶಬ್ಧೊನು ಕೇಂಡ್ದ್, “ಉಂದು ದಾದ?” ಅಂದ್‌ದ್ ಕೇನ್ನಗ

³⁷ ಅಕುಲು ಆಯಡ, “ನಜರೇತ್‌ದ ಯೇಸು ಆ ಸಾದಿಡ್ ಪೋವೊಂದುಲ್ಲೆ,” ಅಂದ್‌ದ್ ತೆರಿಪಾನಗ

³⁸ ಆಯೆ ಯೇಸೋ, “ದಾವೀದ್ ಮಗಾ, ಎನನ್ ಕರುಣೆ ಮಲ್ಪುಲ,” ಅಂದ್‌ದ್ ಬುಲ್ತೆ.

³⁹ ದುಂಬುಡು ಪೋವೊಂದಿತ್ತಿನಾಕುಲು ಆಯನ್ ಮನಿಪಂದೆ ಉಪ್ಪೊಡಂದ್‌ದ್ ದಟ್ಟಿನಗ ಆಯೆ, “ದಾವೀದ ಮಗಾ, ಎಂಕ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆ.

⁴⁰ ಅಪಗ ಯೇಸು ಉಂತುದು ಆಯನ್ ಲೆತ್ತೊಂದು ಬರಿಯೆರೆ ಅಪ್ಪಣೆ ಕೊರಿಯೆ. ಅಕುಲು ಆಯನ್ ಲೆತ್ತೊಂದು ಬತ್ತೆರ್.

⁴¹ ಯೇಸು ಆಯಡ, “ಯಾನ್ ನಿಕ್ಕ್ ದಾದ ಮಲ್ಪೊಡು?” ಅಂದ್‌ದ್ ಕೇನ್ನಗ ಆಯೆ, “ಕರ್ತವಾ, ಎಂಕ್ ಕಣ್ಣ್ ತೋಜುಲೆಕ್ಕ ಮಲ್ಪೊಡು,” ಅಂದ್‌ದ್ ಪಂಡೆ.

⁴² ಯೇಸು ಆಯಡ, “ನಿಕ್ಕ್ ಕಣ್ಣ್‌ಗ್ ದೃಷ್ಟಿ ಬರಡ್, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಪಂಡ್ದ್ ಪಂಡೆ

⁴³ ಅಪಗನೆ ಆಯಗ್ ಕಣ್ಣ್ ತೋಜ್ಂಡ್. ಆಯೆ ದೇವೆರೆನ್ ಪುಗರೊಂದು ಆಯನ ಬೆರಿಯೆ ಪೋಯೆ. ಜನೊಕುಲು ಮಾತೆರ್ಲಾ ನಡತಿ ಸಂಗತಿನ್ ತೂದು ದೇವೆರೆನ್ ಸುಗಿತೆರ್.