ಲೂಕೆ 14 - ಪೊಸ ಒಡಂಬಡಿಕೆ

ಸಬ್ಬತ್‌ದಿನೊಟು ಸೀಕ್‌ದಾಯನ್ ಗುಣ ಮಲ್ಪುನವು

¹ ಯೇಸು ಒಂಜಿ ಸಬ್ಬತ್‌ದಿನೊಟು ಒರಿ ಪರಿಸಾಯೆರೆ ಮುಖ್ಯಸ್ಥೆರೆನ ಇಲ್ಲಡೆಗ್ ವಣಸ್‌ಗ್ ಪೋದುಪ್ಪುನಗ, ಅಕುಲು ಆಯನ್ ನೋಟ ದೀದ್ ತೂವೊಂದಿತ್ತೆರ್.

² ಅಪಗ ಯೇಸುನ ಎದುರು ಒರಿ ಮೆಯಿಟ್ ನೀರ್ ದಿಂಜಿದ್‌ ಬಾತ್ ಪೋತಿನಾಯನ್ ತೂದು,

³ “ಸಬ್ಬತ್‌ದಿನೊಟು ಗುಣ ಮಲ್ಪುನವು ಸರಿಯಾ?” ಅಂದ್‌ದ್ ಯೇಸು ನ್ಯಾಯಶಾಸ್ತ್ರಿಲೆಡಲಾ ಪರಿಸಾಯೆರೆಡಲಾ ಕೇಂಡೆ.

⁴ ಅಕುಲು ಪಾತೆರಂದೆ ಉಪ್ಪುನಗ ಸೀಕ್‌ದಾಯನ ಕೈ ಪತ್ತ್‌ದ್ ಗುಣ ಮಲ್ತ್‌ದ್ ಕಡಪುಡಿಯೆ.

⁵ ಬೊಕ್ಕ ಅಕ್ಲೆಡ, “ನಿಕ್ಲೆನ ಮಗೆ ಆವಡ್ ಬೋರಿ ಆವಡ್ ಸಬ್ಬತ್‌ದಿನೊಟು ಗುವೆಲ್‌ಗ್ ಬೂರುಂಡ, ಆಯೆ ಅವೆನ್ ಅಪಗನೆ ಮಿತ್ತ್ ದೆಪ್ಪಂದೆ ಅವುಲೇ ಬುಡ್ಪೆನಾ,” ಅಂದ್‌ದ್ ಕೇಂಡೆ.

⁶ ಐಕ್ ಅಕ್ಲೆಗ್ ಉತ್ತರ ಕೊರಿಯೆರೆ ತೀರಂದೆ ಮನಿಪಂದೆ ಇತ್ತೆರ್.

ಮದ್ಮೆದ ಲೇಸ್‌ಗ್ ಲೆಪ್ಪುದ ಉಪಕತೆ

⁷ ವಣಸ್‌ಗ್ ಬತ್ತಿನಾಕುಲು ಪಂತೆದ ಸುರುತ್ತ ಸಾಲ್‌ನ್ ಅಜತ್‌ದ್ ದೆತ್ತೊನೊನೆನ್ ಯೇಸು ತೂದು ಒಂಜಿ ಉಪಕತೆನ್ ಮಾತೆರೆಗ್ಲಾ ಪಂಡೆ:

⁸ “ಏರಾಂಡಲಾ ನಿನನ್ ಮದ್ಮೆದ ವಣಸ್‌ಗ್ ಲೆತ್ತ್‌ಂಡ ಪಂತೆಡ್ ಸುರುತ್ತ ಸಾಲ್‌ಡ್ ಕುಲ್ಲೊಡ್ಚಿ. ಒಂಜಿ ವೇಳೆ ನಿನಡ್ದ್ ಹೆಚ್ಚ್ ಮಾನ ಇತ್ತಿನಾಯನ್ ಆಯೆ ಲೆತ್ತ್‌ದುಪ್ಪೆರೆ ಯಾವು.

⁹ ಬೊಕ್ಕ ನಿನನ್ಲಾ ಆಯನ್ಲಾ ಲೆತ್ತಿನಾಯೆ ಬತ್ತ್‌ದ್, ‘ಉಂಬ್ಯಗ್ ಜಾಗ್ ಬುಡು,’ ಅಂದ್‌ದ್ ನಿಕ್ಕ್ ಪನ್ನಗ ಈ ನಾಚಿಗೆಡ್ ಕಡೆತ ಸಾಲ್‌ಡ್ ಕುಲ್ಲರೆ ಪೋಪ.

¹⁰ ಆಂಡ ಏರಾಂಡಲಾ ನಿಕ್ಕ್ ಲೆಪ್ಪು ಕೊರ್ನಗ ಈ ಪೋದು ಕಡೆತ ಸಾಲ್‌ಡ್ ಕುಲ್ಲುಲ; ಅಪಗ ಲೆತ್ತಿನಾಯೆ ನಿನನ್ ತೂದು, ‘ಸ್ನೇಹಿತಾ, ಎದುರು ಬತ್ತ್‌ದ್ ಕುಲ್ಲ ಪನ್ಪೆ,’ ಅಪಗ ನಿನ ಜತೆಟ್ ಕುಲ್ಲುದಿತ್ತಿನಾಕುಲೆನ ಎದುರುಡು ನಿಕ್ಕ್ ಮಾನ ತಿಕ್ಕುಂಡು.

¹¹ ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.”

¹² ಆಯೆ ತಾನ್ ವಣಸ್‌ಗ್ ಲೆತ್ತಿನಾಯಗ್ಲಾ ಒಂಜಿ ಪಾತೆರ ಪಂಡೆ, “ಒಂಜಿ ವೇಳೆ ಈ ಮಧ್ಯಾಹ್ನದ ವಣಸ್‌ಗ್ ಅತ್ತ್‌ಡ ಬೈಯದ ವಣಸ್‌ಗ್ ನಿನ ಸ್ನೇಹಿತನಾವಡ್ ನಿನ ಪಲಯೆ ಮೆಗ್ಯಾಡ್ಲೆನಾವಡ್ ನಿನ ಕುಟುಂಬದಾಕುಲೆನಾವಡ್ ಸಂಪೊತ್ತು ಇತ್ತಿ ನಿರೆಕರೆತಾಕುಲೆನಾವಡ್ ಲೆಪ್ಪಡ. ಅಕುಲುಲಾ ಪಿರ ನಿನನ್ ಲೆಪ್ಪೆರ್.

¹³ ಆಂಡ ಈ ವಣಸ್‌ಗ್ ಲೆಪ್ಪುನಗ ಬಡವೆರ್, ಕೈಕಾರ್ ದಾಂತಿನಾಕುಲು, ಕುಂಟೆರ್, ಕುರುಡೆರ್, ಇಂಚಿತ್ತಿನಾಕುಲೆನ್ ಲೆಪ್ಪು.

¹⁴ ಅಕುಲು ನಿಕ್ಕ್ ಸಂದಾಯೊಗು ಸಂದಾಯ ಮಲ್ಪೆರೆ ದಾಲಾದಾಂತಿನಾಕುಲು ಆದಿತ್ತ್‌ಂಡಲಾ ನೀತಿವಂತೆರ್ ಜೀವ ಆದ್ ಲಕ್ಕ್‌ದ್ ಬನ್ನಗ ನಿಕ್ಕ್ ಸಂದಾಯೊಗು ಸಂದಾಯ ತಿಕ್ಕಂದಿನೆಡ್ದ್ ಈ ಭಾಗ್ಯವಂತೆ ಆಪ.” ಪಂಡೆ.

ಲೇಸ್‌ಗ್ ಪೋಯೆರೆ ಅಡ್ಡಿ ಅಬ್ಯಂತರೊಲು

¹⁵ ವಣಸ್‌ಗ್ ಕುಲ್ಲುದಿತ್ತಿನಾಕುಲೆಡ್ ಒರಿ ಈ ಪಾತೆರೊನು ಕೇಂಡ್ದ್ ಯೇಸುಡ, “ದೇವೆರೆ ರಾಜ್ಯೊಡು ವಣಸ್ ಮಲ್ಪುನಾಕುಲು ಭಾಗ್ಯವಂತೆರ್,” ಅಂದ್‌ದ್ ಪನ್ನಗ

¹⁶ ಯೇಸು ಆಯಗ್ ಪಂಡಿನಿ, “ಒರಿ ನರಮಾನಿ ಮಲ್ಲ ಲೇಸ್ ಮಲ್ತ್‌ದ್ ಮಸ್ತ್ ಜನೊಕುಲೆನ್ ವಣಸ್‌ಗ್ ಲೆಪ್ಪುವೆ.

¹⁷ ಲೇಸ್‌ದ ವಣಸ್‌ದ ಪೊರ್ತುಗು ಆಯೆ ವಣಸ್‌ಗ್ ಲೆತ್ತಿನಾಕುಲೆನ್, ‘ಬಲ್ಲೆ, ವಣಸ್ ತಯಾರಾತ್ತ್‌ಂಡ್,’ ಅಂದ್‌ದ್ ಲೆಪ್ಪೆರೆ ತನ ಬೇಲೆದಾಯನ್ ಕಡಪುಡಿಯೆ.

¹⁸ ಆಂಡ ಅಕುಲು ಒರಿಯಡ್ದ್ ಒರಿ ಬರಿಯೆರೆ ಆಪುಜಿ ಅಂದ್‌ದ್ ಅಡ್ಡಿ ಪನಿಯೆರೆ ಸುರು ಮಲ್ತೆರ್. ಸುರುತ್ತಾಯೆ ಆ ಬೇಲೆದಾಯಡ, ‘ಯಾನ್ ಪೊಸ ಕಂಡೊನು ಕ್ರಯೊಕು ದೆತ್ತೊಂದೆ; ಎಂಕ್ ಅವೆನ್ ತೂದು ಬರೊಡು; ಎಂಕ್ ಮಾಪು ಮಲ್ಪೊಡು, ಯಾನ್ ಬರ್ಪುಜಿ, ಅಂದ್‌ದ್ ನಿನಡ ನಟ್ಟೊನ್ವೆ,’ ಪಂಡೆ.

¹⁹ ಬೊಕ್ಕೊರಿ, ‘ಯಾನ್ ಐನ್ ಜೋಡಿ ಬೋರಿಲೆನ್ ಕ್ರಯೊಕು ದೆತ್ತೊಂದೆ, ಅವೆನ್ ಪರೀಕ್ಷೆ ಮಲ್ಪೆರೆ ಪೋಪೆ, ಎಂಕ್ ಬರಿಯೆರೆ ಆಪುಜಿ, ಎನನ್ ಮಾಪು ಮಲ್ಪೊಡು ಅಂದ್‌ದ್ ನಿನಡ ನಟ್ಟೊನ್ವೆ,’ ಪಂಡೆ.

²⁰ ನನೊರಿ, ‘ಎಂಕ್ ಮದ್ಮೆ ಆತ್ಂಡ್, ಐಡ್ದಾವರ ಎಂಕ್ ಬರಿಯೆರೆ ಆಪುಜಿ.’ ಅಂದ್‌ದ್ ಪನ್ಲ ಪಂಡೆ.

²¹ ಆ ಬೇಲೆದಾಯೆ ಬತ್ತ್‌ದ್ ತನ ಯಜಮಾನಗ್ ಈ ಸಂಗತಿಲೆನ್ ತೆರಿಪಾನಗ ಇಲ್ಲದ ಯಜಮಾನೆ ಕೋಪೊಡು ಬೇಲೆದಾಯಗ್, ‘ಈ ಇತ್ತೆನೇ ಊರುದ ಸಾದಿಲೆಗ್ ಓಣಿ ಒರ್ಕುಗು ಪೋದು ಬಡವೆರ್, ಕುರುಡೆರ್, ಕಣ್ಣ್ ಕೈಕಾರ್ ದಾಂತಿನಾಕುಲೆನ್ ಇಡೆಗ್ ಲೆತ್ತೊಂದು ಬಲ.’ ಅಂದ್‌ದ್ ಪಂಡೆ.

²² ಬೊಕ್ಕ ಆ ಬೇಲೆದಾಯೆ ಯಜಮಾನಗ್, ‘ಈರ್ ಅಪ್ಪಣೆ ಕೊರಿ ಲೆಕ್ಕ ಮಲ್ತೆ ಆಂಡ ನನಲಾ ಜಾಗ್ ಉಂಡು,’ ಪಂಡೆ.

²³ ಅಪಗ ಆ ಯಜಮಾನೆ ತನ ಬೇಲೆದಾಯಗ್, ‘ಈ ಸಾದಿಲೆಗ್ಲಾ ಬೇಲಿಲೆಗ್ಲಾ ಪೋದು ಅಲ್ಪ ತಿಕ್ಕಿನಾಕುಲೆನ್ ಒತ್ತಾಯೊಡು ಲೆತ್ತೊಂದು ಬಲ. ಎನ ಇಲ್ಲ್ ದಿಂಜಡ್.

²⁴ ಆಂಡ ವಣಸ್‌ಗ್ ಲೆಪ್ಪುನಗ ಬರಂದೆ ಅಡ್ಡಿ ಪಂಡಿನಾಕುಲು ಒರಿಲಾ ಯಾನ್ ಮಲ್ಪಾದಿನ ಅಟಿಲ್‌ದ ರುಚಿ ತೂವರೆ ಬಲ್ಲಿ ಅಂದ್‌ದ್ ನಿಕ್ಲೆಗ್ ತೆರಿದುಪ್ಪಡ್.’” ಪಂಡೆ.

ಶಿಷ್ಯೆರೆಗ್ ಆಪಿನ ಕಷ್ಟೊಲು

²⁵ ಮಸ್ತ್ ಜನೊಕುಲು ಗುಂಪುಗುಂಪಾದ್ ಯೇಸುನ ಒಟ್ಟುಗು ಪೋವೊಂದುಪ್ಪುನಗ ಆಯೆ ತಿರ್ಗ್‌ದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ

²⁶ “ಎನ ಕೈತಲ್‌ ಬತ್ತ್‌ದ್ ತನ ಅಪ್ಪೆ, ಅಮ್ಮನ್ ಬೊಡೆದಿ ಜೋಕುಲು ಪಲಯೆ ಮೆಗ್ಯಾಡ್ಲು ಪಲ್ದಿ ಮೆಗ್ದಿಯಾಡ್ಲೆನ್ ಮೊಕ್ಲೆನ್ಲಾ ತನ ಜೀವೊನ್ಲಾ ಪಗೆ ಮಲ್ಪುಜೆಡ ಆಯೆ ಎನ ಶಿಷ್ಯೆ ಆವೆರೆ ಸಾದ್ಯ ಇಜ್ಜಿ.

²⁷ ಏರಾಂಡಲಾ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರ್ಪುಜೆನಾ, ಆಯೆ ಎನ ಶಿಷ್ಯೆ ಆವಯೆ.

²⁸ ನಿಕ್ಲೆಡ್ ಏರಾಂಡಲಾ ಒಂಜಿ ಗೋಪುರೊನು ಕಟ್ಟಾವೊಡು ಅಂದ್‌ದ್ ಎನ್ನ್ಂಡ ಆಯೆ ಸುರುಟ್ಟು ಕುಲ್ಲೊಂದು ಐಕ್ ಏತ್ ಕರ್ಚಿ ತಾಗು, ಅವೆನ್ ಮಲ್ತ್‌ದ್ ಮುಗಿಪಾವುನಾತ್ ಕಾಸ್ ಎನಡ ಉಂಡಾ ಅಂದ್‌ದ್ ಲೆಖ್ಖ ಪಾಡುಜೆನಾ?

²⁹ ಇಂಚ ಲೆಖ್ಖ ಪಾಡಂದೆ ಐಕ್ ಅಡಿಪಾಯ ಪಾಡಿ ಬೊಕ್ಕ ಆ ಬೇಲೆನ್ ಮಲ್ಪೆರೆ ತೀರಂದೆ ಪೋಂಡ ತೂಪಿನಾಕುಲು ಇಂಬೆ ಮಲ್ಲ ಜನತ್ತಲೆಕ್ಕ

³⁰ ‘ಗೋಪುರ ಕಟ್ಟಾವೆರೆ ಪಿದಾಡ್ದ್ ಕೊಡಿ ಎತ್ತಾವೆರೆ ತೀರಂದೆ ಪೋಯೆ,’ ಅಂದ್‌ದ್ ತಮಾಷೆ ಮಲ್ಪೆರ್.

³¹ ಇಂಚಾಂಡ ವಾ ಅರಸು ಆಂಡಲಾ ಬೊಕ್ಕೊರಿ ಅರಸು ಮಿತ್ತ್ ಲಡಯಿ ಮಲ್ಪೆರೆ ಪೋನಗ ತನಡೊಪ್ಪ ಪತ್ತ್ ಸಾರ ಮಂದಿಲೆ ದಂಡ್‌ಲೆನ್ ದೆತ್ತೊಂದು ಬೊಕ್ಕೊರಿಯನ ಇರ್ವ ಸಾರ ಮಂದಿಲೆ ದಂಡ್ ಬರ್ಪಿನೆನ್ ತೂನಗ ಆಯಡೊಪ್ಪ ಲಡಯಿ ಮಲ್ಪೆರೆ ಎಂಕ್ ಸಾದ್ಯನಾ ಅಂದ್‌ದ್ ಕುಲ್ಲೊಂದು ಆಲೋಚನೆ ಮಲ್ಪುಜೆನಾ?

³² ತನ್ಕ್ ಲಡಯಿ ಮಲ್ಪೆರೆ ಶಕ್ತಿದಾಂತೆ ಪೋನಗ, ಲಡಯಿಗ್ ಬರ್ಪಿ ರಾಜೆ ನನಲಾತ್ ದೂರೊಡು ಉಪ್ಪುನಗನೇ ದೂತೆರೆನ್ ಕಡಪುಡ್ದು ಸಮಾಧಾನೊಡು ಒಪ್ಪಂದ ಮಲ್ತೊನ್ವೆ.”

³³ “ಅಂಚೆನೇ ನಿಕ್ಲೆಡ್ ಏರೇ ಆವಡ್ ತನಡ ಇತ್ತಿನೆನ್ ಮಾತೆನ್ ಬುಡ್ದು ಬುಡಂದೆ ಪೋಂಡ ಆಯೆ ಎನ ಶಿಷ್ಯೆ ಆವಯೆ,” ಪಂಡ್ದ್ ಮುಗಿತೆ.

ರುಚಿದಾಂತಿ ಉಪ್ಪು

³⁴ “ಉಪ್ಪು ಎಡ್ಡೆಂತಿನವು, ಆಂಡ ಉಪ್ಪು ಚಪ್ಪೆ ಆದ್ ಪೋಂಡ ಐಕ್ ಒಯಿಡ್ದ್ ರುಚಿ ಮಲ್ಪೆರೆ ಸಾದ್ಯ?

³⁵ ಅವು ಭೂಮಿಗಾವಡ್ ಗೊಬ್ಬರೊಗಾವಡ್ ಬಳಕೆ ಆಯಿಜಿಡ ಅವೆನ್ ಪಿದಯಿ ದಕ್ಕುವೆರ್. ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಅಂದ್‌ದ್ ಪಂಡೆ.