ಲೂಕೆ 10 - ಪೊಸ ಒಡಂಬಡಿಕೆ

ಯೇಸು ಎಲ್ಪತ್ತರಡ್ಡ್ ಶಿಷ್ಯೆರೆನ್ ಕಡಪುಡಿನವು

¹ ಉಂದು ಆಯಿ ಬೊಕ್ಕ ಕರ್ತವೆ ನನಲಾ ಎಲ್ಪತ್ತರಡ್ಡ್ ಜನೊಕುಲೆನ್ ನೇಮಕ ಮಲ್ತ್‌ದ್ ಅಕ್ಲೆನ್ ಇರ್ವೆರ್ ಇರ್ವೆರಾದ್ ತಾನ್ ಪೋವೊಡಿತ್ತಿ ಪ್ರತಿಯೊಂಜಿ ಊರುದ ಜಾಗ್‌ಗ್ ದುಂಬತ್ತ ಕಡಪುಡಿಯೆ.

² ಕಡಪುಡ್ನಗ ಅಕ್ಲೆಗ್ ಪಂಡಿನಿ ದಾನೆ ಪಂಡ, “ಬುಲೆ ಮಸ್ತ್ ಉಂಡು, ಆಂಡ ಬೇಲೆದಾಕುಲು ಕಮ್ಮಿ. ಅವೆಡ್ದಾವರ ಬುಲೆತ ಯಜಮಾನಡ, ಆಯೆ ತನ ಬುಲೆಕ್ ಬೇಲೆದಾಕುಲೆನ್ ಕಡಪುಡೊಡು ಅಂದ್‌ದ್ ನಟ್ಟೊನ್ಲೆ.”

³ ಪೋಲೆ, ಚೆನ್ನನಾಯಿಲೆ ನಡುಟು ಕುರಿತ ಕಿನ್ನಿಲೆನ್ ಪೊಗ್ಗಾಯಿಲೆಕ್ಕ ಯಾನ್ ನಿಕ್ಲೆನ್ ಕಡಪುಡ್ದು ಕೊರ್ಪೆ.

⁴ ಕಾಸ್ ಆವಡ್, ಜೋಳಿಗೆ ಆವಡ್, ಕಾರ್‌ಗ್ ಜೋಡು ಆವಡ್ ದೆತ್ತೊಂದು ಪೋವಡೆ. ಸಾದಿಡ್ ಏರೆಗ್ಲಾ ವಂದನೆ ಸಂದಾವಡೆ.

⁵ ಉಂದತ್ತಂದೆ ನಿಕುಲು ವಾ ಇಲ್ಲದುಲಯಿ ಪೋಂಡಲಾ ಆ ಇಲ್ಲಗ್, “ಸಮಾಧಾನ ಆವಡ್,” ಪಂಡ್ದ್ ದುಂಬತ್ತ ಪನ್ಲೆ.

⁶ ಸಮಾಧಾನದ ಮಗೆ ಅವುಲು ಇತ್ತ್ಂಡ ನಿಕ್ಲೆನ ಸಮಾಧಾನ ಆಯನ ಮಿತ್ತ್ ಉಪ್ಪುಂಡು. ಇಜ್ಜಾಂಡ ಅವು ನಿಕ್ಲೆಗೇ ಪಿರ ಬರ್ಪುಂಡು.

⁷ ಆ ಇಲ್ಲಡೇ ಇತ್ತೊಂದು ಅಕುಲು ಕೊರ್ಪಿನೆನ್ ಉನ್ಲೆ, ಪರ್ಲೆ. ಬೇಲೆದಾಯೆ ತನ ಸಂಬಳೊಗು ತಕ್ಕದಾಯೆ ಅತ್ತಾ? ಒಂಜಿ ಇಲ್ಲನ್ ಬುಡ್ದು ಬೊಕ್ಕೊಂಜಿ ಇಲ್ಲಗ್ ಪೋದು ಕುಲ್ಲಡೆ.

⁸ ಬೊಕ್ಕ ನಿಕುಲು ವಾ ಊರುಗಾಂಡಲಾ ಪೋಯಿ ಬೊಕ್ಕ ಆ ಜನೊಕುಲು ನಿಕ್ಲೆನ್ ಸೇರಾವೊಂಡೆರ್ಡ ಅಕುಲು ಬಲಸಿನೆನೆ ಉನ್ಲೆ.

⁹ ಅಲ್ಪ ಉಪ್ಪು ಸೀಕ್‌ದಾಕುಲೆನ್ ಗುಣ ಮಲ್ಪುಲೆ; ಅವುಲು ಇತ್ತಿನ ಜನೊಕುಲೆಗ್, “ದೇವೆರೆ ರಾಜ್ಯ ಕೈತಲ್ ಬೈದ್‌ಂಡ್,” ಅಂದ್‌ದ್ ತೆರಿಪಾಲೆ.

¹⁰ ಆಂಡ ನಿಕುಲು ವಾ ಊರುಗಾಂಡಲಾ ಪೋಯಿ ಬೊಕ್ಕ ಆ ಜನೊಕುಲು ನಿಕ್ಲೆನ್ ಸೇರಾವಂದೆ ಇತ್ತೆರ್ಡ ನಿಕುಲು ಆ ಊರುದ ಸಾದಿಗ್ ಬತ್ತ್‌ದ್,

¹¹ “ನಿಕ್ಲೆನ ಊರುಡ್ದು ಎಂಕುಲೆ ಕಾರ್‌ಗ್ ಪತ್ತಿದಿ ಧೂಳುನು ಕುಡ್ತ್‌ದ್ ಬುಡ್ಪ; ಅವು ನಿಕ್ಲೆಗೇ ಉಪ್ಪಡ್. ಆಂಡ ದೇವೆರೆ ರಾಜ್ಯ ಕೈತಲ್ ಬೈದ್‌ಂಡ್ ಪನ್ಪಿನವು ನಿಕ್ಲೆಗ್ ತೆರಿದುಪ್ಪಡ್,” ಪಂಡ್ದ್ ಪನ್ಲೆ.

¹² ಆ ದಿನೊಟು ಆ ಊರುದ ಗತಿ ಸೋದೋಮು ಸೀಮೆದ ಗತಿಡ್ದ್‌ಲಾ ಕಠಿಣ ಆದುಪ್ಪುಂಡು ಅಂದ್‌ದ್ ನಿಕ್ಲೆಗ್ ಪನ್ಪೆ.

¹³ “ಅಯ್ಯೋ ಕೊರಜಿನೋ ಅಯ್ಯೋ ಬೆತ್ಸಾಯಿದಾ, ನಿಕ್ಲೆನಲ್ಪ ನಡತಿ ಮಲ್ಲಕಾರ್ನಿಕೊಲು ತೂರ್ ಬೊಕ್ಕ ಸೀದೋನ್ ಪಟ್ಟಣಲೆಡ್ ನಡತುದುಂಡ ಅಲ್ಪದಾಕುಲು ಅಪಗನೆ ಗೋಣಿತಟ್ಟು ಪೊದೆತೊಂದು ಬೊನ್ಯೊಡು ಕುಲ್ಲೊಂದು ಪಶ್ಚಾತಾಪ ಪಡೆದಿತ್ತ್‌ದ್ವೆರ್.

¹⁴ ಆಂಡ ನ್ಯಾಯತೀರ್ಪುದ ದಿನೊಟು ನಿಕ್ಲೆನ ಗತಿಡ್ದ್‌ಲಾ ತೂರ್ ಸೀದೋನುದ ಗತಿ ಮೇಲಾದುಪ್ಪುಂಡು.

¹⁵ ಕಪೆರ್ನೌಮೋ, ನಿನನ್ ಪರಲೋಕೊಗು ಏರಾವೊನುವನಾ? ಪಾತಾಳೊಗು ಜಪ್ಪುವ.

¹⁶ ನಿಕ್ಲೆನ ಪಾತೆರ ಕೇನುನಾಯೆ ಎನನ್ ಕೇನುನಾಯೆ ಆದುಲ್ಲೆ, ನಿಕ್ಲೆನ್ ತಾತ್ಸಾರ ಮಲ್ಪುನಾಯೆ ಎನನ್ ತಾತ್ಸಾರ ಮಲ್ಪುನಾಯೆ ಆದುಲ್ಲೆ. ಎನನ್ ತಾತ್ಸಾರ ಮಲ್ಪುನಾಯೆ ಎನನ್ ಕಡಪುಡ್ದು ಕೊರಿನಾಯನೇ ತಾತ್ಸಾರ ಮಲ್ಪುನಾಯೆ ಆದುಲ್ಲೆ,” ಅಂದ್‌ದ್ ಪಂಡೆ.

ಎಲ್ಪತ್ತರಡ್ಡ್ ಶಿಷ್ಯೆರ್ ಪಿರ ಬರ್ಪಿನವು

¹⁷ ಐಡ್ದ್ ಬೊಕ್ಕ ಆ ಎಲ್ಪತ್ತರಡ್ಡ್ ಜನ ಸಂತೋಷೊಡು ಪಿರ ಬತ್ತ್‌ದ್, “ಕರ್ತವಾ, ದೆವ್ವೊಲು ನಿನ ಪುದರ್‌ನ್ ಕೇಂಡ್ದ್ ಎಂಕ್ಲೆಗ್ ಅಡಿಯಾಳ್ ಆಪ,” ಪಂಡೆರ್.

¹⁸ ಯೇಸು ಅಕ್ಲೆಗ್, “ಸೈತಾನೆ ತೆಡಿಲ್‌ದಲೆಕ್ಕ ಬಾನೊಡ್ದು ಬೂರುನೆನ್ ತೂಯೆ.

¹⁹ ಇಂದಾ, ಸರ್ಪೊಲೆನ್, ಚೇಲ್‌ಲೆನ್, ಪಗೆನಾಯನ ಮಾತ ಬಲೊನು ದೊಂಕ್ಯೆರೆ ನಿಕ್ಲೆಗ್ ಅಧಿಕಾರ ಕೊರ್ತೆ. ಒವುಲಾ ನಿಕ್ಲೆಗ್ ಕೇಡ್ ಮಲ್ಪಂದ್.

²⁰ ಆಂಡ ದೆವ್ವೊಲುಲಾ ಎಂಕ್ಲೆಗ್ ಅಡಿಯಾಳಾದುಂಡು ಅಂದ್‌ದ್ ಸಂತೋಷ ಮಲ್ಪಂದೆ, ಎಂಕ್ಲೆನ ಪುದರ್ ಪರಲೋಕೊಡು ಬರೆದುಂಡು ಅಂದ್‌ದ್ ಸಂತೋಷ ಪಡೆಲೆ,” ಅಂದ್‌ದ್ ಪಂಡೆ.

ಯೇಸು ಸಂತೋಷ ಪಡೆಯಿನವು

²¹ ಅವ್ವೆ ಗಳಿಗೆಡ್ ಯೇಸು ಪರಿಶುದ್ಧಾತ್ಮನ ಬಲೊಡ್ದು ಸಂತೋಷೊಡು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಪರಲೋಕ, ಭೂಲೋಕದ ಕರ್ತವಾ, ಈ ಗೇನದಾಕುಲೆಗ್ಲಾ ಬುದ್ಧಿವಂತೆರೆಗ್ಲಾ ಈ ಪಾತೆರೊಲೆನ್ ಮದೆ ಮಲ್ತ್‌ದ್ ಜೋಕುಲೆಗ್ ತೆರಿಪಾಯ ಅಂದ್‌ದ್ ನಿನನ್ ಪುಗರುವೆ. ಅಂದ್ ಅಮ್ಮೆರೇ, ಇಂಚ ಮಲ್ಪುನವೇ ಎಡ್ಡೆಂದ್‌ದ್ ನಿನ ದೃಷ್ಟಿಗ್ ತೋಜಿನೆಡ್ದ್ ನಿನನ್ ಪುಗರುವೆ.

²² ಎನ ಅಮ್ಮೆ ಮಾತೆನ್ ಎಂಕ್ ಒಚ್ಚಿದ್ ಕೊರ್ತೆ; ಮಗೆ ಇಂಚಿತ್ತಿನಾಯೆ ಅಂದ್‌ದ್ ಅಮ್ಮೆ ಅತ್ತಂದೆ ಬೇತೆ ಏರ್ಲಾ ತೆರಿದಿಜೆರ್; ಬೊಕ್ಕ ಅಮ್ಮೆ ಇಂಚಿತ್ತಿನಾಯೆ ಅಂದ್‌ದ್ ಮಗೆನೇ ಅತ್ತಂದೆ ಬೇತೆ ಏರ್ಲಾ ತೆರಿದಿಜೆರ್. ಬೊಕ್ಕ ಮಗೆ ಅಮ್ಮೆರೆನ್ ಏರೆಗ್ ತೋಜಾದ್ ಕೊರಿಯೆರೆ ಮನಸ್ ಮಲ್ತ್‌ದೆನಾ ಆಯೆಲಾ ಅಮ್ಮೆರೆನ್ ತೆರಿದಿನಾಯೆ ಆದುಲ್ಲೆ.” ಅಂದ್‌ದ್ ಪಂಡೆ.

²³ ಆಯೆ ಬೊಕ್ಕ ಶಿಷ್ಯೆರೆ ಕಡೆಕ್ಕ್ ಪಿಜಿರ್‌ದ್ ಅಕ್ಲೆಗ್ ಬುಡ್ಪಾದ್ ಪಂಡಿನಿ ದಾನೆ ಪಂಡ, “ನಿಕುಲು ತೂವೊಂದುಪ್ಪುನ ಸಂಗತಿನ್ ತೂಪಿನಾಕುಲು ಭಾಗ್ಯವಂತೆರ್.

²⁴ ಮಸ್ತ್ ಜನ ಪ್ರವಾದಿಲುಲಾ ಅರಸೆರ್‌ಲಾ ನಿಕುಲು ತೂವೊಂದುಪ್ಪುನ ಸಂಗತಿನ್ ತೂವೊಡಂದ್ ಆಸೆ ಮಲ್ತ್ಂಡಲಾ ತೂಯಿಜೆರ್; ನಿಕುಲು ಕೇನೊಂದುಪ್ಪುನ ಸಂಗತಿನ್ ಅಕುಲು ಕೇನೊಡಂದ್ ಆಸೆ ಮಲ್ತೆರ್ಡಲಾ ಕೇನಿಯೆರೆ ತಿಕ್ಕ್‌ದಿಜಿ,” ಪಂಡ್ದ್ ನಿಕ್ಲೆಗ್ ಪನ್ಪೆ.

ಎಡ್ಡೆ ಸಮಾರ್ಯದಾಯನ ಉಪಕತೆ

²⁵ ಅಪಗ ಒರಿ ನ್ಯಾಯಶಾಸ್ತ್ರಿ ಲಕ್ಕ್‌ದ್ ಆಯನ್ ಪರೀಕ್ಷೆ ಮಲ್ಪೆರೆ, “ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೆರೆ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ.

²⁶ ಐಕ್ ಯೇಸು ಆಯಗ್, “ನ್ಯಾಯಕಟ್ಟ್‌ಡ್ ಎಂಚಿನ ಬರೆತ್ಂಡ್? ಅವೆನ್ ಎಂಚ ಓದುದಾ,” ಅಂದ್‌ದ್ ಕೇಂಡೆ.

²⁷ ಐಕ್ ಆಯೆ, “‘ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಶಕ್ತಿಡ್ದ್‌ಲಾ ನಿನ ಇಡೀ ಬುದ್ಧಿಡ್ದ್‌ಲಾ ಪ್ರೀತಿ ಮಲ್ಪೊಡು,’ ಬೊಕ್ಕ, ‘ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು,’ ಅಂದ್‌ದ್ ಬರೆತ್ಂಡ್,” ಪಂಡೆ.

²⁸ ಯೇಸು ಆಯಗ್, “ಈ ಸರಿಯಾದ್ ಉತ್ತರ ಕೊರ್ಯ; ಉಂದೆನ್ ಮಲ್ಪುಲ ಅಪಗ ಬದುಕುವ,” ಪಂಡೆ.

²⁹ ಆಂಡ ಆಯೆ ತನನ್ ನೀತಿವಂತೆ ಅಂದ್‌ದ್ ತೋಜಾವೊನಿಯೆರೆ ಬಯಕ್‌ದ್, “ಎನ ನಿರೆತ್ತಾಯೆ ಏರ್?” ಅಂದ್‌ದ್ ಯೇಸುಡ ಕೇಂಡೆ.

³⁰ ಐಕ್ ಯೇಸು ಆಯಗ್ ಪಂಡಿನಿ ದಾನೆ ಪಂಡ, “ಒಂಜಾನೊಂಜಿ ದಿನ ಒರಿ ನರಮಾನಿ ಯೆರೂಸಲೇಮುಡ್ದು ಘಟ್ಟ ಜತ್ತ್‌ದ್ ಯೆರಿಕೊಗು ಪೋವೊಂದುಪ್ಪುನಗ ಕಲ್ವೆರೆ ಕೈಕ್ ತಿಕ್ಕಿಯೆ. ಅಕುಲು ಆಯನ್ ಲೂಟುದು ಗಾಯ ಆಪಿನಾತ್ ಹಾಕ್‌ದ್ ಅರೆಜೀವ ಮಲ್ತ್‌ದ್ ಮೆಯಿತ ಅಂಗಿನ್ಲಾ ದೆತ್ತ್‌ದ್ ಆಯನ್ ಬುಡ್ದು ಪೋಯೆರ್.

³¹ ಅಪಗ ಒರಿ ಯಾಜಕೆ ಆ ಸಾದಿಡ್ ಜತ್ತ್‌ದ್ ಬರೊಂದು ಆಯನ್ ತೂದು ಓರೆ ಆದ್ ಪೋಯೆ.

³² ಅವ್ವೇ ರೀತಿಡ್ ಒರಿ ಲೇವಿಲಾ ಆ ಜಾಗ್‌ಗ್ ಬತ್ತ್‌ದ್ ಆಯನ್ ತೂದು ಓರೆ ಆದ್ ಪೋಯೆ.

³³ ಆಂಡ ಒರಿ ಸಮಾರ್ಯದಾಯೆ ಸಾದಿಡ್ ಪೋನಗ ಆಯನ್ ತೂದು ಕನಿಕರಿತ್‌ದ್‌

³⁴ ಆಯನ ಕೈತಲ್‌ ಪೋದು ಆಯನ ಗಾಯೊಲೆಗ್ ಎಣ್ಣೆಲಾ ದ್ರಾಕ್ಷಾರಸೊನ್ಲಾ ಮೈತ್‌ದ್ ಕುಂಟು ಕಟ್ಟ್‌ದ್ ತನ ಕತ್ತೆದ ಮಿತ್ತ್ ಕುಲ್ಲಾದ್ ಛತ್ರೊಗು ಲೆತ್ತೊಂದು ಪೋದು ಪರಾಂಬರಿತೆ.

³⁵ ಮನದಾನಿ ಆಯೆ ರಡ್ಡ್ ಬೊಳ್ಳಿದ ಪಾವೊಲಿನ್ ಛತ್ರದಾಯಗ್ ಕೊರ್ದು, ‘ಉಂಬ್ಯನ ಚಾಕ್ರಿ ಮಲ್ಪುಲ,’ ನೆಡ್ದ್ ಹೆಚ್ಚಾದ್ ಕರ್ಚಿ ಮಲ್ತಡ, ‘ಯಾನ್ ಪಿರ ಬನ್ನಗ ನಿಕ್ಕ್ ಕೊರ್ಪೆ,’” ಪಂಡೆ

³⁶ “ಕಲ್ವೆರೆ ಕೈಕ್ ತಿಕ್ಕ್‌ದಿನಾಯಗ್ ಈ ಮೂವೆರೆಡ್ ಏರ್ ನಿರೆತ್ತಾಯೆ ಅಂದ್‌ದ್ ನಿಕ್ಕ್ ತೋಜುಂಡು,” ಪನ್ಲ ಅಂದ್‌ದ್ ಕೇಂಡಿನೆಕ್ಕ್,

³⁷ ಆ ನ್ಯಾಯಶಾಸ್ತ್ರಿ, “ಆಯನ ಮಿತ್ತ್ ಕರುಣೆ ತೋಜಾಯಿನಾಯೆನೇ,” ಅಂದ್‌ದ್ ಉತ್ತರ ಕೊರಿಯೆ. ಅಪಗ ಯೇಸು ಆಯಗ್, “ಪೋ, ಈಲಾ ಅಂಚೆನೇ ಮಲ್ಪು,” ಪಂಡೆ

ಮಾರ್ಥ, ಮರಿಯನ ಇಲ್ಲಡೆ ಯೇಸು ಬತ್ತಿನವು

³⁸ ಯೇಸು ಬೊಕ್ಕ ಶಿಷ್ಯೆರ್‌ಲು ಸಂಚಾರ ಮಲ್ತೊಂದುಪ್ಪುನಗ ಒಂಜಾನೊಂಜಿ ಹಳ್ಳಿಗ್ ಬತ್ತೆರ್; ಅಲ್ಪ ಮಾರ್ಥ ಪನ್ಪಿ ಒಂಜಿ ಪೊಂಜೊವು ಯೇಸುನು ತನ ಇಲ್ಲಡೆ ಬರಿಯೆರೆ ಪಂಡಲ್.

³⁹ ಆಲೆಗ್ ಮರಿಯ ಪನ್ಪಿ ಒರ್ತಿ ಮೆಗ್ದಿ ಇತ್ತಲ್. ಮೋಲು ಕರ್ತವನ ಕಾರ ಮುದೆಲ್‌ಡ್ ಕುಲ್ಲೊಂದು ಆಯನ ಪಾತೆರೊನು ಕೇನೊಂದಿತ್ತಲ್.

⁴⁰ ಆಂಡ ಮಾರ್ಥ ದಿಂಜ ಬೇಲೆಡ್ದ್ ಬೇಜಾರಾದ್ ಯೇಸು ಕೈತಲ್‌ ಬತ್ತ್‌ದ್, “ಕರ್ತವ, ಎನ ಮೆಗ್ದಿ ಬೇಲೆಗ್ ಎನನ್ ಒರ್ತಿನೇ ಸೊಂದಿಯೆರೆ ಬುಡ್ತಲ್; ನಿಕ್ಕ್ ದಾಲಾ ಚಿಂತೆ ಇಜ್ಜ? ಎಂಕ್ ಸಹಾಯ ಮಲ್ಪೊಡಂದ್‌ದ್ ಆಲೆಗ್ ಪನ್ಲ,” ಅಂದ್‌ದ್ ಪಂಡಲ್.

⁴¹ ಕರ್ತವೆ ಆಲೆಗ್, “ಮಾರ್ಥ, ಮಾರ್ಥ, ಈ ಮಸ್ತ್ ಬಗೆಟ್ ಚಿಂತೆಡ್ಲಾ ಗಡಿಬಿಡಿಟ್ಲಾ ತಿಕ್ಕೊಂದ.

⁴² ಆಂಡ ಅಗತ್ಯ ಇತ್ತಿನವು ಒಂಜೇ; ಮರಿಯ ಆ ಎಡ್ಡೆಂತಿ ಪಾಲ್‌ನ್ ಅಜತೊಂದಲ್. ಅವು ಆಲೆಡ್ದ್ ದೆಪ್ಪಂದೆ ಪೋವು,” ಅಂದ್‌ದ್ ಉತ್ತರ ಕೊರಿಯೆ.