ಯೋಹಾನೆ 5 - ಪೊಸ ಒಡಂಬಡಿಕೆ

ಸಬ್ಬತ್‌ದಿನೊಟು ಸೀಕ್‌ದಾಯನ್ ಗುಣ ಮಲ್ತಿನವು

¹ ಉಂದೆಡ್ದ್ ಬೊಕ್ಕ ಯೆಹೂದ್ಯೆರೆ ಪರ್ಬ ಇತ್ತಿನೆಡ್ದ್ ಯೇಸು ಯೆರೂಸಲೇಮುಗು ಪೋಯೆ.

² ಯೆರೂಸಲೇಮುಡು ಕುರಿ ಅಗಸೆ ಪನ್ಪಿ ಬಾಕಿಲ್‌ದ ಕೈತಲ್‌ಡ್ ಒಂಜಿ ಕೆದು ಇತ್ತ್ಂಡ್. ಉಂದೆಕ್ಕ್ ಇಬ್ರಿಯ ಭಾಷೆಡ್ ಬೇತ್ಸಥಾ ಅಂದ್‌ದ್ ಪುದರ್ ಇತ್ತ್ಂಡ್. ಆ ಕೆದುತ ಸುತ್ತೊಡು ಐನ್ ಮಂಟಪೊಲು ಇತ್ತ್ಂಡ್.

³ ಐಕ್ಲೆಡ್ ಕೆಲವು ಸೀಕ್‌ದಾಕುಲು, ಕುರುಡೆರ್, ಕಾರ್‌ದಾಂತಿನಾಕುಲು, ವಾತದಾಕುಲು ಏಪಲಾ ಜೆತ್ತೊಂದಿತ್ತೆರ್.

^4-5 ಅಲ್ಪ ಮುಪ್ಪತೆನ್ಮ ವರ್ಸೊಡ್ದಿಂಚಿ ಸೀಕ್‌ಡ್ ಇತ್ತಿ ಒರಿ ನರಮಾನಿ ಇತ್ತೆ.

⁶ ಯೇಸು ಆಯನ್ ತೂದು, ಉಂಬೆ ಮಸ್ತ್ ಕಾಲೊಡ್ದಿಂಚಿ ಸೀಕ್‌ಡ್ ಉಲ್ಲೆ ಅಂದ್‌ದ್ ತೆರಿದ್, “ನಿಕ್ಕ್ ಗುಣ ಆಯೆರೆ ಮನಸುಂಡಾ?” ಅಂದ್‌ದ್ ಆಯಡ ಕೇಂಡಿನಪಗ,

⁷ ಆ ಸೀಕ್‌ದಾಯೆ, “ಕರ್ತವಾ, ನೀರ್ ಉರ್ಕುನಗ ಎನನ್ ಕೆದುತ ಉಲಯಿ ಜಪುಡಾವುನಾಕುಲು ಏರ್ಲಾ ಇಜ್ಜೆರ್. ಯಾನ್ ಅಡೆಗ್ ಪೋನಗ ಎನಡ್ದ್ ದುಂಬು ಬೊಕ್ಕೊರಿ ಜಪ್ಪುವೆ,” ಪಂಡೆ.

⁸ ಯೇಸು ಆಯಗ್, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ನಡಪು,” ಅಂದ್‌ದ್ ಪಂಡೆ.

⁹ ಆ ಗಳಿಗೆಡೇ ಆಯೆ ಗುಣ ಆದ್ ತನ ಪಜೆನ್ ಪತ್ತೊಂದು ನಡತೊಂದು ಪೋಯೆ. ಆನಿದ ದಿನ ಸಬ್ಬತ್‌ದಿನ ಆದಿತ್ತ್ಂಡ್.

¹⁰ ಐಕಾದ್ ಯೆಹೂದ್ಯೆರೆ ಅಧಿಕಾರಿಲು ಗುಣ ಆಯಿನಾಯಡ, “ಇನಿ ಸಬ್ಬತ್‌ದಿನ ಆದುಂಡು, ನಿನ ಪಜೆನ್ ತುಂಬೊಂದು ಪೋಪಿನವು ಸರಿ ಅತ್ತ್.” ಪಂಡೆರ್.

¹¹ ಐಕ್ ಆಯೆ, “ಎನನ್ ಗುಣ ಮಲ್ತಿನಾಯೆನೇ, ನಿನ ಪಜೆನ್ ಪತ್ತೊಂದು ಪೋಲ, ಅಂದ್‌ದ್ ಎನಡ ಪಂಡೆ,” ಪಂಡ್ದ್ ಉತ್ತರ ಕೊರಿಯೆ.

¹² “ನಿನ ಪಜೆನ್ ಮಡ್ತೊಂದು ಪೋಲ, ಪಂಡಿನ ಆ ನರಮಾನಿ ಏರ್?” ಅಂದ್‌ದ್ ಯೆಹೂದ್ಯೆರೆನ ಅಧಿಕಾರಿಲು ಕೇಂಡೆರ್.

¹³ ಆಂಡ ಗುಣ ಆಯಿನಾಯಗ್ ಆಯೆ ಏರಂದ್‌ದ್ ತೆರಿದಿತ್ತಿಜಿ, ಜನೊಕುಲೆ ಗುಂಪು ಮಸ್ತ್ ಇತ್ತಿನೆಡ್ದ್ ಯೇಸು ಅಲ್ತ್‌ಡ್ದ್ ಪೋದಿತ್ತೆ.

¹⁴ ಐಡ್ದ್ ಬೊಕ್ಕ ಗುಣ ಆತಿನಾಯನ್ ಯೇಸು ದೇವಾಲಯೊಡು ತೂದು ಆಯಡ ಇಂಚ ಪಂಡೆ, “ಇಂದಾ, ಇತ್ತೆ ನಿನ ಸೀಕ್ ಗುಣ ಆತ್ಂಡತ್ತಾ ನನ ಪಾಪ ಮಲ್ಪೊಡ್ಚಿ, ಇಜ್ಜಾಂಡ ನಿನ ಸ್ಥಿತಿ ಉಂದೆಡ್ದ್‌ಲಾ ಭಯಂಕರ ಆವು.”

¹⁵ ಆ ನರಮಾನಿ ಅಲ್ತ್‌ಡ್ದ್ ಪೋದು, ಎನನ್ ಗುಣ ಮಲ್ತಿನಾಯೆ ಯೇಸುವೇ ಅಂದ್‌ದ್ ಯೆಹೂದ್ಯೆರೆಗ್ ತೆರಿಪಾಯೆ.

¹⁶ ಈ ಕಾರಣೊನು ತೆರಿದ್ ಯೆಹೂದ್ಯೆರ್, ಯೇಸು ಸಬ್ಬತ್‌ದಿನೊಟು ಇಂಚಿತ್ತಿ ಬೇಲೆಲೆನ್ ಮಲ್ಪುವೆ ಅತ್ತಾ ಅಂದ್‌ದ್ ಆಯಗ್ ಭಂಗ ಕೊರಿಯೆರೆ ತೂಯೆರ್.

¹⁷ ಐಕ್ ಯೇಸು, “ಎನ ಅಮ್ಮೆ ಇನಿ ಮುಟ್ಟಲಾ ಬೇಲೆ ಮಲ್ಪುವೆ, ಯಾನ್ಲಾ ಬೇಲೆ ಮಲ್ಪುವೆ,” ಪಂಡೆ.

¹⁸ ಈ ಪಾತೆರೊನು ಕೇಂಡ್ದ್ ಆಯೆ ಸಬ್ಬತ್‌ನ್ ಅಲಕ್ಷ ಮಲ್ತಿನೇ ಅತ್ತಂದೆ ದೇವೆರೆನ್ ಎನ ಅಮ್ಮೆ ಅಂದ್‌ದ್ ಪನೊಂದು, ತನನ್ಲಾ ದೇವೆರೆಗ್ ಸಮ ಮಲ್ತೊಂಡೆ ಪಂಡ್ದ್, ಯೆಹೂದ್ಯೆರೆ ಅಧಿಕಾರಿಲು ಆಯನ್ ಕೆರಿಯೆರೆ ಬೊಕ್ಕಲಾತ್ ಪ್ರಯತ್ನ ಮಲ್ತೆರ್.

ದೇವೆರೆ ಮಗನ ಅಧಿಕಾರ

¹⁹ ಐಕ್ ಯೇಸು ಅಕ್ಲೆಗ್, “ನಿಕ್ಲೆಗ್ ನಿಜಾದ್ ಪನ್ಪೆ, ಅಮ್ಮೆ ಮಲ್ತಿನೆನ್ ತೂದು ಮಗೆಲಾ ಮಲ್ಪುವೆ ಅತ್ತಂದೆ ತಾನಾದೆ ದಾಲಾ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಮಲ್ಪು ಮಾತೆನ್ಲಾ ಮಗೆಲಾ ಮಲ್ಪುವೆ.

²⁰ ಅಮ್ಮೆ ಮಗನ ಮಿತ್ತ್ ಪ್ರೀತಿ ದೀದ್ ತಾನ್ ಮಲ್ಪುನೆನ್ ಮಾತೆನ್ ಆಯಗ್ ತೋಜಾವೆ. ಉಂದತ್ತಂದೆ ನೆಡ್ದ್‌ಲಾ ಮಲ್ಲ ಬೇಲೆಲೆನ್ ಆಯಗ್ ತೋಜಾವೆ, ಅವೆನ್ ತೂದು ನಿಕ್ಲೆಗ್ ಅಚ್ಚಿರ ಆಪುಂಡು.

²¹ ಅಮ್ಮೆ ಎಂಚ ಸೈತಿನಾಕುಲೆನ್ ಲಕ್ಕಾದ್ ಜೀವ ಕೊರ್ಪೆನಾ, ಅಂಚೆನೇ ಮಗೆಲಾ ತನ್ಕ್ ಬೋಡಿತ್ತಿನಾಕುಲೆಗ್ ಜೀವ ಕೊರ್ಪೆ ಪನ್ಪಿನೆನ್ ತೆರಿಯೊನ್ಲೆ.

²² ಉಂದತ್ತಂದೆ, ಅಮ್ಮೆ ಏರೆಗ್ಲಾ ನ್ಯಾಯತೀರ್ಪು ಮಲ್ಪುಜೆ, ನ್ಯಾಯತೀರ್ಪು ಮಲ್ಪು ಮಾತ ಅಧಿಕಾರೊನು ಮಗಕ್ಕ್ ಕೊರ್ತೆ.

²³ ಮಾತೆರ್ಲಾ ತನ್ಕ್ ಮರ್ಯಾದಿ ಕೊರ್ಪಿಲೆಕ್ಕನೇ ಮಗಕ್ಲಾ ಮರ್ಯಾದಿ ಕೊರೊಡು ಅಂದ್‌ದ್ ಅಮ್ಮೆ ಬಯಕುವೆ. ಮಗಕ್ಕ್ ಮರ್ಯಾದಿ ಕೊರಂದಿನಾಯೆ ಆಯನ್ ಕಡಪುಡ್ದು ಕೊರಿನ ಅಮ್ಮೆರೆಗ್ಲಾ ಮರ್ಯಾದಿ ಕೊರಂದಿನಾಯೆ ಆಪೆ.

²⁴ “ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಏರಾಂಡಲಾ ಎನ ಪಾತೆರೊನು ಕೇಂಡ್ದ್ ಎನನ್ ಕಡಪುಡ್ದು ಕೊರಿನಾಯನ್ ನಂಬುಂಡ ಆಯಗ್ ನಿತ್ಯಜೀವ ಉಂಡು. ಆಯೆ ನ್ಯಾಯತೀರ್ಪುಗು ಗುರಿ ಆವಂದೆ ಮರಣೊನು ಕಡತ್‌ದ್ ಜೀವೊಗು ಸೇರ್ದ್ ಉಲ್ಲೆ.

²⁵ ನಿಕ್ಲೆಗ್ ಸತ್ಯಾದ್ ಪನ್ಪೆ, ಸೈತಿನಾಕುಲು ದೇವೆರೆ ಮಗನ ಸ್ವರೊನು ಕೇನುನ ಕಾಲ ಬರ್ಪುಂಡು, ಅವು ಇತ್ತೆನೇ ಬೈದ್‌ಂಡ್, ಕೇಂಡಿನಾಕುಲು ಬದುಕುವೆರ್.

²⁶ ಅಮ್ಮೆ ಎಂಚ ಸ್ವತಃ ಜೀವ ಆದುಲ್ಲೆನಾ ಅಂಚೆನೇ ಮಗನ್ಲಾ ಸ್ವತಃ ಜೀವೊಡುಪ್ಪುಲೆಕ್ಕನೇ ಮಲ್ಪುವೆ.

²⁷ ನರಮಾನಿ ಮಗೆ ಆದಿತ್ತ್‌ಂಡಲಾ ನ್ಯಾಯತೀರ್ಪು ಮಲ್ಪು ಅಧಿಕಾರೊನು ಮಗಕ್ಕ್ ಕೊರ್ತೆ.

²⁸ ಉಂದೆಕ್ಕ್ ಅಚ್ಚಿರ ಮಲ್ಪೊಡ್ಚಿ, ಸಮಾಧಿಡ್ ಇತ್ತಿನಾಕುಲು ಮಾತೆರ್ಲಾ ಆಯನ ಸ್ವರೊನು ಕೇಂಡ್ದ್ ಲಕ್ಕ್‌ದ್ ಪಿದಯಿ ಬರ್ಪಿ ಕಾಲ ಬರ್ಪುಂಡು.

²⁹ ಎಡ್ಡೆಂತಿನೆನ್ ಮಲ್ತಿನಾಕುಲೆಗ್ ಜೀವೊಗಾದ್ ಪುನರುತ್ಥಾನ ಆಪುಂಡು. ಹಾಳ್ ಮಲ್ತಿನಾಕುಲೆಗ್ ನ್ಯಾಯತೀರ್ಪುಗಾದ್ ಪುನರುತ್ಥಾನ ಆಪುಂಡು.

ಯೇಸುನ ಸಾಕ್ಷಿ

³⁰ “ಎನ್ನಾತೆಗ್ ಎನ ಅಧಿಕಾರೊಡು ದಾಲಾ ಮಲ್ಪಯೆ; ಅಮ್ಮೆ ಪಂಡಿನೆನ್ ಕೇಂಡ್ದ್ ನ್ಯಾಯತೀರ್ಪು ಮಲ್ಪುವೆ, ಬೊಕ್ಕ ಎನ ಸ್ವಂತ ಚಿತ್ತ ನಡಪೊಡು ಪಂಡ್ದ್ ಬಯಕಂದೆ, ಎನನ್ ಕಡಪುಡ್ದಿನಾಯನ ಚಿತ್ತ ನಡಪುಡುಡು ಪಂಡ್ದ್ ಉಪ್ಪುನೆಡ್ದ್ ಯಾನ್ ಮಲ್ಪು ತೀರ್ಪು ನ್ಯಾಯದವು ಆದುಂಡು.

³¹ “ಎನ ಸಂಗತಿಡ್ ಯಾನೇ ಸಾಕ್ಷಿ ಪಂಡ್ಂಡ ಎನ ಸಾಕ್ಷಿ ನಿಜ ಆವಂದ್.

³² ಎನ ಸಂಗತಿಡ್ ಸಾಕ್ಷಿ ಕೊರ್ಪಿನಾಯೆ ಬೊಕ್ಕೊರಿ ಉಲ್ಲೆ. ಎನ ಸಂಗತಿಡ್ ಆಯೆ ಪನ್ಪಿ ಸಾಕ್ಷಿ ಸತ್ಯದವು ಅಂದ್‌ದ್ ಎಂಕ್ ಗೊತ್ತುಂಡು.

³³ ನಿಕುಲು ಯೋಹಾನಡ ಕೇನಿಯೆರೆ ಜನೊಕುಲೆನ್ ಕಡಪುಡಿಯರ್. ಆಯೆ ಸತ್ಯದ ಸಂಗತಿಡ್ ಸಾಕ್ಷಿ ಪಂಡೆ.

³⁴ ಯಾನ್ ಎನ ಸಂಗತಿಡ್ ಜನೊಕುಲು ಸಾಕ್ಷಿ ಕೊರೊಡು ಅಂದ್‌ದ್ ಬಯಕುಜಿ. ಆಂಡಲಾ ನಿಕ್ಲೆಗ್ ರಕ್ಷಣೆ ಆವೊಡು ಅಂದ್‌ದ್ ಉಂದೆನ್ ಪನ್ತೆ.

³⁵ ಯೋಹಾನೆ ಅರ್ಲೊಂದಿತಿನ ಒಂಜಿ ತುಡರ್‌ದ ಲೆಕ್ಕ ಬೊಲ್ಪು ಕೊರಿಯೆ. ನಿಕುಲು ಆಯ ಬೊಲ್ಪುಡು ಒಂತೆ ಸಮಯ ಸಂತೋಷೊಡುಪ್ಪರೆ ಮನಸ್ ಮಲ್ತ್‌ದಿತ್ತರ್.

³⁶ ಆಂಡ ಎನ ಸಾಕ್ಷಿಲು ಯೋಹಾನಡ್ದ್‌ಲಾ ಹೆಚ್ಚ್‌ಗೆದವು, ಎಂಚ ಪಂಡ ಮಲ್ತ್‌ದ್ ತೋಜಾಯೆರೆ ಅಮ್ಮೆ ಎಂಕ್ ಕೊರ್ತಿನ ಕೆಲಸೊಲೇ. ಅಮ್ಮೆ ಎನನ್ ಕಡಪುಡ್ದು ಕೊರ್ತೆ ಅಂದ್‌ದ್ ಎನ ಕೆಲಸೊಲು ಸಾಕ್ಷಿ ಕೊರ್ಪುಂಡು.

³⁷ ಉಂದತ್ತಂದೆ ಎನನ್ ಕಡಪುಡ್ದು ಕೊರಿ ಅಮ್ಮೆ ಎನ ಸಂಗತಿಡ್ ಸಾಕ್ಷಿ ಪನ್ಪೆ. ನಿಕುಲು ಆಯ ಸ್ವರೊನು ಕೇಂಡ್ದಿನೇ ಇಜ್ಜಿ, ಆಯೆ ಎಂಚ ಉಲ್ಲೆ ಪಂಡ್ದ್‌ಲಾ ತೂತ್‌ಜರ್.

³⁸ ಆಯ ಪಾತೆರೊಲು ನಿಕ್ಲೆಡೊಪ್ಪ ನಿಲೆ ಆತಿನವುಲಾ ಇಜ್ಜಿ. ದಾಯೆಗಂದ್ಂಡ ಆಯೆ ಕಡಪುಡ್ದು ಕೊರಿನಾಯನ ಪಾತೆರೊನು ನಿಕುಲು ನಂಬುಜರ್.

³⁹ ಶಾಸ್ತ್ರೊಲೆಡ್ದ್ ನಿತ್ಯಜೀವ ತಿಕ್ಕುಂಡು ಅಂದ್‌ದ್ ಅವೆನ್ ಓದೊಂದುಲ್ಲರತ್ತಾ, ಆಂಡ ಶಾಸ್ತ್ರೊಡುಲಾ ಎನ ವಿಷಯೊಡು ಸಾಕ್ಷಿ ತೆರಿಪಾವುಂಡು.

⁴⁰ ಆಂಡ ನಿತ್ಯಜೀವ ಪಡೆಯೆರೆ ಎನ ಕೈತಲ್‌ ಬರಿಯೆರೆ ನಿಕ್ಲೆಗ್ ಮನಸಿಜ್ಜಿ.

⁴¹ “ಯಾನ್ ನರಮಾನಿಲೆಡ್ದ್ ಬರ್ಪಿ ಮಾನ ಮರ್ಯಾದಿನ್ ಬಯಕುಜಿ.

⁴² ಆಂಡ ಯಾನ್ ನಿಕ್ಲೆ ಮನಸ್‌ನ್ ತೆರಿದೆ. ದೇವೆರೆ ಮಿತ್ತ್ ನಿಕ್ಲೆಗ್ ಪ್ರೀತಿ ಇಜ್ಜಿ ಅಂದ್‌ದ್ ತೆರಿದುಲ್ಲೆ.

⁴³ ಯಾನ್ ಎನ ಅಮ್ಮೆರೆ ಪುದರ್‌ಡ್ ಬೈದೆ, ಆಂಡ ನಿಕುಲು ಎನನ್ ಒಪ್ಪಿಯೊನುಜರ್, ಆಂಡ ಬೊಕ್ಕೊರಿ ಸ್ವಂತ ಪುದರ್‌ದ ಮಿತ್ತ್ ಬತ್ತೆಡ, ಆಯನ್ ಒಪ್ಪಿಯೊನುವರ್.

⁴⁴ ದೇವೆರೆಡ್ದ್ ಒರಿಯಡ್ದೇ ಉಪ್ಪು ಮಾನೊನು ನಾಡಂದೆ; ಒರಿಯಡ್ದ್ ಒರಿ ಮಾನ ದೆತ್ತೊನುನಾಕುಲು ನಿಕುಲು ಎಂಚ ನಂಬೊಲಿ?

⁴⁵ ಯಾನ್ ಅಮ್ಮೆರೆ ಎದುರು ನಿಕ್ಲೆನ ದೂರುಲೆನ್ ತೆರಿಪಾದ್ ಕೊರುವೆ ಅಂದ್‌ದ್ ಎನ್ನಡೆ, ನಿಕುಲು ಭರವಸ ಮಲ್ತಿ ಮೋಶೆನೇ ನಿಕ್ಲೆನ ಮಿತ್ತ್ ದೂರುಲೆನ್ ಪಾಡ್ವೆ.

⁴⁶ ನಿಕುಲು ಮೋಸೆನ್ ನಿಜವಾದ್ ನಂಬುನಕುಲಾಂಡ ಎನನ್ಲಾ ನಂಬುದ್ವರ್. ದಾಯೆ ಪಂಡ ಮೋಶೆ ಎನ ಸಂಗತಿಡ್ ಬರೆತೆ,

⁴⁷ ಆಯೆ ಬರೆತಿನೆನ್ ನಿಕುಲು ನಂಬಿಜರ್ಡ ಎನ ಪಾತೆರೊಲೆನ್ ಎಂಚ ನಂಬುವರ್?” ಅಂದ್‌ದ್ ಪಂಡೆ.