ಯೋಹಾನೆ 20 - ಪೊಸ ಒಡಂಬಡಿಕೆಕಾಲಿಯಾಯಿನ ಸಮಾಧಿ ( ಮತ್ತಾಯೆ 28:1-8 ; ಮಾರ್ಕೆ 16:1-8 ; ಲೂಕೆ 24:1-12 ) 1 ವಾರದ ಸುರುತ್ತ ದಿನ ಮಗ್ದಲದ ಮರಿಯ ಪುಲ್ಲ್ಯಕೆಲೊಗು ನನಲಾ ಕತ್ತಲೆ ಉಪ್ಪುನಗನೇ ಯೇಸುನ ಸಮಾಧಿದಡೆಗ್ ಬತ್ತ್‌ದ್ ಅವುಲು ತೂನಗ ಸಮಾಧಿದ ಕಲ್ಲ್ ಪೊರೆಲ್‌ದಿತ್ತಿನೆನ್ ತೂಯಲ್. 2 ಆಲ್ ಅಪಗನೆ ಬಲ್ತೊಂದು ಸೀಮೋನು ಪೇತ್ರೆ ಬೊಕ್ಕ ಯೇಸುನ ಪ್ರೀತಿದ ಬೊಕ್ಕೊರಿ ಶಿಷ್ಯನ ಕೈತಲ್ ಪೋದು ಪನ್ಪಲ್, “ನಮ ಸ್ವಾಮಿನ್ ಸಮಾಧಿಡ್ದ್ ದೆತ್ತ್‌ದ್ ಓಲು ಕೊನೊದು ದೀತೆರ್ ಅಂದ್‌ದ್ ಗೊತ್ತಿಜ್ಜಿ,” ಪಂಡಲ್. 3 ಪೇತ್ರೆಲಾ ಆ ನನೊಂಜಿ ಶಿಷ್ಯೆಲಾ ಸಮಾಧಿದಡೆಗ್ ಪೋಯೆರ್. 4 ಇರ್ವೆರ್‌ಲಾ ಬಲ್ತೊಂದು ಪೋನಗ ಆ ನನೊಂಜಿ ಶಿಷ್ಯೆ ಪೇತ್ರಡ್ದ್ ದುಂಬು ಬಲ್ತ್‌ದ್ ಆಯೆ ಸಮಾಧಿಗ್ ಸುರು ಮುಟ್ಟುವೆ. 5 ಆಯೆ ಬಗ್ಗ್‌ದ್ ಸಮಾಧಿದ ಉಲಯಿ ತೂನಗ ಬೂರ್ದಿತ್ತಿನ ನಾರ್‌ದ ಕುಂಟುನು ತೂಯೆ ಆಂಡ ಉಲಯಿ ಪೋಯಿಜೆ. 6 ಸೀಮೋನು ಪೇತ್ರೆ ಆಯನ ಬೆರಿಯೆ ಬತ್ತ್‌ದ್ ಸಮಾಧಿದ ಉಲಯಿ ಪೋದು ಯೇಸುನು ಸುತ್ತುದಿನ ನಾರ್‌ದ ಕುಂಟುನು ತೂಯೆ. 7 ಯೇಸುನ ತರೆಕ್ ಕಟ್ಟ್‌ದಿನ ಕುಂಟು, ಬೇತೆ ನಾರ್‌ದ ಕುಂಟುದ ಒಟ್ಟುಗು ದೀವಂದೆ, ಒತ್ತರೆ ಒಂಜಿ ಜಾಗ್‌ಡ್ ಮಡ್ತ್‌ದ್ ದೀತಿನೆನ್ಲಾ ತೂಯೆ. 8 ಅಪಗ ದುಂಬು ಸಮಾಧಿದ ಕೈತಲ್‌ಗ್ ಬತ್ತಿ ಆ ಬೊಕ್ಕೊರಿ ಶಿಷ್ಯೆಲಾ ಉಲಯಿ ಪೋದು, ತೂದು ನಂಬಿಯೆ. 9 ಶಿಷ್ಯೆರೆಗ್ ಯೇಸು ಸೈತ್‌ದ್ ಕುಡ ಜೀವಾದ್ ಲಕ್ಕುವೆ ಅಂದ್‌ದ್ ಶಾಸ್ತ್ರೊಡು ಬರೆತಿನ ಪಾತೆರ ನನಲಾ ಅರ್ಥ ಆದಿತ್ತಿಜಿ. 10 ಐಡ್ದ್ ಬೊಕ್ಕ ಆ ಶಿಷ್ಯೆರ್‌ಲು ಅಕ್ಲೆನ ಜನೊಕುಲೆ ಕೈತಲ್ ಪೋಯೆರ್. ಮಗ್ದಲದ ಮರಿಯಗ್ ಯೇಸು ತೋಜಿದ್ ಬರ್ಪಿನವು ( ಮತ್ತಾಯೆ 28:9 , 10 ; ಮಾರ್ಕೆ 16:9-11 ) 11 ಆಂಡ ಮಗ್ದಲದ ಮರಿಯ ಸಮಾಧಿದ ಪಿದಯಿಡ್ದ್ ಉಂತುದು ಬುಲ್ತೊಂದು ಇತ್ತಲ್. ಬುಲ್ತೊಂದುನಪಗ ಸಮಾಧಿದ ಉಲಯಿ ನಿಲ್ಕ್‌ದ್ ತೂನಗ, 12 ಬೊಲ್ದು ಕುಂಟು ತುತ್ತುದಿತ್ತಿನ ಇರ್ವೆರ್ ದೂತೆರೆನ್ ತೂಯಲ್. ಅಕುಲು ಯೇಸುನ ಶರೀರ ದೀದಿತ್ತಿನಲ್ಪ ಒರಿ ದೂತೆ ತರೆದಲ್ಪ, ಬೊಕ್ಕೊರಿ ದೂತೆ ಕಾರ್‌ದಲ್ಪ ಕುಲ್ಲುದಿತ್ತೆರ್. 13 ಅಕುಲು ಆಲೆಡ, “ಅಮ್ಮಾ, ಈ ದಾಯೆಗ್ ಬುಲ್ಪುನಿ?” ಪಂಡ್ದ್ ಕೇಂಡೆರ್. ಅಪಗ ಆಲ್, “ಎನ ಸ್ವಾಮಿನ್ ಏರಾ ಕೊನೊತೆರ್ ಬೊಕ್ಕ ಓಲು ದೀತೆರ್? ಅಂದ್‌ದ್ ಎಂಕ್ ಗೊತ್ತುಜ್ಜಿ?” ಅಂದಲ್. 14 ಉಂದೆನ್ ಪಂಡ್ದ್ ಪಿರ ತಿರ್ಗ್‌ದ್ ತೂನಗ ಯೇಸು ಉಂತುದಿನೆನ್ ತೂಯಲ್. ಆಂಡ ಆಯೆ ಯೇಸು ಅಂದ್‌ದ್ ಆಲೆಗ್ ತೆರಿಜಿ. 15 ಯೇಸು ಆಲೆಡ, “ಅಮ್ಮಾ, ಈ ದಾಯೆಗ್ ಬುಲ್ಪುನಿ, ಏರೆನ್ ನಾಡೊಂದುಲ್ಲಾ?” ಪಂಡೆ. ಮರಿಯ ಆಯನ್ ಅಲ್ಪದ ತೋಟದಾಯೆ ಅಂದ್‌ದ್ ಎನ್ನ್‌ದ್ ಆಯಡ, “ಸ್ವಾಮಿ, ಈ ಆಯನ್ ತುಂಬೊಂದು ಪೋದಿತ್ತಡ ಓಲು ದೀತ ಎಂಕ್ ಪನ್ಲ, ಯಾನ್ ಕೊನೊಪೆ,” ಅಂದ್‌ದ್ ಪಂಡಲ್. 16 ಯೇಸು ಆಲೆಗ್, “ಮರಿಯ” ಅಂದ್‌ದ್ ಪಂಡೆ. ಆಲ್ ತಿರ್ಗ್‌ದ್ ಇಬ್ರಿಯೆರೆನ ಭಾಷೆಡ್ “ರಬ್ಬೂನಿ” ಪಂಡಲ್. ಐತ ಅರ್ಥ ಗುರುವೇ, 17 ಯೇಸು ಆಲೆಡ, “ಎನನ್ ಮುಟ್ಟೊಡ್ಚಿ ಯಾನ್ ಎನ ಅಮ್ಮೆರೆ ಕೈತಲ್ ನನಲಾ ಪೋತುಜಿ. ಈ ಎನ ಸಹೋದರೆರೆ ಕೈತಲ್ ಪೋದು, ‘ಯಾನ್ ಎನ ಅಮ್ಮೆಲಾ ನಿಕ್ಲೆ ಅಮ್ಮೆಲಾ ಬೊಕ್ಕ ಎನ ದೇವೆರ್‌ಲಾ ನಿಕ್ಲೆ ದೇವೆರ್‌ಲಾ ಆದುಪ್ಪುನಾಯ ಕೈತಲ್ ಏರ್ದ್ ಪೋವೊಂದುಲ್ಲೆ ಅಂದ್‌ದ್ ಅಕ್ಲೆಡ ಪನ್ಲ,’” ಪಂಡ್ದ್ ಪಂಡೆ. 18 ಮಗ್ದಲದ ಮರಿಯ ಯೇಸುನ ಶಿಷ್ಯೆರೆಗ್ ಪೋದು, “ಯಾನ್ ಕರ್ತವನ್ ತೂಯೆ,” ಅಂದ್‌ದ್ ಆಯೆ ಪಂಡಿನೆನ್ ಅಕ್ಲೆಗ್ ತೆರಿಪಾಯಲ್. ಶಿಷ್ಯೆರೆಗ್ ಯೇಸು ತೋಜಿದ್ ಬರ್ಪಿನವು ( ಮತ್ತಾಯೆ 28:16-20 ; ಮಾರ್ಕೆ 16:14-18 ; ಲೂಕೆ 24:36-49 ) 19 ಆನಿಯೆ ಪಂಡ, ವಾರದ ಸುರುತ್ತ ದಿನ ಯೇಸುನ ಶಿಷ್ಯೆರ್ ಒಂಜಿ ಇಲ್ಲಡ್ ಬೈಯದ ಪೊರ್ತು ಒಟ್ಟುಗು ಕೂಡ್ದಿತ್ತೆರ್, ಅಕುಲು ಯೆಹೂದ್ಯೆರೆನ ಪೋಡಿಗೆಡ್ ಬಾಕಿಲ್ ಮುಚ್ಚಿದ್ ಕುಲ್ಲುದಿತ್ತೆರ್, ಅಪಗ ಯೇಸು ಅಕ್ಲೆ ನಡುಟು ಉಂತುದು, “ನಿಕ್ಲೆಗ್ ಸಮಾಧಾನ ಆವಡ್,” ಪಂಡೆ. 20 ಬೊಕ್ಕ ಯೇಸು ತನ ಕೈಲೆನ್ಲಾ ಮರ್ಗಿಲ್‌ನ್ಲಾ ತೋಜಾಯೆ. ಶಿಷ್ಯೆರ್ ಕರ್ತವನ್ ತೂದು ಬಾರಿ ಸಂತೋಷ ಪಡೆಯೆರ್. 21 ಯೇಸು ಕುಡ, “ನಿಕ್ಲೆಡ ಸಮಾಧಾನ ಉಪ್ಪಡ್,” ಅಮ್ಮೆ ಎನನ್ ಕಡಪುಡುದಿಲೆಕ್ಕ ನಿಕ್ಲೆನ್ ಯಾನ್ ಕಡಪುಡ್ವೆ ಪಂಡೆ. 22 ಬೊಕ್ಕ ಯೇಸು ಆಯನ ಶ್ವಾಸೊನು ಶಿಷ್ಯೆರೆನ ಮಿತ್ತ್ ಉರ್ತುದು ಅಕ್ಲೆಡ, “ಪರಿಶುದ್ಧಾತ್ಮ ವರೊನು ದೆತ್ತೊನ್ಲೆ. 23 ನಿಕುಲು ಏರೆನ ಪಾಪೊನು ಮಾಪು ಮಲ್ಪುವರ, ಅಕ್ಲೆನ ಪಾಪ ಮಾಪು ಆಪುಂಡು. ಏರೆಗ್ ಮಾಪು ಮಲ್ಪುಜರಾ ಅವು ಅಕ್ಲೆಗ್ ಒರಿಯುಂಡು,” ಅಂದ್‌ದ್ ಪಂಡೆ. ಯೇಸು ಬೊಕ್ಕ ತೋಮೆ 24 ಯೇಸು ಬನ್ನಗ, ಪದ್ರಾಡ್ ಶಿಷ್ಯೆರೆಡ್ ಒರಿ, ದಿದುಮೆ ಪನ್ಪಿ ತೋಮೆ ಅಕ್ಲೆಡೊಪ್ಪ ಇತ್ತ್‌ಜೆ. 25 ಅವೆಡ್ದಾವರ ಬಾಕಿದ ಶಿಷ್ಯೆರ್‌ಲು, “ಎಂಕುಲು ಕರ್ತವನ್ ತೂಯ,” ಅಂದ್‌ದ್ ಆಯಗ್ ಪಂಡೆರ್. ಐಕ್ ಆಯೆ, “ಯೇಸುನ ಕೈಟ್ ಆದುಪ್ಪು ಗಾಯೊಲೆನ್ ತೂದು ಆ ಗಾಯೊಲೆಡ್ ಎನ ಬಿರೆಲ್‌ಲೆನ್ ದೀದ್, ಆಯನ ಅಲ್ಲೆಡ್ ಎನ ಕೈ ಪಾಡಂದೆ ನಿಕ್ಲೆನ ಪಾತೆರೊಲೆನ್ ಯಾನ್ ನಂಬುನೇ ಇಜ್ಜಿ,” ಪಂಡೆ. 26 ಎಣ್ಮ ದಿನ ಆಯಿ ಬೊಕ್ಕ ಯೇಸುನ ಶಿಷ್ಯೆರ್‌ಲಾ ಅಕ್ಲೆಡೊಪ್ಪ ತೋಮೆಲಾ ಇಲ್ಲದ ಉಲಯಿ ಇತ್ತೆರ್. ಬಾಕಿಲ್ ಮುಚ್ಚಿದಿತ್ತ್‌ಂಡ್. ಅಪಗ ಯೇಸು ಬತ್ತ್‌ದ್ ನಡುಟು ಉಂತುದು, “ನಿಕ್ಲೆಡ ಸಮಾಧಾನ ಆವಡ್,” ಪಂಡೆ. 27 ಐಡ್ದ್ ಬೊಕ್ಕ ತೋಮಗ್, “ನಿನ ಕೈ ಬಿರೆಲ್‌ನ್ ಇಂಚಿ ನೀಡ್ದ್ ಎನ ಕೈ ಮುಟ್ಟುದು ತೂಲ, ನಿನ ಕೈನ್ ನೀಡ್ದ್ ಎನ ಅಲ್ಲೆಡ್ ಪಾಡ್ಲ, ನಂಬಿಕೆದಾಂತಿನಾಯೆ ಆದುಪ್ಪಡ. ನಂಬುನಾಯೆ ಆಲ,” ಅಂದ್‌ದ್ ಪಂಡೆ. 28 ತೋಮೆ ಉತ್ತರ ಕೊರ್ದು ಆಯಡ, “ಎನ ಕರ್ತವಾ, ಎನ ದೇವೆರ್!” ಅಂದ್‌ದ್ ಪಂಡೆ. 29 ಯೇಸು ಆಯಡ, “ಈ ಎನನ್ ತೂಯಿನೆಡ್ದ್ ನಂಬಿಯ. ತೂವಂದೆ ನಂಬಿನಾಕುಲು ಭಾಗ್ಯವಂತೆರ್!” ಪಂಡೆ. ಈ ಪುಸ್ತಕದ ಉದ್ದೇಶ 30 ಯೇಸು ನನಲಾ ಬೇತೆ ಏತೋ ಕಾರ್ನಿಕೊಲೆನ್ ತನ ಶಿಷ್ಯೆರೆ ಎದುರುಡು ಮಲ್ತ್‌ದಿತ್ತೆ. ಅವು ಈ ಪುಸ್ತಕೊಡು ಬರೆತಿಜಿ. 31 ಆಂಡ ಯೇಸು ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಅಂದ್‌ದ್ ನಿಕುಲು ನಂಬುಲೆಕ್ಕಲಾ ನಂಬುದು ಆಯ ಪುದರ್‌ಡ್ ನಿಕ್ಲೆಗ್ ನಿತ್ಯಜೀವ ಉಪ್ಪುಲೆಕ್ಕಲಾ ಈತ್ ಮಾತ ಬರೆತ್ಂಡ್. |
New Life Literature