ಯೋಹಾನೆ 17 - ಪೊಸ ಒಡಂಬಡಿಕೆ

ಯೇಸು ತನ ಶಿಷ್ಯೆರೆಗ್ ಪ್ರಾರ್ಥನೆ ಮಲ್ಪುನು

¹ ಯೇಸು ಈ ಪಾತೆರೊಲೆನ್ ಪಂಡಿ ಬೊಕ್ಕ ಬಾನದಂಚಿ ಕಣ್ಣ್ ಲಕ್ಕಾದ್ ತೂದು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಸಮಯ ಬೈದ್‌ಂಡ್, ನಿನ ಮಗನ್ ಮೈಮೆ ಪಡೆಪಾಲ, ಅಪಗ ನಿನ ಮಗೆ ನಿನನ್ ಮೈಮೆ ಪಡೆಪಾವೆರೆ ಆಪುಂಡು.

² ಈ ಆಯಗ್ ಏರೇರೆನ್ ಕೊರ್ತನಾ ಅಕ್ಲೆಗ್ ಮಾತೆರೆಗ್ಲಾ ನಿತ್ಯಜೀವೊನು ಕೊರೊಡು ಅಂದ್‌ದ್ ಆಯಗ್ ಮಾತ ನರಮಾನಿಲೆ ಮಿತ್ತ್ ಅಧಿಕಾರ ಕೊರ್ತ ಅತ್ತಾ?

³ ಒರಿಯೇ ನಿಜ ದೇವೆರ್ ಆದುಪ್ಪು ನಿನನ್ಲಾ ಈ ಕಡಪುಡ್ದಿ ಯೇಸು ಕ್ರಿಸ್ತನ್ಲಾ ತೆರಿಯೊನುನವೇ ನಿತ್ಯಜೀವ.

⁴ ಈ ಕೊರ್ತಿನ ಕೆಲಸೊನು ಯಾನ್ ಮಲ್ತ್‌ದ್ ಮುಗಿತೆ, ನಿನನ್ ಭೂಲೋಕೊಡು ಮೈಮೆ ಪಡೆಪಾಯೆ.

⁵ ಅಮ್ಮೆರೇ, ಈ ಎನನ್ ಮೈಮೆ ಪಡೆಪಾಲ ಲೋಕ ಉಂಡಾಪಿನೆಕ್ಕ್ ದುಂಬು ನಿನ ಕೈತಲ್ ಎಂಕಿತ್ತಿ ಮೈಮೆಡ್ದೇ ಎನನ್ ಇತ್ತೆ ಮೈಮೆ ಪಡೆಪಾಲ.

⁶ “ಲೋಕದ ಉಲಯಿಡ್ದ್ ಈ ಎಂಕ್ ಕೊರಿ ನರಮಾನಿಲೆಗ್ ನಿನ ಪುದರ್‌ನ್ ತೆರಿಪಾಯೆ. ಮೊಕುಲು ನಿನ್ನಾಕುಲು ಆದಿತ್ತೆರ್ಡಲಾ ಈ ಮೊಕ್ಲೆನ್ ಎಂಕ್ ಕೊರಿಯ. ಬೊಕ್ಕ ಮೊಕುಲು ನಿನ ಪಾತೆರೊನು ಕೈಕೊಂದು ನಡತ್ತ್‌ದೆರ್‌

⁷ ಈ ಎಂಕ್ ಕೊರಿನವು ಮಾತಲಾ ನಿನಡ್ದೇ ಬೈದಿನವು ಅಂದ್‌ದ್ ಇತ್ತೆ ಮೊಕುಲು ತೆರಿಯೊಂದೆರ್.

⁸ ಎಂಚಂದ್ಂಡ ಈ ಎಂಕ್ ಕೊರಿ ಪಾತೆರೊಲೆನ್ ಯಾನ್ ಮೊಕ್ಲೆಗ್ ಕೊರ್ತೆ. ಮೊಕುಲು ಆ ಪಾತೆರೊಲೆನ್ ಕೈಕೊಂದು, ಯಾನ್ ನಿನ ಕೈತಲ್‌ಡ್ದ್ ಬೈದಿನಾಯೆ ಅಂದ್‌ದ್ ನಿಜಾದ್ ತೆರಿಯೊಂದು, ಈಯೇ ಎನನ್ ಕಡಪುಡ್ದು ಕೊರ್ತಿನಾಯೆ ಅಂದ್‌ದ್ ನಂಬುದೆರ್.

⁹ “ಯಾನ್ ಮೊಕ್ಲೆಗಾದ್ ಕೇನೊನುವೆ. ಲೋಕೊಗಾದ್ ಪ್ರಾರ್ಥನೆ ಮಲ್ಪಂದೆ, ಈ ಎಂಕ್ ಕೊರ್ತಿನ ಜನೊಕುಲೆಗಾದ್ ಪ್ರಾರ್ಥನೆ ಮಲ್ಪುವೆ, ದಾಯೆಗ್ ಪಂಡ ಮೊಕುಲು ನಿನ್ನಕುಲಾದುಲ್ಲೆರ್.

¹⁰ ಎನ್ನವು ಮಾತಲಾ ನಿನ್ನವೇ, ನಿನ್ನವು ಮಾತಲಾ ಎನ್ನವು. ಬೊಕ್ಕ ಮೊಕ್ಲೆಡ್ದ್ ಎಂಕ್ ಮೈಮೆ ಉಂಡಾತ್ಂಡ್.

¹¹ ನನ ಯಾನ್ ಲೋಕೊಡು ಉಪ್ಪುಜಿ, ಆಂಡ ಮೊಕುಲು ಲೋಕೊಡು ಉಪ್ಪುನಾಕುಲು, ಯಾನ್ ನಿನ ಕೈತಲ್‌ಗ್ ಬರ್ಪೆ. ಪರಿಶುದ್ಧ ಅಮ್ಮೆರೇ, ಎಂಕುಲು ಒಂಜಾದ್ ಇತ್ತಿಲೆಕ್ಕ ಮೊಕುಲುಲಾ ಒಂಜಾದುಪ್ಪೊಡು ಅಂದ್‌ದ್ ಈ ಎಂಕ್ ಕೊರಿ ನಿನ ಪುದರ್‌ಡ್ ಮೊಕ್ಲೆನ್ ಕಾತೊನ್ಲ.

¹² ಯಾನ್ ಮೊಕ್ಲೆಡೊಪ್ಪ ಉಪ್ಪುನಗ, ಈ ಎಂಕ್ ಕೊರ್ತಿನ ನಿನ ಪುದರ್‌ಡ್ ಮೊಕ್ಲೆನ್ ಕಾತೊಂಡೆ. ಶಾಸ್ತ್ರದ ಪಾತೆರ ನಡಪುಲೆಕ್ಕ ನಾಶನೊಗು ಗುರಿ ಆಯಿ ಮಗೆನೇ ಅತ್ತಂದೆ ಮೊಕ್ಲೆಡ್ ಬೇತೆ ಏರ್ಲಾ ನಾಶ ಆತಿಜೆರ್.

¹³ ಆಂಡ ಇತ್ತೆ ನಿನ್ನಡೆ ಬರ್ಪಿನಾಯೆ ಆದುಲ್ಲೆ, ಅವೆಡ್ದಾವರ ಮೊಕ್ಲೆಡ್ ಎನ ಸಂತೋಷ ಪರಿಪೂರ್ಣ ಆಪಿಲೆಕ್ಕ ಈ ಪಾತೆರೊಲೆನ್ ಲೋಕೊಡು ಇತ್ತ್‌ದ್ ಪನೊಂದುಲ್ಲೆ.

¹⁴ ಯಾನ್ ನಿನ ಪಾತೆರೊನು ಅಕ್ಲೆಗ್ ತೆರಿಪಾದೆ, ಯಾನ್ ಲೋಕದಾಯೆ ಅತ್ತಂದೆ ಉಪ್ಪುಲೆಕ್ಕ ಮೊಕುಲುಲಾ ಲೋಕದಕುಲತ್ತ್, ಅಂಚಾದ್ ಲೋಕ ಮೊಕ್ಲೆನ್ ಪಗೆ ಮಲ್ಪುಂಡು.

¹⁵ ಮೊಕ್ಲೆನ್ ಲೋಕೊಡ್ದು ದೆತ್ತೊಂದು ಪೋವೊಡಂದ್‌ದ್ ಯಾನ್ ಕೇನುಜಿ, ಸೈತಾನ ಕೈಡ್ದ್ ತಪ್ಪಾಲ ಅಂದ್‌ದ್ ನಟ್ಟೊಂದುಲ್ಲೆ.

¹⁶ ಯಾನ್ ಲೋಕದಾಯೆ ಆದುಪ್ಪಂದಿಲೆಕ್ಕನೇ ಮೊಕುಲುಲಾ ಲೋಕದಕುಲತ್ತ್,

¹⁷ ನಿನ ಸತ್ಯೊಡು ಅಕ್ಲೆನ್ ಪರಿಶುದ್ಧ ಮಲ್ಪುಲ. ನಿನ ಪಾತೆರ ಸತ್ಯದವು.

¹⁸ ಈ ಎನನ್ ಲೋಕೊಗು ಕಡಪುಡ್ದು ಕೊರಿಲೆಕ್ಕನೇ ಯಾನ್ಲಾ ಮೊಕ್ಲೆನ್ ಲೋಕೊಗು ಕಡಪುಡ್ದು ಕೊರಿಯೆ.

¹⁹ ಮೊಕುಲು ನಿಜಾದ್‌ಲಾ ಸತ್ಯೊಡು ಪರಿಶುದ್ಧೆರ್ ಆತಿನಕುಲಾದುಪ್ಪೊಡು ಅಂದ್‌ದ್ ಮೊಕ್ಲೆಗಾದ್ ಯಾನ್ ಎನನ್ ಪರಿಶುದ್ಧ ಮಲ್ತೊನ್ವೆ.

²⁰ “ಆಂಡ ಮೊಕ್ಲೆಗಾದ್ ಮಾತ್ರ ಅತ್ತಂದೆ, ಮೊಕ್ಲೆನ ಬೋಧನೆನ್ ಕೇಂಡ್ದ್ ಎನನ್ ನಂಬುನಾಕುಲೆಗಾದ್‌ಲಾ ನಟ್ಟೊಂದುಲ್ಲೆ.

²¹ ಅಮ್ಮೆರೇ, ಮಾತೆರ್ಲಾ ಒಂಜಾದುಪ್ಪೊಡು ಅಂದ್‌ದ್ ಈ ಎನನ್ ಕಡಪುಡ್ದು ಕೊರ್ತ ಅಂದ್‌ದ್ ಲೋಕದಾಕುಲು ನಂಬುನೆಕ್ಕಾದ್, ಈ ಎನಡ್ ಯಾನ್ ನಿನಡ್ ಉಪ್ಪುಲೆಕ್ಕ ಅಕುಲುಲಾ ನಮಡ್ ಒಂಜಾದುಪ್ಪೊಡು ಅಂದ್‌ದ್‌ಲಾ ಯಾನ್ ನಟ್ಟೊನ್ವೆ.

²² ಎಂಕುಲು ಒಂಜಾದುಪ್ಪುಲೆಕ್ಕ ಅಕುಲುಲಾ ಒಂಜಾದುಪ್ಪೊಡು ಅಂದ್‌ದ್, ಈ ಎಂಕ್ ಕೊರ್ತಿ ಮೈಮೆನ್ ಯಾನ್ ಅಕ್ಲೆಗ್ ಕೊರ್ತೆ.

²³ ಯಾನ್ ಅಕ್ಲೆಡಲಾ ಈ ಎನಡಲಾ ಉಪ್ಪುನಗ, ಅಕ್ಲೆನ ಸಮ್ಮಂಧಲಾ ತೋಜಿದ್ ಬರ್ಪಿನೆಡ್ದ್, ಈ ಎನನ್ ಕಡಪುಡ್ದು ಕೊರ್ತ ಪಂಡ್ದ್‌ಲಾ ಈ ಎನನ್ ಪ್ರೀತಿ ಮಲ್ತಿಲೆಕ್ಕ ಅಕ್ಲೆನ್ಲಾ ಈ ಪ್ರೀತಿ ಮಲ್ತ್‌ದ ಪಂಡ್ದ್‌ಲಾ ಲೋಕೊಗು ತೆರಿದ್ ಬರ್ಪುಂಡು.

²⁴ “ಅಮ್ಮೆರೇ, ಈ ಏರೆನ್ ಎಂಕ್ ಕೊರ್ತನಾ ಅಕುಲು ಯಾನ್ ಉಪ್ಪು ಜಾಗ್‌ಡ್ ಎನ ಒಟ್ಟುಗು ಇತ್ತೊಂದು, ಲೋಕ ಉಂಡಾಪಿನೆಡ್ದ್ ದುಂಬೇ ಈ ಎನನ್ ಪ್ರೀತಿ ಮಲ್ತ್‌ದ್ ಎಂಕ್ ಕೊರಿ ಮೈಮೆನ್ ಅಕುಲು ತೂವೊಡು ಅಂದ್‌ದ್ ಬಯಕುವೆ.

²⁵ ನೀತಿದ ಅಮ್ಮೆರೇ, ಲೋಕ ಆಂಡಲಾ ನಿನನ್ ತೆರಿಯಿಜಿ. ಆಂಡ ಯಾನ್ ನಿನನ್ ತೆರಿದೆ, ಬೊಕ್ಕ ಎನ ಶಿಷ್ಯೆರ್‌ಲು, ಈಯೇ ಎನನ್ ಕಡಪುಡ್ದ ಅಂದ್‌ದ್ ತೆರಿಯೊಂದೆರ್.

²⁶ ಯಾನ್ ಅಕ್ಲೆಗ್ ನಿನ ಪುದರ್‌ನ್ ತೆರಿಪಾದೆ ನನಲಾ ತೆರಿಪಾವೆ. ದಾಯೆಗಂದ್ಂಡ ಈ ಎನ ಮಿತ್ತ್ ದೀತಿ ಪ್ರೀತಿ ಅಕ್ಲೆಡ ಉಪ್ಪೊಡಂದ್‌ದ್ ಯಾನ್ಲಾ ಅಕ್ಲೆಡ ಉಪ್ಪೊಡಂದ್‌ದ್ ಪ್ರಾರ್ಥನೆ ಮಲ್ಪುವೆ.”