ಯೋಹಾನೆ 16 - ಪೊಸ ಒಡಂಬಡಿಕೆ

¹ “ನಿಕುಲು ನಂಬಿಕೆಡ್ ಪಿರ ಜಾರಿಯೆರೆ ಬಲ್ಲಿ ಅಂದ್‌ದ್ ಉಂದೆನ್ ಮಾತ ನಿಕ್ಲೆಗ್ ಪನ್ತೆ.

² ನಿಕ್ಲೆನ್ ಸಭಾಮಂದಿರೊಡ್ದು ಪಿದಯಿ ಪಾಡ್ವೆರ್. ಅವತ್ತಂದೆ ನಿಕ್ಲೆನ್ ಕೆರ್ಪಿನಾಯೆ, ತಾನ್ ದೇವೆರೆಗ್ ಯಜ್ಞ ಸೇವೆ ಮಲ್ತ್‌ದೆ ಪನ್ಪಿ ಕಾಲ ಬರ್ಪುಂಡು.

³ ಅಕುಲು ಎನನಾವಡ್ ಅಮ್ಮೆನಾವಡ್ ತೆರಿಯಂದೆ ಉಪ್ಪುನೆಡ್ದ್ ಉಂದೆನ್ ಮಾತ ನಿಕ್ಲೆಗ್ ಮಲ್ಪುವೆರ್.

⁴ ಆ ಕಾಲ ಬನ್ನಗ ನಿಕ್ಲೆನ ನೆನೆಪುಗು ಬರ್ಪಿಲೆಕ್ಕ ನಿಕ್ಲೆಡ ಈ ಪಾತೆರೊಲೆನ್ ಪನ್ಪೆ. ಯಾನ್ ನಿಕ್ಲೆಡೊಪ್ಪ ಇತ್ತಿನೆಡ್ದ್ ದುಂಬತ್ತನೇ ಉಂದೆನ್ ನಿಕ್ಲೆಗ್ ಪಂಡ್‌ದಿತ್ತ್‌ಜಿ.

ಪರಿಶುದ್ಧಾತ್ಮನ ಕೆಲಸೊಲು

⁵ “ಆಂಡ ಇತ್ತೆ ಯಾನ್ ಎನನ್ ಕಡಪುಡ್ದು ಕೊರಿನಾಯನ ಕೈತಲ್‌ ಪೋಪೆ, ‘ಆಂಡ ಯಾನ್ ಒಡೆಗ್ ಪೋಪೆ,’ ಅಂದ್‌ದ್ ನಿಕ್ಲೆಡ್ ಒರಿಲಾ ಎನನ್ ಕೇನುಜರ್.

⁶ ಉಂದತ್ತಂದೆ ಯಾನ್ ಈ ಪಾತೆರೊಲೆನ್ ನಿಕ್ಲೆಗ್ ಪಂಡಿನೆಡ್ದ್ ನಿಕ್ಲೆನ ಉಡಲ್ ದುಃಖೊಡು ದಿಂಜಿದುಂಡು.

⁷ ಆಂಡಲಾ ಯಾನ್ ನಿಕ್ಲೆಗ್ ಸತ್ಯೊನು ಪನ್ಪೆ, ಯಾನ್ ಪೋಪಿನವು ನಿಕ್ಲೆನ ಎಡ್ಡೆಗ್, ದಾಯೆ ಪಂಡ ಯಾನ್ ಪೋಯಿಜಿಡ ಆ ಆದರಿಪುನಾಯೆ ನಿಕ್ಲೆನ ಕೈತಲ್‌ ಬರ್ಪುಜೆ. ಯಾನ್ ಪೋಂಡ ಆಯನ್ ನಿಕ್ಲೆನ ಕೈತಲ್‌ ಕಡಪುಡ್ದು ಕೊರ್ಪೆ.

⁸ ಆಯೆ ಬತ್ತ್‌ದ್ ಪಾಪ, ನೀತಿ, ನ್ಯಾಯತೀರ್ಪುದ ಸಂಗತಿಡ್ಲಾ ಲೋಕೊಗು ತೆರಿಪಾದ್ ಕೊರ್ಪೆ.

⁹ ಅಕುಲು ಎನನ್ ನಂಬಂದೆ ಉಪ್ಪುನೆಡ್ದ್ ಪಾಪದ ಸಂಗತಿಡ್ಲಾ

¹⁰ ಯಾನ್ ಅಮ್ಮೆರೆ ಕೈತಲ್‌ ಪೋದು ನನ ಮಿತ್ತ್ ನಿಕ್ಲೆಗ್ ತೋಜಂದೆ ಉಪ್ಪುನೆಡ್ದ್ ನೀತಿದ ಸಂಗತಿಡ್ಲಾ

¹¹ ಭೂಲೋಕದ ಅಧಿಪತಿಗ್ ನ್ಯಾಯತೀರ್ಪು ಆಯಿನೆಡ್ದ್ ನ್ಯಾಯತೀರ್ಪುದ ವಿಷಯೊಡ್ಲಾ ಲೋಕೊಗು ತೆರಿಪಾದ್ ಕೊರ್ಪೆ.

¹² “ಯಾನ್ ನಿಕ್ಲೆಗ್ ಪನಿಯೆರೆ ಉಪ್ಪುನವು ನನಲಾ ಉಂಡು, ಆಂಡ ಸದ್ಯೊಗು ಅವೆನ್ ತುಂಬೊನಯರ್.

¹³ ಸತ್ಯದ ಆತ್ಮೆ ಬನ್ನಗ ಆಯೆ ನಿಕ್ಲೆನ್ ಮಾತ ಸಂಗತಿಲೆಡ್ ಸತ್ಯೊಗು ಸೇರಾವೆ; ಆಯೆ ತನ ಸಂಗತಿಡೇ ಪಾತೆರಂದೆ ತಾನ್ ಕೇಂಡಿನ ಪಾತೆರೊಲೆನೇ ಪನ್ಪೆ, ಅತ್ತಂದೆ ದುಂಬಗ್ ಆಪಿನೆನ್ ನಿಕ್ಲೆಗ್ ತೆರಿಪಾವೆ.

¹⁴ ಆಯೆ ಎನ ಉಲಯಿಡ್ ಇತ್ತಿನೆನೇ ನಿಕ್ಲೆಗ್ ತೆರಿಪಾದ್ ಎನನೇ ಮೈಮೆ ಪಡೆಪಾವೆ.

¹⁵ ಅಮ್ಮೆರೆಗ್ ಉಪ್ಪುನವು ಮಾತ ಎನ್ನವು. ಉಂದೆಕ್ಕಾದ್ ಎನಡ ಇತ್ತಿನೆನೇ ದೆತ್ತೊಂದು ನಿಕ್ಲೆಗ್ ತೆರಿಪಾವೆ ಅಂದ್‌ದ್ ಪಂಡೆ.

ಸಂತೋಷ ಬೊಕ್ಕ ದುಃಖ

¹⁶ “ಒಂತೆ ಸಮಯೊಡ್ದು ಬೊಕ್ಕ ಎನನ್ ನಿಕುಲು ತೂವಯರ್, ಕುಡ ಒಂತೆ ಸಮಯೊಡ್ದು ಬೊಕ್ಕ ಎನನ್ ತೂವರ್” ಅಂದ್‌ದ್ ಪಂಡೆ.

¹⁷ ಉಂದೆನ್ ಕೇಂಡ್ದ್ ಆಯನ ಶಿಷ್ಯೆರೆಡ್ ಕೆಲೆವೆರ್, “‘ಒಂತೆ ಸಮಯೊಡ್ದು ಬೊಕ್ಕ ಎನನ್ ನಿಕುಲು ತೂವಯರ್,’ ಕುಡ, ‘ಒಂತೆ ಸಮಯೊಡ್ದು ಬೊಕ್ಕ ಎನನ್ ತೂವರ್. ಬೊಕ್ಕ ಯಾನ್ ಎನ ಅಮ್ಮೆರೆ ಕೈತಲ್‌ ಪೋಪೆ,’ ಪನ್ಪಿನೆತ್ತ ಅರ್ಥ ಎಂಚಿನ ಆದುಪ್ಪು?

¹⁸ ‘ಒಂತೆ ಸಮಯ,’ ಪಂಡ ಎಂಚಿನ ಆದುಪ್ಪು? ಆಯೆ ಎಂಚಿನ ಪನ್ಪೆನಾ ಎಂಕ್ಲೆಗ್ ಗೊತ್ತಾಪುಜಿ.” ಪಂಡ್ದ್ ಪನ್ನೊಂದಿತ್ತೆರ್

¹⁹ ಅಪಗ ಯೇಸು ಅಕುಲು ಎನಡ ಕೇನ್ವೆರ್ ಅಂದ್‌ದ್ ತೆರಿದ್, “ಅಕ್ಲೆಗ್, ‘ಒಂತೆ ಸಮಯೊಡ್ದು ಬೊಕ್ಕ ಎನನ್ ನಿಕುಲು ತೂವಯರ್, ಕುಡ ಒಂತೆ ಸಮಯೊಡ್ದು ಬೊಕ್ಕ ಎನನ್ ತೂಪರ್,’ ಅಂದ್‌ದ್ ಯಾನ್ ಪಂಡಿನೆಕ್ಕ್, ನಿಕುಲು ನಿಕ್ಲೆನ ಉಲಯಿ ವಿಚಾರ ಮಲ್ತೊನ್ವರಾ?

²⁰ ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಬುಲ್ತೊಂದು ಅರಬಾಯಿ ಕೊರೊಂದು ಉಪ್ಪುವರ್, ಆಂಡ ಲೋಕ ಸಂತೋಷ ಮಲ್ಪು, ನಿಕುಲು ದುಃಖೊಡು ಉಪ್ಪುವರ್. ಆಂಡ ನಿಕ್ಲೆನ ದುಃಖ ಪೋದು ನಿಕ್ಲೆಗ್ ಸಂತೋಷ ಆಪುಂಡು.

²¹ ಒಂಜಿ ಪೊಂಜೊವು ಪೆದ್ದೆರೆ ಆನಗ ತನ ಬೇನೆದ ಗಳಿಗೆ ಬತ್ತ್ಂಡ್ ಅಂದ್‌ದ್ ಆಲೆಗ್ ಸಂಕಟ ಆಪುಂಡು, ಆಂಡ ಬಾಲೆನ್ ಪೆದ್ದಿ ಬೊಕ್ಕ ಲೋಕೊಡು ಒರಿ ನರಮಾನಿ ಪುಟ್ಟಿಯೆ ಅಂದ್‌ದ್ ಸಂತೋಷೊಡು ಆ ಬೇನೆನ್ ಮದಪುವಲ್.

²² ಅಂಚೆನೇ ನಿಕ್ಲೆಗ್ಲಾ ಇತ್ತೆ ದುಃಖ ಉಂಡು, ಆಂಡ ಯಾನ್ ನಿಕ್ಲೆನ್ ಕುಡೊರ ತೂವೆ, ಅಪಗ ನಿಕ್ಲೆನ ಉಡಲ್‌ಗ್ ಸಂತೋಷ ಆಪುಂಡು, ಬೊಕ್ಕ ನಿಕ್ಲೆನ ಆ ಸಂತೋಷೊನು ಏರ್ಲಾ ನಿಕ್ಲೆಡ್ದ್ ದೆತ್ತ್‌ದ್ ಪಾಡಾಯೆರ್.

²³ “ಆ ದಿನೊಟು ಎನಡ ದಾಲಾ ಕೇನಯರ್. ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಅಮ್ಮೆರೆಡ ಎನ ಪುದರ್‌ಡ್ ಒವೆನ್ ಕೇನೊಂಡಲಾ ಆಯೆ ನಿಕ್ಲೆಗ್ ಕೊರ್ಪೆ.

²⁴ ನಿಕುಲು ಇದ ಮುಟ್ಟ ಎನ ಪುದರ್‌ಡ್ ದಾಲಾ ಕೇಂಡ್ದ್‌ಜರ್, ನಟ್ಟೊನ್ಲೆ, ಅಪಗ ನಿಕ್ಲೆಗ್ ತಿಕ್ಕುಂಡು ಬೊಕ್ಕ ನಿಕ್ಲೆನ ಸಂತೋಷ ಪರಿಪೂರ್ಣ ಆಪುಂಡು.

ಲೋಕದ ಮಿತ್ತ್ ಜಯ

²⁵ “ಯಾನ್ ಈ ಸಂಗತಿಲೆದ ಅರ್ಥೊನು ನಿಕ್ಲೆಗ್ ಉಪಕತೆತ್ತ ರೂಪೊಡು ಪನ್ತೆ, ಆಂಡ ನನ ಮಿತ್ತ್ ಉಪಕತೆತ್ತ ರೂಪೊಡು ನಿಕ್ಲೆಡ ಪಾತೆರಂದೆ, ಅಮ್ಮೆರೆನ ಸಂಗತಿಡ್ ಸಜ್ಜಿಡ್ ತೆರಿಪಾವುನ ಕಾಲ ಬೇಗ ಬರ್ಪುಂಡು.

²⁶ ಆ ದಿನೊಟು ನಿಕುಲು ಎನ ಪುದರ್‌ಡ್ ಸೀದ ಅಮ್ಮೆರೆಡನೇ ಕೇನ್ವರ್, ನಿಕ್ಲೆಗಾದ್ ಯಾನ್ ಅಮ್ಮೆರೆಡ ನಟ್ಟೊನೊಡು ಪನ್ಪಿನ ಅಗತ್ಯ ಇಜ್ಜಿ.

²⁷ ದಾಯೆಗ್ ಪಂಡ ನಿಕುಲು ಎನನ್ ಪ್ರೀತಿ ಮಲ್ತ್‌ದ್ ಯಾನ್ ದೇವೆರೆನ ಕೈತಲ್‌ಡ್ದ್ ಪಿದಾಡ್ದ್ ಬೈದಿನಾಯೆ ಅಂದ್‌ದ್ ನಂಬಿನೆಡ್ದ್ ಅಮ್ಮೆ ನಿಕ್ಲೆನ್ ಪ್ರೀತಿ ಮಲ್ಪುವೆ.

²⁸ ಅಮ್ಮೆರೆ ಕೈತಲ್‌ಡ್ದ್ ಪಿದಾಡ್ದ್ ಈ ಲೋಕೊಗು ಬೈದೆ. ನನ ಈ ಲೋಕೊನು ಬುಡ್ದು ಎನ ಅಮ್ಮೆರೆ ಕೈತಲ್‌ ಪೋಪೆ,” ಪಂಡೆ.

²⁹ ಐಕ್ ಶಿಷ್ಯೆರ್, “ಈ ಪನ್ಪಿನ ಸಂಗತಿಲೆನ್ ಇತ್ತೆ ಅರ್ಥ ಆಪಿಲೆಕ್ಕ ಸ್ಪಷ್ಟಾದ್ ಪನೊಂದುಲ್ಲ ಉಪಕತೆಟ್ ಅತ್ತ್.

³⁰ ಈ ಸಮಸ್ತೊನ್ಲಾ ತೆರಿದಿನಾಯೆ ಪಂಡ್ದ್‌ಲಾ ನಿಕ್ಕ್ ಪ್ರಶ್ನೆ ಮಲ್ಪುನ ಅಗತ್ಯ ಇಜ್ಜಿ ಪಂಡ್ದ್‌ಲಾ ಇತ್ತೆ ತೆರಿಂಡ್. ಉಂದೆಡ್ದಾದ್ ಈ ದೇವೆರೆ ಕೈತಲ್‌ಡ್ದ್ ಬೈದಿನಾಯೆ ಅಂದ್‌ದ್ ನಂಬುವ,” ಪಂಡೆರ್.

³¹ ಐಕ್ ಯೇಸು, “ಇತ್ತೆ ನಂಬುವರಾ?

³² ತೂಲೆ, ನಿಕ್ಲೆಡ್ ಒರಿ ಒರಿ ಚಲ್ಲಾಪಿಲ್ಲಿ ಆದ್ ನಿಕುಲು ಮಾತೆರ್ ನಿಕ್ಲೆನ ಸ್ವಂತ ಜಾಗ್‌ಗ್ ಪೋದು ಎನನ್ ಒಂಟಿಯಾದ್ ಬುಡ್ಪಿ ಕಾಲ ಬರ್ಪುಂಡು, ಅವು ಇತ್ತೆ ಬೈದ್‌ಂಡ್, ಆಂಡ ಯಾನ್ ಒಂಟಿಯೆ ಅತ್ತ್. ಅಮ್ಮೆ ಎನಡೊಪ್ಪ ಉಲ್ಲೆ.

³³ ನಿಕುಲು ಎನಡೊಪ್ಪ ಇತ್ತ್‌ದ್ ಉಡಲ್‌ದ ಸಮಾಧಾನೊನು ಪಡೆವೊಡು ಅಂದ್‌ದ್ ಈ ಸಂಗತಿಲೆನ್ ನಿಕ್ಲೆಗ್ ಪಂತೆ. ಲೋಕೊಡು ನಿಕ್ಲೆಗ್ ಸಂಕಟ ಉಂಡು, ಆಂಡ ಧೈರ್ಯೊಡುಪ್ಪುಲೆ, ಯಾನ್ ಲೋಕೊನು ಗೆಂದ್‌ದೆ,” ಪಂಡೆ.