ಯೋಹಾನೆ 15 - ಪೊಸ ಒಡಂಬಡಿಕೆಯೇಸು, ನಿಜವಾಯಿನ ದ್ರಾಕ್ಷೆದಬೂರು 1 “ಯಾನೇ ನಿಜವಾಯಿನ ದ್ರಾಕ್ಷೆಬೂರು. ಎನ ಅಮ್ಮೆ ತೋಟದಾಯೆ. 2 ಎನಡಿತ್ತ್‌ದ್ ಫಲ ಕೊರಂದಿ ಪ್ರತಿಯೊಂಜಿ ಗೆಲ್ಲ್‌ಲೆನ್ ಆಯೆ ದೆತ್ತ್ ಪಾಡ್ವೆ. ಫಲ ಕೊರ್ಪಿನ ಪ್ರತಿಯೊಂಜಿ ಗೆಲ್ಲ್‌ಲೆನ್ ಹೆಚ್ಚ್ ಫಲ ಕೊರ್ಪಿಲೆಕ್ಕ ಅವೆನ್ ಶುದ್ಧ ಮಲ್ಪುವೆ. 3 ಯಾನ್ ನಿಕ್ಲೆಗ್ ಪಂಡಿನ ಪಾತೆರೊಡ್ದು ನಿಕುಲು ಇತ್ತೆ ಶುದ್ಧ ಆದುಲ್ಲರ್. 4 ನಿಕುಲು ಎನಡ ನಿಲೆ ಆದುಪ್ಪುಲೆ, ಯಾನ್ಲಾ ನಿಕ್ಲೆಡ ನಿಲೆ ಆದುಪ್ಪುವೆ. ಗೆಲ್ಲುಲು ತನ್ನಾತೆಗ್ ಫಲ ಕೊರಿಯೆರೆ ಸಾದ್ಯ ಇಜ್ಜಿ. ಗೆಲ್ಲ್ ಬೂರುದೊಟ್ಟುಗು ಇತ್ತ್ಂಡ ಮಾತ್ರ ಫಲ ಕೊರೊಲಿ. ಅಂಚೆನೇ ನಿಕುಲುಲಾ ಎನಡ ನಿಲೆ ಆದ್ ಇಜ್ಜರ್ಡ ನಿಕುಲು ಫಲ ಕೊರಯರ್. 5 “ಯಾನ್ ದ್ರಾಕ್ಷೆಬೂರು, ನಿಕುಲು ಐತ ಗೆಲ್ಲ್‌ಲು. ಏರ್ಲಾ ಒರಿ ಎನಡ ಯಾನ್ ಆಯಡ ನಿಲೆ ಆದಿತ್ತ್ಂಡ ಮಾತ್ರ ಆಯೆ ಹೆಚ್ಚ್ ಫಲ ಕೊರ್ಪೆ. ನಿಕುಲು ಎನನ್ ಬುಡ್ದು ದಾಲಾ ಮಲ್ಪೆರೆ ಆಪುಜಿ. 6 ಏರ್ ಎನಡ ನಿಲೆ ಆದುಪ್ಪುಜೆನಾ ಆಯನ್ ಕಡ್ತಿನ ಗೆಲ್ಲ್‌ದಲೆಕ್ಕ ಪಿದಯಿ ದಕ್ಕುವೆರ್ ಅವು ನುಂಗುದು ಪೋಪುಂಡು. ಅಂಚಿತ್ತಿ ಗೆಲ್ಲ್‌ಲೆನ್ ಕೂಡಾದ್ ತೂಕು ಪಾಡ್ವೆರ್, ಅವು ಪೊತ್ತುದು ಪೋಪುಂಡು. 7 ನಿಕುಲು ಎನಡೊಪ್ಪಲಾ ಎನ ಪಾತೆರೊಲು ನಿಕ್ಲೆಡೊಪ್ಪಲಾ ನಿಲೆ ಆದಿತ್ತ್ಂಡ, ನಿಕ್ಲೆಗ್ ಬೋಡಾಯಿನೆನ್ ಕೇನೊಂಡ, ಅವು ನಿಕ್ಲೆಗ್ ತಿಕ್ಕುಂಡು. 8 ನಿಕುಲು ಹೆಚ್ಚ್ ಫಲ ಕೊರ್ಪಿನೆಡ್ದೇ ಎನ ಅಮ್ಮೆರೆಗ್ ಮೈಮೆ ಉಂಡಾಪುಂಡು, ಅವೆಡ್ದ್ ನಿಕುಲು ಎನ ಶಿಷ್ಯೆರಂದ್‌ದ್ ತೋಜಾವುಂಡು. 9 ಅಮ್ಮೆ ಎನನ್ ಪ್ರೀತಿ ಮಲ್ತಿಲೆಕ್ಕ, ಯಾನ್ಲಾ ನಿಕ್ಲೆನ್ ಪ್ರೀತಿ ಮಲ್ತ್‌ದೆ. ಎನ ಪ್ರೀತಿಡ್ ನಿಕುಲು ನಿಲೆ ಆದುಪ್ಪುಲೆ. 10 ಯಾನ್ ಎನ ಅಮ್ಮೆರೆನ ಅಪ್ಪಣೆಲೆನ್ ಕೈಕೊಂದು, ಆಯಡ ಪ್ರೀತಿಡ್ ನಿಲೆ ಆದಿತ್ತಿಲೆಕ್ಕ, ನಿಕುಲು ಎನ ಅಪ್ಪಣೆಲೆನ್ ಕೈಕೊನುವರ್ಡ, ಎನ ಪ್ರೀತಿಡ್ ನಿಕುಲು ನಿಲೆ ಆದುಪ್ಪುವರ್. 11 “ಎನಡ ಉಪ್ಪು ಸಂತೋಷ ನಿಕ್ಲೆಡ ಉಪ್ಪೊಡು, ಬೊಕ್ಕ ನಿಕ್ಲೆಡ ಉಪ್ಪು ಸಂತೋಷ ಪೂರ ಆದ್ ದಿಂಜೊಡು ಅಂದ್‌ದ್ ಉಂದೆನ್ ಮಾತ ನಿಕ್ಲೆಗ್ ಪನ್ತೆ. 12 ಯಾನ್ ನಿಕ್ಲೆನ್ ಪ್ರೀತಿ ಮಲ್ತಿಲೆಕ್ಕ, ನಿಕುಲುಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನನೇ, ಯಾನ್ ನಿಕ್ಲೆಗ್ ಕೊರ್ಪಿನ ಅಪ್ಪಣೆ ಆದುಂಡು. 13 ಒರಿ ಸ್ನೇಹಿತೆರೆಗಾದ್ ತನ ಪ್ರಾಣೊನೇ ಕೊರಿಯೆಡ, ಐಡ್ದ್ ಹೆಚ್ಚ್‌ದ ಪ್ರೀತಿ ಒವುಲಾ ಇಜ್ಜಿ. 14 ಯಾನ್ ಕೊರಿನ ಅಪ್ಪಣೆಗ್ ಸರಿಯಾದ್ ನಿಕುಲು ನಡತರ್ಡ ಮಾತ್ರ, ನಿಕುಲು ಎನ ಸ್ನೇಹಿತೆರ್. 15 ನನ ಮಿತ್ತ್ ಯಾನ್ ನಿಕ್ಲೆನ್ ಚಾಕ್ರಿದಾಕುಲು ಅಂದ್‌ದ್ ಪನ್ಪುಜಿ. ಧನಿ ಎಂಚಿನ ಮಲ್ಪುವೆ ಅಂದ್‌ದ್ ಬೇಲೆದಾಯಗ್ ತೆರಿಯುಜಿ. ನಿಕ್ಲೆನ್ ಸ್ನೇಹಿತೆರೆ ಅಂದ್‌ದ್ ಪನ್ತೆ, ಅಮ್ಮೆರೆಡ್ದ್ ಕೇಂಡಿನೆನ್ ಮಾತೆನ್ ನಿಕ್ಲೆಗ್ ತೆರಿಪಾದೆ. 16 ನಿಕುಲು ಎನನ್ ಅಜತ್‌ದ್ ದೆತ್ತೊಂದಿಜರ್, ಆಂಡ ಯಾನ್ ನಿಕ್ಲೆನ್ ಅಜತ್‌ದ್ ದೆತ್ತೊಂದೆ. ನಿಕುಲು ಪೋದು ಫಲ ಕೊರ್ಪಿನಾಕುಲು ಆದುಪ್ಪೊಡು ಅಂದ್‌ದ್‌ಲಾ ನಿಕುಲು ಕೊರ್ಪಿನ ಫಲ ನಿಲೆಯಾದುಪ್ಪುಲೆಕ್ಕ ನಿಕ್ಲೆನ್ ನೇಮಕ ಮಲ್ತ್‌ದೆ. ಇಂಚ ಉಪ್ಪುನಗ ಎನ ಪುದರ್‌ಡ್ ಅಮ್ಮೆರೆಡ ಒವೆನ್ ಕೇನೊಂಡಲಾ ಆಯೆ ನಿಕ್ಲೆಗ್ ಕೊರ್ಪೆ. 17 ಒರಿಯನ್ ಒರಿ ಪ್ರೀತಿ ಮಲ್ಪೊಡು ಅಂದ್‌ದ್ ಯಾನ್ ನಿಕ್ಲೆಗ್ ಅಪ್ಪಣೆ ಕೊರ್ಪೆ. ಲೋಕದ ಪಗೆ 18 “ಲೋಕ ನಿಕ್ಲೆನ್ ಪಗೆ ಮಲ್ಪುನಾಂಡ, ಅವು ಎನನ್ಲಾ ನಿಕ್ಲೆಡ್ದ್ ದುಂಬು ಪಗೆ ಮಲ್ತ್ಂಡ್ ಪಂಡ್ದ್ ಎನ್ನೊನ್ಲೆ. 19 ನಿಕುಲು ಲೋಕದಾಕುಲು ಆದಿತ್ವರ್ಡ, ಲೋಕ ತನ್ನಾಯೆ ಪಂಡ್ದ್ ಪ್ರೀತಿ ಮಲ್ತುದು. ಆಂಡ ನಿಕುಲು ಲೋಕದಾಕುಲು ಆದುಪ್ಪಂದಿನೆಡ್ದ್‌ಲಾ ಯಾನ್ ನಿಕ್ಲೆನ್ ಲೋಕದುಲಯಿಡ್ದ್ ಅಜತ್‌ದ್ ದೆತ್ತೊಂಡಿನೆಡ್ದ್‌ಲಾ ಲೋಕ ನಿಕ್ಲೆನ್ ಪಗೆ ಮಲ್ಪುಂಡು. 20 ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್ ಅಂದ್‌ದ್ ಯಾನ್ ಪನ್ತಿನೆನ್ ನೆನೆಪು ಮಲ್ತೊನ್ಲೆ. ಅಕುಲು ಎಂಕ್ ಭಂಗ ಕೊರ್ಪೆರ್ಡ, ನಿಕ್ಲೆಗ್ಲಾ ಭಂಗ ಕೊರುವೆರ್. ಅಕುಲು ಎನ ಪಾತೆರೊನು ಕೈಕೊಂದು ನಡತೆರ್ಡ, ನಿಕ್ಲೆನ ಪಾತೆರೊಲೆನ್ಲಾ ಕೈಕೊಂದು ನಡಪುವೆರ್. 21 ಆಂಡ ಅಕುಲು ಎನನ್ ಕಡಪುಡ್ದು ಕೊರಿನಾಯನ್ ತೆರಿಯಂದಿನಾಕುಲು ಆದಿತ್ತಿನೆಡ್ದ್, ಎನ ಪುದರ್‌ಗಾದ್ ಇಂಚ ಮಾತ ಮಲ್ಪುವೆರ್. 22 ಯಾನ್ ಬತ್ತ್‌ದ್ ಅಕ್ಲೆಡ ಪಾತೆರಂದೆ ಇತ್ತೆಡ, ಅಕ್ಲೆಗ್ ಪಾಪ ಇತ್ತ್‌ದ್ವಂದ್. ಆಂಡ ಇತ್ತೆ ಅಕುಲು ಮಲ್ತಿನ ಪಾಪೊಲೆಗಾದ್ ಅಕ್ಲೆಗ್ ನೆವನ ಕೊರಿಯೆರೆ ಆಪುಜಿ. 23 ಎನನ್ ಪಗೆ ಮಲ್ಪುನಾಯೆ ಎನ ಅಮ್ಮೆರೆನ್ಲಾ ಪಗೆ ಮಲ್ಪುವೆ 24 ಬಾಕಿದಾಕುಲು ಏರ್ಲಾ ಮಲ್ಪಂದಿ ಬೇಲೆಲೆನ್ ಯಾನ್ ಅಕ್ಲೆಡ ನಡಪಾವಂದೆ ಇತ್ತೆಡ, ಅಕ್ಲೆಗ್ ಪಾಪ ಇತ್ತ್‌ದ್ವಂದ್. ಆಂಡ ಇತ್ತೆ ಅಕುಲು ತೂತೆರ್, ಆಂಡಲಾ ಎನ ಮಿತ್ತ್‌ಲಾ ಎನ ಅಮ್ಮೆರೆ ಮಿತ್ತ್‌ಲಾ ಪಗೆ ಮಲ್ಪುವೆರ್. 25 ‘ಅಕುಲು ಎನನ್ ಕಾರಣದಾಂತೆ ಪಗೆ ಕಟ್ಟೊಂದೆರ್,’ ಅಂದ್‌ದ್ ಅಕ್ಲೆನ ನ್ಯಾಯಕಟ್ಟ್‌ಡ್ ಬರೆದುಪ್ಪು ಪಾತೆರೊಲು ಪೂರ್ತಿ ಆಪಿಲೆಕ್ಕ ಇಂಚ ಆಂಡ್. 26 “ಆಂಡ ಅಮ್ಮೆರೆ ಕೈತಲ್‌ಡ್ದ್ ಯಾನ್ ನಿಕ್ಲೆಗಾದ್ ಒರಿ ಆದರಿಪುನಾಯನ್ ಕಡಪುಡ್ದು ಕೊರ್ಪೆ. ಆ ಸತ್ಯದ ಆತ್ಮೆ ಅಮ್ಮೆರೆಡ್ದ್ ಬತ್ತಿ ಬೊಕ್ಕ ಎನ ಸಂಗತಿಡ್ ಸಾಕ್ಷಿ ಕೊರ್ಪೆ. 27 ನಿಕುಲು ಸುರುಡ್ದು ಎನಡೊಪ್ಪ ಇತ್ತಿನೆಡ್ದ್ ಎನ ಸಂಗತಿಡ್ ಸಾಕ್ಷಿ ಕೊರ್ಪರ್. |
New Life Literature