ಯೋಹಾನೆ 13 - ಪೊಸ ಒಡಂಬಡಿಕೆ

ಯೇಸು ಶಿಷ್ಯೆರೆನ ಕಾರ್ ದೆಕ್ಕಿನವು

¹ ಪಸ್ಕ ಪರ್ಬೊಡ್ದು ದುಂಬು, ಯೇಸು ತಾನ್ ಈ ಲೋಕೊನು ಬುಡ್ದು, ಅಮ್ಮೆ ಕೈತಲ್‌ ಪೋಪಿ ಕಾಲ ಬತ್ತ್ಂಡ್ ಅಂದ್‌ದ್ ತೆರಿಯೊಂದು, ಲೋಕೊಡುಪ್ಪು ತನ್ನಾಕುಲೆನ್ ಪ್ರೀತಿ ಮಲ್ತ್‌ದ್, ಕಡೆ ಮುಟ್ಟಲಾ ಅಕ್ಲೆನ್ ಪ್ರೀತಿ ಮಲ್ತೊಂದೇ ಬತ್ತೆ.

² ಯೇಸು ಬೊಕ್ಕ ಆಯನ ಶಿಷ್ಯೆರ್ ರಾತ್ರೆದ ವಣಸ್‌ಗ್ ಕುಲ್ಲೊಂದಿತ್ತೆರ್. ಆತ್‌ನೆಟ್ಟ ಸೈತಾನೆ, ಸೀಮೋನನ ಮಗೆ ಆಯಿ ಇಸ್ಕಾರಿಯೋತೆ ಯೂದನ ಮನಸ್‌ಡ್ ಯೇಸುನು ಪತ್ತ್‌ದ್ ಕೊರೊಡು ಇನ್ಪಿ ಆಲೋಚನೆನ್ ಪುಟ್ಟಾಯೆ.

³ ಅಮ್ಮೆ ತನ ಕೈಟ್ ಮಾತೆನ್ಲಾ ಕೊರ್ತೆ ಅಂದ್‌ದ್ ತಾನ್ ದೇವೆರೆ ಕಡೆಡ್ದ್ ಬೈದಿನಾಯೆ ಆದ್ ದೇವೆರೆ ಕೈತಲ್‌ ಪೋಪೆ ಪಂಡ್ದ್‌ಲಾ ಯೇಸು ತೆರಿಯೊಂದು

⁴ ವಣಸ್‌ನ್ ಬುಡ್ದು, ತಾನ್ ಪೊದೆತೊಂದಿತ್ತಿ ಕುಂಟುನು ದೆತ್ತ್‌ದ್ ದೀದ್ ಬೈರಾಸ್‌ನ್ ದೆತ್ತೊಂದು ಸೊಂಟೊಗು ಕಟ್ಟೊಂಡೆ.

⁵ ಬೊಕ್ಕ ಬಾಜನೊಡು ನೀರ್ ಪಾಡೊಂದು ಶಿಷ್ಯೆರೆನ ಕಾರ್ ದೆಕ್ಕೊಂದು, ಸೊಂಟೊಗು ಕಟ್ಟೊಂದಿ ಬೈರಾಸ್‌ಡ್ ಒಚ್ಚೆರೆ ಸುರು ಮಲ್ತೆ.

⁶ ಇಂಚ ಸೀಮೋನು ಪೇತ್ರ ಕೈತಲ್‌ ಬನ್ನಗ, ಆಯೆ ಯೇಸುಗು, “ಕರ್ತವಾ, ಈ ಎನ ಕಾರ್ ದೆಕ್ಕುವನಾ?” ಅಂದ್‌ದ್ ಪಂಡೆ.

⁷ ಐಕ್ ಯೇಸು, “ಯಾನ್ ಇತ್ತೆ ಮಲ್ಪುನವು ನಿಕ್ಕ್ ತೆರಿಯಂದ್, ಆಂಡ ದುಂಬಗ್ ನಿಕ್ಕ್ ತೆರಿಯು,” ಪಂಡೆ.

⁸ ಅಪಗ ಪೇತ್ರೆ, “ಈ ಎನ ಕಾರ್ ಏಪೊಗ್ಲಾ ದೆಕ್ಕೆರೆ ಬಲ್ಲಿ.” ಅಂದ್‌ದ್ ಪಂಡಿನೆಕ್ಕ್ ಯೇಸು, “ಯಾನ್ ನಿನನ್ ದೆಕ್ಕಿಜೆಡ ಎನ ಒಟ್ಟುಗು ನಿಕ್ಕ್ ಪಾಲ್ ಉಪ್ಪಂದ್,” ಪಂಡೆ.

⁹ ಅಪಗ ಸೀಮೋನೆ ಪೇತ್ರೆ, “ಕರ್ತವಾ, ಎನ ಕಾರ್ ಮಾತ್ರ ಅತ್ತಂದೆ, ಕೈ ಬೊಕ್ಕ ತರೆನ್ಲಾ ದೆಕ್ಕ್‌ಲ,” ಪಂಡೆ.

¹⁰ ಯೇಸು ಆಯಗ್, “ಮೀದುಪ್ಪುನಾಯನ ಕಾರ್ ದೆಕ್ಕೊಡು ಅತ್ತಂದೆ, ಬೇತೆ ದಾಲಾ ದೆಕ್ಕೊಡು ಅಂದ್‌ದ್ ಇಜ್ಜಿ, ಆಯನ ಮೆಯಿ ಮಾತ ಶುದ್ಧ ಆದುಂಡು, ನಿಕುಲು ಶುದ್ಧ ಆದುಲ್ಲರ್, ಆಂಡ ಮಾತೆರ್ಲಾ ಅತ್ತ್.” ಪಂಡೆ.

¹¹ ಯೇಸು ತನನ್ ಒಚ್ಚಿದ್ ಕೊರ್ಪಿನಾಯೆ ಇಂಚಿತ್ತಿನಾಯೆನೇ ಅಂದ್‌ದ್ ತೆರಿದಿತ್ತಿನೆಡ್ದ್, “ನಿಕುಲು ಶುದ್ಧ ಆದುಲ್ಲರ್, ಆಂಡ ಮಾತೆರ್ಲಾ ಅತ್ತ್,” ಪಂಡೆ.

¹² ಆಯೆ ಅಕ್ಲೆನ ಕಾರ್ ದೆಕ್ಕಿ ಬೊಕ್ಕ, ತನ ಪೊದೆಪುನು ಪೊದ್ಯೊಂದು, ಕುಡ ವಣಸ್‌ಗ್ ಕುಲ್ಲುದು ಅಕ್ಲೆಡ, “ಯಾನ್ ನಿಕ್ಲೆಗ್ ಮಲ್ತಿನವು ಎಂಚಿನವು ಅಂದ್‌ದ್ ತೆರಿಂಡಾ?”

¹³ “ನಿಕುಲು ಎನನ್ ಗುರು ಪಂಡ್ದ್‌ಲಾ ಕರ್ತವಾ ಪಂಡ್ದ್‌ಲಾ ಲೆಪ್ಪುವರ್,” ನಿಕುಲು ಲೆಪ್ಪುನವು ಸರಿ, ದಾಯೆಗಂದ್ಂಡ ಯಾನ್ ಅಂಚಿತ್ತಿನಾಯೆನೇ.

¹⁴ ಕರ್ತವೆಲಾ ಗುರುಲಾ ಆಯಿ ಯಾನ್, ನಿಕ್ಲೆನ ಕಾರ್ ದೆಕ್ಕಿನೆಡ್ದ್, ನಿಕುಲುಲಾ ಒರಿಯಗ್ ಒರಿ ಕಾರ್ ದೆಕ್ಕುನ ಹಂಗ್‌ದಾಕುಲಾದುಲ್ಲರ್.

¹⁵ ಯಾನ್ ನಿಕ್ಲೆಗ್ ಮಲ್ತ್ ತೊಜಾಯಿಲೆಕ್ಕ, ನಿಕುಲುಲಾ ಮಲ್ಪೊಡಂದ್‌ದ್ ನಿಕ್ಲೆಗ್ ಮಾದ್ರಿನ್ ತೋಜಾದೆ.

¹⁶ ನಿಕ್ಲೆಗ್ ನಿಜಾದ್ ಪನ್ಪೆ, ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್. ಕಡಪುಡ್ದು ಕೊರಿನಾಯೆ ಕಡಪುಡ್ಡಿನಾಯಡ್ದ್ ಮಲ್ಲಾಯೆ ಅತ್ತ್.

¹⁷ ನಿಕುಲು ಉಂದೆನ್ ತೆರಿಯೊಂದು ನೆತ್ತಲೆಕ್ಕ ಮಲ್ತರ್ಡ ನಿಕುಲು ಭಾಗ್ಯವಂತೆರ್.

¹⁸ “ಯಾನ್ ನಿಕ್ಲೆನ ಸಂಗತಿಡ್ ಈ ಪಾತೆರ ಪನ್ಪಿನಿ ಅತ್ತ್. ಅಜತ್ ದೆತ್ತೊಂಡಿನಾಕುಲೆನ್ ಯಾನ್ ತೆರಿದೆ. ಆಂಡ, ‘ಎನ್ನೊಟ್ಟುಗು ವಣಸ್ ಮಲ್ಪುನಾಯೆನೇ ಎಂಕ್ ಅಡ್ಡ ಕಾರ್ ದೀತೆ.’ ಪನ್ಪಿ ಶಾಸ್ತ್ರೊಡು ಬರೆತಿ ಪಾತೆರ ನಡಪುಡೊಡು.

¹⁹ ಅವು ನಡಪುನಗ ‘ಯಾನೇ ಆಯೆ,’ ಅಂದ್‌ದ್ ನಿಕುಲು ನಂಬುಲೆಕ್ಕ ಅವು ನಡಪುಡುನೆಡ್ದ್ ದುಂಬು, ಅವೆನ್ ಇತ್ತೆ ನಿಕ್ಲೆಗ್ ಪನ್ಪೆ.

²⁰ ನಿಕ್ಲೆಗ್ ನಿಜಾದ್ ಪನ್ಪೆ, ಯಾನ್ ಕಡಪುಡಿನಾಯನ್ ಸೇರಾವೊನುನಾಯೆ ಎನನ್ ಸೇರಾವೊಂಡಿಲೆಕ್ಕ ಆಂಡ್. ಎನನ್ ಸೇರಾವೊಂಡೆಡ ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ ಆಂಡ್.”

ಯೂದೆ ಯೇಸುನು ಪತ್ತ್ ಕೊರ್ಪಿನೆನ್ ತೆರಿಪಾವುನವು

²¹ ಉಂದೆನ್ ಪಂಡಿ ಬೊಕ್ಕ ಯೇಸು ಆತ್ಮೊಡು ಬೆಂಗ್‌ದ್, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ,” ಅಂದ್‌ದ್ ಸ್ಪಷ್ಟಾದ್ ಪಂಡೆ.

²² ಉಂಬೆ ಏರೆನ ಸಂಗತಿಡ್ ಈ ಪಾತೆರೊನು ಪನೊಂದುಲ್ಲೆ, ಅಂದ್‌ದ್ ಶಿಷ್ಯೆರ್ ಅನುಮಾನೊಡು, ಒರಿಯನ್ ಒರಿ ತೂಪಿನಕುಲಾಯೆರ್.

²³ ಶಿಷ್ಯೆರೆಡ್ ಒರಿ ಯೇಸುನ ಪ್ರೀತಿದ ಶಿಷ್ಯೆ, ಯೇಸುನ ತಿಗಲೆದ ಕೈತಲ್‌ ಒರಗ್ದಿತ್ತೆ.

²⁴ ಆಯಗ್ ಸೀಮೋನು ಪೇತ್ರೆ ಸನ್ನೆ ಮಲ್ತ್‌ದ್, “ಏರೆನ ಸಂಗತಿಡ್ ಪಾತೆರಿಯೆ,” ಅಂದ್‌ದ್ ಯೇಸುಡ ಕೇನಿಯೆರೆ ಪಂಡೆ.

²⁵ ಐಕ್ ಆ ಶಿಷ್ಯೆ ಯೇಸುನ ತಿಗಲೆದಂಚಿ ಬಗ್ಗ್‌ದ್, “ಕರ್ತವಾ, ಆಯೆ ಏರ್?” ಅಂದ್‌ದ್ ಕೇಂಡೆ.

²⁶ ಐಕ್ ಯೇಸು, “ಯಾನ್ ಈ ರೊಟ್ಟಿ ತುಂಡುನು ಮುರ್ಕಾದ್ ಏರೆಗ್ ಕೊರ್ಪೆನಾ ಆಯೆನೇ,” ಅಂದ್‌ದ್ ಆ ರೊಟ್ಟಿ ತುಂಡುನು ಮುರ್ಕಾದ್, ಸೀಮೋನು ಮಗೆ ಆಯಿ ಇಸ್ಕಾರಿಯೋತೆ ಯೂದಗ್ ಕೊರಿಯೆ.

²⁷ ಆಯೆ ಅವೆನ್ ದೆತ್ತೊಂಡಿ ಕೂಡ್ಲೆ ಸೈತಾನೆ ಆಯನ ಉಲಯಿ ಪೊಗ್ಗಿಯೆ. ಅಪಗ ಯೇಸು ಆಯಗ್, “ಈ ಮಲ್ಪೊಡಾಯಿನೆನ್ ಬೇಗ ಮಲ್ಪುಲ!” ಅಂದ್‌ದ್ ಪಂಡೆ.

²⁸ ಯೇಸು ಆಯಗ್ ಉಂದೆನ್ ದಾಯೆಗಾದ್ ಪಂಡೆ ಪಂಡ್ದ್, ವಣಸ್‌ಗ್ ಕುಲ್ಲುದಿನಾಕುಲೆಗ್ ಏರೆಗ್ಲಾ ಗೊತ್ತಾಯಿಜಿ.

²⁹ ಅಕ್ಲೆಡ್ ಕೆಲೆವೆರ್ ಪಣವುದ ಚೀರವು ಯೂದಡ ಇತ್ತಿನೆಡ್ದ್, ಪರ್ಬೊಗಾದ್ ಅಕ್ಲೆಗ್ ಬೋಡಾಯಿನೆನ್ ದೆತ್ತೊನ್ಲ ಅಂದ್‌ದ್ ಬಡವೆರೆಗ್ ದಾದಾಂಡಲಾ ಕೊರೊಡು ಪಂಡ್ದ್‌ಲಾ ಯೇಸು ಆಯಗ್ ಪನೊಂದುಲ್ಲೆ ಅಂದ್‌ದ್ ಎನ್ನಿಯೆರ್.

³⁰ ಆಯೆ ಆ ರೊಟ್ಟಿ ತುಂಡುನು ದೆತ್ತೊಂದು, ಕೂಡ್ಲೇ ಪಿದಯಿ ಪೋಯೆ. ಅಪಗ ರಾತ್ರೆ ಆದಿತ್ತ್ಂಡ್.

ಪೊಸ ಅಪ್ಪಣೆ

³¹ ಆಯೆ ಪಿದಯಿ ಪೋಯಿ ಬೊಕ್ಕ ಯೇಸು, “ಇತ್ತೆ ನರಮಾನಿ ಮಗೆ ಮೈಮೆನ್ ಪಡೆಯೊಂಡೆ, ಬೊಕ್ಕ ದೇವೆರ್‌ಲಾ ಆಯಡ್ದ್ ಮೈಮೆ ಪಡೆತೆ.

³² ಆಯಡ್ದ್ ದೇವೆರೆಗ್ ಮೈಮೆ ಆಯಿನೆಡ್ದ್, ತನಡ್ದ್ ದೇವೆರ್ ಆಯನ್ ಮೈಮೆ ಪಡೆಪಾದ್ ಕೂಡ್ಲೆ ಮೈಮೆ ಪಡೆಪಾವೆ.

³³ ಎನ ಜೋಕುಲೇ, ನನ ಒಂತೆ ಸಮಯ ಮಾತ್ರ ನಿಕ್ಲೆಡೊಪ್ಪ ಉಲ್ಲೆ. ನಿಕುಲು ಎನನ್ ನಾಡುವರ್, ಆಂಡ ಯಾನ್ ಪೋಪಿನಡೆ ನಿಕ್ಲೆಗ್ ಬರಿಯೆರೆ ಆವಂದ್, ಅಂದ್‌ದ್ ಯೆಹೂದ್ಯೆರೆಗ್ ಪಂಡಿಲೆಕ್ಕ ಇತ್ತೆ ನಿಕ್ಲೆಗ್ಲಾ ಪನ್ಪೆ.

³⁴ ಯಾನ್ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆನ್ ಕೊರ್ಪೆ. ಅವು ದಾದ ಪಂಡ ನಿಕುಲು ಒರಿಯನ್ ಒರಿ ಪ್ರೀತಿ ಮಲ್ಪುಲೆ; ಯಾನ್ ನಿಕ್ಲೆನ್ ಪ್ರೀತಿ ಮಲ್ತಿಲೆಕ್ಕ ನಿಕುಲುಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ.

³⁵ ನಿಕುಲು ಒರಿಯನ್ ಒರಿ ಪ್ರೀತಿ ಮಲ್ತರ್ಡ, ಮಾತೆರ್ಲಾ ನಿಕ್ಲೆನ್ ಎನ ಶಿಷ್ಯೆರ್ ಅಂದ್‌ದ್ ತೆರಿಯೊನ್ವೆರ್,” ಪಂಡೆ.

ಪೇತ್ರೆ ಅರೆಂಜುನ ಸಂಗತಿನ್ ತೆರಿಪಾಯಿನವು

³⁶ ಸೀಮೋನು ಪೇತ್ರೆ ಯೇಸುಡ, “ಕರ್ತವಾ, ಈ ಒಡೆಗ್ ಪೋಪ?” ಅಂದ್‌ದ್ ಕೇಂಡಿನೆಕ್ಕ್ ಯೇಸು, “ಯಾನ್ ಪೋಪಿನಡೆಗ್, ಇತ್ತೆ ಬರಯ. ಆಂಡ ಬೊಕ್ಕ ಎನ ಬೆರಿಯೆ ಬರುವ.” ಪಂಡೆ.

³⁷ ಪೇತ್ರೆ ಆಯಗ್, “ಕರ್ತವಾ ಯಾನ್ ದಾಯೆ ಇತ್ತೆ ನಿನ ಬೆರಿಯೆ ಬರಯೆ? ನಿಕ್ಕಾದ್ ಎನ ಪ್ರಾಣೊನ್ಲಾ ಕೊರುವೆ,” ಅಂದ್‌ದ್ ಪನ್ನಗ

³⁸ ಯೇಸು, “ಎಂಕಾದ್ ಪ್ರಾಣ ಕೊರ್ಪನಾ? ನಿಕ್ಕ್ ನಿಜಾದ್ ಪನ್ಪೆ, ಈ ಎನ ಸಂಗತಿಡ್, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಅರೆಂಜುನೆಟ್ಟ ಕೋರಿ ಕೆಲೆಪಂದ್,” ಪಂಡೆ.