ಯೋಹಾನೆ 12 - ಪೊಸ ಒಡಂಬಡಿಕೆ

ಬೇಥಾನ್ಯೊಡು ಯೇಸುಗು ತೈಲಾಭಿಷೇಕ ಮಲ್ಪುನವು

¹ ಪಸ್ಕ ಪರ್ಬೊಗು ನನಲಾ ಆಜಿ ದಿನ ಉಪ್ಪುನಗ ಯೇಸು ಬೇಥಾನ್ಯೊಗು ಬತ್ತೆ. ಸೈತಿನಾಕುಲೆಡ್ದ್ ಲಕ್ಕ್‌ದ್ ಬತ್ತಿ ಲಾಜರೆ ಅವುಲು ಇತ್ತೆ.

² ಯೇಸುಗು ರಾತ್ರೆದ ವಣಸ್ ತಯಾರ್ ಮಲ್ತೆರ್, ಮಾರ್ಥ ಬಲಸೊಂದಿತ್ತಲ್. ಲಾಜರೆಲಾ ಆಯನ ಒಟ್ಟುಗು ವಣಸ್‌ಗ್ ಕುಲ್ದಿನಾಕುಲೆಡ್ ಒರಿ ಆದಿತ್ತೆ.

³ ಅಪಗ ಮರಿಯ ಮಸ್ತ್ ಬಿಲೆತ ಕಮ್ಮೆನದ ಜಟಮಾಂಸಿದ ಎಣ್ಣೆನ್ ಸಾಧಾರಣ ಒಂಜಿ ಸೇರ್ ದಾತ್ ಕನತ್‌ದ್ ಯೇಸುನ ಕಾರ್‌ಗ್ ಪೂಜಿದ್ ಬೊಕ್ಕ ತನ ತರೆ ಕುಜಲ್‌ಡ್ದ್ ಆಯನ ಕಾರ್‌ಲೆನ್ ಒಚ್ಚಿಯಲ್. ಆ ಎಣ್ಣೆದ ಕಮ್ಮೆನ ಇಲ್ಲ್ ನಿಲಿಕೆ ದಿಂಜಿಂಡ್.

⁴ ಅಪಗ ಆಯ ಶಿಷ್ಯೆರೆಡ್ ಒರಿ ಆದಿತ್ತಿ ಯೇಸುನು ಪತ್ತ್‌ದ್ ಕೊರಿಯೆರೆ ಆಲೋಚನೆ ಮಲ್ತೊಂದಿತ್ತಿ ಇಸ್ಕಾರಿಯೋತೆ ಯೂದೆ,

⁵ “ಈ ಎಣ್ಣೆನ್ ಮುನ್ನೂದು ಬೊಳ್ಳಿದ ಪಾವೊಲಿಗ್ ಮಾರ್ದ್ ಬಡವೆರೆಗ್ ಕೊರ್ತೊಲಿ ಅತ್ತಾ?” ಅಂದ್‌ದ್ ಪಂಡೆ.

⁶ ಆಯೆ ಬಡವೆರೆ ಚಿಂತೆಡ್ ಉಂದೆನ್ ಪಂಡಿಜೆ; ಆಯೆ ಕಲ್ವೆ ಆದಿತ್ತ್‌ದ್, ತನ ಕೈಟಿತ್ತಿ ಪಣವುದ ಚೀರವುಡು ಪಾಡ್ದಿನೆನ್ ಕಂಡೊನುನ ಅಭ್ಯಾಸ ಇತ್ತಿನೆಡ್ದೇ ಇಂಚ ಪಂಡೆ.

⁷ ಅಪಗ ಯೇಸು, “ಆಲೆನ್ ಬುಡ್ಲೆ; ಎನನ್ ಕೌಂಪು ದಿನೊಕಾದ್ ಉಂದೆನ್ ದೀವೊಂಡಲ್.

⁸ ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್, ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ ಪಂಡೆ.”

ಲಾಜರನ್ ಕೆರಿಯೆರೆ ಉಪಾಯ ಮಲ್ಪುನವು

⁹ ಯೆಹೂದ್ಯೆರೆ ಜನೊಕುಲೆ ಮಲ್ಲ ಗುಂಪು ಆಯೆ ಅಲ್ಪ ಉಲ್ಲೆ ಅಂದ್‌ದ್ ತೆರಿದ್ ಯೇಸುನು ತೂಯೆರೆ ಮಾತ್ರತ್ತಂದೆ ಸೈತ್‌ದ್ ಜೀವ ಆದ್ ಲಕ್ಕ್‌ದಿನ ಲಾಜರ್‌ನ್ಲಾ ತೂವೊಡು ಅಂದ್‌ದ್ ಬತ್ತೆರ್.

¹⁰ ಆಂಡ ಪ್ರಧಾನಯಾಜಕೆರ್ ಲಾಜರ್‌ನ್ಲಾ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್.

¹¹ ದಾಯೆಗಂದ್ಂಡ ಆಯನ ದಿಸೆಡ್ದ್ ಮಸ್ತ್ ಜನ ಯೆಹೂದ್ಯೆರ್ ಅಕ್ಲೆನ್ ಬುಡ್ದು, ಯೇಸುನು ನಂಬುನಾಕುಲು ಆಯೆರ್.

ಯೆರೂಸಲೇಮುಗು ಯೇಸುನ ಅರಸು ಮರ್ಜಿದ ಪ್ರವೇಶ

¹² ಮನದಾನಿ ಪಸ್ಕ ಪರ್ಬದ ಜಾತ್ರೆಗ್ ಬೈದಿನ ಜನೊಕುಲೆ ಗುಂಪು ಯೇಸು ಯೆರೂಸಲೇಮುಗು ಬರ್ಪೆ ಅಂದ್‌ದ್ ತೆರಿದ್,

¹³ ಈಚಿಲ್‌ದ ಗೆಲ್ಲ್‌ಲೆನ್ ಪತ್ತೊಂದು ಆಯನ್ ಎದುಕೊನಿಯೆರೆ ಪಿದಯಿ ಬತ್ತ್‌ದ್, “ಹೊಸನ್ನಾ! ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ, ಇಸ್ರಾಯೇಲ್‌ದ ಅರಸುಗು ಆಶೀರ್ವಾದ,” ಬೊಬ್ಬೆ ಪಾಡಿಯೆರ್.

¹⁴ ಬೊಕ್ಕ ಯೇಸು ಅಲ್ಪ ಇತ್ತಿನ ಕತ್ತೆದ ಕಿನ್ನಿನ್ ತರ್ಪಾದ್ ಐತ ಮಿತ್ತ್ ಕುಲ್ಲಿಯೆ, ಉಂದೆಡ್ದ್ ಶಾಸ್ತ್ರೊಡು ಬರೆತಿನಂಚನೆ ಆಂಡ್.

¹⁵ “ಚೀಯೋನು ಮಗಲೇ, ಪೋಡ್ಯಡ; ಇಂದಾ, ನಿನ ಅರಸು ಕತ್ತೆದ ಕಿನ್ನಿದ ಮಿತ್ತ್ ಕುಲ್ಲೊಂದು ಬರುವೆ,” ಇನ್ಪಿ ಶಾಸ್ತ್ರದ ಪಾತೆರದಂಚೆನೇ ಮಾತ ನಡತ್ಂಡ್.

¹⁶ ಉಂದು ಆಯ ಶಿಷ್ಯೆರೆಗ್ ದುಂಬು ಗೊತ್ತಿಜ್ಜಾಂಡ್. ಆಂಡ ಯೇಸು ಮೈಮೆದ ಪಟ್ಟೊಗು ಸೇರಿ ಬೊಕ್ಕ, ಉಂದು ಆಯ ವಿಷಯೊಡೇ ಬರೆದಿತ್ತ್‌ಂಡ್ ಪಂಡ್ದ್‌ಲಾ ಎಂಕುಲು ಉಂದೆನ್ ಮಾತ ಆಯಗ್ ಮಲ್ತ ಪಂಡ್ದ್‌ಲಾ ನೆನೆಪುಗು ಬತ್ತ್ಂಡ್.

¹⁷ ಉಂದತ್ತಂದೆ ಯೇಸು ಲಾಜರ್‌ನ ಸಮಾಧಿದ ಉಲಯಿಡ್ದ್ ಲೆತ್ತ್‌ದ್, ಜೀವ ಕೊರಿನ ಗಳಿಗೆಡ್, ಆಯಡೊಪ್ಪ ಇತ್ತಿನ ಜನೊಕುಲು ಈ ವಿಷಯೊಡು ಸಾಕ್ಷಿ ಕೊರೊಂದಿತ್ತೆರ್.

¹⁸ ಆಯೆ ಈ ಕಾರ್ನಿಕೊಲೆನ್ ಮಲ್ತ್‌ದೆ ಅಂದ್‌ದ್ ಕೇಂಡಿನೆಡ್ದ್ ಜನೊಕುಲು ಆಯನ್ ಎದುಕೊನಿಯೆರೆ ಪೋದಿತ್ತೆರ್,

¹⁹ ಇಂಚ ಉಪ್ಪುನಗ ಪರಿಸಾಯೆರ್, “ನಮ ತಂತ್ರೊಲು ದಾಲಾ ನಡತಿಜಿ, ತೂಲೆ; ಲೋಕ ಮಾತ ಆಯ ಬೆರಿಯೆ ಪೋಂಡತ್ತಾ!” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.

ಕೆಲವು ಗ್ರೀಕೆರ್ ಯೇಸುನು ತೂಯಿನವು

²⁰ ಉಂದತ್ತಂದೆ ದೇವೆರೆನ್ ಆರಾಧನೆ ಮಲ್ಪೊಡಂದ್ ಪರ್ಬೊಗು ಬೈದಿನೆಟ್ಟ್ ಕೆಲೆವೆರ್ ಗ್ರೀಕೆರ್ ಇತ್ತೆರ್.

²¹ ಮೊಕುಲು ಆಯಡ, ಗಲಿಲಾಯೊಡುಪ್ಪುನ ಬೆತ್ಸಾಯಿದ ಪನ್ಪಿ ಊರುದ ಫಿಲಿಪ್ಪನ ಕೈತಲ್‌ ಬತ್ತ್‌ದ್, “ಅಯ್ಯಾ, ಎಂಕ್ಲೆಗ್ ಯೇಸುನು ತೂವೊಡು,” ಅಂದ್‌ದ್ ನಟ್ಟೊಂಡೆರ್.

²² ಫಿಲಿಪ್ಪೆ ಬತ್ತ್‌ದ್ ಅಂದ್ರೇಯಗ್ ಪಂಡೆ. ಅಂದ್ರೆಯೆಲಾ ಫಿಲಿಪ್ಪೆಲಾ ಇರ್ವೆರ್‌ಲಾ ಯೇಸುಗು ಪಂಡೆರ್.

²³ ಅಪಗ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ನರಮಾನಿ ಮಗಕ್ಕ್ ತನ ಮೈಮೆದ ಸ್ಥಾನೊನು ದೆತ್ತೊನುನ ಗಳಿಗೆ ಬೈದ್‌ಂಡ್.”

²⁴ ನಿಕ್ಲೆಗ್ ನಿಜಾದ್ ಪನ್ಪೆ, ಗೋದಿದ ಬಿತ್ತ್ ಭೂಮಿಗ್ ಬೂರ್ದು ಸೈತ್‌ಜಿಡ, ಅಂಚೆನೇ ಒರಿಯುಂಡು, ಸೈತ್ಂಡ ಮಸ್ತ್ ಫಲ ಕೊರ್ಪುಂಡು.

²⁵ ತನ ಪ್ರಾಣೊನು ಪ್ರೀತಿ ಮಲ್ತಿನಾಯೆ ಅವೆನ್ ಕಳೆವೊನುವೆ. ಈ ಲೋಕೊಡು ತನ ಪ್ರಾಣೊನು ಪಗೆ ಮಲ್ಪುನಾಯೆ ಅವೆನ್ ನಿತ್ಯಜೀವೊಗು ಒರಿಪಾವೊನ್ವೆ.

²⁶ ಏರಾಂಡಲಾ ಎನ ಸೇವೆ ಮಲ್ಪುನಾಂಡ, ಎನ ಬೆರಿಯೆ ಬರಡ್; ಬೊಕ್ಕ ಯಾನ್ ಓಲು ಉಪ್ಪುವೆನಾ ಅವುಲು ಎನ ಸೇವಕೆಲಾ ಉಪ್ಪುವೆ. ಏರಾಂಡಲಾ ಎನ ಸೇವೆ ಮಲ್ಪುನಾಂಡ ಎನ ಅಮ್ಮೆ ಆಯಗ್ ಸನ್ಮಾನ ಮಲ್ಪುವೆ.

ಯೇಸು ಬೊಲ್ಪುದ ಸಂಗತಿನ್ ತೆರಿಪಾವುನವು

²⁷ “ಇತ್ತೆ ಎನ ಪ್ರಾಣ ಸಂಕಟೊಡು ಉಂಡು, ‘ಅಮ್ಮೆರೇ, ಈ ಸ್ಥಿತಿಡ್ದ್ ಎನನ್ ಬುಡ್ಪಾಲ, ಪಂಡ್ದ್ ಯಾನ್ ಪನೊಡಾ?’ ಅತ್ತ್, ಉಂದೆಕ್ಕಾದ್ ಈ ಗಳಿಗೆಗ್ ಬತ್ತೆ.

²⁸ ಅಮ್ಮೆರೇ, ನಿನ ಪುದರ್‌ಗ್ ಮೈಮೆ ತೋಜಾಲ!” ಅಪಗ, “ಮೈಮೆ ತೋಜಾದೆ, ಕುಡ ಮೈಮೆ ತೋಜಾವೆ.” ಪಂಡ್ದ್ ಬಾನೊಡ್ದು ಒಂಜಿ ಸ್ವರ ಕೇಂಡ್.

²⁹ ಅವುಲು ಉಂತೊದಿತ್ತಿ ಜನೊಕುಲು ಅವೆನ್ ಕೇಂಡ್ದ್, ತೆಡಿಲ್ ಬತ್ತ್ಂಡ್ ಪಂಡೆರ್, ನನ ಕೆಲೆವೆರ್, “ದೂತೆ ಆಯಡ ಪಾತೆರಿಯೆ!” ಪಂಡೆರ್.

³⁰ ಆಂಡ ಯೇಸು ಅಕ್ಲೆಗ್, “ಈ ಸ್ವರ ಎಂಕಾದ್ ಬೈದಿಜಿ; ನಿಕ್ಲೆಗಾದ್ ಬೈದ್‌ಂಡ್.

³¹ ಇತ್ತೆ ಈ ಲೋಕೊಗು ನ್ಯಾಯತೀರ್ಪು ಆಪುಂಡು; ಇತ್ತೆ ಈ ಲೋಕದ ಅಧಿಪತಿ ಸೈತಾನನ್ ಪಿದಯಿ ಪಾಡುಂಡು.

³² ಆಂಡ ಎನನ್ ಭೂಮಿಡ್ದ್ ಮಿತ್ತ್ ಏರಾನಗ, ಮಾತೆರೆನ್ಲಾ ಎನ ಕೈತಡೆ ಒಯಿತೊನುವೆ,” ಅಂದ್‌ದ್‌ ಪಂಡೆ.

³³ ಈ ಪಾತೆರೊಡು ತಾನ್ ಇಂಚಿತ್ತಿ ಮರಣೊನು ಸೈಯರೆ ಉಲ್ಲೆ ಪಂಡ್ದ್ ಕಾರಣ ಕೊರಿಯೆ.

³⁴ ಐಕ್ ಆ ಜನೊಕುಲೆನ ಗುಂಪು, “ಕ್ರಿಸ್ತೆ ಏಪೊಗ್ಲಾ ಉಪ್ಪುನಾಯೆ ಅಂದ್‌ದ್ ನ್ಯಾಯಕಟ್ಟ್‌ಡ್ ಕೇಂಡ್ದ. ಅಂಚಾಂಡ ‘ನರಮಾನಿ ಮಗೆ ಮಿತ್ತ್ ಏರಾವೊನೊಡು,’ ಅಂದ್‌ದ್ ಈ ದಾಯೆ ಪನ್ಪ? ಆ ನರಮಾನಿ ಮಗೆ ಏರ್?” ಅಂದ್‌ದ್ ಕೇಂಡೆರ್.

³⁵ ಯೇಸು ಅಕ್ಲೆಗ್, “ನನ ಒಂತೆ ಸಮಯನೇ ಬೊಲ್ಪು ನಿಕ್ಲೆಡ್ ಉಪ್ಪುಂಡು, ಕತ್ತಲೆ ನಿಕ್ಲೆನ್ ಸುತ್ತು ಪಾಡೊಡ್ದು ದುಂಬೇ ಬೊಲ್ಪುದ ಸಾದಿಡ್ ನಡಪುಲೆ. ಕತ್ತಲೆದ ಸಾದಿಡ್ ನಡಪುನಾಯಗ್ ತಾನ್ ಒಡೆಗ್ ಪೋಪೆ ಅಂದ್‌ದ್ ಗೊತ್ತಾಪುಜಿ.

³⁶ ಬೊಲ್ಪು ನಿಕ್ಲೆ ಕೈತಲ್‌ ಉಪ್ಪುನಗನೇ ಬೊಲ್ಪುನು ನಂಬುಲೆ; ನಂಬುಂಡ ನಿಕುಲು ಬೊಲ್ಪುದ ಜೋಕುಲು ಆದುಪ್ಪುವರ್,” ಅಂದ್‌ದ್ ಪಂಡೆ. ಉಂದೆನ್ ಪಂಡಿ ಬೊಕ್ಕ ಯೇಸು ಅಕ್ಲೆನ್ ಬುಡ್ದು ಪೋದು ದೆಂಗ್‌ದ್ ಕುಲ್ಲಿಯೆ.

ಯೆಹೂದ್ಯೆರೆ ಅಪನಂಬಿಕೆ

³⁷ ಯೇಸು ಕಾರ್ನಿಕೊಲೆನ್ ಅಕ್ಲೆ ಎದುರು ಮಲ್ತ್ಂಡಲಾ ಜನೊಕುಲು ಆಯನ್ ನಂಬಂದೆ ಪೋಯೆರ್.

³⁸ ಉಂದೆಡ್ದ್ ಪ್ರವಾದಿ ಆಯಿ ಯೆಶಾಯೆ ಪಂಡಿನ ಪಾತೆರ ನಡತ್ಂಡ್; ಅವು ದಾನೆ ಪಂಡ, “ಕರ್ತವಾ, ಎಂಕ್ಲೆನ ಬೋಧನೆನ್ ಏರ್ ನಂಬಿಯೆರ್? ಕರ್ತವಾ, ನಿನ ಪುಗೆಲ್‌ದ ಬಲ ಏರೆಗ್ ತೋಜಿದ್ ಬತ್ತ್ಂಡ್?” ಪನ್ಪಿನವು.

³⁹ ಅಕುಲು ನಂಬಂದೆ ಪೋಯಿನೆಕ್ಕ್, ಯೆಶಾಯೆ ತನ ಬೊಕ್ಕೊಂಜಿ ಪಾತೆರೊಡು ಕಾರಣ ಕೊರ್ತೆ, ಅವು ದಾನೆಂದ್ಂಡ,

⁴⁰ “ಅಕುಲು ಕಣ್ಣ್‌ಡ್ ತೂವಂದೆ, ಉಡಲ್‌ಡ್ ತೆರಿಯಂದೆ, ಅಕುಲು ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ, ದೇವೆರ್ ಅಕ್ಲೆನ ಕಣ್ಣ್‌ಲೆನ್ ಮಂದ ಮಲ್ತ್‌ದ್, ಅಕ್ಲೆನ ಉಡಲ್‌ನ್ ಕಲ್ಲ್ ಮಲ್ತೆ.” ಪನ್ಪಿನವೇ.

⁴¹ ಯೇಸುನ ಮೈಮೆನ್ ತೂದು ಆಯನ ಸುದ್ಧಿನ್ ಪಾತೆರ್‌ನಗ ಯೆಶಾಯೆ ಈ ಪಾತೆರೊನು ಪಂಡೆ.

⁴² ಅಂಚಾಂಡಲಾ ಮುಖ್ಯ ಅಧಿಕಾರಿಲೆಡ್ ಮಸ್ತ್ ಜನ ಆಯನ್ ನಂಬಿಯೆರ್. ಆಂಡ ತನ್ಕುಲೆನ್ ಸಭೆಡ್ದ್ ಪಿದಯಿ ಪಾಡೆರ್ ಪಂಡ್ದ್ ಪರಿಸಾಯೆರೆಗ್ ಪೋಡಿದ್, ಅವೆನ್ ಜನೊಕುಲೆ ದುಂಬು ಪಂಡೊನುಜೆರ್.

⁴³ ದಾಯೆ ಪಂಡ, ದೇವೆರೆಡ್ದ್ ತಿಕ್ಕು ಮಾನೊಡ್ಡು, ಜನೊಕುಲೆಡ್ದ್ ಬರ್ಪಿ ಮಾನನೇ ಅಕುಲು ಪ್ರೀತಿ ಮಲ್ತೆರ್.

ಯೇಸುನ ಪಾತೆರೊಲು ತೀರ್ಪು ಕೊರ್ಪುಂಡು

⁴⁴ ಯೇಸು ಗಟ್ಟಿಡ್ ಇಂಚ ಪಂಡೆ, “ಎನನ್ ನಂಬುನಾಯೆ, ಎನನೇ ನಂಬಿನಾಯೆ ಅತ್ತ್, ಆಂಡ ಎನನ್ ಕಡಪುಡ್ದು ಕೊರ್ತಿನಾಯನ್ ನಂಬುನಾಯೆ ಆದುಲ್ಲೆ.

⁴⁵ ಬೊಕ್ಕ ಎನನ್ ತೂಪಿನಾಯೆ, ಎನನ್ ಕಡಪುಡ್ದು ಕೊರಿನಾಯನ್ ತೂಪಿನಾಯೆ ಆದುಲ್ಲೆ.

⁴⁶ ಎನನ್ ನಂಬುನ ಒರಿಯಾಂಡಲಾ ಕತ್ತಲೆಡ್ ಉಪ್ಪೆರೆ ಬಲ್ಲಿ ಪಂಡ್ದ್ ಯಾನ್ ಲೋಕೊಗು ಬೊಲ್ಪಾದ್ ಬೈದೆ.

⁴⁷ ಏರಾಂಡಲಾ ಎನ ಪಾತೆರೊಲೆನ್ ಕೇಂಡ್ದ್, ಐಕ್ ತಕ್ಕ ನಡಪಂದೆ ಪೋಂಡ, ಯಾನ್ ಅಕ್ಲೆಗ್ ತೀರ್ಪು ಮಲ್ಪುಜಿ. ಲೋಕೊಗು ತೀರ್ಪು ಮಲ್ಪೆರೆ ಯಾನ್ ಬೈದಿಜಿ, ಆಂಡ ಲೋಕೊನು ಒರಿಪಾವೆರೆ ಯಾನ್ ಬೈದೆ.

⁴⁸ ಎನನ್ ತಿರಸ್ಕಾರ ಮಲ್ಪುನಾಯೆ, ಎನ ಪಾತೆರೊಲೆನ್ ತರಕೊನಂದೆ ಉಪ್ಪುನಾಯಗ್, ತೀರ್ಪು ಮಲ್ಪುನವು ಒಂಜಿ ಉಂಡು. ಅವು ಯಾನ್ ಪಂತಿ ಪಾತೆರನೇ, ಅವ್ವೇ ಕಡೆತ ದಿನೊಟು ಆಯಗ್ ತೀರ್ಪು ಮಲ್ಪುಂಡು.

⁴⁹ ದಾಯೆ ಪಂಡ ಎನ್ನಾತೆಗ್ ಎನ ಅಧಿಕಾರೊಡು ಪಾತೆರ್‌ದಿಜಿ; ಎನನ್ ಕಡಪುಡ್ದು ಕೊರ್ತಿನ ಅಮ್ಮೆ, ಈ ಇಂಚಿಂಚಿನೆನ್ ಪನೊಡು, ಬೊಕ್ಕ ಇಂಚಿಂಚ ಪಾತೆರೊಡು ಪನೊಡು ಪಂಡ್ದ್ ಎಂಕ್ ಅಪ್ಪಣೆ ಕೊರ್ತೆ.

⁵⁰ ಆಯೆ ಕೊರ್ತಿ ಅಪ್ಪಣೆ ನಿತ್ಯಜೀವದವು ಆದುಂಡಂದ್‌ದ್ ಯಾನ್ ತೆರಿದೆ. ಅಂಚಾಯಿನೆಡ್ದ್ ಯಾನ್ ಪಾತೆರುನ ಮಾತೆನ್ಲಾ ಅಮ್ಮೆ ಎಂಕ್ ಪಂಡಿಲೆಕ್ಕನೇ ಪಾತೆರ್‌ವೆ.”