ಯೋಹಾನೆ 11 - ಪೊಸ ಒಡಂಬಡಿಕೆ

ಲಾಜರನ ಮರಣ

¹ ಬೇಥಾನ್ಯ ಊರುಡು ಲಾಜರೆ ಪನ್ಪಿನಾಯೆ ಸೀಕ್‌ಡಿತ್ತೆ. ಅವು ಮಾರ್ಥ ಬೊಕ್ಕ ಮರಿಯ ಪನ್ಪಿ ಮೆಗ್ದಿಪಲಿ ಇತ್ತಿನ ಊರು.

² ಈ ಮರಿಯ, ಕರ್ತವನ ಪಾದೊಗು ಕಮ್ಮೆನದ ಎಣ್ಣೆನ್ ಪೂಜಿದ್ ತರೆಕುಜಲ್‌ಡ್ ಒಚ್ಚಿದಿನಾಲ್. ಆಲೆನ ಮೆಗ್ಯೆ ಲಾಜರೆ ಸೀಕ್‌ಡಿತ್ತೆ.

³ ಇಂಚ ಉಪ್ಪುನಗ ಸಹೋದ್ರಿಲು, “ಕರ್ತವಾ, ನಿನ ಪ್ರೀತಿದ ಸ್ನೇಹಿತೆ ಸೀಕ್‌ಡುಲ್ಲೆ,” ಪಂಡ್ದ್ ಯೇಸುಗು ಪಂಡ್ ಕಡಪುಡಿಯೆರ್.

⁴ ಯೇಸು ಉಂದೆನ್ ಕೇಂಡ್ದ್, “ಈ ಸೀಕ್ ಸೈಯೆರೆಂದ್ ಬೈದಿನವು ಅತ್ತ್, ಉಂದೆಡ್ದ್ ದೇವೆರೆ ಮಗಕ್ ಮೈಮೆ ಉಂಡಾಪಿಲೆಕ್ಕ, ದೇವೆರೆ ಮೈಮೆಗಾದ್ ಬೈದಿನವು,” ಅಂದ್‌ದ್ ಪಂಡೆ.

⁵ ಮಾರ್ಥಡಲಾ ಆಲೆನ ಮೆಗ್ದಿಡಲಾ ಬೊಕ್ಕ ಲಾಜರಡಲಾ ಯೇಸುಗು ಬಾರಿ ಪ್ರೀತಿ ಇತ್ತ್ಂಡ್.

⁶ ಆಂಡಲಾ ಲಾಜರೆ ಸೀಕ್‌ಡ್ ಉಲ್ಲೆ ಪನ್ಪಿನೆನ್ ಆಯೆ ತೆರಿ ಬೊಕ್ಕ ರಡ್ಡ್ ದಿನ, ಇತ್ತಿನ ಜಾಗ್‌ಡೇ ಉಂತಿಯೆ

⁷ ಐಡ್ದ್ ಬೊಕ್ಕ ತನ ಶಿಷ್ಯೆರೆಗ್, “ಪಿರ ಯೂದಾಯೊಗು ಪೋಯಿ,” ಪಂಡೆ.

⁸ ಶಿಷ್ಯೆರ್, “ಓ ಗುರೂ, ಯೆಹೂದ್ಯೆರ್ ನಿನನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಇತ್ತೆರ್, ಪಿರ ಅಡೆಗೇ ಪೋಪನಾ?” ಪಂಡ್ದ್ ಕೇಂಡೆರ್.

⁹ ಐಕ್ ಯೇಸು, “ಪಗೆಲ್‌ಗ್ ನನಲಾ ಪದ್ರಾಡ್ ಗಂಟೆ ಉಂಡತ್ತಾ, ಒರಿ ಪಗೆಲ್ಡ್ ತಿರ್ಗಿಯೆಡ ಈ ಲೋಕದ ಬೊಲ್ಪು ತೋಜುನೆಡ್ದ್ ಆಯೆ ದಂಟಯೆ.

¹⁰ ಆಂಡ ರಾತ್ರೆಡ್ ನಡಪುನಾಯೆ ಬೊಲ್ಪು ದಾಂತಿನೆಡ್ದ್ ದಂಟುವೆ,” ಅಂದ್‌ದ್ ಉತ್ತರ ಕೊರಿಯೆ.

¹¹ ಈ ಪಾತೆರ ಪಂಡಿ ಬೊಕ್ಕ ಅಕ್ಲೆಗ್, “ನಮ ಸ್ನೇಹಿತೆ ಲಾಜರೆ ನಿದ್ರೆ ಮಲ್ತೊಂದುಲ್ಲೆ; ಯಾನ್ ಆಯನ್ ನಿದ್ರೆಡ್ದ್ ಲಕ್ಕಾಯೆರೆಗಾದ್ ಪೋವೊಂದುಲ್ಲೆ,” ಪಂಡೆ.

¹² ಐಕ್ ಶಿಷ್ಯೆರ್, “ಕರ್ತವಾ, ಆಯೆ ನಿದ್ರೆ ಮಲ್ತೊಂದಿತ್ತೆಡ ಸೌಖ್ಯ ಆಪೆ,” ಅಂದ್‌ದ್ ಪಂಡೆರ್.

¹³ ಯೇಸು ಲಾಜರನ ಮರಣದ ಸಂಗತಿಡ್ ತೆರಿಪಾದ್ ಪಂಡ್ದಿತ್ತೆ; ಆಂಡ ಅಕುಲು ಆಯೆ ನಿದ್ರೆದ ಬಚ್ಚೆಲ್‌ದ ಸಂಗತಿಡ್ ಪನ್ಪೆ ಅಂದ್‌ದ್ ಎನ್ನಿಯೆರ್.

¹⁴ ಅಪಗ ಯೇಸು ಅಕ್ಲೆಗ್ ಬುಡ್ಪಾದ್ ಪಂಡೆ, “ಲಾಜರೆ ಸೈತ್ ಪೋತೆ,

¹⁵ ಯಾನ್ ಅಲ್ಪ ದಾಂತಿನೆಡ್ದ್ ನಿಕ್ಲೆ ಪರವಾದ್ ಸಂತೋಷ ಮಲ್ಪುವೆ, ದಾಯೆ ಪಂಡ ಆಯಡ್ದ್ ನಿಕುಲು ನಂಬಿಯೆರೆ ಒಂಜಿ ಸಾದಿ ಆಂಡ್, ಬಲೆ ಆಯ ಕೈತಲ್‌ ಪೋಯಿ,” ಅಂದ್‌ದ್ ಪಂಡೆ.

¹⁶ ಅಪಗ ದಿದುಮೆ ಪನ್ಪಿ ತೋಮೆ, ಬಾಕಿದ ಶಿಷ್ಯೆರೆಡ, “ನಮಲಾ ಪೋಯಿ ಆಯಡೊಪ್ಪ ಸೈಕ,” ಪಂಡೆ.

ಯೇಸು ಪುನರುತ್ಥಾನಲಾ ಜೀವಲಾ ಆದುಲ್ಲೆ

¹⁷ ಯೇಸು ಬತ್ತಿತ್ತಿನಪಗ, ಲಾಜರನ್ ಸಮಾಧಿಡ್ ದೀದ್ ನಾಲ್ ದಿನ ಆದಿತ್ತ್ಂಡ್ ಅಂದ್‌ದ್ ಆಯಗ್ ತೆರಿದ್ ಬತ್ತ್ಂಡ್.

¹⁸ ಬೇಥಾನ್ಯ ಯೆರೂಸಲೇಮುಗು ಕೈತಲಿತ್ತ್‌ಂಡ್, ಅಲ್ತ್‌ಡ್ದ್ ಅಡೆಗ್ ಸುಮಾರ್ ಮೂಜಿ ಕಿಲೊಮೀಟರ್ ದೂರ ಇತ್ತ್ಂಡ್.

¹⁹ ಅಂಚಾಯಿನೆಡ್ದ್ ಯೆಹೂದ್ಯೆರೆಡ್ ಮಸ್ತ್ ಜನ ಮಾರ್ಥ ಬೊಕ್ಕ ಮರಿಯಗ್ ಅಕ್ಲೆನ ಮೆಗ್ಯನ ಮರಣದ ಸಂಗತಿಡ್ ಸಮಜೈಸಿಯೆರೆ ಬತ್ತ್‌ದಿತ್ತೆರ್.

²⁰ ಇಂಚ ಉಪ್ಪುನಗ, ಯೇಸು ಬರ್ಪೆ ಇನ್ಪಿ ಸಂಗತಿನ್ ಕೇಂಡ್ದ್, ಮಾರ್ಥ ಆಯನ್ ಎದುಕೊನಿಯೆರೆ ಪೋಯಲ್, ಆಂಡ ಮರಿಯ ಇಲ್ಲಡೇ ಕುಲ್ಲೊಂದಿತ್ತಲ್.

²¹ ಬೊಕ್ಕ ಮಾರ್ಥ ಯೇಸುಗು, “ಕರ್ತವಾ, ಈ ಮೂಲು ಇತ್ತುದ್ವಡ ಎನ ಮೆಗ್ಯೆ ಸೈತ್‌ದುವಯೆ.

²² ಆಂಡಲಾ ದೇವೆರೆಡ ಎಂಚಿನ ಕೇನ್ವನಾ, ಅವೆನ್ ದೇವೆರ್ ನಿಕ್ಕ್ ಕೊರ್ಪೆ ಇನ್ಪಿನೆನ್ ತೆರಿದೆ,” ಪಂಡಲ್.

²³ ಯೇಸು ಆಲೆಡ, “ನಿನ ಮೆಗ್ಯೆ ಲಕ್ಕ್‌ದ್ ಜೀವ ಆದ್ ಬರ್ಪೆ,” ಅಂದ್‌ದ್ ಪಂಡೆ.

²⁴ ಮಾರ್ಥ ಆಯಡ, “ಸೈತಿನಾಕುಲು ಕಡೆ ದಿನೊಟು ಪುನರುತ್ಥಾನ ಆನಗ, ಆಯೆಲಾ ಲಕ್ಕ್‌ದ್ ಬರುವೆ, ಇನ್ಪಿನೆನ್ ತೆರಿದುಲ್ಲೆ,” ಅಂದ್‌ದ್ ಪಂಡಲ್.

²⁵ ಯೇಸು ಆಲೆಡ, “ಯಾನೇ ಸೈತಿನಾಕುಲೆಡ್ದ್ ಕುಡ ಲಕ್ಕುನಾಯೆಲಾ ಜೀವಲಾ ಆದುಲ್ಲೆ, ಎನನ್ ನಂಬುನಾಯೆ ಸೈತೆಡಲಾ ಬದುಕುವೆ.

²⁶ ಬೊಕ್ಕ ಏರ್ಲಾ ಜೀವೊಡುಪ್ಪುನಗ ಎನನ್ ನಂಬಿನಾಯೆ, ಏಪೊಗ್ಲಾ ಸೈಯಯೆ, ಉಂದೆನ್ ಈ ನಂಬುವನಾ?” ಅಂದ್‌ದ್ ಕೇಂಡೆ.

²⁷ ಐಕ್ ಆಲ್ ಆಯಡ, “ಅಂದ್ ಕರ್ತವಾ, ಲೋಕೊಗು ಬರೊಡಾಯಿ ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಈಯೇ, ಅಂದ್‌ದ್ ನಂಬುದೆ.” ಪಂಡಲ್.

ಯೇಸು ಕಣ್ಣೀರ್ ಜಪುಡಾಯಿನವು

²⁸ ಉಂದೆನ್ ಪಂಡ್ದ್ ಆಲ್ ಪೋದು ತನ ಮೆಗ್ದಿ ಮರಿಯನ್ ಗುಟ್ಟುಡು ಲೆತ್ತ್‌ದ್, “ಗುರು ಬೈದೆ, ನಿನನ್ ಲೆತ್ತೊಂದುಲ್ಲೆ,” ಅಂದಲ್.

²⁹ ಮರಿಯ ಉಂದೆನ್ ಕೇಂಡಿಲೆಕ್ಕನೇ ಲಕ್ಕ್‌ದ್ ಆಯ ಕೈತಲ್‌ ಪೋಯಲ್.

³⁰ ಯೇಸು ನನಲಾ ಊರುದ ಉಲಯಿ ಬತ್ತ್‌ತ್ತಿಜೆ, ಮಾರ್ಥಗ್ ತಿಕ್ಕಿನ ಜಾಗ್‌ಡೇ ಇತ್ತೆ.

³¹ ಮರಿಯಡೊಪ್ಪ ಇತ್ತ್‌ದ್ ಆಲೆನ್ ಇಲ್ಲಡ್ ಸಮಾಧಾನ ಮಲ್ತೊಂದಿತ್ತಿನ ಯೆಹೂದ್ಯೆರ್, ಆಲ್ ಒರನೆ ಲಕ್ಕ್‌ದ್ ಪೋಯಿನೆನ್ ತೂದು, ಆಲ್ ಬುಲಿಪೆರೆ ಸಮಾಧಿಗ್ ಪೋಯಲ್ ಅಂದ್‌ದ್ ಎನ್ನ್‌ದ್ ಆಲೆನ ಬೆರಿಯೆ ಪೋಯೆರ್.

³² ಮರಿಯ ಯೇಸು ಇತ್ತಿನಡೆಗ್ ಬತ್ತ್‌ದ್ ಆಯನ್ ತೂದು ಆಯ ಕಾರ್‌ಗ್ ಅಡ್ಡಬೂರ್ದು, “ಕರ್ತವಾ, ಈ ಮೂಲು ಇತ್ತುದ್ವಡ ಎನ ಮೆಗ್ಯೆ ಸೈತ್‌ದುವಯೆ,” ಪಂಡಲ್.

³³ ಆಲ್ ಅರ್ಪಿನೆನ್ಲಾ ಬೊಕ್ಕ ಆಲೆಡೊಪ್ಪ ಬೈದಿನ ಯೆಹೂದ್ಯೆರ್ ಬುಲ್ಪುನೆನ್ಲಾ ಯೇಸು ತೂದು, ಮನಸ್ ಕರಗ್‌ದ್,

³⁴ “ಆಯನ್ ಓಲು ದೀತರ್?” ಅಂದ್‌ದ್ ಕೇಂಡೆ. ಐಕ್ ಅಕುಲು, “ಕರ್ತವಾ, ಬತ್ತ್‌ದ್ ತೂಲ.” ಪಂಡೆರ್.

³⁵ ಯೇಸು ಕಣ್ಣೀರ್ ದೆತ್ತೆ.

³⁶ ಯೆಹೂದ್ಯೆರ್ ತೂದು, “ಆಹಾ, ಉಂಬೆ ಲಾಜರ ಮಿತ್ತ್ ಏತೋ ಪ್ರೀತಿ ದೀದಿತ್ತೆ,” ಅಂದ್‌ದ್ ಪಂಡೆರ್.

³⁷ ಅಕ್ಲೆಡ್ ಕೆಲೆವೆರ್, “ಇಂಬೆ ಕುರುಡಗ್ ಕಣ್ಣ್ ಕೊರಿನಾಯೆ ಅತ್ತಾ? ಈ ಲಾಜರೆ ಸೈಯಂದಿಲೆಕ್ಕ ಮಲ್ಪೆರೆ ಆತ್ವಂದಾ?” ಪಂಡೆರ್.

ಯೇಸು ಸೈತ್‌ದಿತ್ತಿ ಲಾಜರನ್ ಬದುಕಾಯಿನವು

³⁸ ಯೇಸು ಕುಡ ಮನಸ್‌ಡ್ ಕರಗೊಂದು ಸಮಾಧಿದ ಕೈತಲ್‌ ಬತ್ತೆ. ಅವು ಒಂಜಿ ಮಾಟೆ ಆದಿತ್ತ್ಂಡ್ ಐತ ಬಾಯಿಗ್ ಒಂಜಿ ಮಲ್ಲ ಕಲ್ಲ್ ದೀದ್ ಮುಚ್ಚಿದಿತ್ತೆರ್.

³⁹ ಯೇಸು, “ಆ ಕಲ್ಲ್‌ನ್ ದೆಪ್ಪುಲೆ,” ಪನ್ನಗ, ಸೈತ್ ಪೋಯಿನಾಯನ ಪಲ್ದಿ ಮಾರ್ಥ, “ಕರ್ತವಾ, ಆಯೆ ಸೈತ್‌ದ್ ನಾಲ್ ದಿನ ಆಂಡ್, ಇತ್ತೆ ನಾತ ಬರು,” ಪಂಡಲ್.

⁴⁰ ಯೇಸು ಆಲೆಗ್, “ಈ ನಂಬಿಯಡ ದೇವೆರೆ ಮೈಮೆನ್ ತೂವ ಅಂದ್‌ದ್ ನಿಕ್ಕ್ ಪಂತಿಜೆನಾ?” ಅಂದ್‌ದ್ ಉತ್ತರ ಕೊರಿಯೆ.

⁴¹ ಅಪಗ ಕಲ್ಲ್‌ನ್ ದೆತ್ತ್‌ದ್ ಪಾಡಿಯೆರ್, ಬೊಕ್ಕ ಯೇಸು ಮಿತ್ತ್ ತೂದು, “ಅಮ್ಮೆರೇ, ಈ ಎನ ಪ್ರಾರ್ಥನೆನ್ ಕೇಂಡಿನೆಕ್ಕಾದ್ ನಿನನ್ ಪುಗರುವೆ.

⁴² ಈ ಏಪಲಾ ಎನ ಪ್ರಾರ್ಥನೆನ್ ಕೇನ್ವ ಪನ್ಪಿನವು ಎಂಕ್ ತೆರಿದೇ ಉಂಡು; ಆಂಡಲಾ ಈಯೇ ಎನನ್ ಕಡಪುಡ್ದು ಕೊರ್ತ ಪನ್ಪಿ ಸಂಗತಿನ್ ಸುತ್ತಲಾ ಉಂತುದಿ ಜನೊಕುಲು ನಂಬೊಡು ಅಂದ್‌ದ್ ಅಕ್ಲೆಗ್ ಬೋಡಾದ್ ಈ ಪಾತೆರೊನು ಪನ್ಪೆ,” ಪಂಡೆ.

⁴³ ಅವೆನ್ ಪಂಡಿ ಬೊಕ್ಕ ಮಲ್ಲ ಸ್ವರೊಟ್ಟು, “ಲಾಜರ, ಪಿದಯಿ ಬಲ!” ಪಂಡೆ

⁴⁴ ಸೈತ್ ಪೋತಿನಾಯೆ ಪಿದಯಿ ಬತ್ತೆ. ಆಯನ ಕೈಕಾರ್ ಕುಂಟುಡು ಕಟ್ಟ್‌ದಿತ್ತ್‌ಂಡ್, ಆಯನ ಮೋನೆ ಕುಂಟುಡು ಸುತ್ತುದಿತ್ತ್‌ಂಡ್. ಯೇಸು ಅಕ್ಲೆಡ, “ಅವೆನ್ ಗಿರ್ಪುಲೆ, ಆಯೆ ಪೋವಡ್,” ಪಂಡೆ.

ಯೇಸುನು ಕೆರಿಯೆರೆ ಉಪಾಯ ಮಲ್ಪುನವು

⁴⁵ ಮರಿಯನಡೆ ಬತ್ತಿತ್ತಿ ಯೆಹೂದ್ಯೆರ್ ಯೇಸು ಮಲ್ತಿ ಕಾರ್ಯೊನು ತೂಯಿನೆಟ್ಟ್ ಮಸ್ತ್ ಜನ ಆಯನ್ ನಂಬಿಯೆರ್.

⁴⁶ ಆಂಡ ಕೆಲೆವೆರ್ ಪರಿಸಾಯೆರೆ ಕೈತಲ್‌ ಪೋದು ಯೇಸು ಮಲ್ತಿನೆನ್ ಅಕ್ಲೆಗ್ ತೆರಿಪಾಯೆರ್.

⁴⁷ ಅಪಗ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಹಿರಿಸಭೆನ್ ಸೇರಾದ್, “ನಮ ದಾದ ಮಲ್ಪೊಲಿ? ಇಂಬೆ ಮಸ್ತ್ ಕಾರ್ನಿಕೊಲೆನ್ ಮಲ್ಪುವೆ ಅತ್ತಾ?

⁴⁸ ನಮ ಉಂಬ್ಯನ್ ಇಂಚೆನೆ ಬುಡುಂಡ ಮಾತೆರ್ಲಾ ಆಯನ ಮಿತ್ತ್ ನಂಬಿಕೆ ದೀವೆರ್; ಬೊಕ್ಕ ರೋಮಾಯೆರ್ ಬತ್ತ್‌ದ್ ನಮಡ್ದ್ ಜಾಗ್‌ನ್ಲಾ ಜನೊಕುಲೆನ್ಲಾ ದೆತ್ತೊಂಬೆರ್,” ಪಂಡೆರ್.

⁴⁹ ಆಂಡ ಅಕ್ಲೆಡ್ ಕಾಯಫೆ ಪನ್ಪಿನಾಯೆ ಆ ವರ್ಸೊಗು ನೇಮಕಾತಿ ಪ್ರಧಾನಯಾಜಕೆ ಆದಿತ್ತ್‌ದ್, “ನಿಕ್ಲೆಗ್ ದಾಲಾ ತೆರಿಯಂದ್;

⁵⁰ ಮಾತ ದೇಶದ ಜನೊಕುಲು ನಾಶ ಆಪಿನೆಡ್ದ್, ಒರಿ ನರಮಾನಿ ಜನೊಕುಲೆಗಾದ್ ಸೈಪಿನವು ಎಡ್ಡೆಂದ್‌ದ್ ನಿಕುಲು ಆಲೋಚನೆ ಮಲ್ಪುಜರ್?” ಪಂಡೆ.

^51-52 ಆಯೆ ತನ ಸ್ವಂತ ಆಲೋಚನೆಡ್ ಉಂದೆನ್ ಪಂಡಿಜೆ, ಆಂಡ ಆಯೆ ಆ ವರ್ಸದ ಪ್ರಧಾನಯಾಜಕೆ ಆದಿತ್ತ್‌ದ್ ದೇವೆರೆ ಸಹಾಯೊಡ್ದು ಯೇಸು ಯೆಹೂದ್ಯೆರೆ ಜನಾಂಗೊಗು ಬೋಡಾದ್ ಪ್ರಾಣ ಕೊರಿಯೆರೆ ಉಲ್ಲೆ ಅಂದ್‌ದ್ ಪಂಡೆ. ಯೇಸು ಆ ಜನಾಂಗೊಗು ಮಾತ್ರ ಅತ್ತಂದೆ ಚಲ್ಲಾಪಿಲ್ಲಿ ಆದ್ ಪೋಯಿ ದೇವೆರೆ ಜೋಕುಲೆನ್ ಕೂಡಾವುನೆಕ್ಕ್‌ಲಾ ಸೈಯೊಡಂದ್‌ದ್ ಪ್ರವಾದನೆ ಪಂಡೆ.

⁵³ ಆ ದಿನೊಡ್ದಿಂಚಿ ಆಯನ್ ಕೆರಿಯೆರೆ ಆಲೋಚನೆ ಮಲ್ತೊಂದಿತ್ತೆರ್.

⁵⁴ ಇಂಚ ಉಪ್ಪುನಗ ಯೇಸು ಯೆಹೂದ್ಯೆರೆ ಮದ್ಯೊಡು ತೋಜುಲೆಕ್ಕ ತಿರ್ಗಂದೆ ಗುಡ್ಡೆದ ಕೈತಲ್‌ಡ್ ಇತ್ತಿ ಎಫ್ರಾಯಿಮ್ ಇನ್ಪಿ ಊರುಗು ಪೋದು ಶಿಷ್ಯೆರೆಡೊಪ್ಪ ಇತ್ತೆ.

⁵⁵ ಅಪಗ ಯೆಹೂದ್ಯೆರೆ ಪಸ್ಕ ಪರ್ಬ ಕೈತಲ್‌ ಇತ್ತಿನೆಡ್ದ್, ಮಸ್ತ್ ಜನೊಕುಲು ತನ್ಕುಲೆನ್ ಶುದ್ಧ ಮಲ್ತೊನಿಯೆರೆ ಬೋಡಾದ್, ಪರ್ಬೊಡ್ದು ದುಂಬತ್ತ, ಹಳ್ಳಿಡ್ದ್ ಯೆರೂಸಲೇಮುಗು ಬತ್ತೆರ್.

⁵⁶ ಅಕುಲು ಯೇಸುನು ನಾಡೊಂದು ದೇವಾಲಯೊಡು ಉಂತೊಂದು, “ನಿಕುಲು ದಾನೆ ಎನ್ನುವರ್, ಆಯೆ ಪರ್ಬೊಗು ಬರಂದೆ ಉಪ್ಪೆನಾ?” ನಿಕ್ಲೆಗ್ ಎಂಚ ತೋಜುಂಡು ಅಂದ್‌ದ್ ಒರಿಯಡ್ದೊರಿ ಪಾತೆರೊಂದು ಇತ್ತೆರ್.

⁵⁷ ಆಂಡ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಆಯನ್ ಪತ್ತೊಡಂದ್‌ದ್ ಆಲೋಚನೆ ಮಲ್ತ್‌ದ್, ಆಯೆ ಉಪ್ಪುನ ಜಾಗ್ ಏರೆಗಾಂಡಲಾ ತೆರಿದಿತ್ತ್‌ಂಡ, ಅವೆನ್ ತನ್ಕ್‌ಲೆಗ್ ತೆರಿಪಾವೊಡು ಅಂದ್‌ದ್ ಅಪ್ಪಣೆ ಕೊರ್ದಿತ್ತೆರ್.