ಯೋಹಾನೆ 10 - ಪೊಸ ಒಡಂಬಡಿಕೆ

ಕುರುಬನ ಉಪಕತೆ

¹ “ನಿಕ್ಲೆಗ್ ನಿಜಾದ್ ಪನ್ಪೆ, ಕುರಿಕುಲೆ ಕೊಟ್ಯದುಲಯಿ ಬಾಕಿಲ್‌ಡೆ ಬರಂದೆ ಬೇತೆ ಒಲ್ತುಡ್ದಾಂಡಲಾ ಲಾಗ್ಯೊಂದು ಬತ್ತೆಡ ಆಯೆ ಕಲ್ವೆಲಾ ಲೂಟಿ ಮಲ್ಪುನಾಯೆಲಾ ಆದುಲ್ಲೆ.

² ಬಾಕಿಲ್‌ಡ್ದ್ ಉಲಯಿ ಬರ್ಪಿನಾಯೆ ಆ ಕುರಿಕುಲೆ ಕುರುಬೆ ಆದುಲ್ಲೆ.

³ ಬಾಕಿಲ್ ಕಾಪುನಾಯೆ ಆಯಗ್ ಬಾಕಿಲ್ ಜಪ್ಪುವೆ. ಕುರಿಕುಲು ಕುರುಬನ ಸ್ವರೊನು ಕೇನ್ವ ಬೊಕ್ಕ ಆಯೆ ತನ ಕುರಿಕುಲೆನ ಪುದರ್ ಲೆತ್ತ್‌ದ್ ಪಿದಯಿ ದೇರೊಂದು ಪೋಪೆ.

⁴ ಐಕ್ಲೆನ್ ಪಿದಯಿ ಕಂತಿ ಬೊಕ್ಕ ಕುರಿಕುಲೆ ಪುಂಡು ಪೋವೊಂದುಪ್ಪುನಗ ಐಕ್ಲೆ ಎದುರುಡು ಪೋಪೆ, ಕುರಿಕುಲು ಆಯ ಸ್ವರೊನು ತೆರಿಯೊಂದು ಆಯ ಬೆರಿಯೆ ಪೋಪುಂಡು.

⁵ ಐಕುಲು ಪಿದಯಿದಾಕುಲೆನ ಸ್ವರೊನು ತೆರಿಯೊನುಜಿ. ಪಿದಯಿದಾಯನ ಬೆರಿಯೆ ಪೋವಂದೆ, ಆಯನ್ ಬುಡ್ದು ಪಾರ್‌ಪೋಪ.”

⁶ ಈ ಉಪಕತೆನ್ ಯೇಸು ಅಕ್ಲೆಗ್ ಪಂಡೆ, ಆಂಡಲಾ ಆಯೆ ಪನ್ಪಿನ ಪಾತೆರ ಅಕ್ಲೆಗ್ ಅರ್ಥ ಆಯಿಜಿ.

ಯೇಸು ಎಡ್ಡೆ ಕುರುಬೆ

⁷ ಅಂಚಾಯಿನೆಡ್ದ್ ಯೇಸು ಕುಡೊರ ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ಕುರಿಕುಲೆಗ್ ಯಾನೇ ಬಾಕಿಲ್ ಆದುಲ್ಲೆ.

⁸ ಎನಡ್ದ್ ದುಂಬು ಬತ್ತಿನಾಕುಲು ಮಾತೆರ್ಲಾ ಕಲ್ವೆರ್‌ಲಾ ಲೂಟಿ ಮಲ್ಪುನಾಕುಲುಲಾ ಆದುಲ್ಲೆರ್, ಆಂಡ ಕುರಿಕುಲು ಅಕ್ಲೆಗ್ ಕೆಬಿ ಕೊರ್ಪುಜ.

⁹ ಯಾನೇ ಆ ಬಾಕಿಲ್, ಏರಾಂಡಲಾ ಎನಡ್ದ್ ಉಲಯಿ ಪೋಂಡ ಆಯಗ್ ರಕ್ಷಣೆ ತಿಕ್ಕು. ದಾಲಾ ತಡೆದಾಂತೆ ಉಲಯಿ ಪೋದು ಪಿದಯಿ ಬರ್ಪೆ. ಮೇಪಿ ಪಜಿರ್‌ನ್ ನಾಡ್ ಪತ್ತುವೆ.

¹⁰ ಕಲ್ವೆ ಕಂಡೊನಿಯೆರೆಲಾ ಕೆರಿಯೆರೆಲಾ ಹಾಳ್ ಮಲ್ಪೆರೆಲಾ ಬರ್ಪೆ ಅತ್ತಂದೆ ಬೇತೆ ಒಯಿಕ್‌ಲಾ ಅತ್ತ್. ಆಂಡ ಯಾನ್ ಐಕ್ಲೆಗ್ ಜೀವ ಉಪ್ಪುಲೆಕ್ಕಲಾ ಸಂಪೊತ್ತು ಉಪ್ಪುಲೆಕ್ಕಲಾ ಬತ್ತೆ.

¹¹ “ಯಾನೇ ಎಡ್ಡೆಂತಿ ಕುರುಬೆ, ಎಡ್ಡೆಂತಿ ಕುರುಬೆ ತನ ಕುರಿಕುಲೆಗಾದ್ ತನ ಪ್ರಾಣೊನು ಕೊರ್ಪೆ.

¹² ಕೂಲಿದಚಾಕ್ರಿದಾಯೆ ಕುರಿಕುಲೆನ ಕುರುಬೆಲಾ ಧನಿಲಾ ಆದುಪ್ಪಂದೆ ಚೆನ್ನನಾಯಿ ಬರ್ಪಿನೆನ್ ತೂದು ಕುರಿಕುಲೆನ್ ಬುಡ್ದು ಪಾರ್‌ಪೋಪೆ. ಚೆನ್ನನಾಯಿ ಕುರಿಕುಲೆನ್ ಪತ್ತ್‌ದ್ ಐಕ್ಲೆನ್ ಚಲ್ಲಾಪಿಲ್ಲಿ ಮಲ್ಪುವ.

¹³ ಆಯೆ ಕೂಲಿದಾಯೆ; ಕೂಲಿದಾಯಗ್ ಕುರಿಕುಲೆನ ಚಿಂತೆ ಇಜ್ಜಿ.

^14-15 ಯಾನೇ ಎಡ್ಡೆಂತಿ ಕುರುಬೆ, ಅಮ್ಮೆ ಎನನ್ ಯಾನ್ ಅಮ್ಮೆರೆನ್ ತೆರಿದಿತ್ತಿಲೆಕ್ಕ, ಯಾನ್ ಎನ ಕುರಿಕುಲೆನ್ ತೆರಿದೆ ಎನ ಕುರಿಕುಲು ಎನನ್ ತೆರಿದ. ಬೊಕ್ಕ ಯಾನ್ ಎನ ಕುರಿಕುಲೆಗಾದ್ ಎನ ಪ್ರಾಣೊನು ಕೊರ್ಪೆ.

¹⁶ ಉಂದತ್ತಂದೆ ಕೊಟ್ಯಗ್ ಸೇರಂದೆ ಉಪ್ಪು ಬೇತೆ ಕುರಿಕುಲೆ ಪುಂಡುಲುಲಾ ಉಂಡು. ಐಕ್ಲೆನ್ಲಾ ಯಾನ್ ಎನ ಪುಂಡುಗು ಸೇರಾವೊಡು. ಐಕುಲು ಎನ ಸ್ವರೊಕ್ಕು ಕೆಬಿ ಕೊರ್ಪ. ಅಪಗ ಮಾತಲಾ ಒಂಜೇ ಪುಂಡು ಆಪ ಬೊಕ್ಕ ಒರಿಯೇ ಕುರುಬೆ ಉಪ್ಪೆ.

¹⁷ “ಎನ ಪ್ರಾಣೊನು ಪಿರ ದೆತ್ತೊನುಲೆಕ್ಕ ಯಾನ್ ಅವೆನ್ ಕೊರ್ಪಿನೆಡ್ದಾವರ ಅಮ್ಮೆ ಎನನ್ ಪ್ರೀತಿ ಮಲ್ಪುವೆ.

¹⁸ ಎನಡ್ದ್ ಎನ ಪ್ರಾಣೊನು ಏರ್ಲಾ ದೆಪ್ಪಾಯೆರ್. ಎನ್ನಾತೆಗ್ ಎನ ಪ್ರಾಣೊನು ಯಾನ್ ಕೊರ್ಪೆ. ಅವೆನ್ ಕೊರಿಯೆರೆ ಎಂಕ್ ಅಧಿಕಾರ ಉಂಡು, ಅತ್ತಂದೆ ಅವೆನ್ ಪಿರ ದೆತ್ತೊನೆರೆಲಾ ಎಂಕ್ ಅಧಿಕಾರ ಉಂಡು. ಇಂಚ ಮಲ್ಪೊಡು ಅಂದ್‌ದ್ ಎನ ಅಮ್ಮೆ ಎಂಕ್ ಅಪ್ಪಣೆ ಕೊರ್ತೆ,” ಪಂಡೆ.

¹⁹ ಈ ಸಂಗತಿನ್ ಕೇಂಡಿನೆಡ್ದ್ ಯೆಹೂದ್ಯೆರೆಡ್ ಕುಡ ಭೇದ ಉಂಡಾಂಡ್.

²⁰ ಅಕ್ಲೆಡ್ ಕೆಲೆವೆರ್, “ಉಂಬ್ಯಗ್ ದೆವ್ವ ಪತ್ತ್‌ದ್ಂಡ್, ಆಯೆ ಮರ್ಲೆ, ಆಯ ಪಾತೆರೊಲೆನ್ ದಾಯೆ ಕೇನ್ವರ್?” ಪಂಡೆರ್.

²¹ ಬೊಕ್ಕ ಕೆಲೆವೆರ್, “ಉಂದು ದೆವ್ವ ಪತ್ತ್‌ದಿನಾಯನ ಪಾತೆರೊಲು ಅತ್ತ್, ದೆವ್ವ ಕುರುಡೆರೆಗ್ ಕಣ್ಣ್ ಕೊರುವಾ?” ಪಂಡೆರ್.

ಯೇಸುನು ತಿರಸ್ಕಾರ ಮಲ್ತಿನವು

²² ಆ ಕಾಲೊಡು ದೇವಾಲಯದ ಪ್ರತಿಷ್ಠೆದ ಪರ್ಬ ಯೆರೂಸಲೇಮುಡು ನಡತ್ಂಡ್; ಅಪಗ ಚಳಿಕಾಲ ಆದಿತ್ತ್ಂಡ್,

²³ ಯೇಸು ದೇವಾಲಯೊಡು ಸೊಲೊಮೋನುನ ಮಂಟಪೊಡು ತಿರ್ಗೊಂದುಪ್ಪುನಗ

²⁴ ಯೆಹೂದ್ಯೆರ್ ಆಯನ್ ಸುತ್ತು ಪಾಡ್ದ್, “ಏತ್ ಸಮಯ ಎಂಕ್ಲೆನ್ ಸಂಶಯೊಡು ದೀಪ? ಈ ಕ್ರಿಸ್ತೆ ಆದಿತ್ತಡ ಎಂಕ್ಲೆಗ್ ಸರಿಯಾದ್ ಪನ್ಲ,” ಪಂಡೆರ್.

²⁵ ಐಕ್ ಯೇಸು, “ನಿಕ್ಲೆಗ್ ಏಪನೇ ಪನ್ತೆ, ಆಂಡಲಾ ನಿಕುಲು ನಂಬಂದೆ ಉಲ್ಲರ್. ಎನ ಅಮ್ಮೆರೆ ಪುದರ್‌ಡ್ ಯಾನ್ ಮಲ್ಪು ಕೆಲಸೊಲು ಎಂಕ್ ಸಾಕ್ಷಿಯಾದುಂಡು.

²⁶ ಆಂಡಲಾ ನಿಕುಲು ಎನ ಕುರಿಕುಲೆ ಗುಂಪುಗು ಸೇರ್ದಿನಾಕುಲು ಅತ್ತಂದಿನೆಡ್ದ್ ನಂಬಂದೆ ಉಲ್ಲರ್ ದಾಯೆ ಪಂಡ ನಿಕುಲು ಎನ ಕುರಿಕುಲು ಅತ್ತ್.

²⁷ ಎನ ಕುರಿಕುಲು ಎನ ಸ್ವರೊಕ್ಕು ಕೆಬಿ ಕೊರ್ಪ, ಯಾನ್ ಐಕ್ಲೆನ್ ತೆರಿದೆ, ಐಕುಲು ಎನ ಬೆರಿಯೆ ಬರ್ಪ.

²⁸ ಯಾನ್ ಐಕ್ಲೆಗ್ ನಿತ್ಯಜೀವೊನು ಕೊರ್ಪೆ, ಐಕುಲು ಏಪೊಗ್ಲಾ ನಾಶ ಆಪಿನೇ ಇಜ್ಜಿ. ಐಕ್ಲೆನ್ ಏರ್ಲಾ ಎನ ಕೈಡ್ದ್ ಸುಲಿಯಯೆ.

²⁹ ಎನ ಅಮ್ಮೆ ಕೊರ್ತಿನವು ಮಾತೆಡ್ದ್‌ಲಾ ಮಲ್ಲವು. ಎನ ಅಮ್ಮೆರೆ ಕೈಡ್ದ್ ಅವೆನ್ ಏರ್ಲಾ ಸುಲಿಯೊನಿಯೆರೆ ಆವಂದ್.

³⁰ ಯಾನ್ಲಾ ಅಮ್ಮೆಲಾ ಒಂಜಾದುಲ್ಲ,” ಪಂಡೆ.

³¹ ಯೆಹೂದ್ಯೆರ್ ಆಯನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಕಲ್ಲ್‌ಲೆನ್ ದೆತ್ತೊಂದು ಬನ್ನಗ

³² ಯೇಸು ಅಕ್ಲೆಡ, “ಯಾನ್ ಅಮ್ಮೆರೆ ಕಡೆಡ್ದ್ ಮಸ್ತ್ ಎಡ್ಡೆ ಕಾರ್ಯೊಲೆನ್ ಮಲ್ತ್‌ದ್ ನಿಕ್ಲೆಗ್ ತೋಜಾಯೆ, ಐಟ್ಟ್ ವಾ ಕಾರ್ಯೊಗಾದ್‌ ಎನ ಮಿತ್ತ್ ಕಲ್ಲ್ ದಕ್ಕುವರ್?” ಅಂದ್‌ದ್ ಕೇಂಡಿನೆಕ್ಕ್

³³ ಯೆಹೂದ್ಯೆರ್, “ಎಂಕುಲು ನಿನ ಮಿತ್ತ್ ಕಲ್ಲ್ ದಕ್ಕುನು, ಈ ಮಲ್ತಿ ಎಡ್ಡೆ ಕಾರ್ಯೊಲೆಗಾದ್ ಅತ್ತ್, ದೇವೆರೆನ್ ದೂಷಣೆ ಮಲ್ತಿನೆಕಾದ್ರ; ಈ ನರಮಾನಿ ಆದ್, ನಿನನ್ ಈಯೇ ದೇವೆರ್ ಅಂದ್‌ದ್ ಮಲ್ತೊನುನೆಡ್ದ್, ನಿನ ಮಿತ್ತ್ ಕಲ್ಲ್ ದಕ್ಕುವ,” ಪಂಡೆರ್.

³⁴ ಐಕ್ ಯೇಸು, “‘ನಿಕುಲು ದೇವೆರ್‌ಲೇ ಅಂದ್‌ದ್ ಯಾನ್ ಪನ್ತೆ,’ ಅಂದ್‌ದ್ ನಿಕ್ಲೆನ ನ್ಯಾಯಕಟ್ಟ್‌ಡ್ ಬರೆತ್ಂಡತ್ತಾ?

³⁵ ಶಾಸ್ತ್ರ ಏಪೊಗ್ಲಾ ಸುಳ್ಳಾವಂದತ್ತಾ ಅಂಚಾಂಡ ದೇವೆರೆ ಪಾತೆರೊನು ಪಡೆಯೊಂದಿನಾಕುಲೆನ್ ‘ದೇವೆರಂದ್,’ ಆಯೆ ಪಂಡ್ದುಪ್ಪುನೆಡ್ದ್,

³⁶ ಅಮ್ಮೆ ಪರಿಶುದ್ಧ ಮಲ್ತ್‌ದ್ ಲೋಕೊಗು ಕಡಪುಡಿನಾಯನ್, ‘ಯಾನ್ ದೇವೆರೆ ಮಗೆ ಆದುಲ್ಲೆ,’ ಅಂದ್‌ದ್ ಪಂಡಿನೆಕ್ಕ್ ಈ ದೇವದೂಷಣೆ ಮಲ್ಪುವ ಪಂಡ್ದ್ ಪನ್ಪರಾ?

³⁷ ಯಾನ್ ಎನ ಅಮ್ಮೆರೆ ಕಾರ್ಯೊಲೆನ್ ಮಲ್ಪಂದೆ ಇತ್ತ್ಂಡ ಎನ ಪಾತೆರೊಲೆನ್ ನಂಬೊಡ್ಚಿ.

³⁸ ಆ ಕಾರ್ಯೊಲೆನ್ ಮಲ್ತ್ಂಡ ಎನನ್ ನಿಕುಲು ನಂಬಂದೆ ಇತ್ತ್ಂಡಲಾ ಆ ಕಾರ್ಯೊಲೆನಾಂಡಲಾ ನಂಬುಲೆ. ಅಪಗ ಎನಡ ಅಮ್ಮೆ ಉಲ್ಲೆ ಅಂದ್‌ದ್‌ಲಾ ಅಮ್ಮೆ ಎನಡ ಉಲ್ಲೆ ಅಂದ್‌ದ್‌ಲಾ ನಿಕುಲು ತೆರಿಯೊಂದು ಅರ್ಥ ಮಲ್ತೊನುವರ್,” ಅಂದ್‌ದ್ ಪಂಡೆ.

³⁹ ಅಕುಲು ಕುಡ ಆಯನ್ ಪತ್ತಿಯೆರೆ ತೂಯೆರ್, ಆಂಡ ಆಯೆ ಅಕ್ಲೆನ ಕೈಡ್ದ್ ತಪ್ಪಾವೊಂದು ಪೋಯೆ.

⁴⁰ ಐಡ್ದ್ ಬೊಕ್ಕ ಆಯೆ ಯೊರ್ದಾನ್ ತುದೆತ ಆಯೆರೆಡ್, ಯೋಹಾನೆ ದುಂಬು ನೀರ್‌ದ ದೀಕ್ಷಾಸ್ನಾನ ಕೊರೊಂದಿತ್ತಿ ಜಾಗ್‌ಗ್ ಕುಡ ಪೋದು ಅಲ್ಪ ಇತ್ತೆ.

⁴¹ ದಿಂಜ ಮಂದಿ ಆಯನ ಕೈತಲ್ ಬತ್ತ್‌ದ್, “ಯೋಹಾನೆ ಒಂಜಿ ಕಾರ್ನಿಕೊನ್ಲಾ ಮಲ್ತ್‌ಜೆ, ಆಂಡ ಇಂಬ್ಯನ ಸಂಗತಿಡ್ ಯೋಹಾನೆ ಪಂಡಿನವು ಮಾತ ಸತ್ಯ ಆದಿತ್ತ್ಂಡ್.” ಅಂದ್‌ದ್ ಪಾತೆರೊಂದಿತ್ತೆರ್.

⁴² ಅಲ್ಪ ಮಸ್ತ್ ಜನ ಆಯನ್ ನಂಬಿಯೆರ್.