ಯಾಕೋಬು 3 - ಪೊಸ ಒಡಂಬಡಿಕೆ

ನಾಲಯಿನ್ ಹತೋಟಿಡ್ ದೀವೊನುನವು

¹ ಎನ ಸಹೋದ್ರೆರೇ, ಬೋಧಕೆರ್ ಆಯಿ ನಂಕ್ ಕಠಿಣವಾಯಿನ ತೀರ್ಪು ಆಪುಂಡು ಅಂದ್‌ದ್ ತೆರಿಯೊಂದು ದಿಂಜ ಮಂದಿ ಬೋಧಕೆರ್ ಆವಡೆ.

² ಮಸ್ತ್ ಸಂಗತಿಡ್ ನಮ ಮಾತೆರ್ಲಾ ದಿಂಜ ತಪ್ಪು ಮಲ್ಪುನಾಕುಲೇ. ಒರಿ ಪಾತೆರೊಡು ತಪ್ಪುಜೆಡ ಆಯೆ ತಕ್ಕದಾಯೆ, ತನ ಶರೀರೊನು ಹತೋಟಿಡ್ ದೀವೊನುನಾಯೆ ಪರಿಪೂರ್ಣೆ ಆದುಲ್ಲೆ.

³ ಕುದುರೆಲೆನ್ ತನ ಹತೋಟಿಡ್ ದೀವೊನಿಯೆರೆಗಾದ್ ಐಕ್ಲೆ ಬಾಯಿಗ್ ಕಡಿವಾಣ ಪಾಡ್ವೆ. ಅಪಗ ಐಕ್ಲೆ ಶರೀರೊನು ನಂಕ್ ಬೋಡಾಯಿಲೆಕ್ಕ ತಿರ್ಗಾವೆರೆ ಸಾದ್ಯ ಆಪುಂಡು.

⁴ ಕಪ್ಪಲ್‌ನ್ ತೂಲೆ, ಅವು ಮಲ್ಲ ಆದಿತ್ತ್‌ಂಡಲಾ ಬಲವಾಯಿನ ಗಾಳಿಡ್ದ್ ನೂಕೊಂದು ಪೋಪುಂಡು. ಆಂಡಲಾ ಅವೆನ್ ನಡಪಾವುನಾಯೆ ಬಜೀ ಎಲ್ಯ ಚುಕ್ಕಾಣಿಡ್ದ್ ತನ್ಕ್ ಮನಸ್ ಬತ್ತಿ ಕಡೆಕ್ಕ್ ತಿರ್ಗಾವೆ.

⁵ ಅಂಚೆನೇ ನಾಲಯಿಲಾ ಒಂಜಿ ಎಲ್ಯ ಅಂಗ ಆದಿತ್ತ್‌ದ್ ಮಲ್ಲ ಕಾರ್ಯೊಲೆನ್ ಕೊಚ್ಚೊನುಂಡು. ತೂಲ, ಒಂಜಿ ಎಲ್ಯ ತೂತ ಕಿಡಿ ಏತ್ ಮಲ್ಲ ಕಾಡ್‌ನ್ಲಾ ಪೊತ್ತಾವುಂಡು.

⁶ ನಾಲಯಿಲಾ ಒಂಜಿ ತೂತ ಕಿಡಿ ಆದುಂಡು. ಅವು ಲೋಕದ ಮಾತ ಅನ್ಯಾಯೊಡ್ದು ದಿಂಜಿದಿತ್ತ್‌ದ್ ಇಡೀ ಶರೀರೊನೇ ಹಾಳ್ ಮಲ್ಪುಂಡು. ಐಟ್ಟ್ ನರಕದ ತೂ ಉಪ್ಪುನೆಡ್ದ್ ಇಡೀ ಬದ್‌ಕ್‌ನೇ ಪೊತ್ತಾದ್ ಪಾಡುಂಡು.

⁷ ನರಮಾನಿ ಮಾತ ತರತ ಪ್ರಾಣಿ ಪಕ್ಷಿ ಪರಪುನವು ನೀರ್‌ಡ್ ಉಪ್ಪುನವು ಮಾತೆನ್ಲಾ ಹತೋಟಿಡ್ ದೀವೊನೊಲಿ.

⁸ ಆಂಡ ಏರೆಗ್ಲಾ ನಾಲಯಿನ್ ಹತೋಟಿಡ್ ದೀವೊನಿಯೆರೆಗ್ ಆವಂದ್. ಅವು ಮನಿಪಂದೆ ಕುಲ್ಲಂದಿನವುಲಾ, ಪಡಿಕೆಂತಿನವುಲಾ ಆದಿತ್ತ್‌ದ್ ಕೆರ್ಪಿ ವಿಷೊಡ್ದು ದಿಂಜಿದುಂಡು.

⁹ ನಮ ನಾಲಯಿಡ್ ನಮ ಕರ್ತವೆ ಆದುಪ್ಪು ಅಮ್ಮೆರೆನ್ ಪುಗರುವ, ಅವ್ವೇ ನಾಲಯಿಡ್ ನಮ ದೇವೆರೆ ರೂಪೊಡು ಉಂಡು ಮಲ್ತ್‌ದಿನ ನರಮಾನಿಲೆನ್ ಶಾಪಿಯುವ.

¹⁰ ಇಂಚ ಒಂಜೇ ನಾಲಯಿಡ್ದ್ ಆಶೀರ್ವಾದಲಾ ಶಾಪಲಾ ಪಿದಾಡ್ದ್ ಬರ್ಪುಂಡು. ಎನ ಸಹೋದ್ರೆರೇ, ಇಂಚ ಉಪ್ಪುನ ಸರಿ ಅತ್ತ್.

¹¹ ಒಂಜೇ ವಸರ್‌ದ ದಂಡ್‌ಡ್ದ್ ಚೀಪೆ ನೀರ್‌ಲಾ ಕೈಪೆ ನೀರ್‌ಲಾ ಒಟ್ಟುಗು ಬರಿಯೆರೆ ಸಾದ್ಯ ಉಂಡಾ?

¹² ಎನ ಸಹೋದ್ರೆರೇ, ಅಂಜೂರದ ಮರೊಟು ಇಪ್ಪೆದ ಪರ್ಂದ್ ಬುಡ್ಪುಂಡ; ಇಜ್ಜಿಡ ದ್ರಾಕ್ಷೆಬೂರುಡು ಅಂಜೂರದ ಪರ್ಂದ್ ಬುಡಿಯೆರೆ ಸಾದ್ಯ ಉಂಡಾ? ಕಂಡಿತಾದ್ ಇಜ್ಜಿ. ಅಂಚೆನೇ, ಉಪ್ಪುನೀರ್‌ದ ವಸರ್‌ಡ್ದ್ ಚೀಪೆ ನೀರ್ ಬರಿಯೆರೆ ಸಾದ್ಯ ಇಜ್ಜಿ.

ನಿಜವಾಯಿನ ಗೇನ ದೇವೆರೆಡ್ದ್ ಬರ್ಪುಂಡು

¹³ ನಿಕ್ಲೆಡ್ ಬುದ್ಧಿವಂತೆಲಾ ಆಲೋಚನೆದಾಯೆಲಾ ಏರ್? ಆಯೆ ಎಡ್ಡೆ ನಡತೆಡ್ದ್ ಸಜ್ಜನಿಗೆದ ಬುದ್ಧಿಡ್ ತನ ಕ್ರಿಯೊಲೆನ್ ತೋಜಾವಡ್.

¹⁴ ಆಂಡ ನಿಕ್ಲೆ ಉಡಲ್‌ಡ್ ಮಚ್ಚರಲಾ ಸ್ವಾರ್ಥೊಡ್ಲಾ ದಿಂಜಿದಿತ್ತ್‌ಂಡ, ನಿಕುಲು ಸತ್ಯೊಗು ವಿರೋಧಾದ್ ಸುಳ್ಳು ಪಾತೆರಂದೆ ಪುಗರೊನಂದೆ ಉಪ್ಪುಲೆ.

¹⁵ ಉಂದು ಮಿತ್ತ್‌ಡ್ದ್ ಬರ್ಪಿ ಗೇನ ಅತ್ತ್, ಈ ಸಂಗತಿಲು ಲೋಕದವುಲಾ ಅಧರ್ಮದವುಲಾ ಆದಿತ್ತ್‌ದ್, ದೆವ್ವೊಲೆಗ್ ಸಮ್ಮಂಧ ಆದುಂಡು.

¹⁶ ದಾಯೆಗಂದ್ಂಡ ಮಚ್ಚರಲಾ ಸ್ವಾರ್ಥಲಾ ಓಲು ಉಂಡಾ, ಅಲ್ಪ ಗಲಿಬಿಲಿಲಾ ಮಾತ ತರತ ಪಡಿಕೆಂತಿನವುಲಾ ಉಪ್ಪುಂಡು.

¹⁷ ಆಂಡ ಮಿತ್ತ್‌ಡ್ದ್ ಬರ್ಪಿನ ಗೇನ, ಸುರುಟ್ಟು ನಿರ್ಮಲದವು ಆದುಪ್ಪುಂಡು. ಅವು ಸಮಾಧಾನದವು, ಶಾಂತದವು, ಒಪ್ಪಿಯೊನ್ನವು, ಕರುಣೆ ಬೊಕ್ಕ ಎಡ್ಡೆ ಫಲೊಕ್ಲೆಡ್ ದಿಂಜಿದಿನವು, ಭೇದಭಾವದಾಂತಿನವು, ಕಪಟದಾಂತಿನವು ಆದುಂಡು.

¹⁸ ಬೊಕ್ಕ ಸಮಾಧಾನ ಬಯಕುನಾಕುಲು ಸಮಾಧಾನದ ಬಿತ್ತ್‌ನ್ ಬಿತ್ತ್‌ದ್ ನೀತಿದ ಫಲೊನು ಕೊಯ್ಪೆರ್.