ಯಾಕೋಬು 1 - ಪೊಸ ಒಡಂಬಡಿಕೆ

¹ ದೇವೆರೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಗ್ಲಾ ದಾಸೆ ಆದುಪ್ಪು ಯಾಕೋಬು ಬೇತೆ ದೇಶೊಲೆಡ್ ಪರಡ್ದ್ ಉಪ್ಪುನ ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ಬರೆಪಿನಿ. ನಿಕ್ಲೆಗ್ ಎಡ್ಡೆ ಆವಡ್.

ನಂಬಿಕೆ ಬೊಕ್ಕ ತಾಳ್ಮೆ

^2-3 ಎನ ಸಹೋದ್ರೆರೇ, ನಿಕ್ಲೆನ ನಂಬಿಕೆಗ್ ಆಪಿನ ಪರೀಕ್ಷೆ ತಾಳ್ಮೆನ್ ಪುಟ್ಟಾವುಂಡು ಅಂದ್‌ದ್ ತೆರಿಯೊಂದು, ನಿಕುಲು ತರತರತ ಭಂಗೊಡು ತಿಕ್ಕ್‌ದ್ ಬೂರ್ನಗ, ಅವು ಸಂತೋಷನೆ ಅಂದ್‌ದ್ ಎನ್ನೊನ್ಲೆ.

⁴ ಆ ತಾಳ್ಮೆ ನಿಕ್ಲೆಡ ಪೂರ್ತಿ ಆದ್ ತೋಜಿದ್ ಬನ್ನಗ ನಿಕುಲು ಮಾತ ಎಡ್ಡೆ ಗುಣತಾಕುಲುಲಾ ಕಡಿಮೆದಾಂತಿನಾಕುಲುಲಾ ಆದುಪ್ಪುವರ್.

⁵ ನಿಕ್ಲೆಡ್ ಗೇನ ಕಡಿಮೆ ಇತ್ತ್ಂಡ, ಅಂಚಿನಾಕುಲು ದೇವೆರೆಡ ನಟ್ಟೊನಡ್. ಆಯೆ ಅವೆನ್ ನಿಕ್ಲೆಗ್ ಕೊರುವೆ. ನಿಕುಲು ನಟ್ಟಿನೆಕ್ಕಾದ್ ಆಯೆ ನಿಕ್ಲೆಗ್ ಬೇಜಾರ್‌ದಾಂತೆ ಕೊರ್ಪೆ.

⁶ ಆಂಡ ಸಂಶಯ ಮಲ್ಪಂದೆ ನಂಬಿಕೆಡ್ ನಟ್ಟೊಡು. ಸಂಶಯ ಮಲ್ಪುನಾಯೆ ಗಾಳಿಗ್ ಅಡಿಮೇಲ್ ಆಪಿ ಕಡಲ್ದ ಸೆರೆಕ್ಕ್ ಸಮ ಆದುಲ್ಲೆ.

⁷ ಆಯೆ ಸ್ಥಿರ ಆದುಪ್ಪುಜೆ, ಅಂಚಿತ್ತಿನಾಯೆ ಕರ್ತವಡ್ದ್ ದಾದಾಂಡಲಾ ತಿಕ್ಕುಂಡು ಅಂದ್‌ದ್ ಎನ್ನುನ ಬೊಡ್ಚಿ.

⁸ ಆಯೆ ರಡ್ಡ್ ಮನಸ್‌ದಾಯೆ ಆದ್ ಮಾತೆಟ್ಲಾ ಸ್ಥಿರದಾಂತಿನಾಯೆ ಆದುಲ್ಲೆ.

ಬಡತನ ಬೊಕ್ಕ ಮಲ್ಲಾದಿಗೆ

⁹ ಬಡತನೊಡು ಉಪ್ಪು ಸಹೋದರೆ ಮಿತ್ತ ಸ್ಥಿತಿಕ್ಕ್ ಬತ್ತೆ ಅಂದ್‌ದ್ ಸಂತೋಷ ಮಲ್ಪಡ್.

¹⁰ ಮಲ್ಲಾದಿಗೆ ಇತ್ತಿನಾಯೆ ದೇವೆರ್ ತನ್ಕ್ ಬಡತನ ಕೊರಿನೆಕ್ಕಾದ್ ಸಂತೋಷ ಮಲ್ಪಡ್. ದಾಯೆಗಂದ್ಂಡ, ಮಲ್ಲಾದಿಗೆ ಇತ್ತಿನಾಯೆ ಪಜಿರ್‌ದ ಪೂತ ಲೆಕ್ಕನೆ ನಾಶಾದ್ ಪೋಪೆ.

¹¹ ಎಂಚಂದ್ಂಡ, ಸೂರ್ಯೆ ಮೂಡ್ದು ದೊಂಬು ಹಾಕ್‌ನಗ ಪಜಿರ್ ನುಂಗುಂಡು, ಬೊಕ್ಕ ಪೂ ತಾಲ್ದ್ ಐತ ಪೊರ್ಲು ನಾಶಾದ್ ಪೋಪಿಲೆಕ್ಕ ಮಲ್ಲಾದಿಗೆ ಇತ್ತಿನಾಯೆಲಾ ತನ ಪ್ರಯತ್ನೊಲೆಡ್ ನಾಶಾದ್ ಪೋಪೆ.

ಪರೀಕ್ಷೆ ಬೊಕ್ಕ ಶೋಧನೆ

¹² ಶೋಧನೆನ್ ಸಹಿಸೊಂದು ಸ್ಥಿರ ಆದುಪ್ಪುನಾಯೆ ಭಾಗ್ಯವಂತೆ; ಆಯೆ ತಕ್ಕದಾಯೆ ಅಂದ್‌ದ್ ತೋಜಿಯೆಡ ದೇವೆರೆನ್ ಪ್ರೀತಿ ಮಲ್ಪುನಾಕುಲೆಗ್ ವಾಗ್ದಾನ ಮಲ್ತ್‌ದಿನ ನಿತ್ಯಜೀವದ ಕಿರೀಟ ಆಯಗ್ ತಿಕ್ಕುಂಡು.

¹³ ಏರೆಗ್ಲಾ ಶೋಧನೆ ಆನಗ, “ಎಂಕ್ ದೇವೆರೆಡ್ದ್ ಶೋಧನೆ ಬೈದ್‌ಂಡ್,” ಅಂದ್‌ದ್ ಪನಡೆ. ದೇವೆರ್ ಪಡಿಕೆಂತಿನೆಕ್ಕ್ ಸಮ್ಮಂಧದಾಯೆ ಅತ್ತ್, ಆಯೆ ಏರೆನ್ಲಾ ಶೋಧನೆ ಮಲ್ಪುಜೆ.

¹⁴ ಆಂಡ ಪ್ರತಿಯೊರಿ ತನ ಸ್ವಂತ ದುರಾಶೆಗ್ ಬಲಿ ಆದ್ ತಿಕ್ಕ್‌ದ್ ಬೂರಿನೆಡ್ದಾದ್ ಶೋಧನೆ ಆಪುಂಡು.

¹⁵ ಆ ದುರಾಶೆಲೆಡ್ದ್ ಪಾಪದ ಕ್ರಿಯೊಲು ಪುಟ್ಟುಂಡು. ಬೊಕ್ಕ ಪಾಪ ಪೂರ್ತಿ ಆದ್ ಮರಣೊನು ಕನಪುಂಡು.

¹⁶ ಎನ ಪ್ರೀತಿದ ಸಹೋದ್ರೆರೇ, ಮೋಸೊಡು ಬೂರಡೆ.

¹⁷ ಮಾತ ಎಡ್ಡೆಂತಿನವುಲಾ ಕುಂದೆಲ್‌ದಾಂತಿ ಉಡಿಗೆರೆಲಾ ಬೊಲ್ಪುಲೆನ್ ಉಂಡು ಮಲ್ತಿ ಪರಲೋಕದ ಅಮ್ಮೆ ಆದುಪ್ಪು ದೇವೆರೆಡ್ದ್ ಜತ್ತ್‌ದ್ ಬರ್ಪುಂಡು. ಆಯೆ ಏಪೊಗ್ಲಾ ಎಡ್ಡೆಂತಿನೆನೇ ಕೊರ್ಪಿನಾಯೆ, ಅತ್ತ್‌ಡ ಆಯೆ ನಿರೆಲ್‌ದ ಲೆಕ್ಕ ದುಂಬು ಪಿರ ಪೋಪಿನಾಯೆ ಅತ್ತ್.

¹⁸ ತನ ಸತ್ಯ ಪಾತೆರೊನು ನಂಕ್ ಕೊರ್ದು ನಮನ್ ಪುಟ್ಟಾಯಿನೆಡ್ದ್ ನಮ ಆಯನ ಮಾತ ಸೃಷ್ಟಿಡ್ಲಾ ಆಯಗ್ ಸುರುತ್ತ ಫಲ ಆದುಲ್ಲ.

ದೇವೆರೆ ಪಾತೆರೊನು ಕೇನೊಡು ಅಂಚೆನೇ ನಡಪೊಡು

¹⁹ ಎನ ಪ್ರೀತಿದ ಸಹೋದ್ರೆರೇ, ಉಂದೆನ್ ತೆರಿಯೊನ್ಲೆ, ಪ್ರತಿಯೊರಿಲಾ ಕೇನುನೆಕ್ಕ್ ಬೇಗ, ಪಾತೆರ್‌ನೆಕ್ಕ್ ಮೆಲ್ಲ ಬೊಕ್ಕ ಕೋಪೊಗು ನಿಧಾನಿ ಆದುಪ್ಪೊಡು.

²⁰ ದಾಯೆಗಂದ್ಂಡ, ನರಮಾನಿ ಕೋಪ, ದೇವೆರೆಗ್ ಮೆಚ್ಚಿಗೆ ಆದುಪ್ಪು ನೀತಿಗ್ ಸರಿ ಆದುಪ್ಪುಜಿ.

²¹ ಅಂಚಾದ್ ನಿಕ್ಲೆ ಜೀವನೊಡ್ದು ಮಾತ ನೀಚತನೊನ್ಲಾ ದುಷ್ಟತನೊನ್ಲಾ ದೆತ್ತ್‌ದ್ ಪಾಡ್ದ್, ದೇವೆರ್ ನಿಕ್ಲೆ ಉಡಲ್‌ಡ್ ದೀತಿನ ಪಾತೆರೊಗು ದೀನತೆಡ್ ಇಡೆ ಕೊರ್ಲೆ, ದಾಯೆಗಂದ್ಂಡ ನಿಕ್ಲೆನ ಆತ್ಮೊನು ರಕ್ಷಣೆ ಮಲ್ಪುನ ಶಕ್ತಿ ಆ ಪಾತೆರೊಗು ಉಂಡು.

²² ಆಂಡ ದೇವೆರೆ ಪಾತೆರೊನು ಕೇನುನು ಮಾತ್ರ ಅತ್ತಂದೆ, ಅವು ದಾನೆ ಪನ್ಪುಂಡು ಅಂಚೆನೇ ನಡಪುನಾಕುಲು ಆದುಪ್ಪುಲೆ, ಇಜ್ಜಾಂಡ ನಿಕುಲು ನಿಕ್ಲೆಗೇ ಮೋಸ ಮಲ್ತೊಂದುಪ್ಪುವರ್.

²³ ಏರಾಂಡಲಾ ದೇವೆರೆ ಪಾತೆರೊನು ಕೇಂಡ್ದ್ ಐಕ್ ತಕ್ಕ ನಡತಿಜಿಡ, ಆಯೆ ತನ ಮೋನೆನ್ ಕನ್ನಡಿಡ್ ತೂಪಿ ನರಮಾನಿಗ್ ಸಮ ಆದುಲ್ಲೆ.

²⁴ ಅಂಚಿತ್ತಿನಾಯೆ ತನನ್ ತೂದು ಪಿದಾಡ್ದ್ ಪೋಯಿ ಕೂಡ್ಲೆ ತಾನ್ ಎಂಚ ಇತ್ತೆ ಅಂದ್‌ದ್ ಅಪಗನೆ ಮದತ್‌ದ್ ಬುಡ್ಪೆ.

²⁵ ಆಂಡ ತನನ್ ಬುಡುಗಡೆ ಮಲ್ಪುನ ನ್ಯಾಯಕಟ್ಟ್‌ಗ್ ಬುದ್ಧಿ ಕೊರ್ದು ಕೇಂಡಿನೆನ್ ಮದಪಂದೆ, ಐತ ಪ್ರಕಾರ ನಡಪುನಾಯೆ ಆದುಲ್ಲೆಡ ದೇವೆರ್ ಆಯನ್ ಆಶೀರ್ವದಿಪುವೆ.

²⁶ ಏರಾಂಡಲಾ ತನ ನಾಲಯಿಗ್ ಕಡಿವಾಣ ಪಾಡಂದೆ, ಭಕ್ತೆ ಅಂದ್‌ದ್ ಎನ್ನುನಾಯೆ ತನ ಉಡಲ್‌ಗ್ ಮೋಸ ಮಲ್ತೊಂದುಪ್ಪುವೆ. ಆಯನ ಭಕ್ತಿ ವ್ಯರ್ಥ ಆದುಂಡು.

²⁷ ಸಂಕಟೊಡು ಬೂರ್ದು ದಿಕ್ಕ್‌ದಾಂತಿನಾಕುಲೆನ್ಲಾ ವಿಧವೆರೆನ್ಲಾ ಪರಾಂಬರಿತ್‌ದ್, ಲೋಕದ ದೋಷ ಆಯಗ್ ತಾಗಂದಿಲೆಕ್ಕ ಕಾಪುನವೇ ಅಮ್ಮೆ ಆದುಪ್ಪು ದೇವೆರೆ ಎದುರುಡು ಶುದ್ಧಲಾ ಮೈಲೆದಾಂತಿನವುಲಾ ಆದುಪ್ಪು ಭಕ್ತಿ.