ಇಬ್ರಿಯೆರೆಗ್ 8 - ಪೊಸ ಒಡಂಬಡಿಕೆಯೇಸು ಎಂಕ್ಲೆನ ಪ್ರಧಾನಯಾಜಕೆ 1 ಎಂಕುಲು ಇತ್ತೆ ಪನ್ಪಿ ಸಂಗತಿಲೆಡ್ ಮುಖ್ಯವಾಯಿನ ಪಾತೆರ ದಾನೆಂದ್ಂಡ, ಪರಲೋಕದುಲಯಿ ಘನ ಇತ್ತಿ ದೇವೆರೆ ಗದ್ದಿಗೆದ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದಿ ಪ್ರಧಾನಯಾಜಕೆ ನಂಕುಲ್ಲೆ. 2 ಉಂಬೆ ಪರಿಶುದ್ಧಸ್ಥಾನೊಡು ಅಂದ್ಂಡ, ನರಮಾನಿ ಪಾಡಂದೆ ಕರ್ತವೆನೇ ಪಾಡಿನ ನಿಜವಾಯಿನ ದೇವೆರೆ ದರ್ಶನದ ಗುಡಾರೊಡು ಯಾಜಕ ಕೆಲಸೊನು ನಡಪಾವುನಾಯೆ ಆದುಲ್ಲೆ. 3 ಪ್ರತಿಯೊರಿ ಪ್ರಧಾನಯಾಜಕೆ ಕಾಣಿಕೆಲೆನ್ಲಾ ಬಲಿಲೆನ್ಲಾ ಅರ್ಪಣೆ ಮಲ್ಪೆರೆ ನೇಮಕ ಆದುಪ್ಪುವೆ ಆತೇ. ಅವೆಡ್ದಾವರ ಅರ್ಪಣೆ ಮಲ್ಪರೆ ಆ ಪ್ರಧಾನಯಾಜಕಗ್ಲಾ ದಾದಾಂಡಲಾ ಉಪ್ಪೊಡು. 4 ಇಂಬೆ ನನಲಾ ಭೂಮಿದ ಮಿತ್ತ್ ಇತ್ತುದ್ವೆಡ ಯಾಜಕೆ ಆತುದ್ವಯೆ. ದಾಯೆ ಪಂಡ ನ್ಯಾಯಕಟ್ಟ್‌ದ ಪ್ರಕಾರ ಕಾಣಿಕೆ ಅರ್ಪಣೆ ಮಲ್ಪುನಾಕುಲು ಇತ್ತುದ್ವೆರ್. 5 ಅಕುಲು ಪರಲೋಕೊಡುಪ್ಪು ದೇವಾಲಯದ ಪ್ರತಿರೂಪಲಾ ನಿರೆಲ್ಲಾ ಆದುಪ್ಪು ದೇವಾಲಯೊಡು ಯಾಜಕ ಕೆಲಸೊನು ಮಲ್ಪುನಾಕುಲು ಆದುಲ್ಲೆರ್. ಮೋಶೆ ದೇವೆರೆ ದರ್ಶನದ ಗುಡಾರೊನು ಮಲ್ಪೆರೆ ಉಪ್ಪುನಗ ಪರ್ವತೊಡು ಯಾನ್ ತೋಜಾಯಿ ಮಾದ್ರಿದ ಲೆಕ್ಕನೇ ಮಾತೆನ್ ಮಲ್ಪಾವೊಡು ಪನ್ಪಿ ದೈವೋಕ್ತಿ ಆಯಗ್ ಉಂಡಾಂಡತ್ತಾ. 6 ಆಂಡ ಕ್ರಿಸ್ತೆ ಐಡ್ದ್ ಶ್ರೇಷ್ಟವಾಯಿನ ಯಾಜಕತ್ವೊನು ಪಡೆತಿನಾಯೆ ಆದುಲ್ಲೆ. ಎಡ್ಡೆಂತಿನ ವಾಗ್ದಾನೊಲೆ ಮಿತ್ತ್ ಉಂಡಾಯಿನ ಎಡ್ಡೆಂತಿನ ಒಡಂಬಡಿಕೆಗ್ ಮದ್ಯಸ್ತೆ ಆದುಲ್ಲೆ. 7 ಆ ಸುರುತ್ತ ಒಡಂಬಡಿಕೆ ದೋಷದಾಂತಿನವು ಆದಿತ್ತ್ಂಡ ರಡ್ಡನೆದ ಒಡಂಬಡಿಕೆಗ್ ಅವಕಾಸ ಇತ್ತ್‌ದ್ವಂದ್. 8 ಆಂಡ ದೇವೆರ್ ಆ ಒಡಂಬಡಿಕೆಗ್ ಸೇರಿನಾಕುಲೆನ ಮಿತ್ತ್ ತಪ್ಪು ತೋಜಾದ್ ಇಂಚ ಪಂಡೆ, “ಇಂದಾ, ಯಾನ್ ಇಸ್ರಾಯೇಲ್ ಇಲ್ಲ್‌ಡೊಪ್ಪಲಾ ಯೆಹೂದ ಇಲ್ಲ್‌ಡೊಪ್ಪಲಾ ಪೊಸತ್ತಾಯಿನ ಒಂಜಿ ಒಡಂಬಡಿಕೆ ಮಲ್ತೊನುನ ದಿನೊಕುಲು ಬರ್ಪುಂಡು. 9 ಈ ಒಡಂಬಡಿಕೆ ಯಾನ್ ಮೊಕ್ಲೆನ ಪಿತೃಲೆನ್ ಕೈ ಪತ್ತ್‌ದ್ ಐಗುಪ್ತ ದೇಶದುಲಯಿಡ್ದ್ ಲೆತ್ತೊಂದು ಬತ್ತಿ ಕಾಲೊಡು ಅಕ್ಲೆಡೊಪ್ಪ ಮಲ್ತೊಂಡಿ ಒಡಂಬಡಿಕೆದಂಚಿನವು ಅತ್ತ್. ಅಕುಲು ಎನ ಒಡಂಬಡಿಕೆಡ್ ಗಟ್ಟಿಯಾದ್ ಉಂತಂದಿನೆಡ್ದ್ ಯಾನ್ ಅಕ್ಲೆನ ಚಿಂತೆನ್ ಬುಡಿಯೆ ಅಂದ್‌ದ್ ಕರ್ತವೆ ಪನ್ಪೆ. 10 ಆ ದಿನೊಕುಲು ಬತ್ತಿ ಬೊಕ್ಕ ಯಾನ್ ಇಸ್ರಾಯೇಲ್ ಇಲ್ಲ್‌ಡೊಪ್ಪ ಮಲ್ತೊನುನ ಒಡಂಬಡಿಕೆ ಇಂಚ ಉಪ್ಪುಂಡು. ಎನ ನ್ಯಾಯಕಟ್ಟ್‌ಲೆನ್ ಅಕ್ಲೆನ ಮನಸ್‌ಡ್ ದೀಪೆ. ಅಕ್ಲೆನ ಉಡಲ್‌ಡ್ ಅವೆನ್ ಬರೆಪೆ. ಯಾನ್ ಅಕ್ಲೆಗ್ ದೇವೆರಾದುಪ್ಪುವೆ; ಅಕುಲು ಎನ ಪ್ರಜೆಕುಲು ಆದುಪ್ಪುವೆರ್. 11 ಒಂಜೇ ಊರುದಾಕುಲುಲಾ ಸಹೋದರೆರೆಗ್ಲಾ ಕರ್ತವ ಗೇನೊನು ಪಡೆಯೊನ್ಲೆ ಪಂಡ್ದ್ ಕಲ್ಪಾವೊಡಂದಿಜ್ಜಿ. ಎಲ್ಯಕುಲೆಡ್ದ್ ಸುರು ಆದ್ ಮಲ್ಲಾಯೆ ಮುಟ್ಟ ಮಾತೆರ್ಲಾ ಎನ ಗೇನೊನು ಪಡೆದುಪ್ಪುವೆರ್. 12 ಯಾನ್ ಅಕ್ಲೆನ ಅನ್ಯಾಯೊನು ದಯೊಟು ಮಾಪು ಮಲ್ಪುವೆ; ಅಕ್ಲೆ ಪಾಪೊಲೆನ್ ಯಾನ್ ನನ ಏಪೊಗ್ಲಾ ನೆನೆಪುಗು ಕನವಯೆ, ಪಂಡ್ದ್ ಕರ್ತವೆ ಪನ್ಪೆ.” 13 ಮುಲ್ಪ ಪೊಸ ಒಡಂಬಡಿಕೆ ಅಂದ್‌ದ್ ಪನ್ಪಿನೆಟ್ ದುಂಬುದೆನ್ ಪರತ್ ಅಂದ್‌ದ್ ಮಲ್ತೆ. ಆಂಡ ಪರತಾವೊಂದಿತ್ತ್‌ದ್ ಪರತಾಯಿನೆಕ್ಕ್ ಅಂತ್ಯಲಾ ಉಂಡು. |
New Life Literature