ಇಬ್ರಿಯೆರೆಗ್ 7 - ಪೊಸ ಒಡಂಬಡಿಕೆ

ಮೆಲ್ಕೀಜೆದೇಕೆ ಪನ್ಪಿ ಯಾಜಕೆ

¹ ಈ ಮೆಲ್ಕೀಜೆದೇಕ್ ಸಾಲೇಮ್ ಊರುದ ಅರಸುಲಾ ಪರಾತ್ಪರ ದೇವೆರೆನ ಯಾಜಕೆಲಾ ಆದಿತ್ತೆ. ಅಬ್ರಹಾಮು ಅರಸರೆನ್ ಸೋಪಾದ್ ಪಿರ ಬನ್ನಗ, ಮೆಲ್ಕೀಜೆದೇಕ್ ಆಯಗ್ ತಿಕ್ಕಿಯೆ, ಬೊಕ್ಕ ಆಯನ್ ಆಶೀರ್ವಾದ ಮಲ್ತೆ.

² ಅಪಗ ಅಬ್ರಹಾಮು ತಾನ್ ಲಡಾಯಿಡ್ ಗೆಂದಿನ ಮಾತೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಮೆಲ್ಕೀಜೆದೇಕ್‌ಗ್ ಕೊರಿಯೆ. ಮೆಲ್ಕೀಜೆದೇಕ್ ಇನ್ಪಿನೆತ್ತ ಅರ್ಥ, “ನೀತಿದ ಅರಸು.” ಬೊಕ್ಕ ಸಾಲೇಮುದ ರಾಜೆ ಪನ್ನಗ, “ಸಮಾಧಾನದ ಅರಸು,” ಅಂದ್‌ದ್ ಅರ್ಥ.

³ ಮೆಲ್ಕೀಜೆದೇಕ್‌ನ ಅಪ್ಪೆ, ಅಮ್ಮೆ ಬೊಕ್ಕ ಆಯನ ಪೂರ್ವಜೆರ್ ಏರ್ ಅಂದ್‌ದ್ ವಾ ಸಂಗತಿಲಾ ಗೊತ್ತುಜ್ಜಿ. ಜನ್ಮದ ಪ್ರಾರಂಭಲಾ ಆಯುಷ್ಯದ ಅಂತ್ಯಲಾ ಇಜ್ಜಿ. ಆಯೆ ದೇವೆರೆ ಮಗೆ ಆದುಪ್ಪು ಯೇಸುಗು ಸಮ ಆದುಲ್ಲೆ. ಆಯೆ ಏಪೊಗ್ಲಾ ಯಾಜಕೆ ಆದುಲ್ಲೆ.

⁴ ಈ ಮೆಲ್ಕೀಸೆದೇಕ್ ಏತ್ ಮಲ್ಲಾಯೆ ಅಂದ್‌ದ್ ಆಲೋಚನೆ ಮಲ್ಪುಲೆ. ಇಸ್ರಾಯೇಲ್ಯೆರೆ ಮೂಲ ಅಮ್ಮೆ ಆದಿತ್ತಿನ ಅಬ್ರಹಾಮುಲಾ ಉಂದೆನ್ ತೆರಿಯೊಂದು ತಾನ್ ಲಡಾಯಿಡ್ ಗೆಂದಿನ ಮಾತೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಆಯಗ್ ಕೊರಿಯೆ.

⁵ ಅಬ್ರಹಾಮುಡ್ದು ಪುಟ್ಟಿ ಲೇವಿ ಸಂತಾನದಾಕುಲು ಯಾಜಕ ಕೆಲಸೊಗು ನೇಮಕ ಆದಿತ್ತ್‌ದ್ ಜನೊಕುಲೆಡ್ದ್ ಪಂಡ್ಂಡ ತನ್ಕುಲೆ ಸಹೋದ್ರೆರೆಡ್ದ್ ಪತ್ತೆಟ್ಟ್ ಒಂಜಿ ಪಾಲ್ ಕಾಣಿಕೆ ದೆತ್ತೊನೊಡು ಅಂದ್‌ದ್ ನ್ಯಾಯಕಟ್ಟ್‌ಡ್ ಅಪ್ಪಣೆ ಉಂಡು.

⁶ ಆಂಡ ಮೆಲ್ಕೀಜೆದೇಕ್ ಲೇವಿನ ವಂಶೊಗು ಸೇರ್ದಿನಾಯೆ ಅತ್ತ್, ಆಂಡಲಾ ಅಬ್ರಹಾಮುಡ್ದು ಪತ್ತೆಟ್ಟ್ ಒಂಜಿ ಪಾಲ್‌ನ್ ದೆತ್ತೊಂಡೆ. ಬೊಕ್ಕ ದೇವೆರೆ ವಾಗ್ದಾನೊಗು ಸರಿಯಾದ್ ಅಬ್ರಹಾಮುನು ಮೆಲ್ಕೀಸೆದೇಕ್ ಆಶೀರ್ವಾದ ಮಲ್ತೆ.

⁷ ಆಶೀರ್ವಾದ ಕೊರ್ಪಿನಾಯೆ ಕಂಡಿತಾದ್‌ಲಾ ಆಶೀರ್ವಾದ ದೆತ್ತೊನುನಾಯಡ್ದ್ ಮಲ್ಲಾಯೆ. ಉಂದೆಟ್ಟ್ ದಾಲಾ ಬೇತೆ ಪಾತೆರ ಇಜ್ಜಿ.

⁸ ಉಂದತ್ತಂದೆ ಲೇವಿಯೆರೆ ಕ್ರಮೊನು ತೂಂಡ ಸೈಯೆರೆ ಇತ್ತಿ ನರಮಾನಿಲು ಪತ್ತೆಟ್ಟ್ ಒಂಜಿ ಭಾಗೊನು ದೆತ್ತೊನುವೆರ್, ಆಂಡ ಮೆಲ್ಕೀಜೆದೇಕ್‌ನ ಕ್ರಮೊನು ತೂಂಡ ನಿತ್ಯೊಗು ಉಪ್ಪುನಾಯೆ ಆದುಲ್ಲೆ ಅಂದ್‌ದ್ ಸಾಕ್ಷಿ ಪನ್ಪುಂಡು.

⁹ ಬೊಕ್ಕ ಕಾಣಿಕೆ ಸ್ವೀಕಾರ ಮಲ್ಪು ಲೇವಿ ಗೋತ್ರದ ಯಾಜಕೆರ್‌ಲಾ ಅಬ್ರಹಾಮುಡ್ದು ಮೆಲ್ಕೀಜೆದೇಕ್‌ಗ್ಲಾ ಕಾಣಿಕೆ ಕೊರಿ ಲೆಕ್ಕ ಆಂಡ್.

¹⁰ ಅಪಗ ಲೇವಿ ಪುಟ್ಟುದಿತ್ತಿಜೆಡಲಾ ಆಯೆ ಅಬ್ರಹಾಮುಡ್ದು ಬತ್ತಿನಾಯೆ ಆದಿತ್ತ್‌ದ್ ಮೆಲ್ಕೀಸೆದೇಕ್ ಅಬ್ರಹಾಮುಡ ಕಾಣಿಕೆ ದೆತ್ತೊನುನಗ ಅಬ್ರಹಾಮುನ ಶರೀರೊಡು ಲೇವಿಲಾ ಇತ್ತೆ ಅಂದ್‌ದ್ ಪನೊಲಿ.

¹¹ ನ್ಯಾಯಕಟ್ಟ್‌ದ ಕ್ರಮ ಪ್ರಕಾರ ಲೇವಿನ ಯಾಜಕತ್ವೊಡು ದೇವೆರ್ ಪರಿಪೂರ್ಣತೆನ್ ಪಡೆದಿತ್ತ್‌ಂಡ; ದೇವೆರ್ ಲೇವಿ, ಆರೋನೆರೆನ್ ಬುಡ್ದು ಮೆಲ್ಕೀಜೆದೇಕ್‌ನ ತರತ ಬೊಕ್ಕೊರಿ ಯಾಜಕೆ ಬರ್ಪಿನ ದಾನೆ ಅಗತ್ಯ ಇತ್ತ್ಂಡ್?

¹² ಬೊಕ್ಕ ಯಾಜಕ ಬೇಲೆ ಬದಲಾಂಡ, ನ್ಯಾಯಕಟ್ಟ್‌ಲಾ ಬದಲಾವೊಡು ಅಂದ್‌ದ್ ಅಗತ್ಯ ಉಂಡು.

¹³ ಮಿತ್ತ್ ಪಂತಿ ಪಾತೆರ ಏರೆನ ಸಂಗತಿಡ್ ಪನ್ತ್ಂಡಾ ಆಯೆ ಬೇತೆ ಒಂಜಿ ಗೋತ್ರೊಡು ಪುಟ್ಟಿನಾಯೆ. ಆ ಗೋತ್ರೊಡ್ದು ಒರಿಯಾಂಡಲಾ ಬಲಿಪೀಠದಲ್ಪ ಬೇಲೆ ಮಲ್ತಿನಾಕುಲು ಅತ್ತ್.

¹⁴ ನಮ ಕರ್ತವೆ ಯೂದನ ಗೋತ್ರೊಡ್ದು ಪುಟ್ಟಿನಾಯೆ ಲೇವಿನ ಗೋತ್ರೊಡ್ದು ಅತ್ತ್. ಬೊಕ್ಕ ಯೂದನ ಗೋತ್ರೊಡ್ದು ಯಾಜಕೆರ್ ಬರ್ಪೆರ್ ಅಂದ್‌ದ್ ಮೋಶೆ ಓಲುಲಾ ಪನ್ತ್‌ಜೆ.

ಮೆಲ್ಕೀಜೆದೇಕ್ ತರೊಟು ಕುಡೊರಿ ಯಾಜಕೆ

¹⁵ ಮೆಲ್ಕೀಜೆದೇಕ್ ತರೊಟು ಬೇತೆನೇ ಒರಿ ಯಾಜಕೆ ಬತ್ತಿನಪಗ, ಈ ವ್ಯತ್ಯಾಸ ನ್ಯಾಯಕಟ್ಟ್‌ಡ್ ಸ್ಪಷ್ಟಾದ್ ಗೋಚರ ಆಪುಂಡು.

¹⁶ ಯೇಸು ಶರೀರ ರೀತಿಡ್ ಲೇವಿ ಗೋತ್ರೊಗು ಸೇರ್ದ್ ಯಾಜಕೆ ಆಯಿನಿ ಅತ್ತ್; ಆಂಡ ನಾಶಾವಂದಿನ ಜೀವದ ಶಕ್ತಿಡ್ದೇ.

¹⁷ ದೇವೆರ್ ಯೇಸುಗು ಶಾಸ್ತ್ರೊಡು ಸಾಕ್ಷಿ ಪಂಡಿಲೆಕ್ಕ, “ಈ ಸದಾಕಾಲೊಗು ಮೆಲ್ಕೀಜೆದೇಕ್‌ನ ತರತ ಯಾಜಕೆ ಆದುಲ್ಲ.”

¹⁸ ಅಂದ್‌ದ್ ಯಾಜಕತ್ವದ ಅಪ್ಪಣೆಲು ಬಲದಾಂತಿನವುಲಾ ಕೆಲಸೊಗು ಬರಂದಿನವುಲಾ ಆದಿತ್ತಿನೆಡ್ದ್ ದೇವೆರ್ ಅವೆನ್ ದೆತ್ತ್ ಪಾಡೊಡಾಂಡ್.

¹⁹ ದಾಯೆಗಂದ್ಂಡ ಮೋಶೆನ ನ್ಯಾಯಕಟ್ಟ್ ಒವ್ವೆನ್ಲಾ ಪರಿಪೂರ್ಣ ಮಲ್ಪುಜಿ. ಆಂಡ ಇತ್ತೆ ದೇವೆರ್ ನಂಕ್ ನಿರೀಕ್ಷೆದ ಸಾದಿ ಮಲ್ತ್‌ದೆ. ಉಂದೆಡ್ದ್ ನಮ ಆಯ ಕೈತಲ್‌ ಬರ್ಪ.

ಯೇಸು ಎಡ್ಡೆ ಪ್ರಧಾನಯಾಜಕೆ

²⁰ ದೇವೆರ್ ಯೇಸುನು ಒಂಜಿ ಆಜ ದೀದ್ ನೇಮಕ ಮಲ್ತೆ. ಆರೋನನ ಗೋತ್ರದಾಕುಲು ಆಜದಾಂತೆ ಯಾಜಕೆರಾದ್ ನೇಮಕ ಆತೆರ್.

²¹ ಆಂಡ ಯೇಸುನ ಸಂಗತಿಡ್ ಒಂಜಿ ಆಜ ಉಂಡು. ದೇವೆರ್ ಆಯಗ್ ಪಂಡೆ, “‘ಈ ಸದಾಕಾಲೊಗು ಯಾಜಕೆ ಆದುಪ್ಪುವ,’ ಅಂದ್‌ದ್ ಕರ್ತವೆ ಇನ್ಪಿ ಯಾನ್ ಆಜ ದೀತೆ; ಬೊಕ್ಕ ಆಯೆ ಮನಸ್‌ಡ್ ಬದಲಾಪುಜೆ.”

²² ಈ ಆಜಡ್ದಾವರ ಯೇಸು ಎಡ್ಡೆಂತಿನ ಒಡಂಬಡಿಕೆನ್ ದೃಢ ಮಲ್ಪುನಾಯೆ ಆದುಲ್ಲೆ.

²³ ಲೇವಿಯೆರ್ ಶಾಶ್ವತ ಆದ್ ಬೇಲೆ ಮಲ್ಪೆರೆಗ್ ಮರಣ ಅಡ್ಡಿ ಆದುಪ್ಪುನೆಡ್ದ್ ಅಕ್ಲೆಡ್ ದಿಂಜ ಜನ ಯಾಜಕೆರಿತ್ತೆರ್.

²⁴ ಆಂಡ ಯೇಸು ಏಪೊಗ್ಲಾ ಉಪ್ಪುನೆಡ್ದ್ ಆಯನ ಯಾಜಕತ್ವಲಾ ಬೇತೆಕ್ಲೆಗ್ ಪೋಪುಜಿ.

²⁵ ಅಂಚಾಯಿನೆಡ್ದ್ ಆಯಡ್ದ್ ದೇವೆರೆ ಕೈತಲ್‌ ಬರ್ಪಿನಾಕುಲೆಗ್ ಏಪಲಾ ಪೂರ್ತಿ ರಕ್ಷಣೆ ಮಲ್ಪೆರೆ ಸಾದ್ಯ ಆಂಡ್. ಆಯೆ ಅಕ್ಲೆಗಾದ್ ಏಪಲಾ ದೇವೆರೆಡ ಮದ್ಯಸ್ತಿಕೆ ಮಲ್ಪೆರೆಗಾದ್ರ ಏನಿತ್ಯೇನಿಗ್ಲಾ ಬದುಕುವೆ.

²⁶ ಇಂಚಿತ್ತಿನಾಯೆನೇ ಎಂಕ್ಲೆಗ್ ಬೊಡಾಯಿ ಪ್ರಧಾನಯಾಜಕೆ. ಆಯೆ ಪರಿಶುದ್ಧೆಲಾ ದೋಷದಾಂತಿನಾಯೆಲಾ ಕಲೆದಾಂತಿನಾಯೆಲಾ ಪಾಪಿಲೆಡ್ದ್ ಪ್ರತ್ಯೇಕ ಇತ್ತಿನಾಯೆಲಾ ಆದಿತ್ತ್‌ದ್, ಪರಲೋಕೊಡು ಮೈಮೆದ ಸ್ಥಾನೊಡು ಉಪ್ಪುನಾಯೆ ಆದುಲ್ಲೆ.

²⁷ ದುಂಬತ್ತ ತನ್ಕುಲೆ ಪಾಪೊಗಾದ್ ಬೊಕ್ಕ ಜನೊಕುಲೆ ಪಾಪೊಗಾದ್ ಬಲಿ ಅರ್ಪಣೆ ಮಲ್ಪುನ ಲೇವಿಕ ಪ್ರಧಾನಯಾಜಕಲೆಕ್ಕ ಆಯೆ ಪ್ರತಿದಿನ ಬಲಿ ಕೊರೊಡು ಅಂದ್‌ದ್ ಅಗತ್ಯ ಇಜ್ಜಿ, ದಾಯೆಗಂದ್ಂಡ ಒಂಜೇ ಸರ್ತಿ ತನನ್ ತಾನೇ ಬಲಿ ಕೊರ್ದು ಆ ಕೆಲಸೊನು ಮಲ್ತ್ ಮುಗಿತೆ.

²⁸ ನ್ಯಾಯಕಟ್ಟ್ ಪ್ರಕಾರ ನೇಮಕ ಆತಿನ ಪ್ರಧಾನಯಾಜಕೆರ್‌ಲು ನರಮಾನಿಲೆಕ್ಕ ಬಲದಾಂತಿನಾಕುಲು ಆದಿತ್ತೆರ್. ಆಂಡ ನ್ಯಾಯಕಟ್ಟ್ ಕೊರಿನ ಮಸ್ತ್ ವರ್ಸದ ಬೊಕ್ಕ ದೇವೆರ್ ತನ ಮಗನ್ ಆಜ ದೀದ್ ಪರಿಪೂರ್ಣತೆಗಾದ್ ಏಪೊಗ್ಲಾ ಪ್ರಧಾನಯಾಜಕೆ ಆದ್ ನೇಮಕ ಮಲ್ತೆ.